Lereghane naa mia yem mbeng akal befam Jehôva ye Yésu ba belane be ékôan été

1. Bedas bevé bézing Yésu a nga ve bia ?

MOAN môr ézing yé si ñi éé dzi ki vole bôt aval ane Yésu a nga bo de. Éyong a mbe a si va, Yésu a nga belan é ngu’u dzèñ naa a bo mekengha nfa ye a vole é bôr bevoo (Luc 9:12-17). A nga ve é das da dang bedas besese éyong a nga ve éning dèñ akal boan be-bôt (Jean 15:13). A téé ye éyong a nga wôme, Yésu éé dzi ki sim naa a vole bia. Aval a nga kiagh de, a nga dzaa Jehôva naa, a ve bia nfufup nsisim wèñ, naa a ayeghle, ye fôlô bia (Jean 14:16, 17, atoan ; 16:13). Éde, ngalane bisulan ye bikôan bia, Yésu a ve bia é dzôm bia yi naa bi yeghle bôr be ye si ése ngura Biblia ye bo beyeghe (Mat. 28:18-20).

2. Beza be ne « é bôr be ne ane bedas » bia yen nten Beéphésien 4:7, 8 ?

² N’yeneghane das éfe Yésu a nga ve bia. Ntôô Pablo a nga tsili naa, niène Yésu a nga bet mevôm me ne ôyap ôyô, « a nga ve bôr ane bedas » (A lang Beéphésien 4:7, 8). Pablo a nga ve ayilgha naa, Yésu a nga ve bedas beté nfa ye naa, be tsini naa ba vole ékôan ébe abuiñ meval (Beéph. 1:22, 23 ; 4:11-13). Ému, nsama bôr be ne ane bedas beté, bi ne lang, bamvene, bemvene be y’ékôan ye bedeghe bikôana. Bebela a ne naa, befam beté, be ne bebo minsem, éde baa fe, ba bo bikop (Jacq. 3:2). Ve, Nti waa Yésu Christ, a belane befam beté naa be vole bia ; be ne bedas a ve bia.

3. Lereghan aval avé bia besese bi ne sukh ésèñ « é bôr be ne ane bedas » ba bo.

³ Yésu a belane befam beté naa be bo môra ésèñ nfa y’avole ékôan (Beéph. 4:12). Ve, bia besese bi ne be vole naa be tugha yem dzale môra ésèñ té. N’vaane éfônan : Abim ye ébe bia ba sèñ nfa ya long menda m’ékôan. Éba bevoo, ba sukh bisèñ éyong ba ve bidzi, ba lerane bôt, ye bo mam mefe. Aval daa fe, ye é mam bia dzô ye bo, bia bese bi ne vole bamvene, bemvene be y’ékôan ye bedeghe bikôan naa be tugha wône Ékôan. Nfasghan aval bia bese bi ne buan é môra ésèñ ba bo, ye aval bi ne lere Yésu ye befam beté, naa bia dzing é môra ésèñ ba bo.

BAMVENE BA BO « BISÈÑ BI NE ÉBAN »

4. Za bisèñ bizing bamvene be nga bo ntet mimbu ôsua ?

⁴ Ntet mimbu ôsua, be nga tele befam bézing ane bamvene (1 Tim. 3:8). A ne bo naa, befam beté ébe be nga bo « bisèñ bi ne éban » Pablo a nga kobe bie (1 Becor. 12:28). Da yene naa, bamvene be mbe bé bo bisèñ bi ne éban nfa ye naa, bemvene be bele abuiñ tam ya bembe ayeghle, ye yem wulu ékôan. Éyong ézing bamvene be nga vole naa, be bo becopias be ye minfufup Mintsili, nge ki a kus é biôm bi mbe éban naa be bo becopias beté.

5. Za bisèñ bizing bi ne éban bamvene ba bo ému ?

⁵ Tamane simane bisèñ bizing bamvene ba bo ékôan denan été (1 Pierre 4:10). Be ne tsiè mam me mono ékôan été, nge ki mam me ye mebeng minkanghle, a sili mebakh, ye ve naa bekare fuèñ be bele mebakh meté. Be ne belan é baparatos ba lere bingengeng nge ki ba bôm mezik, be ne wulu abeng minkanghle nge ki faa, a vole a baghle nda ékôan nfuban. Bisèñ bisese bité bi ne éban naa ékôan é wulu mbeng (1 Becor. 14:40). Ye fe naa, abim bamvene ba wulu mengap mézing me ye ésula ye ézizang sono, ye ve fe mintun. Biyong bizing, mvene a ne sili amvene ézing naa, a ke lerane ñe éyong a ke fep moadzang nge ki kal dzaa ézing, nfa ye naa a saghe ñe.

6. Za mekalgha mézing bi bele naa bi dzing ésèñ bamvene baa ba bo ?

⁶ Aval avé ékôan ngura da buan ésèñ bamvene ? Beberlyb, kal dzaa ézing ya Bolivia, a dzô naa : « Ma tugha yeme buane bisulan amu avole bamvene ba ve. Ngalan ésèñ ba bo, me ne yiè bya, a ve biyalan, a bèè mintun ye ñong ayeghle ngalane bingengeng ye bivaghle. Ba kale mimbèñ mi ye nda ékôan, nfa ye naa é bôr be ne été be tugha yem buan ayeghle ba ve. Ba vole fe naa, é bôr béé se ki tobe bisulan a nda ékôan, be buane bie ngalane videoconferencia. Niène ésulan da man, ba vole nfa ya ve nda ékôan nfuban, ye lang é mono a ne éwala biveve été, ye fe ve naa, bi bele mebakh bia yi akal bisulan ye minkanghle. Ma bira be ve akiba akal mam mesese meté ! » Leslie, éñi a tobe a Colombia, a bele fe n’nôm a too mvene a dzô naa : « N’nôm wom a bira belane bamvene nfa ya vole ñe a bo bisèñ bizing. Nge bamvene beté béé mbe ki, a nga ye bele édedèè abuiñ ésèñ ya bo. Akal dzam té, éde ma ve be akiba akal nsaza wôba, ye amu ba bo de ya n’nem ôsese. » Kaa bisô naa, é mam bekal baa beté be va dzô, a ne é mam mia fe, mia wôran (1 Tim. 3:13).

7. Aval avé bi ne lere naa bia yem mbeng akal ésèñ bamvene baa ba bo ? (A daghe fe évaghle).

⁷ Amben bia yem mbeng akal ésèñ bamvene ba bo, Bible a saghe bia naa : « Bi lere naa bia yem mbeng » (Becol. 3:15). Krzysztof, mvene ézing ya Finlandia, a lere naa a yem mbeng aval di : « Ma lôm kalare nge ki mensaje é vôm ma furu éfus ya Bible ye tugha tsili aval amvene ézing a nga saghe ma, nge ki amu dzé ma bira dzing ésèñ a bo. » Pascal ye Jael, ba ning Nueva Caledonia, ba bo ngura aval meyaghlan akal bamvene. Pascal a dzô naa : « É ntoo ôyôm tam, meyaghlan me ndzaane mèè, ye meyaghlan akal akiba bia ve Nzame, me mbe akal bobedzang beté. » Jehôva a wokh aval meyaghlan meté, ye naa, ékôan ésese ngura da buane me (2 Becor. 1:11).

BEMVENE BE Y’ÉKÔAN « BA SÈÑ NGU’U ÉZIZANG DENAN »

8. Amu dzé Pablo a nga tsili naa bemvene be ye ntet mimbu ôsua be mbe bé « sèñ ngu’u » ? (1 Bethessalonicien 5:12, 13)

⁸ Bemvene be ye ntet mimbu ôsua, be mbe bé sèñ ngu’u akal ékôan (A lang 1 Bethessalonicien 5:12, 13 ; 1 Tim. 5:17). Be mbe bé « lere » ékôan zen, da yili naa, a wulu bisulan bi y’ékôan, ye ñong minkighan ane nsama bemvene. Be mbe « bé bame » bobeñang ye bekal beba, bé ve be melepgha ma yiène ve, bé ve me ye édzing nfa ya kame ékôan (1 Beth. 2:11, 12 ; 2 Tim. 4:2). Bebela a ne naa, befam beté, be mbe fe bé sèñ ngu’u nfa ye naa be yem baghle menda me-bôr meba, ye naa be tobe ngu’u nfa ya nsisim (1 Tim. 3:2, 4 ; Tite 1:6-9).

9. Za meyem bemvene be bele ému ?

⁹ Ému wi, bemvene be bele abuiñ ésèñ. Be ne bekare fuèñ (2 Tim. 4:5). Ba ve mbemba éfônan éyong ba kanghle ya ayông, ba kôman ésèñ minkanghle mebeng minkanghle été, ye vole fe bia naa, bia fe bi kanghle ye bo beyeghe aval da yiène. Be ne fe bekikh minsang be ne n’nem éngôngoo ye kaa ôbangam. Éyong moan kristen ézing a bo nsem ônen, bemvene ba ve mengu’u naa be vole ñe naa a bera kôm élar dèñ ye Jehôva. Été té bièn, ba dzeng fe naa be baghle ékôan nfuban (1 Becor. 5:12, 13 ; Begal. 6:1). Ôsusua, bemvene ba tare bo bebaghle (1 Pierre 5:1-3). Ba tugha yem kôman mintun ba ve. Ba ve mengu’u naa be mane yem bôr besese be y’ékôan deba, ye ke fep é bôr ba yi avole. Bemvene bézing ba sukh fe bisèñ melong, ya baghle menda bikôan. Ba sèñ fe akal a kômane bura bisesang, akal be Comité de Enlace con los Hospitales nge ki Commité de Liaison Hospitalier été, ba ke ba daghe minkôkoan menda mebiang, ye bo abuiñ mam mefe. Ôwé, bemvene ba sèñ ngu’u akal daa !

10. Za mekalgha mézing bi bele naa bi dzing bemvene bèè ba sèñ ngu’u ?

¹⁰ Jehôva a nga dzô naa bebaghle ba ye bia tugha kale, ye naa, « biaa ye ki fe fonghane beñeñèè nge ki a ko wong » (Jér. 23:4). Johanna, kal dzaa ézing ya Finlandia a nga yen naa, bifiè bité bi ne bebela éyong ñia a nga bele môra ôkoan ézing. A kane naa : « Amben é ne me ndzukh naa me kar é bôr bevoo aval ma wôran, é mvene ézing méé mbe ki mé tugha yem, a nga lere ma ôdzibi é yaghlan ye ma, ye ban me naa Jehôva a dzing ma. Maa tugha ki fe simane bifiè a nga belane bie, ve, me ngen ma simane naa, me nga wôrane naa, me ne nkaman. Ma bunu naa, Jehôva éñe a nga lôm ñe naa a zu me vole é tam me nga yi de. » Aval avé bemvene be y’ékôan denan be nga vole mia ?

11. Aval avé bi ne lere naa bia yem mbeng akal bemvene ? (A daghe fe évaghle).

¹¹ Jehôva a kômô naa bi lere bemvene naa bia yem mbeng « akal ésèñ ba bo » (1 Beth. 5:12, 13). Henrietta, éñi a tobe a Finlandia a dzô naa : « Bemvene ba vole é bôr bevoo ya n’nem ôsese, ve, dzam té daa yili ki naa ébe ba dang bele abuiñ tam ye ngu’u, nge ki naa, baa tôbane ki mindzukh mife bining bieba. Biyong bizing, me wôla be dzô fave naa : ‘Ye wa yem ? Ô ne faa mbemba mvene. Ma bunu faa naa wa yem de.’ » Kal dzaa ézing ya Turquía nge ki Turquie a too éyôla naa Sera a dzô naa : « Bemvene baa fe ba yi naa be saghe be, nfa ye naa, be tsini naa ba bo ésèñ deba. Éde, bi ne be tsili moan kalare, a bane be naa be zu dzi ye bia, nge ki a bane be naa, be kuiñ minkanghle ye bia. » Ye mvene ézing a ne ékôan denan naa mia bira dzing mengu’u a ve ? Dzenghane meval mi ne ñe lere naa, mia bira dzing ésèñ a bo (1 Becor. 16:18).

BEDEGHE BIKÔAN BA WÔNE BIA

12. Za nsama bôr ôfe Yésu a nga belane wô naa a wône bikôan ntet mimbu ôsua ? (1 Bethessalonicien 2:7, 8)

¹² Yésu Christ a nga tele fe befam ékôan naa be vole aval afe. A nga belane bemvene be ya Jerusalén naa be lôm Pablo nge ki Paul, Barnabas nge ki Bernabé, ye é bôr bevoo ane bedeghe bikôan (Bisè mintôl 11:22). Amu dzé ? A ne amu akalgha té, éde ba tele de bamvene ye bemvene ékôan été : naa be wône bikôan (Bisè mintôl 15:40, 41). Befam beté be nga yebe naa ba dzimle abuiñ mam mézing naa be bo ésèñ té. Be nga ye fe dzimle bining bieba naa be yeghle ye saghe é bôr bevoo (A lang 1 Bethessalonicien 2:7, 8).

13. Za meyem bedeghe bikôan be bele ?

¹³ Bedeghe bikôan ba bira bo bikena. Bevoo be ye été, ba bo mintet bekilómetros naa be ke fep bikôan. Kada sono, ndeghe bikôan a ve abuiñ mintun, a fep bobedzang, a bo bisulan akal bempwaghe mefan, bisulan akal bemvene, ye bisulan akal minkanghle. A kômane mintun, bisesang melu melal, ye bisesang alu daa. A yeghle besikôlô akal bempwaghe mefan, a takh ngura aval bisulan akal bempwaghe mefan be ye nsama bikôan, ye tsiè fe mam mefe ; ye fe naa, biyong bizing ntem ékôan wa dzô ñe naa a bo bisèñ bizing bi too fe ngôngôlô.

14. Za mekalgha mézing bi bele naa bi dzing é ngu’u ésèñ bedeghe bikôan bèè ba bo ?

¹⁴ Aval avé bikôan bia buan é mbemba ésèñ bedeghe bikôan ba bo ? É kobe adzô minfeban bedeghe bikôan, moadzang ézing ya Turquía a dzô naa : « Éyong ésese bedeghe bikôan ba zu bia fep, da tsini me naa me lôr abuiñ tam mé vole bobedzang ye bekal bam. Me tobaneyang abuiñ bedeghe bikôan ; ve, mboo ézing y’été éé dzi ki me lere naa a dang bele abuiñ ésèñ ya bo, nge ki naa méé se ki kobe ye ñe. » Johanna, éñi bi va tare tu ôyô, a dzô naa, a nga kuiñ ye ndeghe bikôan ézing ésèñ minkanghle, ve, béé dzi ki kuane môr ézing a nda. A dzô naa : « Amben é nga boban aval té, ma ye tsini naa ma simane môs té. A ke kuane naa, bobeñang bam bebèñ be ndaghe ke tobe kisoan éfe, éde be mbe bé bira ma makh. Éde ndeghe bikôan té a nga saghe ma, ye vole ma a yen naa éyong ézing é tam ñi, bii se ki tobe vôm mboo ye menda me-bôr mèè, ye menvuiñ mèè, ve nféféñ éning, bia ye bele abuiñ tam naa bia tobe ye be. » Abuiñ y’ébe bia, daa fe, da siman é mbemba metam bi nga lôt ye bedeghe bikôan baa, ye fe aval be nga vole bia (Bisè mintôl 20:37–21:1).

15. (a) Aval ane bia lang de nten 3 Jean 5-8, aval avé bi ne lere bedeghe bikôan bèè naa, bia yem mbeng akal ésèñ ba bo ? (A daghe fe évaghle). (b) Amu dzé bia yiène lere naa bia bis é binenga befam beté, aval avé ki bi ne de bo ? (A daghe nkaalé « Simghane beyaa beba. »)

¹⁵ Ntôô Juan a nga saghe Gayo nge ki Gaïus a lere é bobedzang be nga zu ñe fep, añep ye ve be naa, « be bulane é zen deba aval da yiène ébe Nzame » (A lang 3 Jean 5-8). Aval évoo bi ne de bo, a ne éyong bia bane bedeghe bikôan naa, be zu dzi é nda dzèè. Aval afe bi ne de bo, é ne a sukh mintaane mimam mi ne mboan akal ésèñ minkanghle éyong ndeghe bikôan a so. Leslie, éñi bi va tu ôyô, a lere naa ayem mbeng meval mefe. A dzô naa : « Ma yaghlane Jehôva naa, a dzale mekômgha meba. Ma, ye n’nôm wom, bi nga tsili fe be bidzango, bi dzô be nté mbé minfeban mieba mi nga vole bia. » Bia yiène simane naa, bedeghe bikôan be ne bôr ane bia. Biyong bizing, ba koan, be bele meyep, nge ki naa, be ne sili mo ô si. Éde, é mbemba bifiè bi ne be dzô, nge ki é boan bedas bi ne be ve, é ne bo aval Jehôva a yalane meyaghlan be nga bo ñe ! (Mink. 12:25)

BIA YI « É BÔR BE NE ANE BEDAS »

16. Aval bia lang de nten Minkana 3:27, za minsili bobedzang be ne sili bebién ?

¹⁶ A si ése ngura, bia yi abuiñ bobedzang naa be sèñ ane « bôr ane bedas. » Nge ô ne é moadzang a dubaneya, « ye ô bele ngu’u ya vole ? » (A lang Minkana 3:27) Ye ô ntoo nkoghane naa wa sèñ ane amvene ? Nge ô ntoo nkoghane naa wa sèñ ane amvene, ye ô ne bera sèñ ngu’u naa ô dzale nsonghane ya bo mvenec ? Ye ô ne kômane naa wa ke Sikôlô bekare fuèñ be y’Édjié Nzame ? Sikôlô té a ye wô kômane naa, Yésu a tugha yem belane wa. Nge wa wôrane naa, wéé be ki nkôman, yaghlane Jehôva akal té. Silighe ñe naa a ve wa nfufup nsisim wèñ naa, ô tugha yem dzale bisèñ ba kee wa (Luc 11:13 ; Bisè mintôl 20:28).

17. Za dzam « é bôt be ne ane bedas » beté, ba lere nfa Yésu Christ, é Kéza waa ?

¹⁷ É bobedzang Yésu a nga tele ane « bôr ane bedas » be ne é ndem da lere naa, a wulu ye bia melu me y’asughlane ma (Mat. 28:20). Bia ve édedèè abuiñ akiba amu naa bi bele é kéza a ne édzing y’akap, a yem é dzam é bièn bia yi, ye ve bia bobedzang beté nfa ya vole bia. Ôsu vèè, dzenghane meval mi ne lere naa, mia yem mbeng akal ngu’u ésèñ befam beté ba bo akal dèè. Mi taa bo kaa vaghle ve Jehôva akiba, éñi a ne tsîn ye « mbemba bedas besese, ye minvaane misese mi ne mbeng » (Jacq. 1:17).