AYEGHLE 16
ZA 64 Bia sap ya n’nem mevakh
Aval bi ne koghle mevakh mèè ésèñ minkanghle
« Sèhane Jehôva ya mevakh » (BYA 100:2).
É DZAM BIA YE YEN
Ayeghle di été bia ye yen é mam bi ne bo naa bi koghle mevakh mèè ésèñ minkanghle.
1. Za dzam bôr bézing ba wôran, éyong ba simane naa ba yiène kobe ya bôr minkanghle ? (A daghe fe évaghle).
BIA bebo bisèñ Jehôva, bia kanghle é bôr bevoo amu naa bia dzing Ésaa wèè a ne a dzôp, ye naa, bia kômô vole é bôr bevoo naa be yem ñe. Abuiñ bekare fuèñ ba yen ña mesan ésèñ minkanghle ba bo. Ve, ébe é bôr bevoo, é ne be ndzukh naa be bele mesan meté. Amu dzé ? Bevoo bézing ba wokh ôsoan ye simane naa be se ki mbemba beyeghle. Éba bevoo baa dzing ki ba ke éza menda, kaa naa be va bane be. Bevoo be ne ko wong naa be tsirane be. Éba bevoo ki be nga yeghe a mare mintsiè y’é bôr bevoo. Amben ba bira dzing Jehôva déé se ki ébubu akal bobedzang ye bekal bèè beté naa bekanghle bemba fuèñ éb’é bôr be ne kaa yem. Amben nèè, ba yen éban ésèñ té é bele, éde da likh naa be kanghle mban. Jehôva a ne édedèè mesan ya be !
Ye wa dzing ésèñ minkanghle ? (A daghe abong 1)
2. Ng’é ne wô ndzukh naa ô bele mevakh ésèñ minkanghle, amu dzé waa yiène ki sili mo ôsi ?
2 Ye biyong bizing é ne wô ndzukh naa ô bele mevakh ésèñ minkanghle amu wa wôran aval té ? Ng’éñe é ne nèè, ô taa sili mo ôsi. É wong wa wôran alé, da yili naa ô ne asili ñu, waa kômô ki naa wa be dang daghe, da lere fe naa waa kômô ki bele mintsiè ya bôt. Môt ézing ñ’aa kômô ki naa be tsirane ñe dang dang éyong a kômô vole é bôt bevoo. Èsaa wiè a ne a dzôp été, a tugha yem mindzukh wa tubane mio, ye naa, a kômô fe wô ve avole wa yiène de (Esaïe 41:13). Ayeghle di été, bia ye yen mam metan me ne wô vole a dang aval mesimane meté, ye yen aval bi ne koghle mevakh mèè ésèñ minkanghle.
LIGHE NAA ÉFIÈ NZAME É VE WÔ NGU’U
3. Dzé é nga vole nkulu medzô Jérémie naa a kanghle é bôr bevoo ?
3 Amben melu mvus Nkobe Nzame ô nga ve bebo bisèñ bèñ ngu’u éyong be nga ve be ayem ézing éé mbe ndzukh. N’tamane ñong éfônane nkule medzô Jérémie. A mbe a bele meyep a n’nem éyong Jehôva a nga lôm ñe naa a ke kanghle. Jérémie a nga dzô naa : « Maa yem ki kobe, amu me ngene mong » (Jér. 1:6). Aval avé a nga dang meyep a mbe a bele alé ? A nga ñong é ngu’u dzèñ bifiè Jehôva a nga kobe ñe. A nga dzô naa : « A mbe ane nkaba nduan wa yông ma bives été, éde méé mbe ki fe dzip añu » (Jér. 20:8, 9). Amben Jérémie a nga kanghle abeng minkanghle é mbe ndzukh, é fuèñ be nga kee ñe naa a kanghle é nga ve ñe é ngu’u a nga yi naa a bo ésèñ té.
4. Dzé da boban éyong bia lang Éfiè Nzame ye binane de ? (Becolossien 1:9, 10)
4 Bekristen ba ñong é ngu’u dzaba ébe é fuèñ da so a Bible été. É kalare ézing a nga tsili ékôan ya Colosas nge ki Colosses, ntôl Pablo nge Paul a nga dzô naa, a tugha yem nkômane Jéhovah, da ye vole bobeñang naa, « be wule aval da yiène é mis Jehôva » nge ba tsini naa « ba wume mbemba bibuma minfa mise » (A lang Becolossien 1:9, 10). Mbemba ésèñ da daghe fe é mbemba fuèñ bia kanghle. Éde éyong bia lang Nkobe Nzame ye binane wô, mebun mèè ébe Jehôva ma tugha bo ngu’u ye tugha wokh éban é ne naa bi kanghle mbemba fuèñ ye Édjiè Nzame.
5. Aval avé bi ne tugha buane nlanghane ye ayeghe Bible daa ?
5 Naa bi dang yem a buane ayeghe Bible dèè, biaa yiène ki ke mbii éyong bia lang, a yeghe, nge ki a binan. Ñonghe tam. Ng’ô kuan éfus ya Bible ô ne kaa tugha yem a wokh, ô taa de dang ayô. Beleghane Guía de studio para los testigos de Jehová, ya Índice de las publicaciones Watch Tower nge ki Guide de recherches pour les Témoins de Jéhovah ye Index des publications Watch Tower naa ô bele ayilgha ye éfus té. Ng’ô ñonghe é tam duè naa wa yeghe aval da yiène, wa ye wône mebun muè naa Nkobe Nzame ô ne bebela (1 Beth. 5:21). Nge mebun muè me ne ngu’u aval té, da ye wô ve mesan naa ô kômô kap é bôr bevoo é mam ô va yeghe.
TUGHA KÔMAN AKAL ÉSÈÑ MINKANGHLE
6. Amu dzé bia yiène tugha kôman akal minkanghle ?
6 Ng’ô tugha kôman akal minkanghle, waa ye ki dang yep a n’nem éyong wa ye kobe ya bôr. Yésu a nga vole beyeghe bèñ naa be yem kôman kaa naa a lôm be ésèñ minkanghle (Luc 10:1-11). Amu be nga dzale é mam Yésu a nga yeghle be, é nga ve be naa be bo abuiñ mbemba bemam minkanghle, ane dzam té é nga likh be naa be tobe édedèè mesan (Luc 10:17).
7. Aval avé bi ne tugha kôman akal minkanghle ? (A daghe fe évaghle).
7 Aval avé bi ne yem kôman akal minkanghle ? Bia yiène tare tem é dzam bia kômô dzô, éyong té bia dzô de aval bia kobe ye bifiè biè. É ne fe éban naa, bi tare tem meval mebèñ nge ki melal, bôr be ne ñong nlang wèè abeng minkanghle daa, ye baghle ôtemgha aval bia ye yalane be. Akôre ye vèè, éyong bi yirang be bebéñ bi ne kobe a be a mvoa été, a bo nsaza, ye lere mbemba fulu.
Tugha kômane akal minkanghle (A daghe abong 7)
8. Nfa mbé bekristen ntôl Pablo nge ki Paul a nga kobe a be, ba fônane mendakh m’ékuan ?
8 Ntôl Pablo nge ki Paul a nga dzô bobeñang ye bekal bèñ naa : « Bi bele ntam wi, mendekh m’ékuan été » (2 Becor. 4:7). Ntam té ô ne dzé ? A ne ésèñ minkanghle dèè da kôre bôr, é tsii é mbemba fuèñ ye Édjié Nzame bia kanghle (2 Becor. 4:1). Mendekh m’ékuan maa me ne dzé ? Me ne bebo bisèñ Jehôva ba ke ba kanghle é bôr bevoo mbemba fuèñ té. Metam Pablo nge ki Paul, bebo ôkira be nga bo béé belane mendekh m’ékuan naa ba leran é biôm bi ne tang nden ane bidzi, vino ye mono. Aval dèè fe, Jehôva a va ve biè môra maa, naa bi kanghle mbemba fuèñ yʼÉdjié dèñ. Y’avole Jehôva bi ne bele é ngu’u da yiène naa bi kanghle ya sôsôe, mbemba fuèñ té.
A YAGHLANE NAA Ô BO AYOKH
9. Aval avé bi ne bo kaa bera ko bôr wong minkanghle nge ki a ko wong naa be tsirane bia ? (A daghe fe évaghle).
9 Biyong bizing bi ne ko bôr wong nge ki a ko wong naa be tsirane bia. Aval avé bi ne dang wong té ? N’taman yen meyaghlan mintôl mi nga bo éyong be nga kîlî be naa be taa bera kanghle. Ndaane naa ba ko wong, be nga dzaa Jehôva naa a vole be « naa be tsini naa ba kanghle Éfiè [dèñ] y’ayông ésese. » Ane Jehôva a nga yalane meyaghlan meba étéñ té ébién (Bisè mintôl 4:18, 29, 31). Nge bia bo bii ko bôr wong metam mézing, bia yiène yaghlane Jehôva naa a vole bia. Dzaghe Jehôva naa édzing ô bele akal bôt, é vole wa a dang é wong wa wôran akal moan môt.
Yaghlane naa ô bo ayokh (A daghe abong 9)
10. Aval avé Jehôva a vole bia naa bi kanghle é fuèñ dzèñ ? (Esaïe 43:10-12)
10 Jehôva a va top biè ane Bengañiè bèñ, éde fe a kiagh bia naa a ye bia vole naa bi bo ayokh (A lang Esaïe 43:10-12). N’yenane fave meval menii a bo de. Ôsusua, Yésu a ne ye bia é tam ésese bia kanghle mbemba fuèñ (Mat. 28:18-20). Édi bèè, Jehôva a nga ve bia avole bangele (Mel. 14:6). Édi lal, Jehôva a nga ve biè nsisim ékî wèñ, naa ô vole bia a siman é mam bi nga yeghe (Jean 14:25, 26). Édi nii, Jehôva a ve bia bobedzang ye bekal bèè naa, be kanghle ya bia. Y’avole Jehôva y’édi mindzidzing bobedzang ye bekal bèè, bi bele é dzôm ésese bia yi naa bi bo ayokh ye tsini ésèñ minkanghle dèè.
TEBEGHE ÉTÉÑ É BÔR BEVOO, YE BELE MBEMBA MESIMAN
11. Éyong mi ne minkanghle, za dzam mi ne bo naa mi tuban abuiñ bôt ? (A daghe fe évaghle).
11 Éyong waa kuane ki bôr menda meba minkanghle, ye da ve wô naa ô kômô sili mo ôsi ? Amu dzé waa sili ki wamièn naa : ‘Vôm mbé bôr be y’abeng minkanghle dam be ne tobe éndagha ?’ (Bisè mintôl 16:13) ‘Ye be ne bisèñ nge ki a makit ?’ Ng’éñe é ne nèè, ye mi ne kuane abuiñ bôt nge mi bo minkanghle bisala ? Moadzang ézing a too éyôla naa, Josué, a dzô naa, « Me nga bele abuiñ biyong naa ma kanghle éyong me nga ke ma wule é bura be makit ya mevôm bôr be ne abuiñ. » Éñe ye ngal, Brigitte, be nga kuane fe abuiñ bôr menda meba, éyong be mbe béé ke kanghle ngoghe asese ye fe é môs sono ngoghe asese (Beéph. 5:15, 16).
Tseneghe tam ye é vôm wa kanghle (A daghe abong 11)
12. Aval avé bi ne bo naa bi yem é mam bôr ba bunu nge ki é mam me tsii be a n’nem ?
12 Ng’éyong ôsua wa kobe ya môr, aa tugha ki wô bèè, dzenghe naa ô yem é mam a bunu, nge ki é mam me tsii ñe a n’nem. Josué ye Brigitte, ba belane nsili ô ne nlô-adzô ye nso afep naa be sum nlang. Éfônan, éyong ba belane nso afep Bible a ne faa dzé ?, ba dzô naa : « Bôr bézing ba tem naa, Bible a ne abakh da so ébe Nzame, é bôr bevoo kaa dang. Wa, wa simane ya ? » Dzam té é wôla ve naa, be sum nlang.
13. Amu dzé bi ne yen naa minkanghle miè mia yem wule, amben môr asese aa bèè ki bia ? (Minkana 27:11)
13 Amben bôr baa bèè ki bia éyong bia kanghle be, bebela a ne naa, bi va dzale nsonghane wèè. Amu dzé bia dzô de ? Amu naa, bi va bo é dzam Jehôva ba é Moan wèñ, ba yane naa bi bo ; bi va kanghle (Bisè mintôl 10:42). Amben éyong biaa yen ki é môr bi ne kobe ya ñe, nge ki éyong ba tep é fuèñ bia kanghle, bi ne bele mesan amu bia yem naa, bi va bo é dzam da ve Jehôva n’nem mbeng (A lang Minkana 27:11).
14. Amu dzé bi ne bele mesan éyong nkare fuèñ mboo a yen é môr a kômô tsini nlang ôsu abeng minkanghle ?
14 Bi ne fe bele mesan minkanghle éyong nkare fuèñ nfe a yen é môr a kômô tsini nlang ôsu abeng minkanghle. Ô momo a vaghan ésèñ daa té, ane éyong ba dzeng é mong a va dzimi. Abuiñ bôr ba dzeng ñe nsama abuiñ mevôm. Éyong be yenang ñe, môr asese a ne mesan, se fave é môr a va yen ñe. Aval daa fe, môr asese y’ékôan a bo é ngap dèñ nfa ya bo nféféñ n’yeghe Christ. Môr asese a ne éban naa, be mane kanghle fuèñ abeng minkanghle ngura, ye naa, besese ba wôrane mevakh éyong nféféñ n’yeghe Bible té a sum naa a zu bisulan.
A BEMBE ÉBE ÉDZING DÈÈ AKAL JEHÔVA Y’AKAL É BÔR BEVOO
15. Aval avé a dzale nten Matthieu 22:37-39 é ne bia vole a koghle nsaza waa ésèñ minkanghle ? (A daghe fe évaghle ).
15 Bi ne koghle nsaza waa ésèñ minkanghle été, éyong bia bembe ébe édzing bi bele akal Jehôva ye akal é bôr bevoo (A lang Matthieu 22:37-39). Tame siman abim mesan Jehôva a wôran, éyong a yen bia bo ésèñ dèñ, ye nté mbé bôr ba ye bo mesan éyong ba ye sum ayeghe Bible ! Simghane fe naa, é bôr ba bèè fuèñ té, ye ñong nkighane naa ba sèhane Jehôva, be ne ning mbèmbèè (Jean 6:40 ; 1 Tim. 4:16).
Éyong bia bembe ébe édzing dèè akal Jehôva, ye akal é bôr bevoo, bia ye veme mevakh mèè ésèñ minkanghle (A daghe abong 15)
16. Aval avé bi ne yen mevakh ésèñ minkanghle dèè éyong bi fere menda maa été ? Vakh bifônan.
16 Ye dzam ézing da ve wô naa, ô fereban a nda duè été ? Ng’éñe ne naa, bembe ébe é dzam ô ne bo naa ô lere édzing duè akal Jehôva y’akal é bôr bevoo. Éyong ôkoan COVID-19 ô mbe, Samuel ba Dania, be mbe be fere a nda dzeba été. Nté sese be nga lôre mbia tam té, be nga bo béé kanghle mban, béé belane telefóno, a tsili be kalara ye bo fe meyeghe Bible ngalane videoconferencia ba lué naa Zoom. Samuel a mbe é kanghle é bôr a mbe éé tôbane be, é nda biang a mbe é ke sèbane akal cáncer. A dzô naa : « Éyong bia lôt metam me ne mindzukh, bi ne bele meyep a n’nem ye wôrane mvoaran a nsôn ya nsisim. Bia yiène dzeng naa bi bele mevakh ésèñ bia bo akal Jehôva. » Nté be mbe mindzukh mité été, Dania a nga ku mbekh an’é nga likh ñe naa, a dzogbe énong tang mengoan melal. A kôre ye vaa, a nga yiène bera tobe mengoan mesaman éto mimbômbokh été. A dzô naa : « Me nga dzeng naa me bo é dzam ésese étéñ dam é nga likh me naa me bo. Me nga kanghle dokira minenga ézing a nga zu me daghe, ye kanghle fe é bôr be mbe béé zu likh biôm a nda. Me nga lèè fe édedèè mbemba minlang ye minenga mboo ézing a mbe éé sèñ mbanegha wa kuane bivol bi y’a nda biang. » Étéñ Samuel ye Dania be mbe be tele, é nga likh be naa, be taa kanghle aval be mbe béé kômô de bo. Ve, be nga bo abim étéñ deba é nga likh be naa be bo, ye yen mevakh été.
17. Aval avé mi ne tugha yeme buane melepgha me va kuiñ ayeghle di été ?
17 Melepgha metan bi va yen ayeghle di été, ma wule mbeng éyong bia dzale me nsama. Kada alepgha y’été, é ne ane é biôm bia belane bie naa bi yam mbemba bidzi. Éyong bia belane biôm bité bisese, ye fulane bie, bidzi bité bia kuiñ ña zam. Éyong bia dzale melepgha meté mesese, bia ye tobe mbemba nkômane naa bi dang mbimbia mesiman, ye koghle mevakh maa ésèñ minkanghle.
AVAL AVÉ É MAM MA ZU MA, MA VOLE WA A DZING MINKANGHLE ?
A ñong tam naa ô tugha kôman
A yaghlane naa ô bo ayokh
A bembe ébe édzing duè akal Jehôva y’akal é bôr bevoo
ZA 80 « Kiaghe, ô yen naa Jehôva a ne mvèñ »