Yésu a wulu mendzim ayôp

Yésu a nga bele ngu’u ya lerre minkôkoan ya wôme bewu. A mbe fe djié nfungha ya mveng. Niène a nga mane yaghlane nkôô ayôp, Yésu a nga yen naa ôkôs ô mbe wé bam é môra ôshuiñ ba luè naa mang me ya Galilée. Mintôô mièñ mi mbe a tsimi wôba été, ye naa, é mbe be ndzukh naa be wulu tsimi étom nfungha. Yésu a nga sighle nkôô, ane a nga sum wulu mendzim ayô naa a ke étun tsimi a mbe. Éyong mintôô mi nga yen naa môr a wulu mendzim ayôp, wong ô nga biñ be. Ve Yésu a nga dzô be naa : “A ne ma. Mina taa ko wong.”

Éde Pedro nge ki Pierre a dzô ñe naa : “A Nti, nge wa faa alé, lighe me naa me zu ébe wa.” Yésu a yalane Pierre naa : “Zakh.” Éde Pierre a nga kôrô a tsimi été ézizang ôkôs, ye sum naa a wulu mendzim ayôp naa a ke ébe Yésu. Éyong a mbe éé yir Yésu bébéñ, Pierre a nga bem mis ébe ôkôs, ane a nga ko wong. A nga wôrane naa a ñii mendzim ôsi. Pierre a nga yônane naa : “A Nti, kôreghe ma !” Yésu a nga same ñe wo, ve biñ ñe ye dzô ñe naa : “Amu dzé ô va sum bele bisô ? Mebun muè me ne vé ?”

Yésu ba Pierre be nga dang a tsimi été, ane ôkôs ô nga sim, étéñ té ébièñ. Tamane siman é dzam mintôô mi nga wôran ? Be nga dzô Yésu naa : « Ô ne faa é Moan Nzame. »

Éé mbe ki éyong ôsua Yésu a nga bo aval akengha té. Éyong éfe, Yésu ya mintôô mièñ be nga ke a tsimi été ôshuiñ ayat. Éyong be nga kîghane ôshuiñ, Yésu a nga ke ôyo a tsimi a mvus. Ane mbimbia ôkôs ô nga sum. Minkumle mi mang mi nga yinebe tsimi, mendzim me nga ñii été. Ane mintôô mi nga véé Yésu béé yônane naa : “A N’yeghle, bi nga zuang wu ! Voleghe bia !” Yésu a nga tebe ye dzô mang naa : « Siighe évôô ! » Été té ébièñ, nfungha ô nga sim, ye naa, mang me nga bo mvoa. Yésu a nga sili mintôô mièñ naa : “Mebun menan me ne vé ?” Be nga dzôane bevoo ya éba bevoo naa : « Ambene nfungha ya mang ba bo ñe mewokh. » Mintôô mi nga yeghe naa, nge be nga ve mebun meba mese ébe Yésu, déé mbe ki éban naa be ko dzôm ézing wong.