Édjié da ye tobe mbembèè

Alu ézing, kéza Nabucodonosor a nga yen biyeyem bi mbe aval ézing. A nga bira yep ya é dzam a nga yen biyeyem aval é nga naa éé mbe ki fe ke ôyô. Éde, a nga luè mingengang mièñ é dzô be naa : “Kareghane ma biyeyem me va yen.” Be nga dzô ñe naa : “Kareghe bia biyeyem buè, a kéza.” Ve, Nabucodonosor a nga dzô be naa : “Kaa ! Dzôghane ma é dzam me va yen biyeyem, nge mina kaa me da dzô, ma ye mina wiñ”. Be nga bera ñe dzô naa : “Dzôghe bia é dzam ô va yen, éyong té bia ye wa kar ayilgha é bele”. Ane a nga yalane be naa : “Mia dzeng naa mi dukh ma. Dzôghane ma é dzam me va yen biyeyem !” Éde, baa be nga dzô kéza naa : “Môr ézing éé se ki é si naa, a ne bo é dzam wa dzaa di. Dzam té déé se ki boban.”

Nabucodonosor a nga bira yèè, éde a nga lôm naa be mane wiñ beyem-mam be ya é si dzèñ. Be mbe fe naa ba ye wiñ Daniel, Sadrac, Mesac, ya Abednego. Ve, Daniel a nga dzaa kéza tam. Éyong té, éde éñe, ya memvuiñ mèñ, be nga yaghlane Jehôva naa a vole be. Za dzam Jehôva a nga bo ?

Jehôva a nga lere Daniel biyeyem Nabucodonosor ngalane melere, a nga dzô fe ñe ayilgha é bele. Niène kiri é nga lene, Daniel a nga ke kobe ya mbo-ésèñ kéza. Éde a nga dzô ñe naa : “Mi taa wiñ n’yem-mam ézing. Me ne kane kéza biyeyem bièñ.” Mbo-ésèñ a nga ke ya Daniel naa a ke yen Nabucodonosor. Daniel a nga dzô kéza naa : “Nzame a ve lere wa é dzam da ye boban ôsu. Biyeyem buè, é bi : Ô va yen môra éyema, édi é mba é bele nlô kông, nkukh, ya meban me miang, abum ya mebèñ me cobre nge ki cuivre, mebo bikièñ, ya mebo ôsi, me ne nfulan ya ékièñ ya mboargha. Éyong té akoa é va so nkôô, é va bimi fe mebo éyema té ya ngu’u. Éyema é va bughu, ane é va mane lighi metso, nfongha ô nga mane fe ke a do. Akoa é nga venghane môra nkôô, éwi ô nga dzèñ si ése ngura.”

Éyong té, éde Daniel a nga dzô ñe naa : “Ayilgha biyeyem é di : Édjié duè éde é ne nlô kông, é ngap é ne miang a ne édjié da ye so, niène édjié duè da ye man. Cobre daa é ne fe édjié éfe, édi da ye so ôsu, da ye fe djié si ése ngura. Édjié da ye so ôsu vaa, da ye bo édedaa ngu’u ane ékièñ. Asughlan, édjié da ye tobe nkaban, édi da ye bele ngura nfa ô yeme ane ékièñ, nfa mboo, wa ye bo atakh ane mboargha. Akoa da venghane nkôô, é ne Édjié Nzame. Da ye mane tsam bidjié bise bivoo, da ye fe tobe mbembèè.”

Nabuconosor a nga kuru mebong asu Daniel a lui nlô ôsi. Éde, a nga dzô naa : “É Nzame wiè a va lere wa biyeyem. Nzame nfe éé se ki ane ñe.” Amben a mbe naa a wiñ Daniel, Nabucodonosor a nga vane ñe tele ane ndjié beyem-mam besese ya ngoman ye abeng si ya Babilonia. Ye ô va yen aval Jehôva a nga yalane meyaghlane Daniel ?