É sugha ndziane Yésu

Mimbu mise, Bejudíos nge ki Bejuif be mbe bé dzemle fet Pascua nge ki Pâque é ngoan Nisan é too alu 14. Fet té ébe dé simane be naa, Jehôva a nga kôre be minkôm be mbe Egipto nge ki Égypte, ye kee be a Si ngiagh. Mbu 33 ye metam mèè, Yésu baabe mintôô mièñ, be nga bo fet Pâque a Jérusalem, édzina é ne a nda ayô. Niène ndziane ô nga man, Yésu a nga dzô naa : “Môr mboo ya ébe mina a ye me kong.” Bifiè bité bi nga bira name, éde be nga sili Yésu naa : “A ne za ?” Yésu a nga dzô naa : “A ne é môr ma ke nfem.” Ane a nga kee Judas Iscariote éfu nfem. Étéñ te ébién, Judas a nga tebe ve kuiñ nda atan.

A kôre ye vèè Yésu a nga bo meyaghlan, a mane kikh nfem bifus ye kap wô ya beyeghe be nga lighi. A nga dzô naa : “Dzaahane nfem wi. Ô ne éfônan ye é ñuu dzam ma ye ve akal denan.” Ane a nga bera bo meyaghlan mefe, a toa vino ye kee ñe beyeghe bèñ. A nga dzô naa : “Ñaahane vino ñi. A ne éfônane ye mekî mam ma ye ve, nfa ye naa minsem mi tobe ndjiane. Ma kiagh mina naa, mia ye tobe bekéza bia be mina a dzôp été. Boghane de mimbu mise naa mi simane ma.” Éde beyeghe Yésu ba bo ésesang té mimbu mise, môs té ngogho asese. Ba luè fet té naa Ésesang ôsiman awu Yésu.

Niène ndziane ô nga man, mintôô mi nga sum wômane naa ba kômô yem za a dang éban. Éde Yésu a dzô be naa : “É môr a dang éban ézizang denan a ne éñi a simane naa émién a ne kaa éban.”

Yésu a nga bera dzô naa : “Mi ne mengom mam. Ma dzô mina é mam mese Tare a kômô naa me dzô mina. Me nkuna ke kôane Tare a dzôp été. Ve mina, mia ye lighe a si va, ye naa bôr ba ye yem naa mi ne beyeghe bam éyong ba ye yen édzing é ne ézizang denan. Mina yiène dzinghane aval ane me va dzing mina.”

Yésu a nga sughlane bo Jehôva meyaghlan, é sili ñe naa a kame beyeghe bèñ bese. A nga dzaa Jehôva naa a vole be na abe sèñ nsama a mvoa été. A nga yaghlane fe naa éyôla Jehôva é bo nfufup. Ane Yésu babe mintôô mièñ be nga yiè Jehôva bya bi ôlughu, ye kuiñ atan. É tam be nga zu biñ Yésu é nga yir bébéñ.