AYEGHLE 16
DZIA 87 Zaa ñong ngu’u bisulan !
N’boghane mengom me ne ngu’u ya bobedzang ye bekal bèè !
« Kié ! Za mvèñ ye mbeng é ne, éyong bi too ye bobedzang nsama élar été ! » (BYA 133:1).
É DZAM BIA YE YEN
Bia ye yen melepgha nfa aval bi ne tobe élar ya bobedzang, ye aval a borane bia éyong bi ne mengom bevoo ya éba bevoo.
1-2. Dzam évoo évé é ne éban akal Jehôva, ye naa, za dzam a kômô naa bi bo ?
AVAL bia belan é bôr bevoo é ne édedèè éban akal Jehôva. Yésu a nga yeghle naa bia yiène dzing é bôr bevoo ane bia dzing bia bebién (Mat. 22:37-39). Da yili naa, bia yiène lere é bôr baa bunu ki é mam bia bunu mbemba fulu. Éyong bia lere be mbemba fulu té, bia vu Jehôva Nzame, é môr « a ve naa, é vièn wèñ ô fèñ ébe mbia be-bôr ye ébe mbemba be-bôr, ye ve naa, nveng é nong akal bikoar-koat bi-bôr ye besôsôe be-bôr » (Mat. 5:45).
2 Amben Jehôva a dzing boan be-bôr besese, ve, a dang dzing éba ba bo é mam me ne tetele (Jean 14:21). A kômô naa bi vu ñe. Éde a dzô bia naa, bi bele « édzing é ne ngu’u » akal bobedzang ye bekal bèè, ye bele ya be « élar é ne ngu’u » (1 Pierre 4:8 ; Bero. 12:10). Aval édzing ye élar té, é ne ane édi bia wôran akal bôr be ye memvong me-bôr mèè, nge ki memvuiñ me ne bia édedèè bébéñ.
3. Za dzam bia yiène baghle ôtemgha nfa édzing ?
3 Aval ane é sam bia bèñ a nda, da yi mendzim naa é tugha vem, éde bia yiène ke ôsu ye sèñ ngu’u nfa ye naa, édzing dèè akal bobedzang é tugha vem. Akal dzam té éde ntôô Pablo a nga lep bekristen naa : « Lighane naa édzing denan akal bobeñang benan é tsini ôsu » (Behéb. 13:1). Jehôva a kômô naa bi ke ôsu ye veme édzing dèè akal bobedzang. Ayeghle di da ye bia lere amu dzé bia yiène tugha bera yir beña bekristen bevoo bébéñ, ye aval bi ne tsini naa bia bo de.
AMU DZÉ BIA YIÈNE TUGHA BERA YIR BEVOO YE ÉBA BEVOO BÉBÉÑ
4. Aval ane bia yen de nten Bya 133:1, aval avé bi ne tsini naa bia dzing élar bi bele ya bobedzang ye bekal bèè ? (A daghe fe évaghle).
4 (A lang Bya 133:1). Bia yebe é dzam ntsili bya a nga dzô éyong a nga tsili naa, ña angom ya é bôr ba dzing Jehôva é ne, « mvèñ » ye « mbeng ». Ve, aval ane môr a ne biane mbeng élé a yen melu mesese, éde fe bi ne sum naa bia biane nté mbé élar bi bele ya bobedzang ye bekal bèè é ne mbeng. Bia bira yenane ya bobedzang ye bekal bèè, tam ézing abuiñ biyong kada sono. Aval avé bi ne tsini naa bia baghle édzing dèè akal deba ? Édzing dèè akal bobedzang ye bekal bèè da ye tsini naa da vem, nge bia ñong tam naa, bia tem nté mbé kada môr ye ébe be a ne éban akal ékôan ye fe akal dèè.
Bi taa vaghle tem naa élar bekristen dèè déé se ki man (A daghe éfaghle 4)
5. Za dzam bôr be ne wôran éyong ba yen nté mbé ayong Jehôva é bele édzing bevoo ya éba bevoo ?
5 É bôr ba tobe éyong ôsua bisulane biè, ba bira kam édzing bi bele akal bevoo ya éba bevoo. Be ne tobe ndzi-n’nem naa, bi ne beña bekristen fave amu ba yen édzing dèè akal bevoo ya éba bevoo. Yésu a nga dzô naa : « Ngalane de, besese ba ye yem naa mi ne beyeghe bam, nge mi bele édzing akal bevoo ya éba bevoo » (Jean 13:35). N’ñonghan éfônane Chaithra, mong sikôlô ya Universidad, a mbe é yeghe Biblia ya Bengaa Jehôva. A nga yebe nluèn akal Ésesang melu melal. Amanegha ye môs ôsua ye ésesang, a nga dzô n’yeghle Biblia wèñ naa : « Bebyèñ bam béé dzi ki vaghle wubane ma môs ézing. Ve, é tam ésesang denan, me nga wôrane ane ba wubane ma ébe biyong 52 ébe môs mboo ! Me nga wôrane naa Jehôva a belan ayong dèñ, naa me wôran édzing dèñ. Ma kômô bo môr mboo ye nda-bôr té ». Chaithra a nga tsini naa a vem a nsisim ye duban mbu 2024. Ôwé, éyong bôr ba yen é mbemba mimboane miè, a lang été édzing bi bele akal bevoo ya éba bevoo, ébe abuiñ biyong, dzam té da tsini be naa be sèhane Jehôva (Mat. 5:16).
6. Za aval a yir bobedzang ye bekal bèè bébéñ da kame bia ?
6 A yir bobedzang ye bekal bèè bébéñ, é ne kame bia. Pablo a nga bame bekristen bevoo naa : « Kenghane ôsu ye saghane bevoo ye éba bevoo kada môs [. . .] naa, môr ézing ye ébe mina a taa bo n’nem alet amu é ngu’u nsem ô ne medukh » (Behéb. 3:13). Nge bia sum sili mo ôsi aval da ve naa, mebo mèè me sum kôrô zen ya sôsôe, Jehôva ane tsini é kristen mboo a yenang de naa, a ve bia avole da yiène (Bya 73:2, 17, 23). Aval avole té é ne faa mbeng akal dèè.
7. Aval avé édzing da wulu nsama ye élat ? (Becolossien 3:13, 14).
7 Bi ne môr mboo ye nsama bôr wa sèñ ngu’u naa be leran édzing bevoo ye éba bevoo, éde bia ñong abuiñ biboran (1 Jean 4:11). Éfônan, édzing da tsini bia naa, « bi zômô é bôr bevoo », ye vole naa élar bekristen dèè é tsini ôsu (a lang Becolossien 3:13, 14 ; Beéph. 4:2-6). Éde, é tam bisulan biè, bia buan édedèè mbemba tam, nsama bôr ôfe waa buane ki maa té.
LERANE NGANG BEVOO YA ÉBA BEVOO
8. Za aval Jehôva a vole bia naa bi tobe élar ya bobedzang ye bekal bèè ?
8 Élar é ne ézizang bobedzang ye bekal bèè si ése ngura é ne fave amu Jehôva éñe a ve de. Jehôva éñe a ve naa, dzam té é boban amben bi ne bôr a bikop (1 Becor. 12:25). Biblia a dzô naa « Nzame a yeghle bia naa, bi dzinghane bevoo ye éba bevoo » (1 Beth. 4:9). Da yili naa, Jehôva a belane Biblia naa, a dzô bia é dzam ébién bia yiène bo naa bi yir bevoo ya éba bevoo bébéñ. Bi ne likh naa « Nzame a yeghle bia » éyong bia tugha fa meyeghle mèñ ye dzale me (Behéb. 4:12 ; Jacq. 1:25). Dzam té ébién, éde Bengaa Jehôva ba dzeng naa ba bo.
9. Za ayeghle bia ñong ébe nten Beromain 12:9-13 nfa a lerane ngang bevoo ya éba bevoo ?
9 Za aval Éfiè Nzame da yeghle bia a yir bevoo ye éba bevoo bébéñ ? Baghlan é dzam Pablo a nga dzô nfa té, ane bia yen de nten Beromain 12:9-13 (a lang). Baghlane naa a nga dzô naa : « Tebeghan ôsu nfa ye a lerane ngang bevoo ye éba bevoo ». Dzam té da yili ya ? Bia yiène dzeng meval bi ne bele « élar é ne ngu’u » ya é bôr bevoo ; éfônan, ane a veme fulu ye a djii é bôr bevoo, a lere añep, ye fulu akap (Beéph. 4:32). Déé se ki éban naa ô yane naa moanñong nge ki kal duè éñe a tare wô yir bébéñ. Ô ne « tebe ôsu » nfa ya bo de. Éde, wa ye wôran é dzam Yésu a nga kiagh éyong a nga dzô naa : « Mevakh ma dang éyong bia ve ndaane éyong bia ñong » (Bisè mintôl 20:35).
10. Aval avé bi ne sèñ ngu’u nfa « ye a lerane bevoo ya éba bevoo ngang » ? (A daghe fe évaghle).
10 É dzam é ne mbeng é ne naa, niène a nga mane bia dzô naa bi tebe ôsu nfa ye a lerane bevoo ya éba bevoo ngang, Pablo a nga saghe bia naa, « bi sèñ ngu’u, kaa bo atakh ». É môr a sèñ ngu’u a ne ayông, a ve mengu’u mese mèñ ébe é dzam a bo. Éyong ba kee ñe dzam ya bo, a tugha de yem bo. Nten Minkana 3:27, 28 wa saghe bia naa : « Ô taa tep naa wa bo mbeng akal é bôr wa yiène de bo, nge ô bele ngu’u naa wa vole ». Éde, éyong bia yen é môr a yi avole, bia ye dzigha bo dzam naa bi vole ñe. Bi taa yane naa bi vole ñe ; kaa ki tem naa, môr nfe a ye ñe vole (1 Jean 3:17, 18).
Bia yiène tebe ôsu nfa ya vole bobedzang ye bekal bèè ba yi de (A daghe éfaghle 10)
11. Dzé é ne bia vole naa bi yir bevoo ya éba bevoo bébéñ ?
11 Aval évoo bi ne lere é bôr bevoo ngang é ne a bo avôô nfa ye a djii be éyong be va dzughu bia. Nten Beéphésien 4:26 wa dzô naa : « Ô taa wokh abé ya ke kuiñ nlô-dzôp wa ke bômô ôsi ». Amu dzé ? Éfus 27 da lere naa, a bo de « da ye ve Satan afôô ». Éfiè dèñ été, Jehôva a baghle bia naa bi djiane bevoo ye éba bevoo. Nten Becolossien 3:13 wa saghe bia naa bi « tsini ôsu [. . .] ye djiane bevoo ye éba bevoo ya n’nem ôse ». A djii bikop é bôr bevoo, é ne aval évoo da dang mbeng bi ne be yir bébéñ. Éyong bia djii é bôr bevoo, bia vole a « baghle élar ya nsisim a mvoa été » (Beéph. 4:3). Da tugha yene naa, éyong bia djii é bôr bevoo, bia vole ayong Jehôva naa, é tobe édedèè élar ye mvoa.
12. Za aval Jehôva a vole bia naa bi yem djii é bôr bevoo ?
12 Bebela a ne naa, bi ne yen ndzukh naa bi djii é bôr be va dzughu bia nge ki, a ve naa, bi wokh n’nem abé. Ve, bi ne de bo ye avole nsisim Nzame. Niène a nga saghe bia naa « bi bele élar é ne ngu’u bevoo ya éba bevoo » ye « sèñ ngu’u », Biblia a dzô bia naa : « Bi fèñ ya nsisim ». É môr « a fèñ » a ne « ndzalan nge ki, a fèñ ye ayông ye fe nsaza, amu é dzam da tsini ñe » é ne nsisim Nzame (A daghe nota de estudio para Romanos 12:11 nge ki, note d’étude de Romains 12:11). Éde, nsisim Nzame ô ne bia vole naa bi bele élar é ne ngu’u ye djiane bevoo ye éba bevoo ya n’nem ôse. Akal dzam té éde bia dzaa Jehôva ye n’nem ôse naa a vole bia (Luc 11:13).
« NKANE ÉZING Ô TAA BO ÉZIZANG DENAN »
13. Dzé é ne ve nkane ézizang dèè ?
13 Ékôan é bele « bôr meval mese » bé so mevôm mese (1 Tim. 2:3, 4). Akal dzam té, kada môr ye ébe bia a ne ñong minkighane mia selane nfa mam ane bitôp bia boat, aval bia kômô yene ô mis, aval bia top naa bia sèban nge ki metsap bia kômô bo. Nge biaa bo ki nkee, mam meté me ne bia kane (Bero. 14:4 ; 1 Becor. 1:10). Amu « Nzame a yeghle bia naa bi dzinghane bevoo ya éba bevoo », bia yiène bo nkee naa bi taa yemle é bôr bevoo mintopbane mia akal bia simane naa, émi mia dang mbeng (Beph. 2:3).
14. Za dzam bia yiène dzeng naa bi bo éyong ésese, amu dzé ki ?
14 Bi ne fe ve naa, nkane ô taa bo ékôan été éyong bia dzeng naa, bi ve saghe é bôr bevoo ye ve be ngu’u éyong ésese (1 Beth. 5:11). Metam me ndaghe lôr ma, abuiñ bôr be maneya vuèbe a nsisim nge ki naa, be nga vèè be ékôan, éndagha be beraya so. Bia ve be mbemba nsohane ya n’nem ôsese ! (2 Becor. 2:8). Baghlan é dzam é nga lôrane kal dzèè ézing a nga bulan a Nda ékôan naa abong té é ntoo mimbu awôm a ve a mane vuèbe a nsisim. A nga dzô naa : « Éyong môr a mbe é wuèñ ya ma ye sam me wo, dzam té é mbe dé ve ma mevakh » (Bisè mintôl 3:19). Za aval boan be-mam meté me nga name ñe ? A dzô naa : « Me mbe mé wôrane naa, Jehôva a sam me wo naa, me bera tobe mevakh. » Éyong bia saghe é bôr bevoo, Yésu a ne belane bia naa, a wône é bôr « be voarang naa ba baghe mbaghe ô ne adzit » (Mat. 11:28, 29).
15. Za dzam éfe bi ne bo nfa ye naa élar é bo ? (A daghe fe évaghle).
15 É dzam éfe bi ne bo nfa ye naa élar é bo da tsinane bifiè biè. Nten Job 12:11 wa sili naa : « Ye alo daa kiakh bifiè ane ôyem wa kiakh bidzi ? » Aval ane é môr a yam bidzi a tare bi kiakh kaa naa a seng bie é bôr bevoo, é ne mbeng naa, bi tugha fas é dzam bia ye dzô kaa naa bi kulu de (Bya 141:3). Bia yiène bele nsonghane naa, é dzam bia zu dzô é bo é dzam da yeghle, da wône, ye « buane bebèè (Beéph. 4:29).
Fasghe é dzam wa ye dzô kaa naa ô kulu de (A daghe éfaghle 15)
16. Beza ba yiène dang dzeng naa be belane bifiè bia saghe ?
16 Beyôm ye beyèñ ébe ba dang yiène dzeng naa be belane bifiè bia saghe (Becol. 3:19, 21 ; Tite 2:4). Bemvene baa fe ba yiène belane mbemba bifiè ye fôlô mintôma Jehôva (Esaïe 32:1, 2 ; Begal. 6:1). Nkana ézing ya Biblia wa simane bia naa : « Za mvèñ é ne, ébe éfiè ba dzô é tam da yiène ! » (Mink. 15:23).
A DZING « YA MIMBOAN YE BEBELA »
17. Za aval bi ne tobe ndzi-n’nem naa édzing bi bele akal bobedzang ye bekal bèè da so bia n’nem ôsi ?
17 Ntôô Juan a saghe bia naa, bi « dzing se ki ya bifiè nge ki ôyem, ve ye mimboan ya bebela (1 Jean 3:18). Bia kômô naa, édzing bi bele akal bobedzang ye bekal bèè é so bia n’nem ôsi. Za aval bi ne bo dzam té ? Éyong bia bira lôr tam ya bobedzang ye bekal bèè, da ve naa bi yir bevoo ya éba bevoo bébéñ ye wône élar dèè. Éde, ndzenghane naa bi bele metam bi ne lôr éyong ya é bôr bevoo, bisulan ye minkanghle. N’ñonghane tam naa bia bo bi ke fep é bôr bevoo. Éyong bia bo de, bia lere naa « Nzame ayeghle bia naa bi dzinghane bevoo ye éba bevoo » (1 Beth. 4:9). Aval té, bia ye tsini naa bia yen « nté mbé é ne mvèñ ye mbeng a tobe ya bobedzang élar été » (Bya 133:1).
DZIA 90 Sughe é bôr bevoo asi