Yésu a ve betoyini be-bôr bidzi

Kaa naa fet Pascua nge ki Pâque y mbu 32 ye melu mèè, mintôô mia so ékena minkanghle. Aval ane be nga so mvoaran, Yésu a nga ke ya be a tsimi été, nfa Betsaida naa be ke wèèghan. Ve niène tsimi a nga yir bébéñ kineghe, Yésu a nga yen naa betoyini be-bôr ba yane be a kineghe. Afiang bo naa a nga kômô tobe étam ya mintôô mièñ, a nga lere bôr beté mbemba fulu. A nga lerre minkôkoan mise be nga so mio ya yeghle be. Ébe ngura nté môs, Yésu a nga ke ôsu naa a kobe be, mam me ya Édjié Nzame. Niène alu é nga ku, mintôô mièñ mi nga zu ñe dzô naa : “É bôr ba, be nga yièneyang wokh zèñ. Dzôghe be naa be ke sôm ôyôm dzôm ya dzi.”

Éde Yésu a nga yalane be naa : “Déé se ki éban naa be ke. Mina bebièn vaane be dzô ya dzi e va.” Mintôô mi nga sili ñe naa : “Ye wa kômô naa bi ke sôm minfem akal deba ?” Felipe nge ki Philippe, môr mboo ye mintôô, a nga dzô naa : “Ambene bi mbaa bi bele abuiñ mono, bii mbe ki mane sôm abim minfem mi ne kokh môr asese.”

Yésu a sili be naa : “Bi bele za dzôm naa bi ne dzi ?” Éde Andrés a nga yalane ñe naa : “Bi bele mitan ya ayôm bekoas bebèñ. Da yene avitsang !” Ane Yésu a nga dzô be naa : “Zaane ma minfem ye bekoas beté.” Ane a nga dzô bôr naa be tobe si ôbut été, béé tobe minsama mi-bôr mi bele bôr 50 ya minsama mi-bôr mi bele bôr 100. Yésu a nga ñong minfem ya bekoas, a daghe a dzôp été, ya yaghlan. A kôre ye vèè, ane a nga kee mintôô bidzi naa be ve môr ase. Befam be mbe 5 000, kaa lang binenga ya boan. Bese be nga dzi yakekuiñ be nga dzèñ. Ane mintôô mi nga mane wôlô bidzi bi nga bughu naa bi taa wu ntukh. Be nga dzale minkuéñ 12 ! Ye waa yen naa, akengha té é mbe faa aval dzam bôr baa be ki yen, nga ?

Niène bôr be nga yen môra dzam té, étéñ té ébiéñ, be nga dzeng naa Yésu a tobe é kéza wôba. Vedaa, Yésu a nga yem mbeng-mbeng naa, se ki tam té éde Jehôva a nga ye ñe tué kéza. Éde a nga dzô bôr naa, be mane bulane menda meba, ya dzô mintôô mièñ naa be ke nfa mboo ye mang me ya Galilea. Ane mintôô mi nga dang a tsimi wôba été, ya naa, Yésu a nga ke étam nkôô ayôp. Amu dzé ? Amu a nga kômô bele tam ya yaghlane Ésaa. Afiang bo naa a nga bele abuiñ mam ya bo, Yésu a mbe é ñong tam naa a yaghlan.