Minsili belang

Beyeghe 70 Yésu a nga lôm minkanghle, be mbe vôm mbé éyong a nga tele Ésesang ndziane Nti ? Ye be nga lame ñe ?

Biaa yiène ki tem naa, amu béé mbe ki vaa éyong Yésu a nga tele Ésesang ndziane Nti, éde da yili naa beyeghe 70 bèñ beté, be nga dzimle ayebe Yésu nge ki naa be nga lame ñe. Tam té, Yésu a nga kômô tobe fave ye besôsôe mintôl mièñ.

Minsama mibèñ mité, mi mbe mi bele ayebe Yésu, a bo mintôl 12 nge ki beyeghe 70 bèñ. Ôsusua, Yésu a nga tare top befam 12 ézizang beyeghe bèñ, éde a nga luè be naa mintôl (Luc 6:12-16). A mbe a Galilea éyong « a nga luè mintôl awôm-a-bèè » ye « lôm be naa be ke kanghle Édjié Nzame ye lere bôt » (Luc 9:1-6). Ôsu vaa, a Judea, éde Yésu « a nga top beyeghe 70 befe ye lôm be bebèñ-bebèñ » (Luc 9:51; 10:1). Dzam té da lere naa, Yésu a mbe a bele beyeghe be nga yiène kanghle é fuèñ dzèñ abuiñ mevôm.

Bejudíos be nga venghane beyeghe bèñ, be nga tsini naa ba dzemle Pascua kada mbu, éyong ézing ye memvong mebôr meba (Akô. 12:6-11, 17-20). Éyong tam ye awu dèñ é nga bo naa é nto bébéñ, éde Yésu ye mintôl mièñ be nga ke a Jerusalén. Ve daa, éé dzi ki luè beyeghe bèñ bevoo besese ye Judea, Galilea, ye Perea naa be kôan akal Pascua. É ne bebela naa, Yésu a nga kômô lôr tam té, fave ya mintôl. A nga dzô be naa : « Me va bira kômô dzi é Pascua ñi ye mina kaa naa me dzukh » (Luc 22:15).

A mbe faa a bele mbemba akalgha. Abong té a ligheyang Yésu fave ôyôm tam kaa naa a wu ane « ntôma Nzame wa ye mane vaa nsem bôr be ye é si ñi » (Jean 1:29). Dzam té é mbe naa da ke boban a Jerusalén, é vôm be nga dzia so ba ve Jehôva metungha. Awu Yésu é nga ye so akôre n’nen da lôr édi é nga boban éyong Bisraelitas be nga dzi moan ntôma alu be nga kôre Egipto (1 Becor. 5:7, 8). É dzam Yésu a nga bo, é nga ye ve mintôl awôm-a-bèè naa be bo é bôr be ne tsîn ye ékôan bekristen (Beéph. 2:20-22). É ne fe mbeng a yem naa nfufup ékisoan, Jerusalén a bele « mekoa 12 me ne ñe tsîn » me bele « biyôla 12, ébi mintôl 12 moan ntôma » me too ntsilan ayô (Mel. 21:10-14). Ôwé, besôsôe mintôl, be mbe be bele mura ayem nfa ye naa é ngiagh Jehôva é dzalban. Dzam té da ve naa, bi wokh amu dzé Yésu a nga kômô tobe sugha Pascua té ya be, ôsu vèè, a bo Ésesang ndziane Nti.

Beyeghe 70 ye beyeghe bevoo, béé mbe ki Ésesang ndziane Nti. Amben éde, besôsôe beyeghe bèñ besese be mbe buan é dzam Yésu a nga sum a bo alu té : Ésesang ndziane Nti. Beyeghe besese be nga bo minwaghane mboan ôsu vaa, baa fe be nga ye ñi élat akal édjié, Yésu a nga kobe a mintôl mièñ alu té (Luc 22:29, 30).