Ayokh Jehoiadá

Jézabel a mbe a bele ngoan dzèñ a too éyôla naa Atalía. Atalía a mbe a bele mbimbia n’nem ane ñia. A mbe é minenga kéza ya Judá. Niène n’nôm a nga wu, ndôma dzèñ é nga tobe kéza. Éyong ndôma dzèñ é wuang, Atalía émièñ a nga ñong édjié ya tobe kéza ya Judá. A nga dzeng naa a mane vèè é bôr bese be mbe tobe bekéza évang dzèñ. Éde a nga dzô naa be mane wiñ é bôr besese be mbe tobe kéza, amben bendèñ bèñ. Amu dzam té, éde môr ase a mbe é ko ñe wong.

Fara n’nen Jehoiadá nge ki Joad ba ngal, Jehosaba, be mbe bé yem naa Atalía a mbe é bo é mam me ne édedaa abé. Vedaa, be nga shuale Jehoás nge ki Joas, é ndèñ Atalía, atoo naa abong té a ngene nkenghle moan, amben dzam té é mbe likh naa, be dzimle bining bieba. Be nga yale ñe a templo été.

Éyong Jehoás a nga dzale mimbu zangbwa, Jehoiadá a nga mane luè betebe ôsu bese ya fe Belevitas. Éde a nga dzô be naa : “Kaleghane mimbèñ mi ya templo, mi taa likh naa môr ézing a ñii.” Ane Jehoiadá, a nga tele Jehoás kéza ya Judá, ya tuè ñe ntôm édjiè nlô ayôp. Ayong ésese é nga yônane naa : “Ndjiè a ñinghe ayap !”

Éyong Atalía a nga wokh é nzogho bôr be nga bo, ane a nga ke ñii a templo été. Niène a nga yen nféféñ kéza a tele, ane a nga yônane naa : “Mi konghang ma ! Mi konghang ma !” Betebe ôsu be ya ayong be nga biñ mbimbia kéza minenga té, be kéñ ne atan, ya wiñ ñe. Ébe abuiñ mimbu, Atalía a mbe mbia éfônan akal ayong. Éde za dzam da ye lôr abong di ?

Jehoiadá a nga vole bôr be ya Judá naa be bera bo élat ya Jehôva, bé kiagh naa, ba ye kang fave ñe. Jehoiadá a nga sili be naa be mane dzighi betemplo Baal ya biyema. A nga bera fe sili befara ya Belevitas naa, be ke sèñ a templo Jehôva nfa ye naa, bôr be bera ñe ke kang wéñ. A nga dzô bebaghle mimbèñ naa be tugha daghe mimbèñ mi ya templo nfa ye naa, é bôr be ne mvîn be bo kaa ñii été. A kôre ye vèè, Jehoiadá babe betebe ôsu be nga ñinghle Jehoás é nda édjié ya tuè ñe éto bedjié ba tobe. Ayong ésese ya Judá é nga bele abuiñ mevakh. Amu a ke kuane naa be kôreyang bo é mo mbimbia Atalía ya fe évus ékang Baal, éde be mbe bera kang Jehôva a mvoa été ! Ye wa yen aval ayokh Jehoiadá é nga vole abuiñ bôr ?