Aval avé wa ye lere naa wa ve akiba akal ntang ?

1-2. Ntang Yésu wa yiane bia tsini naa bi bo za dzam, amu dzé ki ? (2 Becorinthien 5:14, 15). (A daghe fe évaghle).

Nge be kôre wa mekoa asi, éma é nda é va ku, ye waa ye ki wôrane naa wa yiane ve é môr a va kôre wa éning édedaa abuiñ akiba ? Amben bôr befe baa be va tobe fe nkôran, é ne bo naa wamién, wa kumu ñe ve akiba, nfa ye naa ô lere naa waa biane ki ntang wèñ, ye naa waa ye ki vuène môs ézing é dzam a va bo akal duè.

² Aval ane be va tugha da lere ayeghle ye ô mvus, biaa mba ki tobe fili ébe é mam nsem wa so a mo, éwi bi va ñong ane élikh. Vedaa, atungha Yésu a nga yaane ane ntang, ô ne bia kôre, dé ve naa (1) be dzame bia minsem bia bo, (2) bi bele ôyane ye a bo kaa bikop, ye naa (3) bi bera kôm élat daa ya Nzame. Asughlan, bi mbele-yang ntam ya ning mbèmbèè nféféñ éning Jehôva. Bebela ya bebela, ntang wa lere édzing Yésu akal boan be-bôt ; édzing a mbe a bele, abuiñ tam kaa naa a zu byale ane é moan môr a ne sôsôe a si va (Mink. 8:30, 31). Ntôô Pablo a nga tsili naa « édzing Krist da tsini bia » (a lang 2 Becorinthien 5:14, 15). Dzam té da yili naa, édzing Yésu da yiane bia tsini ébe ngura aval, naa bi lere naa, biaa biane ki atungha dèñ ane ntang.

3. Amu dzé aval éñil môr ye ébe bia a ve akiba akal ntang, é ne selane ya aval éñi mboo a bo do ?

³ Aval avé wa ye lere naa wa ve akiba akal ntang ? Éyalane duè é ne selane ya édi é môr mboo. Éfônane da lere bia aval é ne bo. Tame simane bôr belal, éba ba sum ékena naa ba ke vôm ôvoo, ve ñil mboo ye été a so é kisoan da selane ya éñi mboo. Mezen ba wulu ma selane. Aval té daa-daa, é « zen » wa ñong nge ki nsonghane, a ne naa, ô lere naa wa ve akiba akal ntang. Dzam té da daghe aval élat mina Jehôva é ne éndagha. Ya dzam té ôsiman, ayeghle di da ye kobe a meval me bôr melal : (1) É bôr be ngen ba ñong meyeghle me ya Biblia, (2) bekristen be dubaneyang, ya (3) bekristen be tele é nda-bôr Jehôva ôyap éndagha.

É DZAM Ô NE BO NGE Ô NGEN WA ÑONG MEYEGHLE ME YA BIBLIA

4. Za dzam Jehôva a wôrane nfa bong meyeghle be ya Biblia ?

⁴ Nge wa yeghe Biblia, fasghe é dzam di : Éyalane duè ébe mbemba fuèñ da lere naa ô ntoo môr mboo ye é bôr Jehôva a yir ébe ñe, naa be bele élat (Jean 6:44 ; Bisè mintôl 13:48). « Jehôva a fas min’nem. » Dzam té da yili na,a a ñuu tang mengu’u wa ve naa wa yeghe medzô mèñ. A ne fe n’nem mevakh éyong a yen ane wa vem nté wa ke wa bo betsen naa ô wulu ya metsing mèñ (Mink. 17:3 ; 27:11). Ntang wa likh naa ô bele élat é ne ngu’u ya Jehôva (Bero. 5:10, 11). Ô taa ki da vuèn.

5. Aval avé bong meyeghle be ya Biblia be ne dzale melepgha bia kuane mo é kalare Bephilippien 3:16 ?

⁵ Nge ô ne mong meyeghle ya Biblia, aval avé ô ne lere naa wa ve akiba ya ntang ? Ngura aval, é ne éyong wa béé melepgha ntôô Pablo a nga ve Bephilippien : « Kaa bis abim mi vemang, tsinighane naa mia wulu tetele zen té ébién » (Beph. 3:16). Nkonghlane Biblia ôfe éfus té da kobe naa : « Bia yiane tsin naa bia ke é zen ba lere bia naa bi béé éndagha ». Ya aval ane melepgha meté ma lere do, ô taa likh naa dzôm ézing é zu kole ôbakh naa ô taa tsini naa wa vem é zen da ke éning (Mat. 7:14 ; Luc 9:62).

6. Za dzam bong meyeghle be ya Biblia be ne bo, nge ba yen de ndzukh naa be bo betsen ? (Deutéronome 30:11-14). (A daghe fe évaghle) .

⁶ Dzé ô ne bo nge da bo wo ndzukh naa ô yebe ayeghle ya Biblia ézing édi ô ndagha yeghe ? Boghe mindzeng ébe ayeghle té, yaghlane fe Jehôva nfa ye naa nge ô ne da tugha wokh (Bya 86:11). Nge é ngen wô ndzukh naa ô tugha yem a wokh ayeghle ézing, teleghe adzô té nfeng ; ve ô taa likh naa wa yeghe Biblia. Za dzam ô ne bo, nge da bo wo ndzukh naa ô dzôghô mboan ézing éwi Biblia a kîlî ? Simaneghe naa, Jehôva tam ézing, aa sili ki é boan be-bôt be ne bivus é dzam a yem naa béé se ki bo. Ô ne ning aval ane a kumu (a lang Deutéronome 30:11-14). Jehôva a kiagh fe wô naa, a ye wa vole (Esaïe 41:10, 13 ; 1 Becor. 10:13). Ya dzam té, ô taa dzôghô mô ôsi, naa ô dang tem ébe ndzukh wa tubane wô. Banbeye naa ô ve akiba ya é mam mesese Jehôva a veyang wa, été ntang. Nté se édzing duè akal Jehôva da ye tsini naa da ke da vem, wa ye ñu tang naa « memvena mèñ méé se ki édedaa adzita » (1 Jean 5:3).

7. Ébe za dzam bitong bi bong ba yale a bebela été be ne binan ?

⁷ Za dzam da daghe mina bitong bi bong ba yale a bebela été ? Mina mine fe bong meyeghle be ya Biblia. Ya dzam té, mina mia dang é bong meyeghle be ya Biblia ba dang éban bebyèñ benan be bele. Biblia a dzô naa : « Yirighe Nzame bébéñ, ñe a ye fe wa yir bébéñ » (Jacq. 4:8 ; 1 Mila. 28:9). Éyong wa ñong étéñ abo naa wa yir Jehôva bébéñ, a ye yalane wa, ñe é yir fe wa bébéñ. Jehôva aa yen ki wa ane ngap ye nsama. Émién a yir wa ébe ñe ane môr, aval ane é bôr besese be va yale a bebela été. Dzé é va likh naa ô zu bele élat duè wamién ya Jehôva ? Ane ntang, dzam té, waa yiane ki de vuène tam ézing (Bero. 5:1, 2). Éyong té, kaa naa ô ke Ésesang ôsimane awu Yésu ye mbu wi, amu dzé waa binane ki ébe ayilgha awu Yésu é bele akal duè ? Lighe naa ôtemgha té ô tsini wô naa, ô wun nsonghane wiè ya nsisim, kaa bis éwi ô ne, nfa ye naa ô lere naa wa ve Jehôva akiba akal ntang a nga ve ngalan é Ndôma dzèñb.

É DZAM Ô NE BO NGE Ô DUBANEYANG

8. Aval avé bekristen be dubaneyang be lereyang mebun ébe ntang ?

⁸ Nge ô ne é moan kristen a dubaneyang, ô lereyang naa ô bele mebun ébe ntang abuiñ meval. Éfônan, ô nga ñong minkighane mi nga ve naa ô yir Jehôva bébéñ, ô nga yebe fe naa wa wulu ya metsing mèñ. Ô nga bo mewokh ya é mvena Yésu, éñi ye a bo betong wé kabane mebun muè ya é bôr bevoo. Ô nga kee Jehôva éning duè, ô dubane fe. Ye be tebeyang wa ô ngam-ayat amu ye naa wa sukh nfufup ékang ? (2 Tim. 3:12). Amu wa zômô ya sôsôe, wa lere Jehôva édzing, wa lere fe naa wa yen ntang bura dzam, éwi a nga yaane akal duè ngalane é Moan wèñ (Behéb. 12:2, 3).

9. Za dzam bekristen be dubaneyang ba yiane tobe a do nkee ?

⁹ Ane bekristen be dubaneyang, bia yiane tobe a nkee ya dzam ézing. Ya tam, bi ne sum naa bia vuène ntang. Aval avé dzam té é ne boban ? Tame fas é dzam é nga lôr ya bekristen be ye Éfeso ntet mimbu ôsua. Yésu, éñi a kuè a wômeyang, a nga saghe bo amu be mbe mban. Vedaa, a nga dzô be naa : « Me bele a mina dzam ézing, naa mi lighang édzing mi mbe mi bele mesumgha » (Mel. 2:3, 4). Aval ane bifiè Yésu bia lere do, ékang moan kristen a ve, é ne ke da sibi, é vane lighi ane fulu. Môr té a ne bo naa a yaghlan, a ke bisulan, a ke fe minkanghle, veda, a ne bo naa môr té a bo mam meté fave amu é ntoo ñe fulu. Môr té, se ki fe édzing éde da tsini ñe. Za dzam ô ne bo, nge wa wôrane naa édzing duè akal Jehôva déé se ki fe édedaa ngu’u ane melu ô mvus ?

10. Aval avé ô ne « binane » ya « bembe » ébe bisèñ bi kristen buè ? (1 Timothée 4:13, 15).

¹⁰ Ntôô Pablo a nga dzô Timoteo naa « a binane » ya naa « a bembe » ébe bisèñ émièn a nga bo ane kristen (a lang 1 Timothée 4:13, 15). Aval ane melepgha meté ma lere do, dzenghe naa ô tem meval ô ne wun naa ékang wa ve, é dang mbeng, ya naa nge ô ne banbe naa wa « ngiaban ya nsisim » (Bero. 12:11 ; a daghe nota de estudio “Que el espíritu los llene de fervor” nge ki note d’étude « Débordez de zèle grâce à l’esprit »). Éfônan, tam ézing ô ne dzeng naa ô songhane naa ô tugha bèè bisulan, wé tugha bie yem kôman aval é ne édoa. Ô ne ki bo naa, éyong wa bo ayeghle duè wamièn, é tugha wa vole, wé dzeng naa ô tobe étam nfa ye naa ô tugha binan ébe é dzam ô va yeghe. Aval ane ba baghle nduan nfa ye naa é taa dzim, wa ô ne fe dzale mam meté nfa ye naa ô tugha bera ve akiba akal é dzôm sese Jehôva a ve wa, été ntang. Nfa ôvoo, amu dzé waa belane ki besono be ne kaa naa Ésesang ôsiman awu Yésu é kuiñ, naa wa binan ébe mingura aval biborane bia buane bio éndagha, ane Bengaa Jehôva ? Kaa bisô, dzam té da ye likh naa ô tugha bera ve akiba akal ntang, éwi ô ne tsîn ébe élar duè ya Jehôva.

11-12. Ye a dzimle ayông éyong ézing, da yili naa bi dzimleyang nfufup nsisim Nzame ? Vakh ayilgha. (A daghe fe évaghle).

¹¹ Nge éyong ézing wa wôrane naa waa bele ki fe ayông akal nfufup ékang ane wa kumu, ô taa sili mo ôsi, nge ki a ban naa ô dzimleyang nfufup nsisim Nzame. Simaneghe naa ntôô Pablo a nga tsili Becorintios nfa minkanghle mièñ, é dzô naa : « A ke kuiñ, nge ma bo do kaa naa da vaghane ya nkômane wom, aval ase é ne bo, a ne ésèñ be va kee ma » (1 Becor. 9:17). Za dzam a nga kumu dzô ?

¹² Biyong bizing, Pablo éé mbe ki a bele nkômane naa a ke kanghle. Vedaa, a mbe a bele ébangha naa a bembe ésèñ minkanghle dèñ, kaa bis aval a mbe é wôrane éyong té. Wa ô ne fa ñong aval nkighane té. Ñonghe nkighane naa wa bo é dzam é ne tetele, amben nge waa bele ki nkôman ye a bo do. Ya dzam té, yaghlaneye « akal nkômane ya ngu’u ye a bo mam » (Beph. 2:13). Banbeye ya ayông ébe bisèñ bi ya nsisim buè. Beleghe mebun naa ya tam, é mam wa bo ma ye name é mam wa wôran. Aval té, éde wa ye bera véé édzing duè, édi é ngene wa n’nem été.

13. Aval avé bi ne tsini naa bia vakh nge bi « ne mebun été » ?

¹³ Biyong bizing, é ne mbeng naa bi fas melepgha bia kuane 2 Becorinthien 13:5 : « Tsinighane naa mia vakh nge mi ne mebun été ; tsinighane naa mia lere é dzôm ébién mi ne. » Biyong bizing, bi ne bo bia bebién nsili ane : “Ye ma tele faa minkômane mi ya Édjié ôsu éning dam ?” (Mat. 6:33). “Élôr-tam ma top, ye da lere naa ma vini é dzam é ne abé ?” (Bya 97:10). “Ye ma fuiñ mvoa ya élar ézizang é bobedzang be ne bebunu ?” (Beéph. 4:2, 3). Ésesang ôsiman awu Yésu, a ne é tam bi ne binan, a dang-dang ébe ntang, éwi Jehôva a va ve bia. Wa ve bia ntam naa bi fas bia bebién, ya naa bi tobe ndzi-n’nem naa bia ning akal Krist se ki, akal bia bebiénc.

É DZAM Ô NE BO NGE ÉNDAGHA Ô TELE É NDA-BÔR JEHÔVA ÔYAP

14. Dzé é ne likh naa bekristen bézing be likh naa ba tobe bisulane bi ye ékôan ?

¹⁴ Niène be nga tobe abim mengoan nge ki abuiñ mimbu bé sèhane ya sôsôe, bekristen bézing be likh-yang naa, baa tobe ki fe nsama ya ékôan. Amu dzé ? Bevoo bézing be ne « ndzalane ya meyep me ye éning » (Luc 21:34). Éba bevoo, be nga kop ya bifiè nge ki mimboan é bobeñang bevoo be ye ékôan (Jacq. 3:2). Éba bevoo ki, be nga bo minsem min’nen, be yeme fe naa, baa kumu ki dzaa avole. Kaa bis akalgha sese é ne bo, za dzam ô ne bo nge éndagha, ô tele é nda-bôr Jehôva ôyap ? Za dzam ntang ya édzing Jehôva ba Yésu be va lere wa, bi ne wa tsini naa ô bo ?

15. Aval avé Jehôva a lere naa a bis ntôma ô vus-yang zen ? (Ezéchiel 34:11, 12, 16).

¹⁵ Binaneye ébe é dzam Jehôva a wôran akal é bôr be vus-yang zen. Aa tep ki bôr beté. Zelan, a dzeng mintôma mi dzimiyang. A ve mio bidzi, a vole fe be naa be dughan ébe ñe (a lang Ezéchiel 34:11, 12, 16). Ye Jehôva a ne bo aval daa ya wa ? Ôwé ! Ya yen wa fas ayeghle di, da lere naa n’nem wiè ô ne ntsinane nfa ô ne tetele. Aval ane Jehôva a nga yen n’nem wiè, a nga so fe wa a bebela été, éndagha, ye a ne wa bera luè naa ô bera dughan ébe ñe ?

16. Dzé é ne vole mintôma mi dzimi-yang naa mi bera dughan ébe Jehôva ? (A daghe fe évaghle).

¹⁶ Moan abakh Jehová desea que vuelva nge ki Reviens à Jéhovah, a bele bifiè bia ve ngu’u : « Beleghe ndzi-n’nem naa Jehôva a ne vaa, a ye tobe vaa akal duè éyong wa ye dughan ébe ñe. A ye wô vole naa ô lumane ya meyep, ya naa ô kôm é mam wa wôran, éma ma dzughu wa, ya ve fe naa ô bele mvoa ya n’nem, mvoa ya ôsiman, éñi da so ébe ôbuale ô ne nfuban. Éyong té, ô ne bera wôrane nkômane ye a sèhane Jehôva nsama ya é bobeñong mina bebo mia lughu ñe. » Simaneghe naa, bemvene baa be bele fe nkômane ye a vole wa. Be ne bo ane « ashuèñ éyong évung da lôt, é vôm ô ne sobe éyong mveng da nong » (Esaïe 32:2). Éyong wa ve akiba amu ntang, silighe wamièn naa : “Za mam me ne bo nfa ye naa me tugha bera kôm mam ya Jehôva ?” (Esaïe 1:18 ; 1 Pierre 2:25). Éfônan, ye ô ne ke bisulane bisese a Nda bikôan ? Ye ô ne kobe ya bemvene, ô dzaa fe be naa be ve wa avole ya nsisim. Ye dzam té é ne yili naa, wa yiane bo ayeghle ya Biblia ébe abong tam ? Ô ne tobe a ndzi-n’nem naa Jehôva a ye borane é dzam sese wa bo nfa ye naa ô dughan ébe ñe, ya naa wa lere naa wa ve akiba akal ntang é Moan wèñ.

ZA DZAM WA YE BO ?

17-18. Aval avé bi ne belan é tam dzaa ya fakh, kaa naa Ésesang ôsiman awu Yésu ye mbu wi é kuiñ ?

¹⁷ Yésu a nga dzô naa, be nga ve ntang « nfa ye naa é môr ase a lere mebun ébe ñe a taa tobe ntsaman, vedaa a bele éning é ne mbèmbèè » (Jean 3:16). Ntang ô ne é dzam Jehôva a belane do nfa ye naa a kôre bia ébe é mam ma so nsem ya awu. Môr ézing ye ébe bia, aa yiane ki da vuèn (Bero. 3:23, 24 ; 2 Becor. 6:1). Melu kaa naa Ésesang ôsiman awu Yésu é kuiñ, ma ve bia ntam naa bi ne binan ébe édzing Jehôva ba Yésu be nga lere bia. Édzing té da yiane bia tsini naa bi yalane bi lere naa bia dzing de.

¹⁸ Aval avé wa ye lere naa wa ve akiba akal ntang ? Aval wa ve akiba é ne selane ya aval é môr mboo a bo do. Ve, ô ne tobe ndzi-n’nem naa Jehôva a ye borane mengu’u muè naa, wa ô ñong fe ngap ébe bakuru be-bôt ba lughu ñe, éba « baa ning ki fe akal deba bébién, vedaa be nga ninghang akal é môr a nga wu akal deba » (2 Becor. 5:15).