Tobeghe mebun éyong ésese naa, Jehôva a ne wô vole

1. Aval avé Moisés a nga tobe Jehôva mebun éyong a nga kulu Bisraelitas Egipto ?

MOISÉS a ne mbemba éfônane ye bifônane ba tu é kalare Behébreu été nfa ya lere mebun (Behéb. 3:2-5 ; 11:23-25). A nga lere mebun meté éyong a nga kulu Bisraelitas Egipto. Éé dzi ki likh naa, ngu-ngu’u kéza ye Egipto ye nsama bizima wèñ ô ve naa a ko wong. É tobe Jehôva mebun, a nga ve naa ayong é kighan Évele mang ye fe éyang (Behéb. 11:27-29). É Bisraelitas be nga dang abuiñ a mbe éba be nga dzimle mebun meba naa, Jehôva a mbe be kale, ve, Moisés a nga tsini naa a tobe é Nzame wèñ mebun. Moisés a nga yem bo naa a ve mebun mèñ ébe Jehôva, amu naa, ya akengha, Nzame a nga ve Bisraelitas bidzi ye mendzim nkôr éyang étéa (Akô. 15:22-25 ; Bya 78:23-25).

2. Amu dzé Nzame a nga sili Moisés naa : « Ye é wo Jehôva ô ne édedèè étun ? » (Nlang 11:21-23).

² Amben Moisés a mbe a bele mebun me ne ngu’u, ve é nga kuiñ naa mbu mboo ôsu, ave Jehôva a nga kôre ayong Israel ye akengha, Moisés a nga sum sili nge Jehôva a mbe faa be ve tsit ane bidzi, aval ane a nga kiagh be de. É mbe Moisés ndzukh a tem aval avé Jehôva a nga ye bo naa a ve bakuru be-bôr bidzi nkôr éyang été. Naa a yalane ñe, éde Nzame a nga sili Moisés naa : « Ye é wo Jehôva ô ne édedèè étun ? » (A lang Nlang 11:21-23). E va, nsama bifiè « é wo Jehôva » wa tsinane nfufup nsisim Nzame nge ki, é ngu’u a bo de mam. Bebela a ne naa, Jehôva a mbe é sili Moisés naa, ‘Ye wa tem faa naa méé se ki dzale é dzam me va dzô naa ma ye bo ?’

3. Amu dzé bia yiène binan ébe nlang Moisés ye Bisraelitas ?

³ Ye ô yep-hang a n’nem éyong ézing nge Jehôva a ye wô ve wa ye é nda-bôr duè é dzôm mia yi nfa ya nsôn ? Ane ô bohang de nge ki kaa, ntamane binane nsama, ébe nlang Moisés ye éwi Bisraelitas be nga makh mebun ébe é ngu’u Jehôva naa a ne be baghle. Metsin metsing me ya Bible ma kuiñ nlang té été, ma ye bia vole a wône mebun mèè naa é wo Jehôva wéé se ki vaghle bo étun môs ézing.

AYEGHLE BIA ÑONG ÉBE MOISÉS YE ÉBE BISRAELITAS

4. Dzé é nga ve naa abuiñ bôr be sili nge Jehôva a mbe faa be ve bidzi nfa ya nsôn ?

⁴ Amu dzé abuiñ Bisraelitas be nga sum bele bisô naa, Jehôva a mbe be ve é dzôm ba yi nfa ya nsôn ? Bisraelitas ye « abuiñ bôr befe béé mbe ki Bisraelitas » be nga kôrô Egipto ye be, abong té é ntoo ôyôm tam, ave be sum wulu ye be éyang été, é zen da ke é Si ngiagh (Akô. 12:38 ; Deut. 8:15). É bôr béé mbe ki Bisraelitas nsama té été, be nga sum bo minkè nfa ndziane maná, éde abuiñ Bisaelitas baa fe, be nga ñii ébang té été (Nla. 11:4-6). Bôr be nga sum kômô dzi bidzi be mbe bé dzi éyong be mbe Egipto. Amu naa, ayong é mbe dé bira kè, éde Moisés a nga sum tem naa, éñe a nga yiène dzeng abim tsit da ye yiène nkuna bôr ôsese té, ve éé nga yem ki aval ye é vôm a mbe de bele (Nla. 11:13, 14).

5-6. Za ayeghle bi ne ñong nfa aval abo-dulu nsama bôr wéé mbe ki Bisraelitas é nga name abuiñ Bisraelitas ?

⁵ É bôr béé mbe ki Bisraelitas béé dzi ki yem mbeng akal é mam mese Jehôva a nga ve be. Ane abuiñ Bisraelitas be nga sum vu abo-dulu té. Bia fe, bi ne vu mbia abo-dulu bôr be ye émo be ne kaa yem mbeng, ye kaa fe yen naa Jehôva a ve bia éndagha abim da yiène bia. Dzam té é ne boban nge bia bo bi daghe a mvus é mam bi mbe bi bele, nge ki faa éyong bia ñamle é mam é bôr bevoo be bele. Vedèè, bia ye dang bele mevakh nge bi ne mevakh ye abim bi bele, a bo étéñ ésese bi tele.

⁶ Bisraelitas be nga yiène simane naa, Nzame a nga ban be naa, éyong ba ye kuiñ nféféñ si a nga kiagh be, a ye dzale mekômgha meba me ya nsôn. Ngiagh té é nga yiène dzaleban é Si ngiagh, se ki nté be mbe a zen éyang été. Aval dèè fe, ndaane naa bia bembe ébe é mam bii se ki bele émo di été, bia yiène dang bembe ébe é mam Jehôva a kiagh naa, a ye bia ve nféféñ éning. Bia bo fe mvèñ éyong bia binan ébe bifus bi ne wône mebun mèè ébe Jehôva.

7. Amu dzé bi ne tobe mebun naa é wo Jehôva wéé se ki édedèè étun ?

⁷ Ngeng ézing wa sili wamién, amu dzé Jehôva a nga sili Moisés naa : « Ye é wo Jehôva ô ne édedèè étun ? » Ya nsili té, Jehôva a nga yiène kômô naa, Moisés a tem é mam mebèñ ma : (1) É ngu’u dzèñ é ne kaa beniè. (2) A ne belan é ngu’u dzèñ vôm ôse amben mevôm bi ne tem naa, me ne édedèè ôyap. Amben be mbe ôyap éyang été, Jehôva a mbe a bele ngu’u naa a ve be abim tsit é mbe yiène Bisraelitas besese. Ye « é ngu-ngu’u wo wèñ », Nzame a nga lere naa, a ne vole ayong dèñ é vôm ôse é ne bo (Bya 136:11, 12). Éde, éyong bi tele mindzukh été, Jehôva a ne vole kada môr ye ébe bia é vôm ôsese bi ne (Bya 138:6, 7).

8. Dzé é ne bia vole naa bi taa bo bikop bivoo-bivoo, ane abuiñ bôr é mbe éyang été ? (A daghe fe évaghle).

⁸ Jehôva a nga dzale é dzam a nga kiagh, ane a nga lôm ayong ngura, ndanguna becodornices nge ki becaille. Vedèè, Bisraelitas béé dzi ki ve Nzame akiba akal akengha té. Ndaane de, ye ôzang, abuiñ ye été é nga kômô dang bera bele abim déé nga yiène ki be. Éde, ébe ngura nté môs ye étun, be nga kôan édedèè abuiñ becodornices. Ane, é bôr « be nga bele aval mbia ôzang té », Jehôva a nga wokh be abé ye ve be akira (Nla. 11:31-34). Bi ne ñong ayeghle ya éfônane té. Bia yiène bo nkee naa bi taa bo ôzang akum. A bo naa bi ne kuma nge ki njijèñ môr, é dzam bia yiène tele ôsu é ne naa bi kôane « mimbeng mi-mam a dzôp été » bi dzeng naa bi bele élar é ne ngu’u ye Jehôva ba Yésu (Mat. 6:19, 20 ; Luc 16:9). Éyong bia bo de, bi ne tobe ndzi-n’nem naa, Jehôva a ye dzale mekômgha me ya nsôn mèè.

9. Za dzam bi ne tobe de mebun nfa avole da so bia ébe Nzame ?

⁹ Jehôva a ne nkoghane naa a vole ayong dèñ ému. Ve dzam té daa yili ki naa biaa ye ki vaghle dzimle biôm bi ye mo, nge ki naa, biaa ye ki vaghle wokh zèñb. Ve, Jehôva aa ye ki bia vaghle lame. A ye bia vole mbimbia bitéñ bisese bia ye tubane bio. Aval avé bi ne lere naa bia tobe mebun naa, Jehôva a ye dzale mekômgha me ya nsôn mèè ? Ntamane yen bitéñ bibèñ bi : (1) Éyong bia tubane mindzukh nfa ye a bele mono ye, (2) éyong bia takh é mam bi ne yi akal melu ma zu.

ÉYONG BIA TUBANE MINDZUKH NFA YA BELE MONO

10. Za mindzukh mi mono bi ne tubane mio ?

¹⁰ Nté bia tugha ke bia ke amangha ye émo di, bia yiène yane naa é tugha ke da bo édedèè ndzukh naa bi bele mono. Bia ye yen abuiñ mintsenane nfa mam me poletik, bibubua bi-bam, meluman, nge ki faa abuiñ akoan. Mam meté me ne tugha ke ma ve naa bi sia dzimle ésèñ, akum dèè, nge ki faa é nda dzèè. Da ye bia sili naa ngeng ézing bi dzeng nféféñ ésèñ bébéñ é vôm bi too, nge ki faa naa bi ke tobe vôm nfe ya é nda-bôr dzèè, nfa ye naa bi dzale mekômgha me ya nsôn meba. Dzé é ne bia vole naa bi ñong minkighane mia lere naa bi bele mebun ébe ngu-ngu’u wo Jehôva ?

11. Dzé é ne wô vole naa ô dang mindzukh mi mono ? (Luc 12:29-31).

¹¹ É dzam da dang éban wa yiène bo é ne naa, ô kare Jehôva « meyep ô bele a n’nem », dzam té da ye wô bira vole (Mink. 16:3). Dzaaghe Jehôva naa a ve wa é fakh da ye wô ve naa, ô ñong mbemba minkighane ye fe naa, ô bele n’nem ô bôô ôsi nfa ye naa, ô « taa bira yep a n’nem » ya étéñ ô tele (a lang Luc 12:29-31). dzaaghe ñe naa a vole wa naa, ô tobe mevakh ya abim biôm ô bele (1 Tim. 6:7, 8). Boghe mindzeng mebakh mèè été nfa aval ô ne dang mindzukh mi mono. Abuiñ bôt é nga buane meyeghle ma kuiñ mebakh me ne a nden wèè jw.org été, ma lere aval bi ne dang mindzukh mi mono.

12. Za minsili mi ne vole moan kristen naa a ñong minkighane mia dang mbeng akal é nda bôt dzèñ ?

¹² Bekristen bézing be nga yebe ésèñ be nga ve bo é too ôyap ya é vôm é nda-bôt dzeba da ning. Ve ôsu vèè, ane be nga yen naa nkighane té ô mbe abé. Kaa naa ô yebe nféféñ ésèñ, ô taa daghe fave é miang wa ye wun été. É dzam ôsua wa yiène tare tem é ne, nge da ye wô vole wa, ya é nda-bôt duè naa mi tsini ôsu ya tobe Jehôva bébéñ (Luc 14:28). Éde silighe wamièn naa : ‘Aval avé dzam té é ne name alukh dam, nge me yebe ésèñ da ve naa, me ke n’nôm wom nge ki ngal wom ôyap ? Ye da ye me likh naa me ke bisulan bisese, me bo ayông minkanghle, ya tobe mban ya bobedzang bam ?’ Nge ô bele boan, wa yiène fe sili nsili ô ne éban wi : ‘Za aval ma ye yale é boan bam « melepgha ya meyeghle Jehôva été » nge méé se ki ya bo ?’ (Beéph. 6:4). Lighe naa ôsiman Jehôva éwô ô wulu ya wa, ndaane éwi bôr be ye é nda bôr duè, nge ki mengom muè me ne kaa kang metsin metsing me ya Bibliac. Tony, éñi a ning Asia occidental, abuiñ mimbanegha mi nga ve ñe mbemba ésèñ ba yaane ñe mvèñ si fe. Ve, niène a nga mane yaghlan ya kobe ba ngal nfa té, ane a nga ñong nkighane naa a tep bisèñ bité, ya tem aval é nda bôr dzèñ é mbe ning moan éning. Ému, éyong a simane nkighan a nga ñong alé, Tony a dzô naa : « Me bele môra maa naa me voleyang abuiñ bôr a yem Jehôva, ye naa, é boan bèè be ne édedèè nsaza a bebela été. É nda bôr dzèè é yegheyang naa, nté sese bia dzale bifié bia kuiñ nten Matthieu 6:33, Jehôva a ye bia ve é mam bia yi nfa ya nsôn. »

ÉYONG BIA TAKH É MAM BI NE YI NFA YA NSÔN AKAL MELU MA ZU

13. Mam mevé bi ne bo éndagha nfa ye naa bi bele é dzôm bia yi, nfa ya nsôn akal éyong bia ye bo beñabôrô ?

¹³ Bi ne fe lere abim avé bia tobe Jehôva mebun éyong bia takh mam éndagha akal é tam bia ye tobe beñabôrô. Biblia a saghe bia naa, bi sèñ ngu’u nfa ye naa, bi dzale mekômgha me ya nsôn mèè akal melu ma zu (Mink. 6:6-11). Éde da yiène naa, nge étéñ dèè da likh bia de, é ne mvèñ naa bi baghle mono vôm ézing akal melu ma zu. Bebela a ne naa, mono a ne bia ve abim nkaman ézing (Eccl. 7:12). Vedèè, biaa yiène ki vaghle likh naa ndzenghane mono éwô ô bo é dzam da dang éban bining biè.

14. Za aval nten Behébreu 13:5 ô ne bia vole naa bi taa dang yep a n’nem akal melu ma zu ?

¹⁴ Yésu a nga kane nlang wa lere naa é ne mboan ô ne kaa fakh, éyong ndzenghane mono éwô bia tele ôsu, ve, bia kaa bo « kuma é mis Nzame » (Luc 12:16-21). Môr ézing aa yem ki é dzam da ye boban ôkiri (Mink. 23:4, 5 ; Jacq. 4:13-15). Amu bi ne beyeghe Yésu, bia tubane ngura aval ndzukh. Yésu a nga dzô naa, bia yiène tobe nkoghane naa « bia likh » é biôm biè bisese naa bi bo beyeghe bèñ (Luc 14:33, atoan). Bekristen be ye ntet mimbu ôsua be ya Judea be nga yebe ya mevakh naa ba dzimle é biôm bieba (Behéb. 10:34). Metam mèè fe, abuiñ bobedzang ya bekal bèè be nga yebe naa ba dzimle bisèñ bieba nge ki biôm bife amu naa béé dzi ki sukh mam me poletik (Mel. 13:16, 17). Dzé é nga vole be naa be bo de ? A ne é bôra mebun be bele ébe é ngiagh Jehôva da dzô naa : « Maa ye ki wô vaghle likh, ye naa, maa ye ki wô vaghle lame » (a lang Behébreu 13:5). Bia bo abim ésese bi ne bo naa, bi kômane naa bi dzale minkômane mi ya nsôn miè akal melu ma zu. Ve, nge é dzam bii va yane ki é biaane biè, bia ve mebun mèè ébe Jehôva.

15. Za aval bebyèñ be ne bekristen ba yiène yen é boan beba ? (A daghe fe évaghle).

¹⁵ Mesi mézing, bôr ba kômô dang bièñ boan nfa ye naa boan beté éyong ba ye vem, be wun abuiñ mono naa, be baghle be, « éyong ba ye bo min’nôm ». Bible a dzô naa, bebyèñ ébe ba yiène baghle é boan beba (2 Becor. 12:14). É ne été naa, bebyèñ be ne yi naa é boan beba be vole bo éyong be ntoo beñabôrô, ye naa, abuiñ boan be ne mevakh éyong ba vole bebyèñ beba (1 Tim. 5:4) Ve, bebyèñ be ne bekristen ba yem naa, ba dang bele mevakh, se ki éyong ba yale é boan beba nfa ye naa, be wun abuiñ mono naa be kale bo, ve, éyong ba vole é boan beba naa be bo bebo bisèñ Jehôva (3 Jean 4).

16. Aval avé bebyèñ be ne kôman é boan beba naa be dzale mekômgha me ya nsôn meba ? (Beéphésien 4:28).

¹⁶ Éyong mia vole é boan benan naa be yeghe aval be ne dzale mekômgha meba me ya nsôn akal melu ma zu, lereghane be naa, mia tobe Jehôva mebun. Nté be ngen bong, lereghane bo éban é ne naa, môr a sèñ ngu’u (Mink. 29:21 ; a lang Beéphésien 4:28). Nté ba ke ba vem, voleghan é boan benan naa be bo abim ése be ne bo a sikôlô. É ne mvèñ naa, bebyèñ be ne bekristen be bo mindzeng, ye dzeng naa be dzale metsin metsing me ya Bible, nfa ya vole é boan beba naa, be ñong nkighan ô ne fakh nfa ya aval ba ye belane ayeghle be va ñong a sikôlô. Dzam té da ye be vole naa, be dzale mekômgha me ya nsôn meba, ye fe naa, be dzale ya ayông ésèñ minkanghle deba.

17. Za dzam bi ne tobe de ndzi-n’nem ?

¹⁷ Besôsôe bebo bisèñ Jehôva be ne bele ndzi-n’nem naa, a bele ngu’u ya nkômane ye naa, a baghle bo ye naa, a dzale mekômgha me ya nsôn meba. Nté bia ke bia ke amanegha ye émo di, bia yiène dzeng naa bi tugha bera ve mebun mèè ébe Jehôva. A bo é dzam ésese é ne bo, bi tobeghe ndzi-n’nem naa, Jehôva a ye belan é ngu’u dzèñ naa, a dzale mekômgha me ya nsôn mèè. Bi ne fe tobe ndzi-n’nem naa, Jehôva a bele ngu’u ya vole bia a bo é vôm sese bi ne bo.