AYEGHLE 15
DZIA 30 Ésaa wom, é Nzame wom, Mvuiñ dzam
« A yir Nzame bébéñ é ne mbeng » akal dèè !
« Ébe ma, a yir Nzame bébéñ é ne mbeng akal dam » (BYA 73:28).
É DZAM BIA YE YEN
Ayeghle di été, bia ye yen aval bi ne yir Jehôva bébéñ, ya fe abuane bia ñong éyong bia bo de.
1-2. (a) Za dzam bia yiène bo nfa ye naa bi lar angom é ne ngu’u ya môt ? (b) Za dzam bia ye yen ayeghle di été ?
YE Ô bele angom ézing mina ñe mia bira woghan ? Aval avé mina ñe mi nga sum angom denan ? Abong ézing, ô nga lôr abuiñ tam mina ñe, ô nga yeghe a yem mam mézing éning dèñ, éde ô nga kuiñ naa ô yem é mam a dzing, ye é mam a vini. Ô nga yen naa a bele é mbemba mefulu ô mbe kômô vu. Éndagha, wa dzing mvuiñ duè.
2 Da sili abuiñ tam, ya mengu’u nfa ye naa, bi bele élar é ne ngu’u ya môt. Aval té éde fe é ne éyong bia kômô lar angom é ne ngu’u ya Jehôva. Ayeghle di été, bia ye yen aval bi ne yir é Nzame waa bébéñ ye abuane bia ñong éyong bia bo de. Ôsusua, amu dzé é ne éban naa bi yir Jehôva, angom dèè, bébéñ.
3. Amu dzé bia yiène binan ébe abuane bia ñong éyong bia yir Jehôva bébéñ ? Vakh éfônan.
3 Bia bese bia yem naa é ne mbeng naa bi yir Jehôva bébéñ. Vedaa, éyong bia binan ébe abuane bia ye ñong, da tsini bia naa bi bera yir ñe bébéñ (Bya 63:6-8). Éfônan, bia yem naa a yem dzi, a bo deporte nge ki sport, a yem wèèghan, ye bira ñu mendzim, é ne mbeng akal é ñuu dzaa. Vedaa, abuiñ bôr daa bis ki mam meté, baa kale ki meñuu meba. Éyong bia siman abuane bia ñong amu bia kale meñuu maa, da ve naa bi tsini naa bia bo do. Aval dèè fe, é ne bo naa bia yem naa a yir Jehôva bébéñ é ne mbeng akal dèè, ve, a binan ébe abuane da so nge bi bo do, da tsini bia naa bi yir mvuiñ dzèè bébéñ (Bya 119:27-30).
4. É môr a nga tsili Bya 73:28, a nga dzô za dzam ?
4 (A lang Bya 73:28). É môr a nga tsili Bya 73 a mbe moan levita, a mbe a bele ayem naa, a yiè bya a templo Jehôva été. Tam ézing, a nga sèhane Jehôva sôsôe ébe abuiñ mimbu. Ve, a mbe é yem naa é mbe éban naa, a simane émièn naa « a yir Nzame bébéñ » é mbe mbeng akal dèñ. A nga kômô fe naa, é bôr bevoo be yem naa a bo angom ya Nzame é ne fe mbeng akal deba. Amu dzé é ne mbeng naa bi tugha yem Jehôva ye wônô angom dèè ya ñe ?
« A YIR NZAME BÉBÉÑ » DA SO BIA MEVAKH
5. (a) Amu dzé a tugha yir Jehôva bébéñ da so bia mevakh ? (b) Aval avé n’yemane Nzame wa vole wa ye kame wa ? (Minkana 2:6-16).
5 Nté bia yir Jehôva bébéñ, mevakh mèè ma ke ma vem (Bya 65:4). Amu dzé bia dzô do ? Amu naa, éyong bia lang é dzam Bible a dzô ye dzale de, da ve naa bi bo n’yeman. N’yemane té wa kame bia nfa ye naa bi taa bo é dzam é ne bia dzughu (a lang Minkana 2:6-16). Akal dzam té éde Bible a dzô naa : « Mvom ébe é môr a bele fakh ya é môr a tugha yem fas mam » (Mink. 3:13).
6. Dzé é nga likh naa n’yiè bya a dzimlé mevakh mèñ ?
6 Mengom Jehôva me wula fe tobe éwiñ biyong bizing. N’yiè Bya 73 a nga dzimlé mevakh mèñ éyong a nga sum naa a tem é mam a nga yen naa me ne ékoar-koat. A nga sum naa a tem naa, mbia be-bôr ébe be bele mbemba éning, amben baa bis ki Nzame ye naa, baa kômô ki dzale metsing mèñ. Dzam té é nga ve naa, n’yiè bya té a wokh abé ye sum naa a ñamlé éning deba. A nga tem naa, é bôr be ne nget ya éngung be ne bele é dzam ésese ba kômô, be ne mvoa, ye naa be ne kaa dzukh (Bya 73:3-7, 12). Akal bikoar-koat bi-mam a nga yen éde a nga tem naa, a sèhane Jehôva daa so ki bia abuan. Éyong n’yiè bya té a mbe édedèè éwiñ, a nga dzô naa : « Ma yen naa déé mbe ki éban naa, me baghle n’nem wom nfuban, nge ki, a saalé é mam me ne abé » (Bya 73:13).
7. Za dzam bi ne bo éyong bi ne éwiñ ? (A daghe fe ).
7 Amben n’yiè bya a mbe édedèè éwiñ, a nga bo dzam ézing nfa ye naa a tsen mesimane mèñ. « A nga ñii é môra santuario Nzame », e wèñ Jehôva a nga tsen mesimane mèñ (Bya 73:17-19). Éyong bi ne éwiñ, Jehôva, angom dèè, a yem do. Nge bi ne éwiñ, bi ne yaghlane Jehôva ye dzaa ñe naa a vole bia naa, bi yem é dzam bi ne bo. Melepgha ma so a kalare Nzame été ye avole bobedzang ye bekal bèè me ne bia ve ngu’u naa, bi tsini naa bia sèhane ñe amben bi ne éwiñ. Amben éyong bia tubane abuiñ mindzukh, ye naa biaa yem ki é dzam bi ne bo, Jehôva a ne bia vole naa bi bele mvoa a n’nema (Bya 94:19).
É levita a nga tsili nten Bya 73, a tele a « môra santuario nge ki santuaire Nzame » (A daghe éfaghle 7)
« A YIR NZAME BÉBÉÑ » DA VE NAA ÉNING DÈÈ É BELE AYILGHA YE NAA BI BELE ÔYANE
8. Amu dzé é ne fe éban akal dèè naa bi yir Jehôva bébéñ ?
8 A yir Nzame bébéñ é ne mbeng akal dèè minfa mibèñ mife. Ôsusua, da ve éning dèè ayilgha. Édi bèè, da ve bia ôyane ô ne ngu’u nfa melu ma zu (Jér. 29:11). Ntamane fas minfa mibèñ mité.
9. Aval avé a yir Jehôva bébéñ da ve éning dèè ayilgha ?
9 A yir Jehôva bébéñ da ve éning dèè ayilgha. É bôr ba sôô naa Nzame a ne, ba tem naa éning déé bele ki ayilgha, ye naa, ya tam bôr baa ye ki fe bera ning a si va. Vedèè, niène bi va yeghe Biblia, bi va bele ndzi-n’nem naa Nzame a ne, ye naa, « a boran é bôr ba dzeng ñe ya n’nem ôsese » (Behéb. 11:6). Amben ému, bi ne mevakh amu naa bia sèhane Jehôva. Amu dzé dzam té da so bia mevakh ? Amu naa Jehôva a nga vele bia ya nkômane ya sèhane ñe. Éde, éyong bia bo do, dzam té da so bia ña mevakh (Deut. 10:12, 13).
10. Za dzam Jehôva a kiagh é bôr be bele mebun ébe ñe nten Bya 37:29 ?
10 Abuiñ bôr béé bele ki ôyane akal melu ma zu. Ôyane wôba ô ne fave a bele ésèñ, a lughan, a bele boan ya kôane mono akal melu ma zu, éyong baa ye ki fe bele ésèñ. Baa simane ki Nzame. Ve, bebo bisèñ Jehôva ba ve mebun meba ébe ñe (Bya 25:3-5 ; 1 Tim. 6:17). Bi bele mebun ébe é Nzame bi va yir bébéñ, ye naa, bia bunu é mam a kiagh bia nfa melu ma zu. Bi bele abuiñ mam bia yane, dang-dang a sèhane ñe a paraíso mbèmbèè (a lang Bya 37:29).
11. Za abuane bia ñong éyong bia yir Nzame bébéñ, ye naa, dzam té da ve naa a wôrane ya ?
11 A yir Nzame bébéñ da so bia abuan abuiñ meval. Éfônan, Jehôva a kiagh naa a ye djii minsem é bôr ba dzôban ye yir ñe bébéñ (Esaïe 1:18). Dzam té da ve naa, bi taa tsini naa bia kele min’nem ôyô akal minsem bi nga bo melu ô mvus (Bya 32:1-5). A yir fe Jehôva bébéñ da ve ñe n’nem mbeng (Mink. 23:15). Bebela a ne naa, bia buane fe mam mefe amu naa bi ne mengom Jehôva. Éndagha, ntamane yen é dzam bia yiène bo nfa ye naa bi tsini naa bia yir Nzame bébéñ.
AVAL BI NE TSINI NAA « BIA YIR NZAME BÉBÉÑ »
12. Za dzam ô nga bo nfa ye naa ô tugha yir Nzame bébéñ ?
12 Nge ô ntoo moan Bengaa, da yili naa ô bohang abuiñ mam nfa ye naa ô yir Jehôva bébéñ. Éfônan, ô nga yeghe abuiñ mam nfa Jehôva ya Yésu. Ô nga mane dzôban akal minsem ô nga bo melu ô mvus. Ô nga lere mebun me ne ngu’u ébe Nzame, ye naa, ô nga ve mengu’u naa ô ning aval a kômô. Vedèè, nfa ye naa bi tugha yir Nzame bébéñ, bia yiène tsini naa bia bo mam meté (Becol. 2:6).
13. Za mam melal me ne bia vole naa bi tsini naa bia yir Jehôva bébéñ ?
13 Za mam me ne bia vole naa bi tsini naa bia yir Jehôva bébéñ ? (1) Bia yiène tsini naa bia lang ye yeghe Biblia. Éyong bia bo de, biaa yiène ki sughu fave naa bia yeghe mam. Bia yiène dzeng naa bi yem aval Nzame a tem, é dzam a kômô naa bi bo, ye ning aval a kômô (Beéph. 5:15-17). (2) Bia yiène wônô mebun mèè bi binan abuiñ meval a lere bia zen. (3) Bia yiène vini é mam Jehôva a vini, ye saalé a bo mengom ya é bôr ba bo aval mam meté (Bya 1:1 ; 101:3).
14. Aval ane nten 1 Becorinthien 10:31 wa dzô do, za mam mézing bia yiène bo nfa ye naa bi ve Jehôva n’nem mbeng melu mesese me ye éning dèè ? (A daghe fe évaghle).
14 (A lang 1 Becorinthien 10:31). É ne édedèè éban naa bi dzeng é mam me ne ve Jehôva n’nem mbeng. A ve Jehôva n’nem mbeng daa sughu ki fave naa bia ke bisulan ye ke minkanghle. É mam mese bia bo melu mesese me ye éning dèè, ma yiène fe ve Jehôva n’nem mbeng. Nge bi ne kaa medukh ébe mam mesese, ye naa, bia kap ya é bôr bevoo é biôm bi bele, bia ye ve Jehôva n’nem mbeng (2 Becor. 8:21 ; 9:7). A kômô fe naa bi yem baghle éning a ve bia. Bia yir Nzame bébéñ éyong bia bo é mam me ne ve naa, bi baghle éning dèè ane, a yem dzi, a tugha ñu mendzim, ye a yem kale meñuu mèè meval mefe. Jehôva a bira bia dzing éyong a yen naa bia ve mengu’u naa, bi ve ñe n’nem mbeng ébe é mam mese bia bo (Luc 16:10).
A yem a duru metua, a kale bia bebién bi bo deporte nge ki sport ye dzi bidzi bia so bia mvoa ye bo fe añep, a ne é mam bi ne bo naa bi ve Jehôva n’nem mbeng (A daghe éfaghle 14)
15. Aval avé Jehôva a kômô naa bi tobe ya é bôr bevoo ?
15 Jehôva a ne mbemba fulu ya bôr besese, a bo naa, ba sèhane ñe, nge ki kaa (Mat. 5:45). Ñe a yi fe naa bi tobe ya é bôr bevoo aval té. Éfônan, biaa « yiène ki kobe môr ézing abé, kaa ki bo é bôr ba wôman [. . .] boghane évuvuèñ éyong ése ya bôr besese » (Tite 3:2). Éde, amben é bôr baa sèhane ki Jehôva, biaa yiène ki tem naa bi ne édedèè éban a lôr bo (2 Tim. 2:23-25). Bia tugha yir Jehôva bébéñ nge bi ne mbemba fulu ya môr asese.
« BI NE YIR NZAME BÉBÉÑ » AMBEN ÉYONG BIA BO BIKOP
16. N’tsili Bya 73 a nga wôrane ya, niène a nga sèhane Jehôva ébe ngum tam ?
16 Biyong bizing, é ne bobane naa wa wôrane naa, Jehôva éé se ki wô bébéñ amu bikop ô nga bo melu ô mvus. Aval ane bi va yen do, n’tsili Bya 73 ñe a nga wôrane fe aval té. A nga dzô naa : « Mebo mam a kuane naa me nga kôrôyang ô zen ; me nga ye sen » (Bya 73:2). Émièn a dzô naa, asu Jehôva a kuane naa n’nem ô ntoo ñe « abé » ye « kaa yem fas mam » « ane tsit » (Bya 73:21, 22). Ve, ye a nga tem naa, amu bikop bièñ Jehôva aa mbe ki fe é dzing ñe, nge ki naa aa nga ye ki fe ñe djii ?
17. (a) Amben a kuane naa n’yiè bya a siliyang mo ôsi, za dzam a nga bo ? (b) Za dzam bia yeghe ébe éfônan dèñ ? (A daghe fe bivaghle).
17 Nge n’tsili bya a nga wôrane naa Jehôva a nga lame ñe, é mbe fave ébe ôyôm tam. Amu a mbe é yem naa a yiène yir Jehôva bébéñ, amben a nga sili mo ôsi. A nga tsili naa : « Ve, éndagha me ne éyong ase ya wa [Jehôva] ; wa biñ é wo meyôm wom. Wa lere me zen ya melepgha muè, asughlan wa ye me bere ôyô » (Bya 73:23, 24). Bia fe, bi ne yen Jehôva ane môra akoa da ve naa, bi taa fônghan éyong bia wôrane naa bi nga siliyang mo ôsi (Bya 73:26 ; 94:18). Amben mebo mèè ma kôrô ô zen ébe ngum tam, bi ne bulan ébe Jehôva ye bele ndzi-n’nem naa a ne « nkoghane naa a djii bia » (Bya 86:5). Éyong bia wôrane naa bi siliyang mo ôsi, a ne éyong bia yiène dang yir Jehôva bébéñ (Bya 103:13, 14).
Éyong bia wôrane naa bi nga takhang nfa ya nsisim, bia yiène yir Jehôva bébéñ, bi yaghlane mban ya ke bisulan éyong ésese (A daghe éfaghle 17)
« A YIR NZAME BÉBÉÑ » MBÈMBÈÈ
18. Amu dzé bi ne tsini naa bia yir Jehôva bébéñ ya ke kuiñ mbèmbèè ?
18 Bi ne tsini naa bia yir Jehôva bébéñ ya ke kuiñ mbèmbèè. Biaa ye ki vaghle sim naa bia yeghe mam nfa wèñ. Biblia a dzô naa, mezen ya n’yemane Jehôva « bii se ki me mane yem » (Bero. 11:33).
19. Za dzam abakh Bya da ban bia akal melu ma zu ?
19 Nten Bya 79:13 wa dzô naa : « Ve, bia ayong duè, nsama mintôma muè, bia ye wô ve akiba mbèmbèè, ye naa, bia ye wô lughu mbèmbèè ya mbèmbèè. » Nté wa tsini naa wa yir Nzame bébéñ, wa fe, ô ne bele ndzi-n’nem naa, wa ye ñong biborane bièñ mbèmbèè. Ye dzô ya mebun naa : « Nzame a ne akoa ye n’nem wôm ye é ngap dzam mbèmbèè » (Bya 73:26).
DZIA 32 Ñonghe é ngam Jehôva !
a É bôr ba tsini naa ba dzukh a n’nem été, ba bira yep a n’nem nge ki be ne édedaa éwiñ, be ne dzaa avole bedokira. Nfa ye naa ô yem mam mefe, a daghe La Atalaya, número 1 del 2023 nge ki La Tour de garde, n° 1 2023.