Beyeghe ba ñong nfufup nsisim Nzame

Melu awôm a kuène naa Yésu a bulaneyang a dzôp été, éde beyeghe bèñ be nga ñong nfufup nsisim Nzame. A mbe a Pentecostés ye mbu 33, ya naa, abuiñ bôr be nga so mesi mesi, naa ba zu tobe fet té, a Jerusalén. Beyeghe Yésu bébéñ 120 be nga sulan édzina é mbe a nda yôp. A tem-tem, môra dzam ézing é nga boban. Dzôm ézing é too ane nkaba nduan, é nga yeneban nlô kada n’yeghe asese, éde be nga sum kobe abuiñ minkobe. Môra édung dé fônane nfungha ô ne ngu’u ô nga dzèñ a nda été.

Beyeng be nga so a Jerusalén, be nga wokh édung té, éde be nga ke mbii a nda té, naa be ke yen é dzam é nga lôr wéñ. Be nga bira kam éyong be nga wokh beyeghe ba kobe minkobe mité. Éde be nga dzô naa : “Ke bi tèè naa a ne bôr be ya Galilea. Ve dzé da ve naa be kobe minkobe miè ?”

Pedro nge ki Pierre ya mintôô mivoo be nga tebe nsama bôr té ôsu. Pedro a nga dzô bôr beté aval be nga wiñ Yésu, ye naa Jehôva a nga wômô ñe. Pedro a nga dzô naa : “Abong di, Yésu a ntoo a dzôp été, a too é wo meyôm Ésaa, ya naa, a lômang nfufup nsisim a nga kiagh. Akal té éde mia wokh ye yen menkengha ma.”

É mam Pedro a nga dzô, me nga bira name bôr, éde be nga sili ñe naa : « Za dzam bia yiène bo ? » A nga dzô be naa : “Dzôbeghane minsem mienan ya duban ébe éyôla Yésu. Éyong té mia fe mia ye ñong é das é ne nfufup nsisim Nzame.” Môs té mboo-mboo, bôr tang 3 000 be nga duban. Atéé ye éyong té, é nomo beyeghe é nga bira vem avôô a Jerusalén. Ye avole nfufup nsisim Nzame, mintôô mi nga tele abuiñ bikôan aval é nga ve naa, be mbe yeghle beyeghe é mam mesese Yésu a nga dzô be naa be bo.