« Luèghe bemvene »

1. Za aval Jehôva a nga lere naa, mintôma mièñ mi ne ñe éban ?

MINTÔMA mièñ mi ne Jehôva abuiñ éban. A nga kus mio ya mekî Yésu, éde a nga tele bemvene naa be kale abeng mintôma dèñ (Bisè mintôl 20:28). Nzame a kômô naa be ñeghle mintôma mièñ. Be too édjié Yésu asi, bemvene ba vole mintôma, ba kame fe mio, ébe é mam me ne be dzughu nsisim été (Esaïe 32:1, 2).

2. Za faa Jehôva a lere naa a dang bis ? (Ézéchiel 34:15, 16).

² Jehôva a bis mintôma mièñ misese, ve a dang bis émi mia dzukh. Ngalane bemvene, a vole éba ba dzukh nsisim été (a lang Ézéchiel 34:15, 16). Vedaa, a kômô naa bi dzeng avole é tam bia yi do. Metam meté, se fave naa bia yaghlane naa Nzame a sukh bia, bia yiène fe dzaa avole ébe « bekale mintôma ya beyeghle » be ye ékôan (Beéph. 4:11, 12).

3. Za aval bia besese bi ne buan éyong bia fas ayem bemvene be bele ékôan été ?

³ Ayeghle di, bia ye fas ntaane mam Nzame, nfa ye naa bi bele avole nsisim été ngalane bemvene. Bia ye yalane minsili milal mi : Tam évé bia yiène sili bemvene avole ? Amu dzé bia yiène de bo ? Ya fe, aval avé ba vole bia ? Amben biaa tubane ki ndzukh ézing éndagha, biyalan ébe minsili mité bia ye koghle édzing bi bele akal ntaane mam Nzame, éwi ô ne bia kôre éning môs ézing.

ÉYONG ÉVÉ BIA YIÈNE « LUÈ BEMVENE » ?

4. Za aval bia yem naa nten Jacques 5:14-16, 19, 20 wa kobe adzô é môr a koan nsisim été ? (A daghe fe bivaghle).

⁴ Ntôô Santiago nge ki Jacques, a nga kane aval Jehôva a belane bemvene naa be vole bia. Santiago a nga tsili naa : « Ye môr ézing a ne nkôkoan ézizang denan ? A luèghe bemvene be ye ékôan » (a lang Jacques 5:14-16, 19, 20). Santiago a kobe é môr a yiène kôm élar dèñ ya Jehôva. É kobe adzô é môr a koan, aa dzô ki ñe naa a luè dokira, ve naa, a luè bemvene. Santiago a bera fe lere naa, nfa ye naa é môr a koan a let, ba yiène ñe djii minsem mièñ. Minfa mizing, nfa ye naa é môr a koan nsisim été a let, a yiène bo mam mézing aval ane é môr ñe a fe a koan nsôn a bo. Éyong bia koan nsôn, bia ke yen dokira, bi kare ñe aval bia wôran, ye bèè é mam a dzô bia naa bi bo. Aval té daa-daa, éyong bia koan nsisim, bia yiène ke yen mvene ézing, bi kare ñe étéñ bi tele, ye dzale melepgha a ve bia me ne tsîn a Biblia été.

5. Za aval bi ne yem nge angom daa ya Jehôva é nga tekh-yang ?

⁵ Nten Jacques abong 5, Santiago a ve bia mengu’u naa bi kobe ya bemvene, éyong bia wôrane naa angom daa ya Jehôva é nga tekh-yang. Ve, da dang éban naa bi dzaa bemvene avole kaa naa bi dzimle ayebe Jehôva. Biblia a ve bia mbam naa, nge bi bo kaa tobe do nkee, bi ne sum naa bia tem naa, bi bele ayebe dèñ éyong bi dzimle-yang do (Jacques 1:22). Bekristen bézing be ye ntet mimbu ôsua be ye ékôan é mbe a Sardis, be nga ku évus té été, éde Yésu a nga ve be mbam nfa étéñ be mbe be tele nsisim été (Mel. 3:1, 2). Ngura aval bi ne fas étéñ ye nsisim daa, a ne éyong bia vaghane mevakh bi bele ékang bia ve Jehôva éndagha, ya éma bi mbe bi bele metam ô mvus (Mel. 2:4, 5). Bi ne sili bia bebién naa : “Ye mevakh mam éyong ma lang ya binan Biblia me silibaneyang ? Ye me ngen ma ke bisulan bisese bi ye ékôan ? Ye ma ke bisulan kaa naa ma kômane bio ? Ye ayông dam akal ésèñ minkanghle é sim-hang ? Ye a dzale minkômane mi ya nsôn miam ye dzeng naa me bele abuiñ mono éde da dang ma ñong tam ya asimane dam éndagha ?” Nge éyalan ébe nsili ôvoo ye été é ne ôwé, dzam té é ne lere naa bi ntoo atekh nsisim été, ye naa, nge bi kaa dzeng naa bi kôm do, é ne bia ke édedaa abé. Nge bia wôrane naa, bia bebién bii se ki fe wônô élar daa ya Jehôva, nge ki faa naa, bi bo-hang é dzam bia yem naa Jehôva a yen abé, bia yiène ke dzaa bemvene avole.

6. Za dzam é bôr be va bo nsem ônen ba yiène bo ?

⁶ Ôwé, é bôr be va bo nsem ônen, éwi ô ne likh naa be vaa môr ékôan été, ba yiène dzeng naa be yir bemvene bébéñ (1 Becor. 5:11-13). É môr ase a va ku nsem ônen été, a yi avole nfa ye naa a bera kôm élar dèñ ya Jehôva. Naa bi wun ndjiiane Jehôva ngalane ntang, bia yiène lere « mimboane mia ke môr adzôban » (Bisè mintôl 26:20). Mimboane mité été, bi ne lang a yir bemvene bébéñ éyong bi va bo nsem ônen.

7. Za nfe a yi avole bemvene ?

⁷ Bemvene baa vole ki fave é bôr be va bo nsem ônen, ba vole fe é bôr be ne atekh nsisim été (Bisè mintôl 20:35). Tam ézing, ô ne ko wong naa waa wun ki alumane duè ya mbia minkôman. Alumane duè é ne dang bera bo ngu’u, nge kaa naa ô yeghe bebela, ô mbe wé ñu baang, ô mbe wé yen pornografía, nge ki faa naa, ô mbe ô bele éning é ne mvin. Ô taa ko wong naa ô dzaa avole. Ô ne top naa wa kobe ya é mvene ézing ô ne kar é mam ma ve wô naa ô yep a n’nem. Mvene té a ye wô ve melepgha ma ye wô vole, ye ban fe wô naa, ô ne ve Jehôva n’nem mbeng éyong wa tep naa wa dzale mbia minkômane muè (Eccl. 4:12). Éyong ézing, ô ntoo mvoaran amu naa ô ngen ô bele mbia minkôman. Bemvene be ne wa simane naa, da ve Jehôva n’nem mbeng a yen naa, wa dzaa avole. Da lere naa ô ne ésili ñuu ye naa, waa kômô ki bele édedaa mebun ébe wamién (1 Becor. 10:12).

8. Ye bia yiène ke kare bemvene bikop bisese bia bo ? Vakh ayilgha.

⁸ Biaa yiène ki ke kare bemvene bikop bisese bia bo. Éfônan, ô ne dzô moadzang nge ki kal dzaa ézing é dzam da dzughu ñe, nge ki faa naa, ô nga bira yaa ñe. Ndaane naa ô dzeng naa ô ke kobe ya mvene ézing, wa yiène dzeng naa ô dzale melepgha Yésu, nfa ye naa mvoa é bera bo é zang mina moanñong, nge ki mina ñu kaa (Mat. 5:23, 24). Ô ne fas minlô-medzô mia daghe, évuvuèñ, édzip ya ndjiène ñuu, nfa ye naa ô kuiñ naa ô bele mbemba mefulu meté ôsu. Ôwé, nge é kuiñ naa wamién wéé se ki fe kôm ntsiè té, éyong té éde ô ntoo ke dzaa mvene ézing naa a vole wa. É kalare Pablo a nga tsili Befilipenses nge ki Bephilippien, a nga dzaa moadzang ézing be ne kaa tu éyôla naa, a vole Evodia ba Síntique nge ki Évodie ba Syntyche, naa be kôm mintsiè mieba. Aval té daa-daa, éde mvene ye ékôan duè ñe a ne fe wô vole (Beph. 4:2, 3).

AMU DZÉ BIA YIÈNE LUÈ BEMVENE ?

9. Amu dzé biaa yiène ki likh naa ôsoan ô bo bia naa bi taa luè bemvene ? (Minkana 28:13).

⁹ Bia yiène bele mebun ye bo ayokh nfa ye naa bi dzaa avole éyong bi va bo nsem ônen, nge ki éyong bia wôrane naa bi nga dzimle-yang alumane daa ya mbia minkôman. Biaa yiène ki likh naa ôsoan ô bo naa bi taa luè bemvene. Amu dzé biaa yiène ki de bo ? Éyong bia béé ntaane mam Jehôva, bia lere naa bia tobe ñe mebun ya fe melepgha mèñ, nfa ye naa bi tsini naa bia tobe mvoa ya ngu’u nsisim été. Bia mem naa, bia yi avole dèñ naa bi tsini naa bo é mam me ne sôsôe (Bya 94:18). Nge bi va bo nsem, Nzame a ye bia lere é mvam dzèñ nge bi ke kare bemvene é dzam bi va bo, bi lame fe mbia abo-dulu daa (a lang Minkana 28:13).

10. Za dzam é ne lôt nge bi dzeng naa bi shuale minsem mia ?

¹⁰ Zelan ya biboran bia bele éyong bia dzaa mvene avole, bi ne likh naa étéñ daa é dang bera bo abé, nge bi dzeng naa bi shuale minsem miaa. Éyong kéza David a nga dzeng naa a shuale minsem mièñ, a nga dzukh nsisim été, ôtemgha wèñ été, ya fe nsôn été (Bya 32:3-5). Éyong bia koan, nge ki naa bi va dzukh vôm, nge bi likh naa tam é lôr abuiñ kaa naa bia bo dzam nfa ye naa bi sum biang, bia ye bira wokh mintéñ. Aval té daa-daa, éyong bi va bo nsem ônen, nge bi likh naa tam é lôr abuiñ kaa naa bia dzeng avole bemvene, bi ne dzimle ya ke kuiñ, élar daa ya Jehôva. Jehôva aa kômô ki naa dzam té é lôrane bia. Ya dzam té, éde a dzô bia naa bi kobe ya bemvene, éba a belane bo naa be vole bia naa bi bera bo mengom mèñ (Esaïe 1:5, 6, 18).

11. Nge bi dzeng naa bi shuale nsem ônen bi va bo, aval avé dzam té é ne dzughu é bôr bevoo ?

¹¹ Nge bi dzeng naa bi shuale nsem ônen bi va bo, dzam té é ne dzughu é bôr bevoo. Bi ne likh naa nfufup nsisim Nzame ô taa fe wulu ékôan été, ye tsam fe é mvoa bobedzang ya bekal baa (Beéph. 4:30). Aval té daa-daa, nge bi wokh naa môr ye ékôan a va bo nsem ônen, bia yiène ñe dzô naa a ke kobe ya bemvene ébe adzô téa. A shuale nsem ônen môr nfe a va bo, da ve naa, bia bi bele fe bidzô (Lév. 5:1). Édzing daa akal Jehôva, da yiène bia tsini naa bi ke kobe ya bemvene. Aval té, éde bia vole naa ékôan é tobe nfuban, ye ve naa é bôr be va bo nsem ônen, be bera bele mbemba élar ya Jehôva.

AVAL AVÉ BEMVENE BA VOLE BIA ?

12. Aval avé bemvene ba vole é bôr be tekh-yang nsisim été ?

¹² Bemvene ba ñong ayeghle nfa ye naa be sukh é bôr be tekh-yang nsisim été (1 Beth. 5:14). Nge a ne naa ô vus-yang, be ne wô bo minsili ya akeng, naa be « kulu atan » é mam wa siman ye wôrane n’nem été (Mink. 20:5). Ô ne be vole éyong wa kuu bo n’nem wiè, amben nge é ne wô ayèñ amu naa ô ne môr ôsoan, nge ki naa, wa wokh ôsoan a kane é dzam é nga boban. Ve, ô ne ba vole éyong wa kare bo ndzukh wa tubane wô. Ô taa ko wong naa bifiè buè bi ne fônane « bifiè ba wua afan » (Job 6:3). Amu naa baa ye ki dzeng naa be ñong ébangha avôô-avôô, bemvene ba ye ve mengu’u naa be yem wô bèè, nfa ye naa be tugha yem wokh adzô té, ye naa be ve wa melepgha (Mink. 18:13). Ba ñu tang naa a baghle abeng mintôma da dzaa tam. Ya édo, baa dzeng ki naa be kôm mintsiè mi ne ayèñ avôô-avôô.

13. Aval avé bemvene be ne bia vole ya meyaghlane meba ya fe aval ba lere bia zen ngalane Biblia ? (A daghe fe bivaghle).

¹³ Éyong wa luè bemvene, ba ye ve mengu’u naa ô taa tsini naa wa dang ve wamién bidzô. Vedaa, ba ye yaghlane akal duè. Ô ne yaghan ébe é ngu’u meyaghlane meba me bele. Éyong ba vole wa, ba ye fe « [wa] waa mboan ya éyôla Jehôva » (Jacq. 5:14-16). « Mboan » té, ô ne é bebela a ne Éfiè Nzame été. Amu ye naa, ba belane Biblia ya akeng, bemvene ba ye wô sili n’nem, a fong wa, ba ye fe wô vole naa ô bera kôm élar duè ya Jehôva (Esaïe 57:18). Melepgha meba ma so a Biblia, me ne wô ve é ngu’u wa yi, naa ô tsini naa wa bo é dzam Jehôva a dzô. Ngalane bo, ô ne wokh é king Jehôva da dzô wô naa : « Zen éde ñi. Wulughe do » (Esaïe 30:21).

14. Aval ane abakh Begalates 6:1 da lere do, aval avé bemvene ba vole é môr asese a va ñong « mbia abo-dulu » ? (A daghe fe bivaghle).

¹⁴ (A lang Begalates 6:1). Éyong ésese moan kristen a ñong « mbia abo-dulu », aa bo ki fe é dzam Jehôva a kômô naa a bo. Tam ézing, a va ñong nkighan ô ne kaa fakh, éwi ô va likh ñe naa a ke bo nsem ônen. Ya édzing, bekristen be ne bemvene « ba dzeng naa be songhan aval môr té ya nsisim ô ne évuvuèñ ». Éfiè Griego ba konghlane naa « a songhan », é ne ane éyong ba dzeng naa be bera tsuè éves é va bughu é vôm da yiène tobe, nfa ye naa môr té a taa lighi ya éyem. Aval ane é dokira a ne akeng a ve mengu’u naa a tsuè éves é mbughan kaa naa môr té a dang da wokh mintéñ, éde fe bemvene ba ve mengu’u naa be sèñ ôkoan ya nsisim waa, kaa naa ba bera bia koghle mintéñ. Vedaa, ba yeghle fe bemvene naa, ba yiène « bem é mis meba ébe [bébién] ». Nté ba vole bia naa bi songhane é zen dzaa, bemvene ba mem naa, baa be ne fe bebo-bikop. Ya dzam té, baa be ne fe ñong mbia abo-dulu. Éde, ba ye tobe de nkee naa be taa tem naa, ba dang sôsôe a lôr é bôr ba dzeng naa be vole. Ndaane de, ba yiène bo ésili ñuu ya lere n’nem éngôngoo (1 Pierre 3:8).

15. Za dzam bi ne bo nge bia tubane ndzukh ézing ?

¹⁵ Jehôva a nga yeghle bemvene naa, baa yiène ki kobe ya é bôr bevoo é mam bia kare bo ashuèñ. Be va yeghe fe naa, ba yiène ve melepgha ma so a Biblia été, se ki a dzô bôr é dzam bébién ba bunu naa é ne tetele. Aval té daa fe, be va yeghe naa ba yiène tsini naa ba vole bia, naa bi dang mindzukh bia tubane mio (Mink. 11:13 ; Begal. 6:2). Amben bemvene be bele mefulu ya n’yeman wa selane bo bevoo ya éba bevoo, bi ne kobe ya mvene asese éyong bi bele ndzukh. É ne édedaa éban naa bi simane naa, biaa yiène ki tsini naa bia dzeng melepgha ébe abuiñ bemvene, bi yane naa mboo ézing a ye bia dzô naa bi bo, é dzam bia bebién bia kômô bo. Nge bi bo do, bia ye bo ane é bôr ba kômô naa be dzô bo fave é dzam ba kômô wokh, se ki é dzam Jehôva a yeghle Éfiè dèñ été (2 Tim. 4:3). Éyong bia ke yen mvene ézing naa bia kare ñe ndzukh bia tubane wô, tam ézing, a ne bia sili nge bi kobeyang adzô té ya bemvene befe, ya kômô yem melepgha be nga ve bia. A yem meniè mèñ, da ye tsini mvene té naa a ye ke dzaa melepgha ébe mvene nfe (Mink. 13:10).

É DZAM BIA BEBIÉN BIA YIÈNE BO

16. Za dzam kada môr ye ébe bia a yiène bo ?

¹⁶ Amben bemvene ba kale bia ane mintôma Nzame, baa dzô ki bia é dzam bia yiène bo. Kada môr ye ébe bia a bele é dzam a yiène bo nfa ye naa, a lere naa a ning ane é môr a ko Nzame wong. Bia yiène ve Jehôva n’nem mbeng ya é mam bia dzô ya fe, é mam bia bo. Ya avole dèñ, bia ye ñong minkighane mi ne fakh ye tsini naa bia tobe sôsôe ya ñe (Bero. 14:12). Éde, ndaane naa, ba tobe naa ba kare bia é dzam bia yiène bo éyong ése, bemvene ba simane bia ôtemgha Nzame, éwi bia kuan Éfiè dèñ été. Éyong bia bèè melepgha meba me ne tsîn a Biblia été, bia yeghe aval bi ne tem ane Jehôva, nfa ye naa bi ñong minkighane mi ne fakh (Behéb. 5:14).

17. Za dzam Jehôva a kômô naa bi bo ?

¹⁷ Bia bira ve akiba naa Jehôva a kale bia ya édzing aval ane mbemba nkale mintôma ñe a bo fe ya mintôma mièñ ! Jehôva a nga lôm Yésu, éñi a ne « mbemba nkale mintôma », a nga yaane ntang akal daa, nfa ye naa bi bele éning é ne mbèmbèè (Jean 10:11). Ngalane bemvene be ye ékôan, Jehôva a va dzale é ngiagh dèñ da dzô naa : « Ma ye mina ve bekale mintôma ba bo mam aval da so n’nem wom, éba ba ye mina ve bidzi ya n’yeman, ya fe mbemba n’woghane mam » (Jér. 3:15). Ya dzam té, nge bia wôrane naa, mebun maa me nga tekh-yang, nge ki naa bia yiène bera kôm élar daa ya Jehôva, biaa yiène ki ko wong naa bi luè bemvene naa be vole bia. Éyong té bia ye yen naa, Jehôva a yem belane bo nfa ye naa be vole bia.