Béé dzi ki kur mebong asu éyema

Avitsang tam a kuane naa kéza Nabucodonosor a ndagha yen biyeyem éyema, a nga lôm naa be long mura éyema kông. Éde, a nga tele do é si é ne kaa minkôô, a Dura. Éde fe a nga kôane ôsu wèñ é bôr besese be mbe be bele bura minkông a si té, Sadrac, Mesac ya Abednego baa be mbe fe été. Kéza a nga lôm naa : “Éyong mia ye wokh édung metong, bearpas, ya begaitas nge ki becornemuse, mia yiane kur mebong ôsu éyema ! É môr ase a ye da bo kaa bo, a ye ñong akira naa ba wua ñe a dzii nduan été.” Wa bunu ya, ye Behebreos belal be mbe faa naa ba ye lughu éyema té, nge ki faa naa be nga ye lughu fave Jehôva ?

Éyong té éde kéza a nga lôm naa be bôm mezik. Bôr besese be nga kur mebong, be nga lughu fe éyema. Ve, Sadrac, Mesac ya Abednego béé nga lughu ki do. Bôr bézing be nga ñu de tang, éde be nga dzô kéza naa : “É Behebreos belal ba, baa lughu ki éyema duè.” Nabucodonosor a nga lôm naa be luè bitong bilal bite, éde a nga dzô be naa : “Ma ye mina bera ve tam nfa ye naa mi lughu éyema. Nge mina kaa da bo, ma ye mina wua a dzii nduan été. Nzame ézing éé se ki mina kôre ébe ma.” Éde be nga yalane ñe naa : “Biaa bera ki yi tam éfe. É Nzame wèè a ne bia kôre. Ve, amben aa bo ki do, a kéza, biaa ye ki lughu éyema duè.”

Nabucodonosor a nga bira wokh abé. Éde a nga dzô é bôr bèñ naa : “Bereghane bere dzii tang a biyong zangbwa, a lôr abim é wôla tare bo !” Éyong té, éde a nga lôm bezima bèñ naa : “Maneghane kakh é bôr ba, éyong té mina wua be été !” Dzii nduan é mbe édedaa ayông naa, bezima be nga wu éyong be nga yir bébéñ. Behebreos belal be nga ku a nduan été. Éyong té, Nabucodonosor a nga zu daghe a dzii nduan été, éde a nga yen naa bôr benii be mbe bé wulu a nduan été, se ki fe belal. Ane a nga sighan, éde a nga sili bevole bèñ naa : “Ye se ki bôr belal ébe bi va wua a nduan été ? Ma yen benii, mboo ye été a fônane fe angele !”

Nabucodonosor a nga tugha bera yir dzii nduan bébéñ, éde a nga yônane naa : “Kuighane atan, a bebo-bisèñ é Nzame a dang ôyap yôp !” Bôr besese be nga yaghan éyong be nga yen ane Sadrac, Mesac ya Abednego ba kuiñ a nduan été, ye naa, dzam ézing daa dzi ki ba bo. A bo ékôp deba, ésii deba, nge ki bitôp bieba, dzôm ézing ye be mbe be bele déé dzi ki dzikh. Amben éñum ôtsira wéé mbe ki bo ô ñuu.

Nabucodonosor a nga dzô naa : “É Nzame Sadrac, Mesac ya Abednego a ne n’nen. A va lôm angele wèñ naa a zu ba kôre, nzame nfe éé se ki ane é Nzame wôba.”

Behebreos belal, be mbe nkoghane naa ba tobe sôsôe ya Jehôva kaa bis é dzam é mbe lôt, ye waa, wa kômô fe bo sôsôe ane ébo ?