Vughe aval Jehôva ba Yésu ba tem

1-2. A dzing Jehôva da sili za dzam, ye naa, aval avé Yésu a nga lere de ?

Yésu a nga lere é dzam é mbe édedèè éban menvena Nzame été, éyong a nga dzô naa : « Wa yiène dzing é Nzame wiè ye n’nem ôse wiè, é ñuu duè ése, é ngu’u duè ése, ye ôsimane wiè ôse » (Luc 10:27). Akal dzam té, éde bia dzing de Jehôva ye é biôm bisese bi bele, ye fe é dzôm ésese bi ne. Été bi ne lang, minkômane miè, awôrane dèè, ye é ngu’u dzèè. Bi ne fe lang été, aval bia tem. É ne été naa, bii se ki mane tugha wokh ôtemgha Jehôva ôsese. Ve, bi ne tugha wokh ôtemgha wèñ éyong bia yeghe aval « Yésu a tem », amu naa, Yésu a tugha yem, ye vu kaa ékop aval Ésaa a tem (1 Becor. 2:16 ye nota de estudio « nosotros sí tenemos la mente de Cristo »).

² Yésu a mbe é dzing Jehôva ye ôtemgha wèñ ôse. A mbe é yem nkômane Jehôva akal dèñ, éde a mbe nkoghane naa, a béé wô amben dzam té é nga ye yili naa, a tubane mindzukh akal sôsôe. Amu Yésu a nga bem ôsimane wèñ naa a ve Ésaa n’nem mbeng, éde éé dzi ki likh naa dzam éfe ézing, éde é dang éban éning dèñ.

3. Za ayeghle ntôô Pedro a nga ñong ébe Yésu, ye naa, za dzam ntôô Pedro a nga saghe bekristen bevoo naa be bo ? (1 Pierre 4:1).

³ Pedro ye mintôô mivoo be nga bele maa ya lôr tam ya Yésu, ébe fe be nga tare yeghe a yem aval a tem. Éyong a nga tsili é kalare ôsua wèñ ye nsisim Nzame, a nga saghe bekristen bevoo naa be tobe nkoghane naa, be bele aval étéñ ya nsisim Krist a bele (a lang 1 Pierre 4:1). Pedro a nga belane nkobe bizima éyong a nga tsili naa : « Tobeghane nkoghane ». Nge bekristen be yeghe a tem aval Krist a mbe é tem, ba ye bele é dzam ésese ba yi naa be lumane nkôman ôsese ye a bo é dzam é ne abé, ye luman émo Satan a djié (2 Becor. 10:3-5 ; Beéph. 6:12).

4. Za aval ayeghle di é ne wô vole naa ô béé melepgha Pedro a nga ve ?

⁴ Bia ye fas aval Yésu a tem, ye aval avé bi ne ñe vu. Bia ye yen aval bi ne (1) yeghe a vu aval Jehôva a tem, (2) bo asili ñuu, ye (3) bele mbemba ken bi yaghbe ébe Jehôva ngalane meyeghlan.

VUGHE AVAL JEHÔVA A TEM

5. Éyong évé, Pedro éé dzi ki tem ane Jehôva ?

⁵ Ntamane yen éyong ézing Pedro éé dzi ki tem ane Jehôva ébe adzô ézing. Yésu a nga dzô mintôô mièñ naa, a nga yiène ke a Jerusalén, é vôm betebe ôsu be ye menda menzame, be nga ye ñe biñ, a tsible ñe, ye wiñ ñe (Mat. 16:21). É nga yiène bo Pedro ndzukh a yebe naa, Jehôva a nga ye likh naa be wiñ Yésu, éñi a mbe ôyane akal Israel ye fe é Mesías be nga kiagh be (Mat. 16:16). Ya dzam té, éde Pedro a nga luè Yésu nfeng ye dzô ñe naa : « A Nti, boghe mbemba fulu ya wamién ; aval dzam té daa yiène ki vaghle biaane wa » (Mat. 16:22). Amu naa Pedro éé dzi ki tem ane Jehôva ébe adzô té, éde éé dzi ki bele ôtemgha ôvoo ya Yésu.

6. Za aval Yésu a nga lere naa a mbe é tem ane Jehôva ?

⁶ Yésu a nga lere naa a mbe é tem ane Ésaa wèñ a ne a dzôp été. Yésu a nga dzô Pedro naa : « Lôreghe ma a mvus a Satan ! Ô ne akoa da ve naa me kole ôbakh, amu ô bele, se ki ôsimane Nzame, ve, ôtemgha boan be-bôt » (Mat. 16:23). Éyong ézing, Pedro éé mbe ki a bele mbia ôsiman éyong a nga dzô de, ve, Yésu éé dzi ki yebe melepgha a nga ve ñe. Bi ne ñong ayeghle ya dzam té. Nkômane Jehôva wéé mbe ki naa, Yésu a kaman éning dèñ nfa é dzam é nga ye biaane ñe. Tam té, Pedro a nga ñong môra ayeghle nfa aval a mbe tem ane Jehôva.

7. Za aval Pedro a nga lere ôsu naa, a nga kômô songhane ôtemgha wèñ nfa ye naa, a bele ôtemgha Jehôva ? (A daghe é ne atarga).

⁷ Pedro a nga lere ôsu naa, a nga kômô songhane ôtemgha wèñ, nfa ye naa a bele ôtemgha Jehôva. Tam é nga kuiñ akal Jehôva naa, meyong mefe maa me sum fe ñe kang. Éde be nga lôm Pedro naa a ke kanghle Cornelio, éñi a nga ye bo é Gentil ôsua a nga venghane kristen. Bejudíos, béé mbe ki bé bo abuiñ mam nsama ya Begentiles. Ya dzam té, éde biaa yen ki de éyeyaghane naa, be nga yiène kômane Pedro nfa ye naa a dzale ayem dèñ. Éyong Pedro a nga wokh nkômane Nzame nfa adzô té, éde a nga songhane ôtemgha wèñ nfa té. Asughlan, éyong be nga lôm ñe wéñ, Pedro a nga ke « kaa kè » (Bisè mintôl 10:28, 29). A nga kanghle Cornelio ya é nda-bôr dzèñ, éde be nga duban (Bisè mintôl 10:21-23, 34, 35, 44-48).

8. Za aval bi ne lere naa ôtemgha waa, wa fônan éwi Jehôva ? (1 Pierre 3:8 ye atoan).

⁸ Mimbu ôsu, Pedro a nga saghe bekristen bevoo naa be « tobe king dzaa » (a lang 1 Pierre 3:8 ye atoan). Bia, bôr be ye ayong Jehôva, bi ne tobe king dzaa nge bi vu ôtemgha Jehôva bia kuane wô Éfiè dèñ été. Éfônan, Yésu a nga saghe beyeghe bèñ naa, be tele Édjié Nzame ôsu bining bieba (Mat. 6:33). Ya dzam té ôsiman, nkare fuèñ ézing ye ékôan denan, a ne top naa, a bo mpwaghe-mefan, nge ki naa, a bo ngura aval ésèñ Ékôan Jehôva été. Ndaane naa bi lep ñe naa, a bo mbemba fulu ya émién, bia yiène ñe saghe ye sukh ñe asi nfa mengu’u a kômô ve.

BOGHE ASILI ÑUU

9-10. Za aval Yésu a nga lere naa, a mbe édedaa asili ñuu ?

⁹ Alu kaa naa be wiñ ñe, Yésu a nga ve Pedro ya mintôô mivôô ayeghle é mbe éban nfa ye a bo asili ñuu. Ôsusua, Yésu a nga lôm Pedro ba Juan naa be ke kômane mam akal bidzi be nga ye sughlane dzi nsama a too moan môt. Nkômane té été, be nga yiène bele moan ntseng ye betawôla naa, be sôp beyeng mebo kaa naa be sum dzi. Ve, za a nga ye bo ésèñ da sili asili ñuu té, éyong tam ye a dzi é nga ye kuiñ ?

¹⁰ Kaa de tare tem abuiñ biyong, Yésu a nga lere bura asili ñuu. Amu naa, a nga bo é dzam mbo ésèñ éñe a nga yiène bo, éde mintôô mièñ mi nga bira de kam. Yésu a nga vaa étôp a mbe a baghe a yôp, éde a nga tsini tawôla angereghe, a ve mendzim a moan ntseng été, ye sum naa a sôp be mebo (Jean 13:4, 5). É nga yiène ñe ñong abuiñ tam naa a mane sôp mintôô 12 mièñ mebo, amben éma Judas, éñi a nga ye ñe kong avitsang tam ôsu vaa. Ve, ye asili ñuu, Yésu a nga mane bo ésèñ té. Éde ya ôdzibi, Yésu a nga dzô be naa : « Ye mia wokh é dzam me va bo mina ? Mia luè me naa “N’yeghle” ye “Nti”, é ne fe été, amu naa me ne de. Vedaa, nge ma me ne Nti ye N’yeghle, me va sôp mina mebo, mina fe, mia yiène sôp mebo menan bevoo ya éba bevoo » (Jean 13:12-14).

11. Za aval Pedro a nga lere naa, a nga yeghe a bo asili ñuu ? (1 Pierre 5:5). (A daghe fe évaghle).

¹¹ Pedro a nga yeghe fulu asili ñuu ébe Yésu. A kuane naa Yésu a bulaneyang a dzôp été, Pedro a nga bo akengha, é sèñ é môr a nga byale ébokh (Bisè mintôl 1:8, 9 ; 3:2, 6-8). Éde, nkuna bôr ô nga yen bura dzam té ô nga zu é vôm Pedro a mbe (Bisè mintôl 3:11). Vedaa, Pedro éé dzi ki kômô naa, bôr be lughe ñe, amben a nga vem é vôm bôr ba dzing naa be lughe be. Ndaane de, a nga lere asili ñuu ye lere bôr naa be lughe Jehôva ya Yésu é dzô naa : « Ngalan éyôla [Yésu], ye mebun bi bele ébe éyôla dèñ, éde é môr mia yen ñi ye yem, a ve bo ngu’u » (Bisè mintôl 3:12-16). Bifiè Pedro a nga belane bie é kalare a nga tsili bekristen nfa éban ye a yeghe a bo asili ñuu, bi ne bia simane éyong Yésu a nga tsini tawôla angereghe ye sôp mebo mintôô mièñ (a lang 1 Pierre 5:5).

12. Za aval bi ne yeghe a bo asili ñuu ane Pedro ?

¹² Bi ne vu éfônane Pedro éyong bia yeghe a bo asili ñuu. A bo asili ñuu daa daghe ki fave é mam bia dzô. Éfiè Pedro a nga belane de akal « asili ñuu », da lere naa asili ñuu da daghe aval bia yen bia bebién, ye fe aval bia yen é bôr bevoo. Bia bo mam akal é bôr bevoo, amu naa bia dzing Jehôva, bia dzing be, ve, se ki amu bia dzing naa bôr be lughe bia. Nge bia sèhane Jehôva ye é bôr bevoo ya mevakh, kaa bis nge bôr ba yen mengu’u bia ve, nge ki kaa, bia ye lere naa bi ne asili ñuu (Mat. 6:1-4).

BELEGHE « MBEMBA KEN »

13. A bele « mbemba ken » da yili za dzam ?

¹³ A bele « mbemba ken » da yili za dzam ? (1 Pierre 4:7). É kristen a bele mbemba ken a ve mengu’u mesese mèñ naa a ñong é mbemba minkinghane mia bembe ébe ôtemgha Jehôva. Kristen té a yem naa, é dzam da éban éning dèñ, a ne élar a bele ya Jehôva. A yen émién aval da yiène, a yebe naa, aa yem ki mam mesese. A lere fe naa, a yaghbe ébe Nzame éyong a ne mban a yir Jehôva bébéñ meyaghlan été ya asili ñuua.

14. Za aval Pedro a nga lere môs ézing naa, éé dzi ki yaghbe ébe Jehôva ?

¹⁴ Alu é mbe kaa naa a wu, Yésu a nga ve beyeghe bèñ mbame wi : « Mina besese mia ye kole ôbakh étom dam alu di ». Ya mebun, éde Pedro a nga dzô naa : « Amben é bôr bevoo bese ba kole obakh étom duè, ve ma, maa ye ki vaghle kole ôbakh ! » Alu té, Yésu a nga ve beyeghe bèñ bézing melepgha ma : « Kenghan ôsu ye momo ye yaghlane mban » (Mat. 26:31, 33, 41). Nge Pedro a nga bèè melepgha meté, éyong ézing a nga ye yebe ya ayokh naa, a yem Yésu. Ndaane de, Pedro éé dzi ki yebe naa a yem n’yeghle wèñ. Éde, a nga bira dzôbane dzam té (Mat. 26:69-75).

15. Aval avé Yésu a nga baghle mbemba ken alu a nga sughlane lôr ane moan môr a binam ?

¹⁵ Yésu a nga yaghbe ya n’nem ôsese ébe Jehôva. Amben Yésu a mbe kaa ékop, a nga yaghlan abuiñ biyong. Dzam té é nga ve ñe naa, a bele ayokh ye a bo mam ma wulu nsama mboo ya nkômane Jehôva a mbe a bele akal dèñ (Mat. 26:39, 42, 44 ; Jean 18:4, 5). A daghe ane Yésu a mbe é yaghlan, é nga yiène bira name Pedro éning dèñ ése ngura.

16. Za aval Pedro a nga lere naa, a nga yeghe a bele mbembe ken ? (1 Pierre 4:7).

¹⁶ Ya tam, Pedro a nga tugha yaghbe ébe Jehôva meyaghlan été. Éyong Yésu a nga wômô, éde a nga ban Pedro ye mintôô mivoo naa, ba ye bele nfufup nsisim nfa ye naa, be dzale ésèñ minkanghle deba. Vedaa, éde a nga dzô be naa be yane a Jerusalén ya ke kuiñ dzam té da dzalban (Luc 24:49 ; Bisè mintôl 1:4, 5). Za dzam Pedro a nga bo nté a mbe é yane ? Pedro ye bekristen bevoo be « nga tsini meyaghlan été » (Bisè mintôl 1:13, 14). Ôsu vaa, é kalare ôsua wèñ, Pedro a nga saghe bekristen bevoo naa, be bele mbemba ken ye yaghbe ébe Jehôva meyaghlan été (a lang 1 Pierre 4:7). Pedro a nga yaghbe ébe Jehôva ye venghane nkum ékôan été (Begal. 2:9).

17. Afiang bo é mam mesese bia yem bo, za dzam bia yiène tsini naa bia bo ? (A daghe fe évaghle).

¹⁷ Naa bi bele mbemba ken, bia yiène bo mban a yaghbe ébe Jehôva meyaghlan été. Bia yiène wokh naa é ne éban naa bi tsini naa bia yaghlane Jehôva amben é mam mesese bia yem bo. Bia yiène de dang bera bo, éyong bia kômô ñong bura minkighane. Bia yiène yaghlane Jehôva naa, a lere bia zen, ya mebun naa, éñe a yem é dzam da dang mbeng akal daa.

18. Za aval bi ne songhane ôtemgha waa nfa ye naa, bi tugha yem vu aval Jehôva a tem ?

¹⁸ Bia bira ve akiba amu naa, Jehôva a nga vele bia aval da ve naa, bi ne vu mefulu mèñ (Atar. 1:26). É ne bebela naa, bii se ki vu Jehôva kaa bo ékop (Esaïe 55:9). Ve, ane Pedro, bi ne songhane ôtemgha waa nfa ye naa, bi tugha yem vu aval Jehôva a tem. Éde, ntsinighane naa bia vu aval Nzame a tem, bi bo asili ñuu ye bele mbemba ken.