iMatai ni Veigauna

11 Toso na gauna era soqoni yani na Isireli vei Tevita i Epironi,+ era kaya: “Raica! O keimami qo na suimuni kei na lewemuni.*+ 2 Ena gauna sa oti ni tui tiko o Saula, o kemuni ga oni dau liutaki ira na Isireli ina ivalu.*+ E qai tukuna vei kemuni o Jiova na nomuni Kalou: ‘O iko ga o na vakatawai ira na noqu tamata na Isireli, o na iliuliu mo lewai ira na noqu tamata na Isireli.’”+ 3 Era mani lako kece yani na qase ni Isireli vua na tui e Epironi, e veiyalayalati kei ira o Tevita ena mata i Jiova e Epironi. Era lumuti Tevita sara me tui Isireli+ me vaka na vosa i Jiova vei Samuela.+

4 Oti e lako o Tevita kei ira kece na Isireli i Jerusalemi, oya o Jepusa+ na vanua era tiko kina na Jepusaiti.+ 5 Era vakanini Tevita na lewe i Jepusa: “O na sega ni lako mai ke!”+ E qai valuta o Tevita na koronivalu o Saioni,+ ena gauna qo sa Koro i Tevita.+ 6 E mani kaya o Tevita: “O koya ena mokuti ira e liu na Jepusaiti, ena iliuliu, ena turaga.” E liu cake o Joapi+ na luvei Seruaia, e qai turaga o koya. 7 E lai vakaitikotiko o Tevita ena koro kaukaua. Oya na vuna era vakatoka kina me Koro i Tevita. 8 E tara wavoki na koro o koya, mai na Buke* kei na vanua wavolita, qai vakavinakataka o Joapi na vo ni yasa ni koro. 9 E kaukaua tiko ga+ o Tevita ni tokoni koya o Jiova ni lewe vuqa.*

10 Qo na nodra turaga na tamata qaqa nei Tevita era tokoni koya vakalevu ena nona veiliutaki kei ira kece na Isireli, mera buli koya me tui me vaka na vosa i Jiova me baleti Isireli.+ 11 Qo o ratou na tagane qaqa nei Tevita: o Jasopiami+ na luvei Akimoni, e nodratou turaga na le tolu.+ E vakamatea ena nona moto e le 300 ena dua ga na gauna.+ 12 E taravi koya o Eliesa+ na luvei Toto na luvei Aoa.+ O koya e dua vei ratou na le tolu na tagane qaqa. 13 A tiko vata kei Tevita mai Pasitamimi+ na vanua era soqoni vata kina na kai Filisitia mera vala. E tiko e kea e dua na tikiniqele e levu kina na varile, era qai dro na lewenivanua ena vukudra na kai Filisitia. 14 Ia e duri tu o koya ena loma ni were qori me taqomaka, e mokuti ira tiko ga na kai Filisitia, e mani vakavuna o Jiova e dua na qaqa* levu.+

15 E tolu vei ira na le 30 na turaga eratou lako sobu ena vatu vei Tevita ena qaravatu e Etulama,+ ni keba tiko na nodra mataivalu na kai Filisitia ena Buca o Refeimi.+ 16 E tiko ena gauna qori o Tevita ena idrodro, ia e tiko mai Peceliema e dua na nodra matasotia na kai Filisitia. 17 E qai tukuna o Tevita ni sa karamaca: “Meu gunuva mada ga na wai mai na mataniwai volekata na matamata e Peceliema!”+ 18 Eratou curuma yani vakaukaua na le tolu qo na nodra keba na kai Filisitia, ratou qai takiva na wai mai na mataniwai volekata na matamata e Peceliema, eratou kauta sara vei Tevita, ia e sega ni via gunuva o Tevita, e livia ga yani vei Jiova. 19 E kaya o koya: “Au na sega ni cakava qo mai na rai ni noqu Kalou! Meu gunuva na nodratou dra na tagane qo eratou bolemate?+ Ni ratou bolemate me ratou kauta mai.” E sega ni via gunuva o koya. Qo na ka eratou cakava na tolu na nona tamata qaqa.

20 O Apisai+ na taci Joapi+ e nodratou turaga e tolu tale, e vakamatea ena nona moto e le 300, e rogo me vakataki ratou na le tolu.+ 21 Eratou le tolu, e dokai sara o koya vei rau na le rua, e nodrau turaga, ia e sega ni yacova na nodratou itutu na imatai ni tolu.

22 O Penaia+ na luvei Jioiata, e* dua na tamata qaqa e cakava e levu na ka e Kapisieli.+ E mokuta e rua na luvei Erieli na turaga ni Moapi, e lako sobu ina qara ena gauna ni ucacevata qai vakamatea e dua na laione.+ 23 E mokuta tale ga e dua na tagane levu ni Ijipita, e lima na kiupiti* na kena balavu.+ E taura tiko e ligana na kai Ijipita e dua na moto e vaka na kau ni dautalitali,+ ia e lako sobu yani vua o Penaia kei na dua na ititoko, e kaliraka na moto mai na ligana na kai Ijipita qai vakamatei koya ena nona moto.+ 24 Qo na ka e cakava o Penaia na luvei Jioiata, e rogo me vakataki ratou na tolu na tagane qaqa. 25 E dokai sara o koya vei ira na le tolusagavulu, e sega ni yacova na nodratou itutu na le tolu.+ E lesi koya o Tevita me lewai ira na nona yadra.

26 Qo o ira na tagane qaqa ena mataivalu, o Asaeli+ na taci Joapi, o Elenani na luvei Toto mai Peceliema,+27 o Samoci na kai Eroti, o Ilesi na kai Peloni, 28 o Aira+ na luvei Ikesi na kai Tikoa, o Epieseri+ na kai Anacoci, 29 o Sipikei+ na luvei Usa, o Ilei na luvei Aoa, 30 o Merei+ na kai Nitofa, o Eleti+ na luvei Pena na kai Nitofa, 31 o Etei na luvei Ripei mai Kipea na luvei Penijamini,+ o Penaia na kai Piraconi, 32 o Urei mai na waimaca* o Keasi,+ o Epieli na kai Arapa, 33 o Asimavece na kai Peurimi, o Eliapa na kai Selipimi, 34 o ira na luvei Asemi na kai Kiso, o Jonacani na luvei Sake na Araraiti, 35 o Eami na luvei Sakari na Araraiti, o Ilifali na luvei Uri, 36 o Eferi na kai Mikera, o Eaija na kai Peloni, 37 o Esirei na kai Kameli, o Nerai na luvei Esipei, 38 o Joeli na taci Necani, o Mipari na luvei Akiri, 39 o Seleki na luvei Amoni, o Neri na kai Pieroci, e dau cola na iyaragi nei Joapi na luvei Seruaia, 40 o Aira na na Iceri, o Karepi na Iceri, 41 o Uraia+ na Itaiti, o Sapati na luvei Alai, 42 o Etini na luvei Seasa na Rupeni, e dua na nodra turaga na Rupeni, era le 30, 43 o Anani na luvei Meaka, o Jiosafati na kai Micini, 44 o Usia na kai Aseteroci, o Sama kei Jaeli erau luvei Ocami na kai Aroeri, 45 o Jitieli na luvei Simiri, kei na tacina o Jioa na kai Tisi, 46 o Ilieli na kai Meavimi, o Jiripei kei Josavaia erau luvei Elimeami, kei Icema na kai Moapi. 47 o Ilieli, o Opeti, kei Jesieli na kai Misopaia.