Bemvene baa be se ki bivet bechrétien. Ésèñ ba bo ékôan été baa tang ki be de, be ne é bôr be ne Jehôva bebéñ aval ane é ba ya ntet mimbu ôsu be mbe, be ne bebaghle akal ékôan Nzame (Bisè Mintôl 20:28). Ba dzale mefulu me Nzame ma yiane nfakh ya yeme wulu ye baghle ékôan Nzame « saa akal naa ba yemele be, ve a n’nem ôse, saa akal ényeghe mono ve yaa ngul ése » (1 Pierre 5:1-3). Ba bo za dzam akal daa ?

Ba baghle ye kamane bia. Bemvene ba lere bia zen, ba kamane bia ye vole ékôan naa é tobe Jehôva bebéñ. Ba yeme wokh naa Nzame é nye a nga ve be môra ésèñ te, é de be ne keghe bia ndeghle, ba dzeng naa bi ning mvoghe yaa mevakh été (2 Becorinthien 1:24). Aval daa ane mbaghle mintôma aa yeghle mintôma myéñ, bemvene ba ve ngul yaa yeme môr ase yaa ékôan été.​—Minkana 27:23.

Ba yeghle bia ane bi ne bo nkômane Nzame. Sono ase, bemvene ba wulu bisulan bi y’ékôan e bo naa mbunan waa ô wône (Bisè Mintôl 15:32). Bemvene ba lere fe bia éfônan nkanghle amu éyong bia be be bia kuiñ, ba yeghle ye lere aval bi ne yeme kanghle.

Ba ve bia ngul nyôl. Naa môr ase yaa bebia a bele mbemba élat ye Jehôva, bemvene ba ñong éyong yaa luè minlang yaa bia e nda ékôan nge ki menda maa. É dzam ba dzeng é ne naa be vole bia naa bi bele ngul nyôl ngalan Bible.​—Jacques 5:14, 15.

Bisèñ bemvene ba bo biaa sughe ki ve ékôan été. Abuiñ ya été be bele mesu m’éséñ mefe ane e yeghle menda me bôr meba. Mam mete ma ñong be abuiñ éyong. Bobedzang be te « ba yiane ñong ngang yaa éseme ».​—1 Bethessalonicien 5:12, 13.

• Z’asu ésèñ bemvene be bele ?

• Z’avole ba ve môr ase ya bebia ?

Bible a lere naa bôr meval me bèè be beghe meveghe ékôan été « bemvene ya b’amvene » (Bephilippien 1:1). Ékôan ése é bele abuiñ b’amvene. B’amvene ba bo dzé akal daa ?

Ba vole bemvene. A bo bitông nge ki min’nôm, b’amvene be ne Jehôva bebéñ, be ne é bôr bi ne tobe be ndzi n’nem. Ékôan été ba tsiè abuiñ mam me ne éban me deghe ane mam ma yiane wulu ya ngomele. Aval te da ve naa bemvene be tugha bele éyong ya yeghle ya baghle ékôan.

Be ne nfî. B’amvene b’ézing ba ñong bôr ye ôsesa ve lere be bitoo éyong ba zu bisulan. É ba bevokh ba fure mezik, ba fas mam me mono bivevee, ba kap bekalare, ba lere bia é vôm bia kanghle. Ba baghle ékôan nfuban. Bemvene ba sili be biyong b’izing naa be ke vole min’nôm mi bôr. Ba bo bisèñ bi te bise yaa mbemba n’nem, mboan te wa so be éseme.​—1 Timothée 3:13.

Ba lere mbemba éfônan. Ba top b’amvene akal mbemba mefulu me nsisim meba. Bisulan, mintun miaba mia wônô bia mebun. Ayông Minkanghle deba da ve bia ngul. Ésèñ fufulu ba be bemvene da so bia élat (Beéphésien 4:16). Nge ba tsine mboan te ôsu, be ne sughlane tobe bemvene.

• Aval mefulu mevé b’amvene ba yiane bele ?

• Za mam ba bo naa ékôan Nzame é wulu mvoghe ?

Mintsilan mi kalare Nzame nkobe grecque mia bo mban yaa tu Barnabé ye ntôl Paul. Amu be mbe bedeghe bikôan be nga yeyen bikôan yaa ntet mimbu ôsu. Amu dzé be nga bobo de ? Akal be nga vevegbe éning bechrétien bevokh. Paul a nga dzô naa : « mbulghane mvus bi ke yen ane bobedzang be to’o. » A nga yebe naa aa wule mintet bekilometre akal e ke ve be ngul nyôl (Bisè Mintôl 15:36). Aval te bedeghe bikôan be ya ému ba bo.

Ba zu bia ve ngul. Ndeghe ékôan ase a bebe bikôan 20 ; a lôre ngura sono ba bebe biyong bibèè ébe mbu. Mefekh mèñ ye éma ngal nge a ne nlughan me ne bia abuiñ éban. Ba ve ngul naa be yem é bôr bese be ne bikôan, ve ki lerane be minkanghle yaa meyeghe Bible. Ba vole bôr be yaa ékôan éyong ba yen be menda meba yaa nsama bemvene. Mintun ba ve bisulan yaa é bôra bisesang ma yemele bia mebun​—Bisè Mintôl 15:35.

Ba ñong môr ase ngap. Bedeghe bikôan ba vole bôr yaa ékôan naa be bele mbemba élat ba be Jehôva. Ba sulan ba be bemvene ye b’amvene naa be fas ane ésèñ da wulu ye ve melepgha ma lere ane bôr be ne yem mbeghe memveghe be bele ékôan été. Ba vole bempwaghe mefan naa be yem wum mbemba bibuma minkanghle, ba yen mbeng éyong ba tobane minféféñ mi bôr ye yen ane ba vem nsisim. Ba ve ngul deba ése naa be bo ésèñ te ya fe naa be tobe « be ñong ngap ya ésèñ akal daa » (2 Becorinthien 8:23). Mebun meba y’élat é ne ézezang ba be Nzame é ne bia mbemba éveghla bia yiane vu.​—Behébreu 13:7.

• Akal dzé bedeghe ba zu bebe bikôan bi Nzame ?

• Aval avé mi ne bele nfî éyong ba zu mina yen ?

Éyong étemetem dzam da kuiñ ébe Bengaa Jehôva, éto’o te bieñ bia kôman ye fas aval bi ne vole bobedzang be tele minzukh été. Mimboan mi te mia lere ényeghe é ne ézezang dzaa (Jean 13:34, 35 ; 1 Jean 3:17, 18). Aval avé bia vole bobedzang ?

Bia ve mono. Éyong zèñ é nga kuiñ a Judée ntet mimbu ôsu bechrétien be yaa Antioche be nga lôm be mono (Bisè Mintôl 11:27-30). Melu maa fe nge bia wokh naa vôm ézing nzukh ô bele Bengaa, bia lôm bivevee akal e vole bobedzang ngalan bikôan bia.​—2 Becorinthien 8:13-15.

Bia kômane mimvolane. Bemvene be ne é vôm nzukh ô va kuiñ, ba dzeng naa be yeme nge bobenyang bese be ne mvoghe. Ba tele moan nsama bôr naa be tia medzô bidzi, mendzim, mebiang, bitop ye menda. Bengaa ba yeme mesu m’ésèñ m’ézing, ba kôre mesi meba ye be mono beba naa be ke kuiñ é vôm nzukh ô ne, naa be kôme menda bobedzang yaa menda m’ékôan Bengaa me va tsame. Ésèñ bia bo fufulu da ve naa bi dzigha tebe ya e dzigha kuan éyong nzukh wa yene ngura vôm. Mimvolane mia, mia deghe bobedzang be ya nsisim, ve bia vole fe é bôr bevokh be se ki Bengaa.​—Begalate 6:10.

Bia belane Bible naa bi vole é bôr bevokh. É bôr bese ba yen minzukh, ba yane naa be vole be. Biyong bi te, bia ñong ngul ébe Jehôva « ésaa a ne mvam ya é Nzame a vole bôr min’nem » (2 Becorinthien 1:3, 4). Éyong bia lere bôr be te mengakh me ya Bible, bia ve be ndzi nlem naa Édjié Nzame da zu vaa minzukh meval mese.​—Melere 21:4.

• Akal dzé Bengaa ba dziga vole é bôr be ne minzukh été ?

• Z’aval bi ne vole min’nem é bôr minzukh mi bele ?

Keghe naa a wu, Yésu a nga luè minlang ba be beyeghe béñ be nii : Pierre, Jacques, Jean ye André. A nga ve be ndem da ye lere nsoane wéñ melu me y’asughlan. Éyong te a nga sili môra nsili naa : « za a ne ôlo’o ô ne sôsôe ya nkyel é masa wéñ aa ye top naa a ve bôr be yaa nda dzèñ bidzi éyong da yiane ? » (Matthieu 24:3, 45 ; Marc 13:3, 4). Bidzi ba kobe bie bi ne bidzi bi yaa nsisim, da yili naa n’yeman Nzame. Yésu, « masa », a nga kakh beyeghe béñ naa aa ye top é bôr ba ye ve be abuiñ n’yeman te melu me y’asughlan. Za a ye bo ôlo‘o ô te ?

É Moan nsama bechrétien be ne nwaghane mboan. « Nwaghane mboan » wa yili naa ô ne tobane yaa nsisim Nzame. Ôlo’o te é we ô ne Tsin Ékôan Bengaa Jehôva wa ve é bôr ba kang Jehôva bidzi bi yaa nsisim. Bia deghe ve nye naa bi ñong « ngap bidzi dzaa éyong da yiane. »​—Luc 12:42.

A baghle akum yaa nda bôr Nzame. (1 Timothée 3:15). Yésu a nga ke ôlo’o te môra mveghe naa ô baghle akum y’ékôan Nzame yaa si é tsinan​—nkanghle ye meyeghle ma bobane bikôan. Naa bi ñong é mam me ne bia éban éyong da yiane, « ôlo’o ô ne sôsôe yaa nkyel », wa ve bia bidzi bi ya nsisim ngalan bekalare bia belane be akal minkanghle ya meyeghle bia ñong bisulan ya bisesang binen bia.

Ôlo’o ô te ô ne sôsôe amu wa tông benya medzô me ya Bible, ya fe ésèñ minkanghle Yésu a nga ve be. Ôlo’o ô te ô ne fe nkyel amu wa tele é mam Christ ôsu (Bisè Mintôl 10:42). Jehôva aa borane wo ve ve naa ésèñ minkanghle é wum abuiñ bibuma ve ve fe nye abuiñ bidzi bi ya nsisim.​—Ésaïe 60:22 ; 65:13.

• Za Yésu aa nga top naa a ve beyeghe bèñ bidzi bi ya nsisim ?

• Amu dzé bi ne dzô naa ôlo’o ô te ô ne sôsôe yaa nkyel ?

Ntet mimbu ôsu, « moan nsama mintôl ye bemvene ya Jérusalem » ébe be mbe tsin ékôan. Ébe be nga ñoñong bura metsing akal bechrétien be ya melu mete (Bisè Mintôl 15:2). Bese be mbe king dzaa amu be nga bebelane medzô ma kuiñ é Kalare Nzame, ye likh naa nsisim Nzame ô wulu be (Bisè Mintôl 15:25). Aval te éde da bobane ému.

É moan nsama bechrétien Nzame a belane wo. Bobedzang be ya Tsin Ékôan ba nyeghe ba yeghe Kalare Nzame. Be bele abuiñ n’yeman nfakh biyalan yaa minsili mia deghe medzô me Nzame, ye ésèn minkanghle. Tsin Ékôan da tobane éyong dzaa ébe sono naa be fas é mam ma tsinane bikôan bi ya si ése. Aval ane é nga bobane melu mvus, ba ve melepgha ma so Kalare Nzame. A kôre ya été ba tsili be kalare ve lôm besôsôe be va ñong bikôan bise. Mboane te wa ve naa bi bo dzam daa (Bisè Mintôl 16:4, 5). Tsin Ékôan da ve naa mam me yeme wule akal ngomele be ne, ba kôm bidzi bi ya nsisim ye sukh ésèñ minkanghle a si. Ébe fe ba tele é bobedzang ba beghe memveghe bikôan naa bisèñ bi ke ôsu.

É moan nsama bechrétien nsisim Nzame wa wulu wo. Tsin ékôan da wule aval Jehôva baa Yésu ba lere nye (1 Becorinthien 11:3 ; Beéphésien 5:23). Bôr be te be se ki bivet é bôr bevokh. Ba be bechrétien bevokh « ba bo mban ya tông moan Ntôma [Yésu] é vôm ase aa ke » (Melere 14:4). Tsin Ékôan da yen mbeng éyong bia yeghlane akal deba.

• Beza be mbe tsin ékôan melu mvus ?

• Aval avé Tsin Ékôan da wule ane Nzame aa kômô naa a wule ému ?

Béthel, nkobe Hébreu a yili naa « Nda Nzame » (Atargha 28:17, 19). Ba luè menda bisèñ Bengaa Jehôva be bele mesi mesi akal minkanghle mia deghe mbemba fuèñ naa Béthel. Amerka, a kisôan ba luè naa New York, Tsin Ékôan da bebe bisèñ bise bia bobane si ése ngura. É bôr bese ba bo bisèñ menda me te be nto’o nda bôr ya Béthel. Aval ane nda bôr, ba nying ye dzi nsama mbokh, ba yeghe kalare Nzame élat été.​—Bya 133:1.

É vôm môr ase aa lere éyî. Be Béthel be se, Bengaa a bo befam nge ki binenga, ba ve éyong deba ése naa ba bo nkômane Nzame ye sukh Édjié Nzame a si (Matthieu 6:33). Môr ézing y’été a bele ki ôba, ve bese be bele vôm ya tobe ye dzi, ba ve be ôyom mone naa be dzale é mam me ne be éban. Môr ase y’été a bele asu ésèñ dèñ. A bo ôfisina, kisin, nda bidzi, é vôm ba kom bekalare, nkômane y’é vôm ba dzi, é vôm ba sô bitop y’é mam mese mevokh.

É vôm ba tele ésèñ minkanghle ôsu. A su ésèñ Béthel ase a tele ôsu é ne naa, bôr abuiñ be wokh benya medzô ma so e Kalare Nzame été. Nsoe kalare wi ô ne ndem dzaa y’été. Nsoe kalare te ô nga tsilban ngalan Tsin Ékôan, éyong be mane tsile, ba lôme we ébe é bôr ba konghlane bekalare minkobe meval meval. Niane nkonghlane ô mane-yang ba lôme we minsini a kule bekalare. A sughlan y’été ba lôme bekalare be te bikôan a lôre 120 000 bi ya si ése. Béthel a sukh bisèñ bi te asi, akal e ve naa​—ésèñ minkanghle é ke ôsu.​—Marc 13:10.

• Beza be ne be béthélite, ye ba tang be ?

• Za ésèñ béthel ase a sukh a si ?

Mesu m’ésèñ meval meval me ya Ntem Ékôan, be ne fe luè naa Béthel, ma deghe ésèñ minkanghle ya mesi nge ki si dzaa. Ba kônghlane ye kule bekalare, ba lôme be mesi mesi, ba kôme fe audio ya bingengeng.

Nsama bemvene wa wule ésèñ. Tsin Ékôan da kee bisèñ bise bia yiane bobane Ntem Ékoan ébe bebu mefekh belal be ne nwônan. Nsama bemvene be te ba lôme Tsin Ékoan mefuèñ ma deghe ane bisè bia wulu mesi me larane Ntem Ékoan, nge ki ayôm minzukh be ne tobane myo. Be yeme medzô me Nzame été naa be deghe bisèñ bise bia bobane ntem ékôan. Mefuèñ me te ma vole Tsin Ékôan naa a kôme minlô medzô aa ye belane myo minféféñ bekalare aa ye kulu akal bisulan ya bisesang binen. Tsin Ékôan da lôme môr naa a zu yen ane ésèñ da wule Ntem ékôan (Minkana 11:14). Éyong nlômane te wa so, a bo ntun wa ve Bengaa bese ngul nyôl.

A sukh bikôan bi lare nye a si. É bobedzang ba sèñ e Béthel ba ve naa minféféñ bikôan mi biale. Ba sukh bisèñ Bempwaghe mefan a si, minlôman ya bedeghe bikôan. Ba kômane fe akal bisesang binen, ba tsiè adzô nlonghan minféféñ menda m’ékôan, ba ve fe naa bekalare be kuiñ bikôan. Mam mete mese ma ve naa ésèñ minkanghle é ke ôsu.​—1 Becorinthien 14:33, 40.

• Aval avé Mintem m’ékôan mia vole Tsin Ékôan ?

• Z’ésèñ Mintem m’ékôan mia bo ?

Ôsiman ya naa môr ase a wokh « mbemba fuèñ » si ése ngura, ô nga ve naa bi kule bekalare a lôre minkobe 900 (Melere 14:6). Dzé é nga ve naa bi bo abîm ésèñ te ? Si ése ngura bi bele nsama be tsili ye be konghlane bekalare bese be ne nsaza​—Bengaa Jehôva.

Kalare ase a tare kuiñ kobe nges. Tsin Ékôan, é tele ésèñ mintsilan bekalare ôsu. Ba deghe ésèñ mintsilan da bobane wéñ ya é di da bobane mintem mi ékôan m’izing. Amu a bele be tsili bekalare mesi mese, dzam te da ve Tsin Ékôan naa a bele abuiñ minlô medzô mia name bôr bese.

Ba lôme kalare ébe é bôr ba konghelane nye. Niane ntsilane ô mane-yang betsili ba lang ye deghe nge ékop é se, a kôre ye vèè, kalare a ke ébe benkonghelan be ne si ése ngura. Moan nsama te a tare lang e bo naa be yeme top « bifia bi ne sôsôe ye foghe-foghe » da yili naa bifia bia fônane nges nkobe weba.​—Ecclésiaste 12:10.

B’ordinateur ba ve naa ésèñ é wule avôl. Bi se dzô naa b’ordinateur ba b’ésèñ ane moan môr. Ve, ba ve naa ésèñ é bo ébubu, keghe ki dzimele éyong. Bengaa Jehôva be nga kôm minsini aa wule e nden mba luè naa MEPS « Système électronique d’édition multilingue ». A ve naa be kule bekalare tang minkobe mintet ya biveghle bia yule ye bie éyong dzaa.

Amu dzé bia kule bekalare minkobe m’izing bôr be se ki abuiñ ? Amu nkômane Nzame ô ne naa « bôr bese be tobe nkôran ye tugha yeme be bebela ya bible ».​—1 Timothée 2:3, 4.

• Aval avé bekalare baa ba tsiliban ?

• Amu dzé bia konghlane bekalare baa abuiñ minkobe ?

Bia kule ye kap bizuk be bible ye bekalare befe mbu ôse kaa tang. Bia long ye kôm menda m’ékôan y’é ma me ya Bebéthel. Bia sukh minlôman a si y’é bobedzang ba sèñ Bebéthel, bia vole fe é bôr be tele minsukh été. Nsili ô to’o naa « é mono bia bo nye bisèñ bi te aa so bia vé ? »

Biaa ñong ki ngap awôm, keghe ékama, nge ki ñong ket. Afiang bo naa bisèñ biaa bise bia sili abuiñ mono, ve biaa dzaa ki nge ñong mono ébe bôr. Anto’o ayap éyong, Ô momo ézing a nga kuiñ éé lere naa bia bune naa Jehôva éé nye a sukh bia asi. « Biaa sili ki bôr mono nge​—ki dzôm ézing »​—a ne bi nga baghle de !​—Matthieu 10:8.

Bivevee bia sukh bisèñ bia bo asi. Bôr abuiñ ba nyeghe ba yen bisèñ bia bo. Dzam te da ve naa be fure bivevee. Bengaa Jehôva be bele mevakh naa ba ve éyong, ngul, mono ye biôm bife be bele naa nkôman Nzame ô bobane si é se (1 Minlan 29:9). A Nda Ékôan dzaa nge ki mevôm bia bo bisesang binen, é bôr ba kômô, be ne fure é dzôm be bele minkop bivevee. É mono waa a dang so ébe é bôr baa bele ki abuiñ. Éfônan ane nkus minenga ya Temple ô nga ve ayôm minsang mi mono mi bèè (Luc 21:1-4). Aval te môr ase ane baghle « dzôm ézing e fefel » naa a ve de Nzame « aval n’nem wèñ wa kômô » keghe dzôban.​—1 Becorinthien 16:2 ; 2 Becorinthien 9:7.

Bi ne dzi n’nem naa Jéhôva a ye ke ôsu naa a boran é môr ase a wume nye yaa é biôm byèñ akal e ve naa nkômane wèñ ô boban.​—Minkana 3:9.

• Nselan ôvé ô ne ézang Bengaa Jehôva ya min’yebe minvokh ?

• Bivevee bia ve naa bi bo dzé ?

Ane éyôla da lere de, menda m’ékôan​—me ne mevôm bia ñong meyeghle ma deghe Édjié Nzame : nlô adzô minkanghle Yésu.​—Luc 8:1.

Mevôm ba ve Jehôva nya éwuma. Bengaa Jehôva ba tôbane fe nda ékôan akal nkômane ésulan minkanghle (Matthieu 24:14). Menda m’ékôan me se ki abîm nge ki nlonghan aval daa. Menda m’ékôan m‘ézing me bele abuiñ bikôan bia sulane été. Melu maa ma bikôan bia vem, éde da ve naa bi long minféféñ menda m’ékôan, bi ne long abong ézing metan ébe môs. Bi nga long nge ki a veme mewôm betoyini mendaa m’ékôan. Ve, é ne bobane ya ?​—Matthieu 19:26.

Ma longban yaa bivevee bi ne fuful. Bia lôm bivevee bia e ntem ékôan, e bo naa be long minféféñ menda m’ékôan, nge ki a kôm é ma me ndamane-yang.

Ma longban ngalan nsama bemem wa so mesi mesi. Abuiñ mesi, me bele nsama bemem wa long menda m’ékôan. Wa ke mevôm mese ba luè be afiang bo naa mevôm me te me ne ôyap. Mboan te wa ve naa Bengaa bevokh be bele menda m’ékôan. Mesi mevokh, Bengaa ba yem bo bisèñ me long ba mveghe ya long ye kôm menda m’ékôan. Ve, Bengaa bebièñ be ne é vôm nda ékôan da kômô longbane ébe ba yiane bo abuiñ ésèñ. Nsisim Nzame wa ve naa bisèñ bi te bi ke ôsu.​—Bya 127:1 ; Becolossien 3:23.

• Amu dzé bia luè menda bisulan maa naa menda m’ékôan ?

• Aval avé bia long menda m’ékôan si se ngura ?

Éyola Nzame é ne ntsilan menda m’ékôan mese. Akal te é de bia baghle me nfuban ya mbemba nkôman, e lere naa bia kang é Nzame waa. môr ase a ne bo ésèñ te.

Ésulan ése bia bo nfuban. Ésulan ése bia vwén nda ékôan. Éyong dzaa e be sono bia bo ngul nfuban. Ngura mvene nge ki amvene é wo wa deghe ésèñ te ye kare é mam mese bia yiane bo. Ane a vwéñ, a fimi si, a fimi bito, a tukh bidukh, a fimi mengop, a vaa mbuan, a bo nfuban nseng. Éyong dzaa ébe mbu bia ñong ngura mos naa bia bo nfuban ya mbu, biabe é boan baa. Dzam te da ye ve naa be kang nda ékôan​—Ecclésiaste 5:1.

Bia kôm é biôm bi ndaman-hang. Mimbu mise bia deghe nge dzôm é ndaman-yang nda ékôan été nge ki atan. Èyong bia yen naa dzôm da deghle, bia dziga kôm e bo naa bi bo keghe dzimele abuiñ mono (2 Minlang 24:13 ; 34:10). Éyong nda ékôan é ne nfuban ye mbemba mbaghlan bia yen mbeng e wume Nzame été. Éyong bia fure é mo maa bisèñ bi te été bia lere naa bia nyeghe Jehôva ye nda ékôan dzaa (Bya 122:1). Dzam te da so bia olughe ébe bôr be ya minseng​—2 Becorinthien 6:3.

• Amu dzé bia yiane kang nda ékôan ?

• Aval avé bia baghle menda m’ékôan maa ?

Ye wa kômô tugha yeme mam m’ézing me ya Bible ? Ye wa kômô tugha wokh bitun bizing, nge ki naa wa kômô yem minlang bôr b’ézing, nge ki dzam ézing Kalare Nzame a kobe. Ye o sili ya wa myèñ nge Kalare Nzame a ne wo vole éyong o tele bitsile été ? Éberga bekalare é ne nda ékôan é ne we vole.

Éberga te é ne we vole. Abong ézing wa bele ki bekalare bese Bengaa Jehôva be kule-hang nkobe wiè. É ne éberga bekalare é ne nda ékôan é ne we vole amu é bele minnôm ya minféféñ bekalare. Minkônghlan mi Bible mi fe, mbemba mendzim soso’o ye bekalare bevokh. Atarga nge ki a mane ésulan o taghe vuèn ne naa o lore wèñ. Nge ordinateur a ne été abong ézing a bele Watchtower library é nye a bele bekalare bese bi kule-hang. Ane fe we vole naa o dzigha yen nlô adzô, éfia nge ki éfus ézing.

Éberga é ne éban akal bong be sikolo y’éning moan chrétien ya minkanghle. Éberga da vole bia éyong bia kôman ésèñ ya sikolo. é moandzang a bele mveghe ya ésulan éning moan chrétien ya minkanghle é nye fe a tia é mam ma deghe éberga. A ve naa bekalare be tabe nkôman ya fe naa bekalare be ndem kuiñ be bo keghe makh été. Nge wa kômô kalare ézing a ne we nye ke nge ki é môr a yeghle we medzô me Nzame. Ve, kalare ézing ya été a yiane ki kuiñ atan. Bia yiane ki tsili éyola dzaa été nge ki anyap mefep.

Kalare Nzame a yeghle bia naa « nge bia kômô bele n’yeman Nzame » bi dzeng we « ane bia dzeng ngos » (Minkana 2:1-5). Éberga bekalare ya nda ékôan é ne we vole nfakh te.

• Za biôm éberga ya nda ékôan é bele ?

• Za a ne we vole naa o yeme belan éberga ya nda ékôan ?

Yésu Christ a nga dzô beyeghe béñ naa : « éndendang denan é fèghe mesu me bôr, ndamben ba ye yen mbemba bisèñ binan, ve wume ésaa wonan a ne a yôp » (Matthieu 5:16). Akal te bia belane é mam beyeme mam ba té ane nden. Nge wa kômô yeme mbunane waa yaa bisèñ bia bo ô ne nyî jw.org. Dzé ô ne kwane de wéñ ?

Éyalane Kalare Nzame aa ve ébe abuiñ minsili bôr ba sili. Ô ne kwane biyalane bi ya bôra minsili y’éning. Ane nsoe kalare ô ne éyôla naa Ye minzuk mi ke foghe man dzô ézing ? ya fe, Ye bewu ba ye foghe wômô mô ézing ? biyalane ya minsili mi te bi ne a nden a lôre minkobe 800. A nden wéñ ô ne fe kwane Traduction du monde nouveau a lôre minkobe 160. A bele fe bekalare be fe ane Que nous enseigne la Bible ?, ye bekalare be ndeme kuiñ ane Ô momo nge ki Vééghan oyô ! Ô ne be lang, awokh, nge ki limle a nden meval meval : MP3, PDF nge ki EPUB. Ô ne fe kule mefep me y’été nkobe môr a kômô! Bingengeng bi ne fe abuiñ minkobe akal mimvuvukh yaa mindodokh. Ô ne fe yen mbeng nge wa limle bingengeng bi fe, bible, ya mbemba mezikh.

Mefuèñ ma deghe Bengaa Jehôva. É nden dzaa da kule minféféñ mefuèñ ma deghe ésèñ da bobane si se ngura ye é mam ma lot é vôm bobedzang be ne mesi mesi ye aval bia sukh é bobedzang be tele minzukh été. Ô ne fe koane é vôm be Bethel baa be ne yaa mefuèñ me yaa bisesang binen.

Mam me te mese ma ve naa éndendang é fèghe. Bia yeme naa bôr bese ba ke nden dzaa. Éde bia ke ôsu aa yeghlan naa : « adzô Jehôva é mane mialan » é si se ngura.​—2 Bethessalonicien 3:1.

• Aval avé jw.org a ve naa bôr be yeme benya medzô ?

• Dzé wa kômô yen a nden daa ?