AYEGHLE 28
ZA 123 Bia sukh Édjié Jehôva asi
Ye ô ne yem a bo nkane ézizang bebela ya minaa ?
« Tebeghane naa bip [. . .] ye kana ye bebela a tsini mina a ngerenge » (BEÉPH. 6:14).
É DZAM BIA YE YEN
Aval bi ne yeghle bia bebièn naa bi yem bo nkane ézizang é bebela bi nga yeghe ébe Jehôva, ye minaa Satan ye é bôr ba sukh ñe asi ba ngône.
1. Za dzam wa wôrane nfa bebela ?
AYONG Jehôva da dzing é bebela bia yen Nkobe Nzame été. Éñe mebun maa me tsii été (Bero. 10:17). Dzam té, é va tsini bia a bunu naa, Jehôva a va tele Ékôan bekristen ane « nkum, ye é dzôm da sukh bebela » (1 Tim. 3:15). Ya mevakh, bia yebe édjié « é bôr be tele ôsu » ézizang dèè, éyong ba ve bia ayilgha ye é bebela a ne a Bible été, ye lere bia abo-dulu da wule nsama ye nkômane Nzame (Behéb. 13:17).
2. Aval ane bia lang de nten Jacques 5:19, za dzam é ne biane bia éyong bi yegheyang bebela ?
2 Ve, niène bi yebeyang bebela, ye naa, bia yiène béé é mbemba melepgha Ékôan Nzame da ve bia, é ne bera kuiñ naa be dukh bia (A lang Jacques 5:19). Ye n’nem ôsese, Satan a kômô naa, bi dzimle mebun bi bele ébe Bible, nge ki ébe melepgha Ékôan Nzame da ve bia (Beéph. 4:14).
3. Amu dzé bia yiène bembe ébe bebela ? (Beéphésien 6:13, 14)
3 A lang Beéphésien 6:13, 14. Ébe avitsang tam, Debela a ye belan é fuèñ é ne ngu’u naa a dukh meyong mesese nfa ye naa, be tebe Jehôva é ngam ayat (Mel. 16:13, 14). Bi ne fe yane naa, Satan a ye veme mengu’u mesese mèñ naa a dukh bôr be ye ayong Jehôva (Mel. 12:9). Ya dzam té, é ne éban naa bi yeghle bia bebién, a yem bo nkane ézizang bebela ye minaa, ye fe naa, bi bo bebela mewokh (Bero. 6:17 ; 1 Pierre 1:22). Dzam té, éde da ye bia vole a ning bitsible binen !
4. Za dzam bia ye yeghe ayeghle di été ?
4 Ayeghle di été, bia ye yen mefulu mebèñ bia yi naa me vole bia a yem é bebela a so a Bible été, ye yebe melepgha Ékôan Nzame da ve bia. Éyong té, bia ye yen mefekh melal ma ye bia vole naa, bi tsini ôsu ya bembe a bebela été.
MEFULU BIA YI NFA YE NAA BI YEM BEBELA
5. Aval avé a ko Jehôva wong da vole bia naa bi yem bebela ?
5 A ko Jehôva wong. Éyong bia yeghe a ko Jehôva wong aval da yiène, bia bira ñe dzing aval da ve naa, biaa ye ki vaghle kômô bo é dzam é ne ñe ve n’nem abé. Bia kômô dzigha yeghe nkane ô ne ézizang mbeng ye abé, ézizang bebela ye minaa, naa bi bele ayebe Jehôva (Mink. 2:3-6 ; Behéb. 5:14). Biaa yiène ki likh naa é wong bia ko moan môt, é dang édzing bi bele de Jehôva, amu naa, abuiñ biyong, é mam ma tobe boan be bôr mvèñ, ma tobe Jehôva abé.
6. Aval avé wong akal moan môt é nga ve naa bedjié awôm be ye Israel be venghane bebela ?
6 Nge é wong bi bele akal moan môt wa dang é wong bi bele akal Nzame, bi ne ke bebela ôyap. N’yenane éfônane bedjié 12 be nga ke dong é si Jehôva a nga kiagh naa a ye kee Bisraelitas. Nfa awôm ye bedjié be nga ke dong si, é wong be nga bele akal Becananeos nge ki Becananéen, ô mbe ngu’u a lôr édzing be mbe be bele akal Jehôva. Be nga dzô Bisraelitas bevoo naa : « Bii se ki lumane ayong té, amu be ne ngu’u a dang bia » (Nla. 13:27-31). É mis moan môt, Becananeos be mbe faa ngu’u a lôr Bisraelitas. Ve daa, é môr asese a mbe é dzô naa, Bisraelitas béé se ki wun minzizing mieba, éé mbe ki é simane Jehôva. Awôm bedong beté, be nga yiène bembe ébe é dzam Jehôva a nga kômô naa Bisraelitas be bo. Be nga yiène fe binane ébe é mam a ke kuane Jehôva a ndaghe bo akal deba. Dzam té é nga ye be vole a wokh naa, é ngu’u Becananeos éé mbe ki dzôm éyong ba vaghane de ye é ngu’u ésese Jehôva. Amu naa, Josué ya Caleb be mbe bé kômô bele ayebe Jehôva, éde béé dzi ki bo ane awôm bedong be mbe kaa mebun. Be nga dzô ayong naa : « Nge bi bele ayebe Jehôva, bebela, a ye ve naa bi ñii si té ye kee bia do » (Nla. 14:6-9).
7. Aval avé bi ne wône é wong bi bele akal Jehôva ? (A daghe fe évaghle).
7 Naa bi wône é wong bi bele akal Jehôva, bia yiène bembe naa minkighane misese mia, mi ve ñe n’nem mbeng (Bya 16:8). Nté wa lang minlang mi ya Bible, silighe wamièn naa : ‘Nge ma me mbe me tele étéñ té, za nkighane me nga ye ñong ?’ Éfônan, tame simane naa ô mbe éyong bedjié awôm ye Israel be nga zu bo mbia ôkobikôrô. Ye ô nga ye yebe é dzam be nga dzô, ye likh naa wong akal moan môt ô biñ wa, nge ki, ye édzing duè akal Jehôva ye nkômane ô bele naa ô ve ñe n’nem mbeng ébe be nga ye wun ? Ngura miè bôt Bisraelitas té, ôô dzi ki bunu naa Josué ba Caleb be nga kobe be bebela. Ya dzam té, be nga dzimle maa ya ñii Si ngiagh (Nla. 14:10, 22, 23).
Ébe za wa ye ve mebun muè ? (A daghe abong 7)
8. Za fulu bia yiène sèñ ngu’u naa bi bele, amu dzé ki ?
8 Asili ñuu. Jehôva a lere é bôr be ne asili ñuu bebela (Mat. 11:25). Y’asili ñuu, bi nga yebe naa be vole bia a yeghe bebela (Bisè mintôl 8:30, 31). Ve daa, bia yiène tobe nkee naa bi taa venghane éngung. Nge bi ne éngung, bi ne sum tem naa, n’yenane mam wèè ô ne sôsôe nté mboo fe ane metsin metsing me ya Bible ye melepgha Ékôan Jehôva da ve bia.
9. Aval avé bi ne baghle asili ñuu daa ?
9 Naa bi baghle asili ñuu dzaa, bia yiène simane naa bi ne avitsang éyong bia vaghane bia bebièn ye Jehôva (Bya 8:3, 4). Bi ne fe dzaa Jehôva naa a vole bia a bo édedèè asili ñuu, ye yebe naa be yeghle bia. Jehôva a ye bia vole a tele ôsu, mesimane mèñ a ve bia ngalane Éfiè dèñ ye Ékôan dèñ, évang mesimane mèè. Éyong wa lang Biblia, dzenghe é mam ma lere naa Jehôva a dzing asili ñuu ye fem éngung ye ébere ñuu. Boghane édedèè nkee naa mi tsini naa mia bo asili ñuu, nge ba ve mia ayem ézing da ve naa mi bele abim édjié.
AVAL BI NE TEBE NAA BIP A BEBELA ÉTÉ
10. Beza Jehôva a belane be naa be yeghle ye lere ayong déñ zen ?
10 A baghle mebun ébe é zen Ékôan Nzame da ve bia. A Israel ye ôkua, Jehôva a nga tare belane Moisés, éyong té, a nga belane fe Josué nfa ye a ve ayong déñ melepgha (Jos. 1:16, 17). Bisraelitas be mbe be bele biboran éyong be mbe bé ñong bôr beté ane éba ba kobe akal Jehôva Nzame. Mintet mimbu ôsu vèè, éyong be nga tele Ékôan bekristen, mintôl 12 ébe be nga wule ékôan (Bisè mintôl 8:14, 15). Ôsu vèè, moan nsama té, ô mbe fe wé lang bemvene be ya Jerusalén. Éyong be mbe bé bèè melepgha besôsôe befam beté, « bikôan bi nga tsini naa bia wôneban a mbunan été, ye vem kada môs » (Bisè mintôl 16:4, 5). Metam maa, bia fe, bia ñong biboran éyong bia bèè melepgha ma so ébe Ékôan Jehôva. Ve, Jehôva a ne wôrane ya, éyong biaa yebe ki é bôr a va tele ? Bi ne yalane nsili té, éyong bia yen é dzam é nga boban ye Bisraelitas éyong be mbe bé ke Si ngiagh.
11. Za dzam é nga lôran ye bôr be ye Israel ye ôkua be nga tep Moisés ane ntebe ôsu Nzame a nga top ? (A daghe fe évaghle).
11 É tam Bisraelitas be nga bo ékena naa ba ke Si ngiagh, é bôr be mbe be bele bura meyem nsama té été, be nga bangane Moisés ye éto Jehôva a nga ve ñe. Be nga dzô naa : « Ayong Jehôva ngura é ne nfufup, [se fave Moisés], ye naa, Jehôva a ne fe ézizang deba » (Nla. 16:1-3). Amben é mbe bebela naa é mis Nzame « ayong se ngura » é mbe nfufup, ve daa, Moisés éñe Jehôva a nga top naa a wule ayong dèñ (Nla. 16:28). Éyong be mbe bé soa Moisés, bebela a ne naa, Jehôva éñe be mbe bé soa alé. Béé dzi ki bembe ébe é dzam Jehôva a mbe é kômô. Be nga bembe ébe é mam bebién be mbe bé kômô ; abuiñ édjié ya duma. Jehôva a nga wiñ bedjié beté ye fe betoyini bebôr be nga sukh be asi (Nla. 16:30-35, 41, 49). Ému, bi ne tobe mebun naa, Jehôva a vini é bôr be ne kaa seme mintaane mimam Ékôan dèñ.
Za ô nga ye sukh asi ? (A daghe abong 11)
12. Amu dzé bi ne tsini ôsu ya ve mebun mèè ébe Ékôan Jehôva ?
12 Bi ne tsini ôsu ya ve mebun mèè ébe Ékôan Jehôva. Éyong ba yiène songhane n’woghane mam wèè nfa bebela ézing ya Bible, nge ki aval ba yiène wulu ésèñ da tsinane Édjié Nzame, bobedzang be ye Tsîn Ékôan baa ko ki wong naa be tsen mam mézing nge da yiène (Mink. 4:18). Ba bo de amu naa é dzam da dang be éban a lôr mam mesese, é ne naa, be ve Jehôva n’nem mbeng. Ba bo fe é dzam ésese be ne bo nfa ye naa, minkighane miaba mi so Nkobe Nzame été, éwi bebo bisèñ besese Jehôva ba yiène béé.
13. Dzé é ne « éfônane ye mbemba bifiè », ye naa, za dzam bia yiène bo ye do ?
13 « Tsinighe ôsu ye bembe éfônane ye mbemba bifiè » (2 Tim. 1:13). « Éfônane ye mbemba bifiè » da tsinane meyeghle bekristen ba ñong a Biblia été (Jean 17:17). Aval meyeghle meté, me ne tsîn ye é mam mese bia bune. Ékôan Jehôva é nga yeghle bia naa, bi bembe ébe éfônane té. Nté sese bia bo de, bia ye tobe nkamane nfa ya nsisim.
14. Aval avé bekristen bézing béé dzi ki baghle « éfônane ye mbemba bifiè » ?
14 Za dzam é ne biane bia nge bi bo kaa baghle « éfônane ye mbemba bifiè » ? N’ñonghane éfônan. Ntet mimbu ôsua, bekristen bézing be nga miam fuèñ ézing é mbe minèè, déé dzô naa, é môs Jehôva ô so-hang. É ne bo naa, kalare ézing be mbe bé tem naa ntôl Pablo nge ki Paul a nga tsili, a mbe é ban dzam té. Kaa tare fas nge é mbe bebela, bekristen bézing be ye Tesalónica nge ki Thessalonique, be nga bunu fuèñ té, ye miaman fe de. Béé nga ye ki yebe minaa mité, nge be mbe bé siman é mam Paul a mbe é yeghle be éyong a mbe ya bo (2 Beth. 2:1-5). Paul a nga saghe bobeñang naa be taa yebe é mam mesese be mbe bé wokh. Nfa ya vole be akal melu ma zu, Paul a nga man é kalare bèè a nga tsili bekristen be ya Tesalónica ya bifiè bi : « A ne mbôlô wom, éwi Paul, ô ne ntsilan ye é wo wom, wa ban bekalare besese ma tsili ; aval té éde ma tsili » (2 Beth. 3:17).
15. Aval avé bi ne kame bia bebién ébe mefuéñ me ne minaa ma fônane bebela. Vakh éfônan (A daghe fe bivaghle).
15 Za ayeghle bi ne ñong ya bifiè Paul a nga dzô Betesalonicenses nge ki Bethessalonicien ? Éyong bia wokh dzam ézing daa vaghane ki ye édi bi nga yeghe a Bible été, nge ki naa, bia wokh môra fuéñ ézing, bia yiène bo fakh. N’nôm Unión Soviética nge ki Union Soviétique, minzizing mia mi nga miamane fuéñ ézing bé belan é kalare be nga dzô naa a so ébe Tsîn Ékôan. Kalare té, a nga saghe bobedzang bézing naa be kanane ye Ékôan ye wiè é daba. Kalare té, a mbe é fônan é dzam é ne bebela. Ve daa, béé dzi ki dukh é bobedzang baa be mbe sôsôe. Be nga dzigha yem naa, é fuéñ é mbe kalare té été, éé mbe ki é vaghan ye é mam be nga yeghle be. Melu ma, minzizing mi ye bebela, mi wôla belane minféféñ be tecnología nge ki technologie, naa be zaman ye kane bia. Ndaane a likh naa, be « dzigha zaman é ken [dèè] », bi ne kame bia bebién éyong bia fas nge é dzam bi va wokh nge ki a lang, da wule nsama ye be bebela bi nga so bia yeghe (2 Beth. 2:2 ; 1 Jean 4:1).
Mi taa likh naa be dukh mia (A daghe abong 15)a
16. Aval ane bia lang de nten Beromain 16:17, 18, za dzam bia yiène bo nge bôr bézing ba lum bebela mvus ?
16 Tsinighe naa wa tobe élat ye é bôr be ne sôsôe ye Jehôva. Nzame a kômô naa, bi tobe élat ékang daa été. Bia ye tsini naa bia tobe élat, nté sese bia ye bembe a bebela été. É bôr besese ba lum bebela mvus, ba kane Ékôan, akal dzam té, éde Jehôva a dzô naa, bi « saalé bo. » Nge bi boo kaa de bo, bia bebién bi ne fe ke bebela ôyap (A lang Beromain 16:17, 18).
17. Za biborane bia ñong éyong bia yem bebela ye tebe naa bip été ?
17 Éyong bia yem bebela ye tebe naa bip été, bia ye tobe Jehôva bébéñ ye bele mebun me ne ngu’u (Beéph. 4:15, 16). Bia ye fe kame bia bebién ébe meyeghle ye mefuéñ Satan me ne minèè, ye fe naa, Jehôva a ye kame bia é tam bitsiblé binen. Tsinighe ôsu naa wa tebe naa bip a bebela été, « éde Nzame mvoa a ye tobe ye wa » (Beph. 4:8, 9).
ZA 122 Tebeghe naa bip, keghe teng !
a AYILGHA FÔRÔ: Évaghle da lere é mam me nga boban mewôm mimbu ô mvus, bobedzang ye n’nôm Unión Soviética nge ki Union soviétique be nga bele é kalare a mbe é yene naa a so ébe Tsîn Ékôan, ve, a mbe é so ébe minzizing mia. Metam maa, minzizing mia, mi ne belane internet naa be miaman minèè mizing nfa Ékôan Jehôva.