Aval Jehôva a vole bia naa bi zômô

1. Amu dzé déé se ébubu naa bi tsini naa bia zômô ya ke kuiñ amanegha, ve, za a ye bia vole ? (1 Pierre 5:10).

MELU me ya asughlane bi ne ma, me ne ayèñ, n’nam Jehôva wa yiène tsini naa wa zômô. Bôr bézing be bele akoan é ne kaa let. Éba bevoo, ba dzukh amu be va dzimle é môr ba dzing. Bevoo bézing, ba tubane naa bôr ba tebe be é ngam ayat, a ne bo bôr be ya é mvong dzeba, nge ki bôr be ye bidjié bingoman (Mat. 10:18, 36, 37). Ô ne bele ndzi-n’nem naa, kaa bis ndzukh wa tubane wô, Jehôva a ne wô vole naa ô zômô (a lang 1 Pierre 5:10).

2. Dzé da vole bia bekristen naa bi kuiñ naa bi zômô ?

² A zômô da yili naa bia tobe besôsôe ya Jehôva, bia sèhane fe ñe ya mevakh amben éyong bia tubane mindzukh, éyong ba tsible bia, éyong bi ne meboblan été, nge ki éyong bia kômô bo nsem. Nfa ye naa bi tsini naa bia zômô, bia bekristen, biaa yiène ki ve mebun maa ébe é ngu’u dzaa. Bi ne zômô fave amu ye naa, Jehôva a ve bia « é ngu’u é ne ôyap ôyô ». Bii se ki ning kaa avole dèñ (2 Becor. 4:7). Ayeghle di, bia ye fas mevole menii Jehôva a ve bia nfa ye naa, bi tsini naa bia zômô. Bia ye fe yen aval bi ne yem buane mevole meté mesese.

MEYAGHLAN

3. Amu dzé bi ne dzô naa meyaghlan me ne akengha ?

³ Jehôvah a va bo akengha é ne bia vole naa bi zômô. A va ve naa bi kuiñ naa bi kobe ya ñe, amben bi ne bebo-minsem (Behéb. 4:16). Fasghe é dzam di : Bi ne yaghlane Jehôva éyong ésese, ye a dzô ñe é dzam ésese bia kômô ñe dzô. A ne bia wokh kaa bis nkobe ôse bia kobe, ya é vôm ôse bi ne, amben nge bi ne ôyap, nge ki mbokh (Jonas 2:1, 2 ; Bisè mintôl 16:25, 26). Nge bia bira yep a n’nem aval da ve naa biaa kuane bifiè nfa ye naa bi dzô ñe é dzam bia wôran, Jehôva a ne wokh é dzam bia kômô ñe dzô (Bero. 8:26, 27). Bebela ya bebela naa, meyaghlan me ne faa akengha !

4. Za aval bia yem naa, éyong bia yaghlane Jehôva naa a vole bia naa bi zômô, a ye bia vole ?

⁴ Éfiè dèñ été, Jehôva a ban bia naa : « Kaa bis é dzam ésese bia dzaa ñe dé vaghane ya nkômane wèñ, a wokh bia » (1 Jean 5:14). Ye bi ne dzaa Jehôva naa a vole bia naa bi zômô ? Ôwé ! A bo do, da vaghane ya nkômane wèñ. Amu dzé bi ne da dzô ? Éyong bia zômô meboblan, bia ve Jehôva naa a yalan é môr a poghe ñe, Satan (Mink. 27:11). Biblia a bera fe dzô naa, Jehôva a bele nkôman ô ne ngu’u « naa a lere é ngu’u dzèñ akal é bôr be bele min’nem mi ne ngum ébe éñe » (2 Mila. 16:9). Ya dzam té, bi ne bele ndzi-n’nem naa Jehôva a bele ngu’u ya nkôman ye a vole bia naa bi zômô (Esaïe 30:18 ; 41:10 ; Luc 11:13).

5. Za aval meyaghlan me ne bia ve mvoa ye ôtemgha ? (Esaïe 26:3).

⁵ Biblia a dzô naa éyong bia yaghlan ya n’nem ôse nfa é mam ma ve naa bi yep, « é mvoa Nzame da lôr ôsiman ôsese, da ye baghle min’nem [mia] ya atemgha [daa] » (Beph. 4:7). Fasghe é dzam adzô té da yili. É bôr baa sèhane ki Jehôva ba tubane mindzukh, ba dzeng abuiñ meval nfa ye naa be bele mvoa ye ôtemgha. Éfônan, bevoo bézing ba belane ngura aval mbinan, nfa ye naa be mane vaa é dzam ésese be ne bele ôtemgha, amben é mam ma ve naa be yep a n’nem. Ve, a dzeng naa bi mane vaa asiman ésese bi bele ôtemgha é ne bo abé akal mvoa ye nsisim dzaa (A vaghane ya Matthieu 12:43-45). Bebela a ne naa, é mvoa Jehôva a ve bia éyong bia yaghlane ñe, é ne édedaa ôyap ôyôp a lôr é mvoa ése bi ne wôran da so bia ébe aval mbinane té. Éyong bia yaghlane Jehôva bia lere naa bia sughbe ébe éñe, ye naa, a ve bia « mvoa éyong ése » (a lang Esaïe 26:3). Ngura aval Jehôva a bo do, é ne naa, a vole bia naa bi simane bebebela be ya Biblia ba sili bia min’nem ôsi. Bebebela beté ba likh naa asimane daa, ya min’nem mia, mi siliban ôsi amu bia yem naa Jehôva a bis bia, a kômô fe naa mam me ke bia mbeng (Bya 62:1, 2).

6. Za dzam ô ne bo nfa ye naa meyaghlane muè, me tugha wô yem vole ? (A daghe fe évaghle).

⁶ É dzam ô ne bo. Éyong wa tuban éndaghle ézing, « Keeghe Jehôva mbaghe wiè », yaghlane fe ñe naa, a ve wa é mvoa dzèñ (Bya 55:22). Yaghlane fe ñe naa, a ve wô fakh naa ô yem é dzam wa yiène bo (Mink. 2:10, 11). Meyaghlan été, nté wa dzaa ñe naa a vole wô naa ô zômô, ô taa ki vuène naa, ô ve ñe akiba éyong ése (Beph. 4:6). A tugha daghe é mam mesese a bo môs misese naa a vole wô naa ô zômô, ye ve fe ñe akiba akal avole dèñ, ya é mbemba be-mam mese a ve wa. Amben wa dzukh amu éndaghle ézing wa lôr éndagha, ô taa vuèn aval Jehôva a tsini naa a vole wa (Bya 16:5, 6).

ÉFIÈ NZAME

7. Za aval ayeghe ya Biblia da vole bia naa bi zômô ?

⁷ Jehôva a ve bia Éfiè dèñ naa é vole bia naa bi zômô. Biblia a bele abuiñ bifus bia ban bia naa, Jehôva a sukh bia asi. N’yeneghan éfônane dzaa ye été. Matthieu 6:8 a dzô naa : « Ésaa wônan a yem é dzam mia yi amben kaa naa mi dzaa ñe do ». Yésu éñe a nga kobe bifiè bité amu a tugha yem Jehôva a lôr môr ase. Ya dzam té, bi ne faa tobe ndzi-n’nem naa éyong bia dzukh, Jehôva a yem é dzam bia yi, ye naa, a ye bia vole. Biblia a bele abuiñ mbemba mesimane ma so ébe Jehôva ma ve bia é ngu’u bia yi nfa ye naa bi tsini naa bia zômô (Bya 94:19).

8. (a) Vakh éfônan ye aval tsîn atsing ézing ya Biblia é ne bia vole naa bi zômô. (b) Za dzam é ne bia vole naa bi simane metsin metsing me ya Biblia éyong bia yi me ?

⁸ Metsin metsing me ya Biblia me ne bia vole naa bi zômô. Aval ése é ne bo, me bele n’yeman ô ne bia éban, éwi wa vole bia naa bi ñong mbemba minkighane (Mink. 2:6, 7). Éfônan, Biblia a dzô bia naa bi taa bera yep n’nem nfa é mam ma ye boban melu ma zu. Ve, a dzô bia naa bi wônô mebun maa ébe Jehôva môs ôse (Mat. 6:34). Nge bi bele fulu naa bia lang Biblia ye binan ébe é dzam bia lang été, da ye bia bo ébubu naa bi simane metsin metsing me ya Biblia me ne bia bo éban, é tam bia yi mo.

9. Za aval minlang mi ya Biblia mia wônô mebun maa ébe avole Jehôva ?

⁹ Biblia a bele fe minlang é bôr be mbe ane bia, be nga ve mebun meba ébe Jehôva, éde, ñe a nga sukh fe bo asi (Behéb. 11:32-34 ; Jacq. 5:17). Éyong bia fas ébe minlang mité, bia wônô mebun maa naa, Jehôva a ne « ashuèñ daa ya é ngu’u dzaa, avole bi ne ébubu a kuane do é tam mindzukh » (Bya 46:1). Éyong bia tem aval besôsôe bebo-bisèñ Jehôva be ye metam ô mvus be nga lere mebun ébe éñe, ye tsini fe naa ba sèhane ñe mindzukh été, daa da ve fe bia ngu’u naa bi bo aval daa (Jacq. 5:10, 11).

10. Za dzam ô ne bo nfa ye naa, Biblia a tugha wô yem vole ?

¹⁰ É dzam ô ne bo. Langhe Biblia môs misese, ye tsili bifus bi ne wô vole. Abuiñ bôr é nga yen fe naa éfus ba fas kada kiri da vole be naa, be sum môs ya ôsimane ya Biblia wa fong bo. Kal dzaa ézing é too éyôla naa Maríaa a nga yen naa dzam té é ne bebela éyong be nga yen naa, ésaa yaa ñia be mbe be bele cáncer. Dzé é nga vole ñe naa a zômô nté sese a nga kale bo mengoan ébal beté be nga sughlane ning ? A dzô naa : « Kada kiri, me mbe mé lang Examinemos las Escrituras todos los días nge ki Examinons les Écritures chaque jour, ye binane fe. Fulu té é nga likh me naa, me dzale ôsimane wom ya atemgha ye a Biblia. É nga vole fe me naa, me dang banebe ébe é dzam da dang éban a lôr ébe mamién, ya ébe étéñ mindzukh me mbe me tele été. » (Bya 61:2).

BOBEDZANG BE YE ÉKÔAN

11. Amu dzé da ve bia ngu’u a yem naa se ki bia étam bia tubane mindzukh ?

¹¹ Jehôva a ve bia bobedzang be ye Ékôan naa, be vole bia naa bi zômô. A yem naa, é « bobedzang [baa] be ye éning ése ngura baa ba tubane fe aval mindzukh bia tubane mio », da ve bia ndzi-n’nem naa, bii se ki étam (1 Pierre 5:9). Ya dzam té, bi ne tobe ndzi-n’nem naa, kaa bis ndzukh ôsese bi ne tubane wô, bôr befe baa be lôreyang fe aval bitéñ bité, bé zômô. Dzam té da yili naa, bia fe bi ne zômô ! (Bisè mintôl 14:22).

12. Za aval bobedzang be ye ékôan be ne bia vole, za dzam ki bia bi ne bo akal deba ? (2 Becorinthien 1:3, 4).

¹² Bobedzang ya bekal baa be ye ékôan be ne bia ve ngu’u naa bi tsini naa bia zômô, ngalan é mam ba dzô, ya éma ba bo akal daa. Ntôô Pablo a nga yen naa dzam té é mbe été. Abuiñ biyong, a nga ve é bôr be mbe bé vole ñe éyong a mbe a nda-mimbokh akiba, é tu bo ya biyôla bieba. Be nga ve Pablo afôlô, be nga saghe ñe, ye ve fe ñe avole a nga yi (Beph. 2:25, 29, 30 ; Becol. 4:10, 11). Ému, aval dzam té daa é ne fe biaane bia. Éyong bia yi avole naa bi tsini naa bia zômô, bobedzang ye bekal baa be ne vaa, akal daa ; ye naa, éyong baa fe ba yi avole, bia fe bi ne vaa, akal deba (a lang 2 Becorinthien 1:3, 4).

13. Dzé é nga vole kal dzaa ézing é too éyôla naa Maya naa a zômô ?

¹³ Bobedzang be ye si ése ngura be nga bo môra avole akal é kal dzaa ye a Rusia ba luè naa Maya. Mbu 2020, be nga ke fas é nda dzèñ, ye naa ôsu vaa, a nga yiène kame émién abaa minsang é kobe adzô ye mebun mèñ. Maya a dzô naa : « Tam té ésese, me mbe mvoaran, mé bira yep a n’nem, me mbe fe éwiñ. Ve, bobedzang ya bendôm bam be nga luè ma nkoo bisusuakh, bevoo bézing be nga lôm ma bemensajes nge ki bemessage ya bidzango. Be nga ban me naa, ba bira ma dzing. Ma so ma yem naa bobedzang ya bendôm bam ba dzing ma, ye naa be ne é mvong bôr dzam. Ve, a sum ye mbu 2020, éde me nga dang tugha yen naa dzam té é ne été. »

14. Za aval bi ne buane ya avole bobedzang ye bekal baa nté sese bia zômô ? (A daghe fe évaghle).

¹⁴ É dzam ô ne bo. Nté sese wa zômô, tobeghe bébéñ ya bobeñong ye bekal buè be ne bekristen. Ô taa ko wong naa wa dzaa bemvene avole. Be ne bo « ashuèñ akal évung, é vôm ba ke sobe éyong ôkôs ô ne » (Ésaïe 32:2, atoan). A simane naa é bobeñong be ne bekristen baa ba zômô fe mindzukh. A bo mbemba dzam akal é môr a yi avole, daa da ye wô vole naa ô yen mam aval da yiène, nté sese wa zômô mindzukh muè wamién (Bisè mintôl 20:35).

ÔYANE WAA

15. Za aval ôyane a mbe a bele ôsu ô nga vole Yésu, ye naa, za aval ôyane waa akal melu ma zu ô ne bia vole ? (Behébreu 12:2).

¹⁵ Jehôva a ve bia ôyane ô ne ngu’u nfa ye naa ô vole bia naa bi zômô (Bero. 15:13). Tame siman aval ôyane ô nga vole Yésu é mos ô nga dang ndzukh éning dèñ a si va (a lang Behébreu 12:2). Yésu a mbe é yem naa é sôsôe dèñ é nga ye ve naa éyôla Nzame é tobe nfuban. Yésu a nga yane fe naa, a ye bera ke kuan Ésaa a dzôp été, ye naa ôsu vaa, a nga ye sèñ ya bobeñang, Édjié ye a dzôp. Aval té daa-daa, ôyane waa naa bia ye ning mbèmbèè a si va, nféféñ éning Nzame, wa ve bia naa bi zômô mindzukh misese bia tubane mio émo Satan di été.

16. Za aval ôyane ô nga vole kal dzaa ézing naa é zômô, za dzam ki wa yeghe ébe é dzam a kane ?

¹⁶ N’tamane yen aval ôyane, éwi ye Édjié Nzame, ô nga vole kal dzaa ye a Rusia a too éyôla naa Alla, éñi be nga biñ n’nôm ye fere ñe mbokh. Éyong dzam té é nga bo, Alla a nga dzô naa : « A yaghlan akal ôyane waa wa zu ye binan ébe ôyane té, é nga kame naa me taa dang wôran atekh. Ma wokh naa, se ki amanegha éde alé. Jehôva a ye wun, ya dzam té, bia, bia ye fe wun. »

17. Za aval bi ne lere naa bia ve akiba akal ôyane Jehôva a nga ve bia ? (A daghe fe évaghle).

¹⁷ É dzam ô ne bo. Ñonghe tam naa wa tem ébe é mbemba éning Jehôva a maneyang bia kôman ôsu. Yeneghe wamién nféféñ éning Nzame été, simane fe biborane bia ye bele. Ye naa, kaa bis ndzukh ôsese bi ne tubane wô éndagha, bia ye wô yen ane é dzam « da ye lôt é too fe ôveves » (2 Becor. 4:17). Nfa mboo, boghe é dzam ésese ô ne bo nfa ye naa ô kap mebun muè ya é bôr bevoo. Tame siman aval ndzukh é ne bo akal deba naa, be zômô mbimbia be-mam me ye mbia émo Satan di, kaa naa ba yem é ngiagh Nzame akal melu ma zu. Ô ne ba dzô ayôm mam mézing nfa ye naa, be kômô bera yem, nfa Édjié Jehôva ya mengiagh mèñ.

18. Amu dzé bi ne tobe mebun ya mengiagh Jehôva ?

¹⁸ Niène a nga mane zômô abuiñ mindzukh ya sôsôe, Job a nga dzô Jehôva naa : « Éndagha, me nga yemang naa ô ne bo mam mesese, ye naa wéé se voar a bo é dzam ézing ô bele ôsiman » (Job 42:2). Aval ane Job a nga yeghe de, dzam ézing déé se ki kame naa Jehôva a dzale nkômane wèñ. Dzam té é ne bia ve ngu’u nté sese bia tsini naa bia zômô. Éfônan, tame siman é minenga a koan, éñi a koaneyang ayap amu dokira ézing aa dzi ki ñe sèñ. Ve, éyong é dokira a lorang abuiñ tam é sèñ bôt atoo fe éñi be ne tobe ñe mebun, a yen é dzôm da ndaghle ñe, a kare fe ñe aval a ne sèñ ôkoan wèñ, dzam té da likh naa, minenga té a wôrane mvoa amben é ngen da dzaa ñe abuiñ tam naa a mane sèban. Éndagha, a ntoo zômô é yem naa a bele mbemba ôyane, éwi ye naa, a ye bo mvoa. Aval té daa-daa, mebun bi bele ébe ôyane ye nféféñ éning, ma vole bia naa bi zômô.

19. Dzé é ne bia vole naa bi zômô ?

¹⁹ Aval ane bi va yen de, Jehôva a vole bia naa bi zômô ngalane meyaghlan, Éfiè dèñ, bobedzang be ye ékôan, ya ôyane waa. Nge bi tugha yem belane mevole meté, Jehôva a ye bia vole ébe mindzukh misese bi ne tubane mio émo Satan di, ya ke kuiñ émi mité mia ye man mbèmbèè (Beph. 4:13).