iMatai ni Veigauna
12 Qo o ira na lako yani vei Tevita i Sikilaki+ ni sega ni veilakoyaki ena galala ena vuku i Saula+ na luvei Kisi, era maliwai ira na tamata qaqa era dau tokoni koya ena ivalu.+ 2 Era vakaiyaragi ena dakaititi, era vakayagataka na ligadra imatau kei na ligadra imawi+ mera rabotaka na vatu+ se vanataka na gasau ena dakaititi. Era taci Saula na Penijamini.+ 3 Na nodra turaga o Eieseri kei Joasi, erau luvei Sima na kai Kipea,+ o Jisieli kei Pelati erau luvei Asimavece,+ o Piraka, kei Jeu na kai Anacoci, 4 o Isimaia na kai Kipioni,+ na tamata qaqa, e dua vei ira na tolusagavulu+ e liutaki ira na tolusagavulu, kei Jeremaia, o Jeseli, o Joenani, o Josapati na kai Kitera, 5 o Elusei, o Jirimoci, o Pilaia, o Semaraia, o Sefataia na kai Arifi, 6 o Elikana, o Aseia, o Esareli, o Joeseri, o Jasopiami, o ratou na luvei Kora,+ 7 o Joela kei Sepataia erau luvei Jiroame na kai Kitori.
8 Eso na Kata era lai to e yasa i Tevita ena idrodro e veikau,+ era tamata qaqa, era sotia dauvala, era taura na nodra isasabai lelevu kei na moto, e vaka na mata ni laione na matadra, era totolo me vaka na kaseli ena veiulunivanua. 9 E nodra turaga o Esa, na kena ikarua o Opetaia, na kena ikatolu o Iliapi, 10 na kena ikava o Misimana, na kena ikalima o Jeremaia, 11 na kena ikaono o Atai, na kena ikavitu o Ilieli, 12 na kena ikawalu o Joenani, na kena ikaciwa o Elisapati, 13 na kena ikatini o Jeremaia, na kena ikatinikadua o Makipanai. 14 Qori o ira na luvei Kata,+ era turaga ni mataivalu. O koya e lailai duadua e tautauvata kei na 100, o koya e levu duadua e tautauvata kei na 1,000.+ 15 Qo o ira na takosova na Joritani ena imatai ni vula ni luvu tu na batiniwai, era cemuri ira kece na tiko ena vanua lolovira ena tokalau kei na ra.
16 Era lako tale ga yani vei Tevita eso na Penijamini kei na Juta ena nona idrodro.+ 17 E qai lako yani o Tevita me tavaki ira, e kaya vei ira: “Ke oni lako mai ena vakacegu moni mai vukei au, ena duavata kei kemuni na lomaqu. Ia ke oni via veretaki au vei ira na kequ meca ni sega ni cala na ligaqu, me raica mada ga na nodra Kalou na tukada, me vakatulewa kina.”+ 18 E sobuti Emasai+ na nodra turaga na le tolusagavulu na yalo ni Kalou:
“Keimami nomuni Tevita, keimami tokoni kemuni, na luvei Jese.+
Moni vakacegu, me nomuni na vakacegu, me vakacegu o koya e vukei kemuni tiko,
Ni vukei kemuni tiko na nomuni Kalou.”+
E mani vakacegui ira o Tevita qai lesi ira mera turaga ni mataivalu.
19 Eso tale ga na Manasa era lai to vei Tevita ni lako vata yani kei ira na kai Filisitia mera valuti Saula, ia e sega ni vukei ira na kai Filisitia o koya, nira bose oti na nodra turaga na kai Filisitia+ era qai vakatalai koya, era kaya: “Ena lai to kei na nona turaga o Saula, eda na vakayalia kina na uluda.”+ 20 Ni yaco i Sikilaki+ era mai to vua o ira na Manasa: o Atina, o Josapati, o Jitieli, o Maikeli, o Josapati, o Ilaiu, kei Silicei, na nodra turaga na vica vata na udolu ena yavusa o Manasa.+ 21 Era vukei Tevita mera valuta na ilala daukabakoro nira tamata qaqa kece era yalodei,+ era turaga ni mataivalu. 22 Era lako tiko ga vei Tevita+ e veisiga na lewenivanua mera vukei koya, mani dua kina na mataivalu levu me vaka na mataivalu ni Kalou.+
23 Qo na kedra iwiliwili na turaga era vakaiyaragi mera vala era lako vei Tevita i Epironi+ mera solia vua na veiliutaki vakatui nei Saula me vaka na ivakaro+ i Jiova. 24 Era le 6,800 na lewe i Juta era taura na isasabai lelevu kei na moto, era vakaiyaragi mera vala. 25 Era le 7,100 na Simioni era tamata qaqa era yalodei, era lewe ni mataivalu.
26 O ira na Livai era le 4,600. 27 O Jioiata+ e nodra iliuliu na luvei Eroni,+ era tiko vata kei koya e 3,700, 28 vaka kina o Setoki+ na cauravou qaqa e yalodei, kei na 22 na turaga ni mataqali i tamadra.
29 Era le 3,000 na Penijamini era taci Saula,+ e dua na iwiliwili levu era dau yadrava tu na ka me baleta na vuvale i Saula. 30 Era le 20,800 na Ifireimi era tamata qaqa era yalodei, era rogo ena mataqali nei tamadra.
31 O ira na veimama ni yavusa i Manasa, era le 18,000 e digitaki na yacadra mera lako vei Tevita mera buli koya me tui. 32 O ira na yavusa na Isakari era kila na gauna kei na ka e dodonu mera cakava na Isireli, era le 200 na nodra turaga, era vakarorogo na tacidra ena nodra ivakaro. 33 O ira na Sepuloni era le 50,000 era lako rawa ina ivalu, era tuva vakaivalu nira vakaiyaragi kece ni vala, era tomani Tevita nira yalodina.* 34 O ira na Nafitalai, era le 1,000 na nodra turaga, e tomani ira e le 37,000 nira vakaisasabai lelevu kei na moto. 35 O ira na Tani era tuva vakaivalu era le 28,600. 36 O ira na Aseri era lako rawa ina ivalu mera tuva vakaivalu e le 40,000.
37 Mai na tai ni Joritani+ vei ira na Rupeni, o ira na Kata, kei na veimama ni yavusa na Manasa, era le 120,000 na sotia era taura na veimataqali iyaragi ni ivalu. 38 Qo kece o ira na tamataivalu, era tuva mera lako yani ena lomavata i Epironi mera buli Tevita me tui Isireli taucoko, era lomavata tale ga na vo kece ni Isireli mera buli Tevita me tui.+ 39 Era tiko ga e kea kei Tevita me tolu na siga, era kana, era gunu, nira vakarautaka qori na tacidra. 40 O ira tale ga na tu voleka, mai na nodra vanua na Isakari, na Sepuloni kei Nafitalai, era kau kakana mai ena asa, ena kameli, ena meule, kei na bulumakau, era kauta yani vakalevu na ka e buli ena falawa, na ibuli lolo kei na vuanivaini rabaraba, na waini, na waiwai, na bulumakau kei na sipi, nira marau vakalevu e Isireli.