Ô ne bele ndzi-n’nem naa Jehôva a djiiya wa

1-2. Za dzam bia wôran éyong bia yem naa Jehôva a djiiya minsem mia ? (A daghe fe atarga).

KÉZA David a mbe é yem é dzôm é ne naa môr a wôrane bidzô akal minsem a nga bo melu ô mvus (Bya 40:12 ; 51:3, encabezamiento nge ki suscription). A nga bo bura bivus bizing éning dèñ. Vedaa, a nga lere naa a dzôban ya n’nem ôse, Jehôva ñe a nga djii fe ñe (2 Sam. 12:13). Asughlan, David a mbe mevakh éyong a nga wokh naa Jehôva a nga djii ñe (Bya 32:1).

² Aval ane David, bia, bia wôrane fe mevakh éyong bia ñu tang naa Jehôva a djii minsem mia ya éngôngoo n’nem. Da fong bia a yem naa Jehôva a ne nkoghane naa a djii minsem mia, ya ke kuiñ émi mi minen ; nge bia dzôban ya n’nem ôse, bi mem minsem mia, bi ve fe mengu’u mesese naa bi taa bera baalé bivus bia ! (Mink. 28:13 ; Bisè mintôl 26:20 ; 1 Jean 1:9). Da sili bia min’nem ôsi, a yem naa Jehôva a djii minsem mia, aval é ne ngum, dé lighi fe ane nsem wéé dzi vaghle bo ! (Ézéch. 33:16).

3-4. Za aval kal dzaa ézing é nga wôran niène a nga duban, za dzam ki bia ye yen ayeghle di té ?

³ Biyong bizing, é ne bôr bézing ayèñ a yebe naa, Jehôva a djiiya bo. N’tamane yen éfônane Jennifer, éñi a nga vem a bebela été. Éyong a mbe étong, a nga bo mbia be-mam, é ning fe bining bibèñ. Ve, mimbu ôsu, a nga bo betsen éde a nga kee Jehôva éning dèñ, a dubane fe. A dzô naa : « Éning me mbe me bele ô mvus, é mbe ndzalan ya ôzang akum, nsem bizazama, a bira ñu meyokh, ye a bira dzing meyaa. Ôsimane wom été, me nga yem naa nge me dzaa bidjiiya, me dzôbane fe, metungha Yésu ma ye ma fubu. Ve, méé mbe ki me bele ndzi-n’nem naa a djiiya faa ma. »

⁴ Ye biyong bizing é ne wô ayèñ naa ô bele ndzi-n’nem naa Jehôva a djiiya wa, ya minsem ô nga bo melu ô mvus ? Jehôva a kômô naa bi bele ndzi-n’nem ya n’nem éngôngoo wèñ ane David. Ayeghle di, bia ye yen amu dzé bi ne yebe naa Jehôva a djiiya bia, ya é dzam é ne bia vole naa bi bo do.

AMU DZÉ BIA YIÈNE YEBE NAA JEHÔVA A DJIIYA BIA ?

5. Za dzam Satan a kômô naa bi bunu ? Vakh éfônan.

⁵ Éyong bia yebe naa Jehôva a djiiya bia, bia ne saalé bi ku ôlam Satan ôvoo. Simane naa, Satan a ye ve mengu’u mesese nfa ye naa bi dzôghe naa bia sèhane Jehôva. Naa a wun dzam té, a ye dzeng naa bi tem naa minsem mia, béé se mia djii. N’fasghan éfônan môr ézing ye a Corinto be nga vaa ékôan amu nsem bizazama (1 Becor. 5:1, 5, 13). Ôsu vaa, a nga dzôban, ve Satan a nga kômô naa ékôan é tep naa da djii môr té, ya ke kuiñ naa é tep naa da ve ñe mbemba nsoan ékôan été. Nfa mboo, Satan a nga kômô naa é môr a nga dzôban a wôrane naa, nsem wèñ béé se ki wa djii éde, « a bira yep a n’nem ya tobe édedaa éwiñ » nfa ye naa a likh naa a sèhane Jehôva. Satan aa be ki tsen nsonghane wèñ nge mboane mam wèñ. Ve, « bia, biaa dzimi ki melam mèñ » (2 Becor. 2:5-11).

6. Za dzam bi ne bo nge bi ngen bia wôrane naa Jehôva aa be ki djii minsem bi nga bo melu ô mvus ?

⁶ Éyong bia yebe naa Jehôva a djiiya bia, é ne ve naa bi taa bera wôrane bidzô. Éyong bia bo nsem, bia wôrane bidzô (Bya 51:17). Dzam té é ne mbeng. Ôbualé waa ô ne bia tsini naa bi tsen abo-dulu (2 Becor. 7:10, 11). Ve, nge bi tsini naa bia wôrane naa, Jehôva aa dzi ki bia djii, dzam té é ne likh naa bi dzôghe naa bia sèhane ñe. Éyong bia yebe naa Jehôva a djiiya bia, dzam té é ne likh naa, bi taa fe wôrane bidzô ye likh bie ô mvus. Éyong té bia ye sèhane Jehôva aval a kômô, ya ôbualé ô ne nfuban, ya mevakh (Becol. 1:10, 11 ; 2 Tim. 1:3). Éndagha, aval avé bi ne ban n’nem waa naa ô yebe naa Jehôva a djiiya bia ?

DZÉ É NE BIA VOLE NAA BI YEBE NAA JEHÔVA A DJIIYA BIA ?

7-8. Aval avé Jehôva a nga lereban ébe Moisés, ye naa, za mebun dzam té da ve bia ? (Akôre 34:6, 7).

⁷ A binan ébe aval Jehôva a nga lere émién. Tame yen éfônan, éyong Jehôva a nga kobe ya Moisés nkôô Sinaía (a lang Akôre 34:6, 7). Ébe é mam mesese Jehôva a mbe dzô ébe mefulu mèñ ya mezen mèñ, a nga yen mbeng naa a lereban ane « é Nzame a lere bôr mvam ya éñi a ne n’nem éngôngoo ». Ye Nzame té a ne tep naa a djii é môr a lughu ñe ya bebela, éñi a dzôban ya n’nem ôse, ébe nsem a va bo ? Kaa dzôm ! Dzam té é ne lere nget ya zông, Jehôva ñe aa se lere aval mefulu meté.

⁸ Bi ne bele ndzi-n’nem naa, éyong Jehôva a dzô bia naa a ne mvam, a kobe bia bebela ye naa, aa se bia bo minaa tam ézing (Bya 31:5). Ya dzam té, bi ne bele mebun ébe é dzam a dzô bia. Nge da bo wa ndzukh naa ô vuène minsem ô nga bo ô mvus, silighe wamién naa : “Ye me bele faa mebun naa Jehôva a ne é Nzame lere bôr mvam ye naa a ne n’nem éngôngoo, ya fe naa, tam ézing aa se tep naa a djii mbo-minsem ase a dzôban ? Éyong té, ye maa yiène ki yebe naa Jehôva djiiya ma ?”

9. Dzé da yili naa, minsem mia mi ntoo ndjiiane ? (Bya 32:5).

⁹ A binan ébe é dzam Jehôva a nga lôm betsili Biblia naa be dzô nfa ndjiiane wèñ (a lang Bya 32:5). Éfônan, tame siman aval kéza David, môr mboo ye éba be nga tsili Biblia, a nga lere ane Jehôva a djii. David a nga dzô naa : « Ô nga djii évus ye minsem miam ». Éfiè Hebreo ba konghlane naa « a djii » é ne fe yili naa « a tele ôyôp », « a vaa » nge ki, « a ke de ». Ya dzam té, éyong Jehôva a nga djii ñe, David a nga wôran ane ba vaa ñe mbaghe ô mbe adzit a baghe. Éde, David a mbe wôrane mevakh é yem naa Jehôva a djiiya ñe aval é ne ngum (Bya 32:2-4). Bia bi ne fe wôran aval mevakh meté mevoo-mevoo. Éyong bia dzôban ya n’nem ôse, biaa yiène ki tsini naa bia wôrane bidzô akal é dzam bi nga bo ô mvus. Vedaa, bia yiène wôrane mevakh éyong bia simane naa, Jehôva a djiiya bia ya n’nem ôse.

10-11. Bifiè « nkoghane naa a djii », bia lere bia za dzam nfa Jehôva ? (Bya 86:5).

¹⁰ (A lang Bya 86:5). E va, David a kobe adzô Jehôva é dzô naa, ô ne « nkoghane naa wa djii ». É kobe adzô bifiè bité, n’fasane ye a Biblia ézing wa dzô é dzam di dé daghe Jehôva : « [A] ne é “Môr a djii”, a ne é “fulu” dèñ ». Amu dzé é ne Jehôva fulu naa a djii ? Nfa bèè ye éfus té da dzô naa : « Ô ne ndzalan ya édzing é ne sôsôe akal é bôr besese ba luè wa ». Ane bi va yeghe ayeghle ye ô mvus, édzing é ne sôsôe Jehôva da tsini ñe naa, a bo élar é ne ngu’u ya besôsôe bebo-bisèñ bèñ. Amu sôsôe édzing té, Jehôva « a ye djii ya n’nem ôse » bebo-minsem besese ba dzôban (Esaïe 55:7, atoan). Nge da bo wa ayèñ naa ô yebe naa Jehôva a djiiya wa, tam ézing ô ne sili wamién naa : “Ye ma bunu faa naa Jehôva a djii, naa a dzame ya n’nem ôsese é bôr besese ba dzôban, bé dzaa fe ñe naa a kuè be éngôngoo ? Éñeng, ye maa yiène ki yebe naa Jehôva a nga djii ma éyong me nga dzaa ñe naa a kuè ma éngôngoo ?”

¹¹ Bi ne bele afôlô éyong bia yem naa Jehôva a tugha mane wokh étéñ bebo-minsem daa (Bya 139:1, 2). Dzam té da tugha lereban ébe é dzia éfe David é ne fe bia vole naa bi yebe naa, Jehôva a djiiya bia.

Ô TAA VUÈN É DZAM JEHÔVA A SIMAN

12-13. Aval ane abakh Bya 103:14 da lere de, za dzam Jehôva a siman nfa waa, ye naa, da tsini ki ñe naa a bo za dzam ?

¹² (A lang Bya 103:14). David a dzô naa Jehôva a « simane naa bi ne metso ». Ya bifiè bité, David a tugha ngônô amu dzé Jehôva a ne nkoghane naa a djii é bôr ba sèhane ñe éyong ba dzôban : Jehôva a siman éyong ésese naa, bi ne bebo-minsem. Nfa ye naa bi tugha wokh dzam té, n’tughane bera fas bifiè David.

¹³ David a dzô naa Jehôva a « yem mbeng aval bi ne nkôman ». Jehôva a nga vele Adán « ya metso me ya si », a yem fe naa é boan be-bôr be ne kaa bikop, be bele meniè. Éfônan, ba yiène dzi, a ke ôyô, ye a vebe (Atar. 2:7). Ve, éyong Adán ba Eva be nga bo nsem, adzô ye a bo metso é nga bera zu bele éyilgha éfe. Amu ye naa bi ne é boan beba, bi bele nsem, dzam té da tsini bia naa bi bo é mam me ne abé. Jehôva aa yem ki fave naa bi ne bebo-minsem ; David a nga lere naa, Jehôva a « simane » de. Éfiè Hebreo ba belane de va, a ne ane ba dzô naa, môr a bo mbemba dzam. Da yili naa, bi ne fe wokh bifiè David bité aval di : Jehôva a yem naa bia ye bo bikop biyong bizing. Éde, éyong da lôr a bia, da likh naa a lere bia n’nem éngôngoo, é djii fe bia, éyong bia dzôban ya n’nem ôse (Bya 78:38, 39).

14. (a) Za dzam David a bera dzô nfa aval Jehôva a djii bia ? (Bya 103:12). (b) Za dzam bi ne yeghe ébe aval Jehôva a nga djii David ? (A daghe nkaalé « Aval Jehôva a djii ye vuèn »).

¹⁴ N’djiiane Jehôva wa sughe ôvé ? (A lang Bya 103:12). David a dzô naa éyong Jehôva a djii, a likh minsem mia « ôyap aval ane é vôm nlô-dzôp wa [tebe] ya é vôm wa ke [bôme ôsi] ». Da yili naa, é vôm nlô-dzôp wa tebe ya é vôm wa ke bôme ôsi be ne édedaa ôyap, aval da ve naa béé se ki tubane tam ézing. Dzam té da yeghle bia za dzam ébe minsem Jehôva a djii bia ? Abakh ézing be ne tobe de mebun da lere dzam té dé dzô naa : « Nge nsem waa, wa ke édedaa ôyap ya é vôm bi ne, bi ne tobe ndzi-n’nem naa éñum é maneyang, ndem ézing déé se fe, baa simane ki fe wô ». Tame tem é dzam di, éñum é ne likh naa môr a simane dzam ézing. Ve, éyong Jehôva a djii, a ne ane a mane vaa éñum ésese é mbaa, kaa naa a bera simane nsem waa, nfa ye naa a dzughu bia (Ézéch. 18:21, 22 ; Bisè mintôl 3:19).

15. Za dzam bi ne bo nge bia wôrane naa Jehôva aa be djii minsem bi nga bo ô mvus ?

¹⁵ Aval avé bifiè David bia kuan abakh Bya 103 bia vole bia naa bi yebe naa Jehôva a djiiya bia ? Nge bia bira wôrane bidzô akal minsem bi nga bo ô mvus, bi ne sili bia bebién naa : “Ye ma vuèn é dzam Jehôva a siman ? Da yili naa, ye ma vuène naa Jehôva a yem naa me ne mbo-minsem, ye naa, a djii mbo-minsem a dzôban ane ma ? Ye me ngen ma siman é dzam Jehôva a top naa a vuène, da yili naa, ye ma tsini naa ma simane minsem a djiiyang, émi aa ye fe bera simane môs ézing nfa ye naa a dzughu ma ?” Jehôva aa bembe ki ébe minsem bi nga bo melu ô mvus. Bia, biaa yiène ki de bo (Bya 130:3). Éyong bia yebe naa Jehôva a djiiya bia, bia ye djii bia bebién ya bivus bi nga bo metam ô mvus, ye tsini fe ôsu.

16. Vakh éfônane da lere amu dzé é ne abé naa bi tsini naa bia tem minsem Jehôva a djiiya bia ? (A daghe fe évaghle).

¹⁶ Tame siman éfônane di. Éyong môr a duru metua, a ne dong é moan ngop a vole ñe naa a yen é mam ma boban ô mvus. A ne bo dzam té biyong bizing. Ve, é ne bo abé nge moan ngop té étam éñe a dong éyong ésese. Nfa ye naa a yem duru, da dzaa naa a dong ésala ôsu. Aval té daa-daa, é ne bo éban nge biyong bizing bia dong minsem bi nga bo ô mvus ; amu bi ne ñong meyeghle, bi ne fe wônô ébanegha daa naa, biaa bera ki mia baalé. Ve, nge bi tsini naa bia bembe ébe bivus bi nga bo ô mvus, bi ne bira wôrane bidzô aval é ne ve naa bi likh naa bi taa tugha yem sèhane Jehôva éndagha. Zelane ya do, bia yiène bembe ébe é zen bi bele ôsu. Bia wulu é zen da ke bia éning é ne mbèmbèè Jehôva a nga kiagh bia, é vôm mbimbia mesiman « maa ye fe bera so ôsiman » (Esaïe 65:17 ; Mink. 4:25).

TSINIGHE NAA WA DZENG NAA N’NEM WIÈ Ô YEBE

17. Amu dzé bia yiène tsini naa bia dzeng naa n’nem waa ô yebe édzing ya n’djiiane Jehôva ?

¹⁷ Bia yiène tsini naa bia dzeng naa n’nem waa ô yebe naa, Jehôva a dzing bia ye naa, a djii bia (1 Jean 3:19, atoan). Amu dzé ? Amu Satan aa ye ki dzôghe naa a ve mengu’u naa bi yebe naa, béé se bia dzing nge ki naa, béé se bia djii. Aval ése é ne bo, n’songhane wèñ ô ne naa, a kômô naa bi likh naa bia sèhane Jehôva. Bi ne yane naa Satan a ye bera koghle mengu’u ébe dzam té, amu naa a yem naa tam é ligh-yang ñe avitsang (Mel. 12:12). Biaa yiène ki likh naa a wun !

18. Za dzam ô ne bo naa n’nem wiè ô yebe édzing ya n’djiane Jehôva ?

¹⁸ Ayeghle bi nga bo ô mvus é nga lere é dzam wa yiène bo nfa ye naa ô yebe naa, Jehôva a dzing wa. Ayeghle di, é va lere wa aval ô ne bele ndzi-n’nem naa Jehôva a djiiya wa. Éfônan, siman é dzam a nga dzô nfa ébe émién. A binan ébe é dzam a nga lôm é bôr be nga tsili Biblia naa be dzô nfa n’djiiane wèñ. Ô taa vuène naa Jehôva a simane naa ô ne mbo-minsem, ye naa, a ye wô lere é mvam dzèñ. A simane fe naa, Jehôva a djii aval é ne ngum. Éyong té, ye aval mebun David ñe fe a mbe a bele ébe é mvam Jehôva, waa, wa ye fe dzô naa : « Akiba, a Jehôva, amu ô va djii “évus ye minsem miam” ! » (Bya 32:5).