Lako Yani

2 Ena gauna oya, e dua na turaga mai na yavusa i Livai e vakawatitaka e dua na yalewa e luvei Livai.+ 2 E mani bukete na yalewa qai vakasucuma e dua na gonetagane. Ni raica o koya ni gone matavinaka, e vunitaki koya sara me tolu na vula.+ 3 Ni sa sega ni vunitaki koya rawa,+ e kauta mai e dua na basikete kuta* qai bonota ena drega loaloa. E biuta e loma na gone, lai biuta sara e loma ni veikuta ena bati ni Uciwai na Naile. 4 Ia e duri tu mai vakayawa na ganena+ me raica se cava ena yacovi koya.

5 Ni gole sobu na luvei Fero yalewa me lai sili ena Naile, era taubale tiko e bati ni wai na nona yalewa dauveiqaravi. E raica sara o koya na basikete ena loma ni veikuta. Sega ni bera ni sa tala yani na nona yalewa bobula me lai kauta mai.+ 6 Ni dolava na basikete e raica sara na gone, e tagi tiko na gonetagane. Dua na ka na nona lomani koya, ia e kaya: “Qo e dua sara ga na luvedra na Iperiu.” 7 E qai tukuna o ganena vua na luvei Fero yalewa: “Vakacava, meu lai kaciva mai vei ira na Iperiu e dua na yalewa dauveimei, me susuga na gone?” 8 E kaya vua na luvei Fero yalewa: “Lako!” Sega tale ni wawa na goneyalewa ni lako yani me kaciva mai na tinanigone.+ 9 Mani kaya vei koya na luvei Fero yalewa: “Kauta na gone qo lai susuga vei au, au na qai saumi iko tiko.” E mani kauta na gone na yalewa oya qai susugi koya. 10 Ni sa tubucake na gone, e kauti koya sara vei luvei Fero yalewa me luvena tagane,+ e vakayacana me o Mosese* qai kaya: “Na vuna niu a vueti koya mai wai.”+

11 Ena gauna oya, ni sa tamatabula* o Mosese, e lako yani vei ira na tacina me raica na icolacola bibi era colata voli,+ e raica sara e dua na kai Ijipita ni mokulaka tiko e dua na Iperiu, e tacina. 12 E veiraiyaki o koya qai sega ni raica e dua, e mani vakamatea na kai Ijipita oya qai vunitaki koya ena nuku.+

13 Ia ni lako yani ena siga tarava, erau veivala tiko e rua na tagane Iperiu. E kaya sara vei koya e cala: “Na cava o mokuta kina na nomu itokani?”+ 14 E mani sauma o koya: “O cei e lesi iko mo neirau iliuliu, mo neirau turaganilewa? O via vakamatei au tale ga me vaka na nomu vakamatea na kai Ijipita?”+ E tuburi Mosese na rere qai kaya: “Sa kilai sara ga na ka qo!”

15 E qai rogoca o Fero na ka e yaco, e mani saga me vakamatei Mosese, ia e drovaki Fero o Mosese, qai lai vakaitikotiko ena vanua o Mitiani,+ e dabe sara ena yasa ni dua na toevu. 16 Ia e vitu na luvena yalewa na bete ni Mitiani,+ eratou lako yani me ratou taki wai, ratou qai tawana na igunugunu me ratou vagunuva na qelenimanumanu i tamadratou. 17 Me vaka na kena ivakarau, era lako yani na ivakatawanisipi ra qai cemuri ira. Mani tucake o Mosese me vukei* ratou na yalewa qai vagunuva na nodratou qelenimanumanu. 18 Ni ratou lesu yani i vale vei Riueli* na tamadratou,+ e kaya mai ena kurabui: “Dou lesu totolo tu mai vakacava i vale nikua?” 19 Eratou sauma: “E dua na kai Ijipita+ a vakabulai keitou mai vei ira na ivakatawanisipi, qai takiva sara ga vei keitou na wai me vagunuva na qelenimanumanu.” 20 E tukuna vei ratou na luvena yalewa: “I vei o koya? Na cava dou biuti koya tu yani kina? Kaciva me tou mai kanavata.” 21 E vakadonuya sara o Mosese me tiko kei na tagane oya, e qai soli Sipora na luvena yalewa+ vei Mosese me watina. 22 E qai vakasucuma e dua na luvena tagane qai vakatokai koya me o Kerisomi,*+ ni tukuna: “Au sa mai tiko vulagi e vanuatani.”+

23 Oti e dua na gauna balavu,* e qai mate na tui Ijipita,+ ia era vutugu voli na Isireli nira vakabobulataki ra qai tagi voli ena levu ni vuturi, mani lako cake tiko ga vua na Kalou dina+ na nodra tagi ni kere veivuke nira vakabobulataki. 24 Sa qai rogoca na Kalou na nodra vutugu,+ e qai nanuma na Kalou na nona veiyalayalati kei Eparama, Aisake, kei Jekope.+ 25 E raica qai kauaitaka na Kalou na nodra rarawa na Isireli.