Aval avé bia lere édzing ya n’nem éngôngoo ébe bebo-minsem ?

1. Za dzam é ne boban éyong môr a va bo nsem ônen ?

AYEGHLE ye sono ayat, bi nga yen é dzam ntôô Pablo a nga dzô ékôan ya Corinto nge ki Corinthe naa é bo, éyong môr ézing a nga bo nsem ônen. Mbo-nsem té éé dzi ki dzôban, éde be nga yiène ñe vèè ékôan été. Ve, ane nten ye nlô-adzô ye ayeghle di da lere de, Nzame a tsini é môr a va bo nsem ônen naa, a dzôban (Bero. 2:4). Aval avé bemvene be ne vole é môr a va bo nsem ônen naa, a dzôban ?

2-3. Za dzam bia yiène bo éyong bia yem naa moadzang ye ékôan a va bo nsem ônen, ye amu dzé ki ?

² Nge bemvene baa yem ki naa moadzang ézing a va bo nsem ônen, béé se ki ñe vole. Éde, za dzam bia yiène bo éyong bia yem naa moadzang nge ki kal dzèè a va bo nsem ô ne ve naa be vèè ñe ékôan été ? Bia yiène ñe dzô naa, a ke yen bemvene naa be vole ñe (Esaïe 1:18 ; Bisè mintôl 20:28 ; 1 Pierre 5:2).

³ Ve, dzé é ne boban nge môr té, aa kômô ki kobe ya bemvene ? Tam té, bia bebièn bia yiène ke yen bemvene naa be ve ñe avole da yiène. Éyong bia bo do, bia lere naa bia dzing moadzang nge ki kal dzèè, amu bia yem naa bemvene be ne ñe yem vole. Nge môr té a ke ôsu ye tsini naa a bo é dzam é ne abé, a ye bera tugha ndaman élar dèñ ya Jehôva. A ne fe ve naa bôr be ye atan be kobe Jehôva ya ékôan dèñ abé. Édeeng, amben dzam té é ne bo ndzukh, bia ke yen bemvene amu naa bia ñeghe Jehôva ya modzang nge ki kal dzèè té (Bya 27:14).

AVAL AVÉ BEMVENE BA VOLE É BÔT BE VA BO NSEM ÔNEN ?

4. Za nsoghan bemvene be bele éyong ba tobe ya é môt a va bo nsem ônen ?

⁴ Éyong moadzang nge ki kal dzèè a va bo nsem ônen, nsama bemvene ba top bemvene belal ézizang deba, naa be bo comitéa. Bemvene beté ba yiène bo asili ñuu ya yem meniè meba. Amben ba dzeng naa ba vole mbo-nsem naa a dzôban, ba yem mbeng-mbeng naa, béé se ki yemlé môr té naa a tsen (Deut. 30:19). Bemvene ba yem naa, se ki môr asese éñe a ye dzôban minsem mièñ aval kéza David a nga bo do (2 Sam. 12:13). Bôr bézing be ne top naa baa bèè ki mbamane Jehôva (Atar. 4:6-8). Ve dèè, nsonghane bemvene ô ne naa, be tsini é môr a va bo nsem adzôban. Za metsin metsing ma vole bo éyong ba tobe ya é môr a va bo nsem ônen ?

5. Za dzam bemvene ba yiène baghle ôsiman éyong ba ye dzeng naa ba tobe ya é môr a va bo nsem ônen ? (2 Timothée 2:24-26) (A daghe fe évaghle).

⁵ Bemvene ba yiène baghle ôsiman naa, é môr a va bo nsem ônen a ne ane ntôma ô va dzimi, ye naa, ô ngen tang nden asu Jehôva (Luc 15:4, 6). Akal té, éyong ba tobe ya môr té, bemvene baa yiène ki dzime kobe ya ñe nge ki a dzime ñe ñong, baa yiène ki sughu fave naa ba sili ñe minsili ye yane biyalane bièñ. Ndaane do, ba ye dzeng naa be bele mefulu bia yen nten 2 Timothée 2:24-26 (A lang). Bemvene ba ye tobe évuvuèñ ya mbemba fulu nfa ye naa be name n’nem é môt a va bo nsem.

6. Aval avé bemvene ba ye kômane min’nem mieba kaa naa be tobe ya é môt a va bo nsem ônen ? (Beromain 2:4).

⁶ Bemvene ba kômane min’nem mieba. Ba ye dzeng naa ba vu Jehôva éyong ba ye tobe ya é môr a va bo nsem, bé simane bifiè Paul éyong a nga dzô naa : « Nzame ya é mbemba fulu dèñ a kômô wô tsini naa ô dzôban » (A lang Beromain 2:4). É dzam bemvene ba yiène tare bele ôsiman é ne naa, be ne bebaghle mintôma Krist a wulu ya bo (Esaïe 11:3, 4 ; Mat. 18:18-20). Kaa naa be tobe ya é môr a va bo nsem, comité a ye fas meyaghlan été, é dzam ba yiène dzeng naa be bo ; a tsini mbo-nsem naa a dzôban. Ba ye bo mindzeng a Bible été ya mebakh me ye ékôan, béé yaghlane naa be bele fakh. Ba ye dzeng naa be tugha wokh é dzam é va ve naa môr té a siman aval té, ya bo nsem ônen (Mink. 20:5).

7-8. Aval avé bemvene be ne vu é fulu ôdzibi Jehôva éyong ba tobe ya é môr a va bo nsem ônen ?

⁷ Bemvene ba vu é fulu ôdzibi Jehôva. A simane aval Jehôva a nga ñong é bôr be nga bo minsem melu ô mvus. Éfônan, Jehôva a nga lere fulu ôdzibi éyong a nga bame Caín, ébe é mam me mbe so ya nsem, ya likh fe ñe tam naa a tsen (Atar. 4:6, 7). Jehôva a nga ve David akira ngalan nkulu medzô Natán, é belan éfônan é nga name kéza n’nem (2 Sam. 12:1-7). Jehôva « a nga tsini naa a lôm » bekulu medzô « éyong ésese », naa be ke bame ayong Israël (Jér. 7:24, 25). Éé dzi ki yane naa ayong dèñ é dzôban naa a vole do. Ndaane de, éñe a mbe é tare bo mam nfa ye naa be dzôban.

⁸ Bemvene ba vu éfônan Jehôva éyong ba dzeng naa be vole é bobedzang ya bekal bèè be va bo nsem ônen. Aval ane nten 2 Timothée 4:2 wa dzô de, ba fas « ya ôdzibi ôse » éyong ba tobe ya é môr é dzidzii wèñ a ve ñe bidzô. Ba tobe ya ñe, ye lere fulu ôdzibi ane nten 2 Timothée 4:2 wa dzô do : « Mvene a yiène tobe éyong ése évuvuèñ ya ôdzibi, nfa ye naa, a vole [é môr a va bo nsem], naa a ve ñe naa a bera kômô bo é dzam é ne sôsôe. Nge [mvene] a sia wokh abé, [é môr a va bo nsem] a ne bo kaa fe bera wokh melepgha mèñ ya tep naa a dzôban. »

9-10. Aval avé bemvene be ne vole é môr a va bo nsem ônen naa, a tugha wokh amu dzé é dzam a va bo é va ndaman élar a bele ya Jehôva ?

⁹ Bemvene ba ye dzeng naa be tugha wokh é mam me va ve naa môr té a ku a nsem. Éfônan, ye moan kristen té a va takh nfa ya nsisim amu a va lame ayeghle môr émièn dèñ, nge ki ésèñ minkanghle ? Ye a va sim naa a yaghlane Jehôva môs misese, kaa ki bo meyaghlane me ne édoa ? Ye a va likh naa mbia mekômgha éme me wulu ya ñe ? Ye a va dzime top é bôr ba be be ba wulu nge ki bivuiñ bièñ ? Aval avé minkighane mité mi va name n’nem wèñ ? Ye a tugha wokh amu dzé minkighane ya mimboan mité mi va ve Ésaa wèñ Jehôva n’nem abé ?

¹⁰ Bemvene be ne sili é môr a va bo nsem, minsili mia vole ñe a fas é mam me va ve naa élar ba Jehôva é sibe, ya ke kuiñ a ne a va ku a nsem été. Ba bo de ya mbemba fulu, kaa ki ñe sili é boan be-bam ma daghe fave môr émièn, é mam méé se ki éban naa bôr be yem (Mink. 20:5). Ya fe naa, be ne belane bifônan bizing naa be vole môr té naa a fas, ye vole ñe naa a yen ane mimboane mièñ mi ne abé, aval Natán a nga bo do ya David. Ngeng ézing naa éyong ôsua ba ye tare tobe, môr té a ne sum tobe éwuiñ akal mbia minkighan a nga ñong. A ne fe dzôban.

11. Aval avé Yésu a mbe é ñong bebo-minsem ?

¹¹ Bemvene ba ve mengu’u naa be vu Yésu. Yésu a nga vole Saulo de Tarso nge ki Saul de Tarse, é sili ñe nsili ô ne édoa naa : « A Saul, a Saul, amu dzé wa tsiblé ma ? » (Bisè mintôl 9:3-6) Éyong ki a nga kobe adzô « minenga bidzabô Jezabel, » Yésu a nga dzô naa : « Me va likh ñe abuiñ tam naa a dzôban » (Mel. 2:20, 21).

12-13. Aval avé bemvene be ne likh é môr a va bo nsem ônen tam naa a dzôban ? (A daghe fe évaghle).

¹² Bé vu éfônan Yésu, bemvene baa ye ki kikh avôô naa, é môr a va bo nsem aa ye ki dzôban. Bôr bézing be ne dzôban éyong ôsua ba tare tobe ya bemvene, éba bevoo ki, da ye be sili abuiñ tam naa be bo do. Éde bemvene be ne dzeng naa be tubane ya é môr a va bo nsem abuiñ biyong. Ngeng ézing naa, éyong ba be bo, ba ye mane kobe éyong ôsua, éyong té éde é kristen a va bo nsem a ye sum fas melepgha be va ve ñe. A ne yir Jehôva bébéñ, é bo ñe meyaghlan ya asili ñuu (Bya 32:5 ; 38:18). Éde, éyong ba ye bera tuban, é môr a va bo nsem a ne tsen n’yenane mam a mbe a bele éyong ôsua be nga tare tuban.

¹³ Nfa ye naa be tsini mbo-nsem naa a dzôban, bemvene ba yiène yen é môr a va bo nsem éngôngoo, ya lere ñe mbemba fulu. Ba yaghlane fe Jehôva naa a bôrane mengu’u meba. Ba bunu fe naa, moadzang nge ki kal dzèè té, a ye dzôban ya sanghle abo-dulu dèñ (2 Tim. 2:25, 26).

14. Za faa a yiène ñong duma éyong é môr a va bo nsem ônen a dzôban, amu dzé ki ?

¹⁴ Éyong é môr a va bo nsem a dzôban, dzam té da so abuiñ mevakh ! (Luc 15:7, 10) Za faa a yiène ñong duma ? Ye bemvene ? Simghane é dzam Pablo a nga tsili akal bebo-minsem : « Éyong ézing Nzame éñe a ye be ve naa be dzôban » (2 Tim. 2:25). Éde, « se ki moan môt, ve, a ne Jehôva éñe a vole moan kristen naa a tsen mesiman mèñ ya sanghle abo-dulu dèñ. Pablo a dzô bia é mbemba be-mam ma boban éyong môr a dzôban. Môr té, a ne tugha yem wokh bebela, a tsen aval a wokh mam, ya kôre fe melam Satan été » (2 Tim. 2:26).

15. Aval avé bemvene be ne tsini naa ba vole mbo-nsem a va dzôban ?

¹⁵ Éyong mbo-nsem a dzôban, bemvene be ye comité ba ye tsini naa ba ke ñe fep nfa ye naa be ve ñe avole a yi, a ve ñe ngu’u naa a kôre melam Satan été, ye bera wulu é zen é ne sôsôe (Behéb. 12:12, 13). É ne été naa, bemvene baa ye ki dzô môr ézing é mam be va tsiè éyong be va tobe ya mbo-nsem. Ve, za mam ékôan é ne yem ?

« BAMEGHE BO ASU BÔR BESESE »

16. Aval ane nten 1 Timothée 5:20 da dzô do, za ba luè « asu bôr besese » Paul a kobe be ?

¹⁶ A lang 1 Timothée 5:20. Timothée éñe Paul a nga tsili bifiè bité nfa ya tsiè é mam ma tsinane « é bôr ba bo minsem. » Za dzam a nga kômô dzô ? Éé dzi ki kômô dzô naa, éfiè « asu bôr besese », da daghe ékôan ngura. Ndaane de, éyong ézing a mbe é kobe, é bôr be mbe bé yem minsem mi va boban. A mbe bo, é bôr be va yen nsem té, nge ki faa é bôr be va kobe ya mbo-nsem émièn. Bemvene be mbe bé dzô be ashuèñ naa be mana tsiè adzô té, ya naa be va bame mbo-nsem.

17. Nge a kuiñ naa ékôan ngura é nga yemang nsem ô va boban, nge ki naa ba ye wô yem, bemvene ba ye bôm za fuèñ, amu dzé ki ?

¹⁷ Éyong ézing é mbe kuiñ naa ékôan ngura da mane yem nsem ô va boban nge ki naa ba ye de yem. Éde nge éñe é mbe nèè, éfiè « asu bôr besese » é mbe dé daghe ékôan ngura. Éde mvene a mbe é dzô ékôan ngura nge be va bame moadzang nge kal dzèè ézing. Amu dzé ? Paul a yalane naa : « Nfa ye naa be bame é bôr bevoo » naa be taa ku nsem té été.

18. Éyong a ne naa é bong be dubaneyang ébe be va bo nsem, aval avé ba ye tsiè adzô té ? (A daghe fe évaghle).

¹⁸ Bi ne dzô ya nfa é bong be dubaneyang, bia dzô vèè, éba baa be ki kuiñ mimbu 18 ? Éyong be va bo nsem ônen, nsama bemvene ba ye top bemvene bebèñ naa be ke tobe ya mong té ya bebyèñ bèñ be ne bekristenb. Bemvene ba ye dzeng naa be yem é mam bebyèñ be boang nfa ye naa be vole é moan wôba naa a dzôban. Nge mong té a bèè melepgha bebyèñ ya tsen mesiman ya abo-dulu dèñ, bemvene bebèñ beté be ne kikh naa déé se ki éban naa be ke adzô té ôsu. Édi é ne bebela, é ne naa, bebyèñ ébe Nzame a nga kee ayem naa be songhan é boan beba ya édzing (Deut. 6:6, 7 ; Mink. 6:20 ; 22:6 ; Beéph. 6:2-4). Ve, bemvene ba tsini biyong bizing naa ba daghe nge bebyèñ ba tsini naa ba ve é moan wôba avole da yiène. Ve dèè, dzé da ye boban nge mong té aa dzôban ki ye tsini mbia abo-dulu dèñ ? Tam té, comité bemvene ba ye tobe ya ñe ya bebyèñ bèñ be ne bekristen.

« JEHÔVA A BIRA WOKH BÔR MINTÈÑ, A NE FE N’NEM ÉNGÔNGOO »

19. Aval avé bemvene ba ye ve mengu’u naa ba vu Jehôva éyong ba tsiè adzô é môr a va bo nsem ônen ?

¹⁹ Comité bemvene a bele ayem asu Jehôva naa a baghle ékôan nfuban (1 Becor. 5:7). Nge é ne boban, ba kômô fe naa be tsini é bôr be va bo é dzam é ne abé naa be dzôban. Éde, éyong ba vole aval môr té, ba bunu naa, a ye tsen mbia abo-dulu dèñ. Amu dzè ? Amu naa ba kômô vu Jehôva, é môr « a bira wokh bôr mintèñ, a ne fe n’nem éngôngoo » (Jacq. 5:11). Tamane daghe a ne n’nôm ntôô Jean a nga lere do. A dzô naa : « Ayôm boan dam, ma tsili mina mam meté nfa ye naa mi taa bera bo nsem. Ve, nge da kuiñ naa môr ézing a bo nsem, bi bele mvole bebèñ Ésaa wèè, Yésu Krist, sôsôe môt » (1 Jean 2:1).

20. Za dzam bia ye yen ayeghle da sughlan ?

²⁰ Édi é ne éngôngoo é ne naa, biyong bizing moan kristen a ne tep naa a dzôban. Nge éñe é ne nèè, ba yiène ñe vèè ékôan été. Aval avé bemvene ba tsiè aval bôra medzô meté ? Nsili té, éwô bia ye yalan wô, ayeghle da sughlan.