iMatai ni iVola Vei Ira mai Korinia
4 Mera raici keitou na lewenivanua ni keitou dauveiqaravi i Karisito, keitou dauniyau tale ga ni ka vuni tabu+ ni Kalou. 2 Ena tikina qo, e bibi vua na dauniyau me dau yalodina. 3 E sega ni bibi vei au na nomuni vakalelewa se na lewa ni mataveivaqaqai* vakatamata. O yau mada ga au sega ni vakalewai au. 4 Niu sega mada ga ni kila e dua na ka au beitaki kina. Ia au sega ni vakadonui au ena yavu qo, ni o Jiova* ga e lewai au.+ 5 O koya gona, ni kua ni vakalewa+ e dua na ka ni se bera na kena gauna, me lako mada mai na Turaga. Ena qai vakaraitaka na veika vuni ni butobuto, ena vakaraitaka tale ga na inaki ni loma ni tamata. Na Kalou ena vakacaucautaka na tamata yadua.+
6 Ia qo raveitacini, au tukuni keirau kei Apolosa+ me keirau ivakaraitaki moni vulica kina na idusidusi qo: “Kua ni kuria na ka e volai,” de oni dokadoka kina,+ oni qai beca e dua tale. 7 Na cava o nanuma kina ni o duatani? Na cava e tu vei iko a sega ni soli vei iko?+ Ke mani soli vei iko, na cava o dokadoka kina? Vaka sara ga era sega ni soli vei iko!
8 Oni sa lomavakacegu? Oni sa vutuniyau? Oni sa veiliutaki tiko vakatui,+ oni sega ni waraki keitou? Au diva moni sa veiliutaki dina tiko vakatui, me rawa nida lai veiliutaki vata yani vakatui.+ 9 Kena irairai vei au ni Kalou e biuti keitou na yapositolo me keitou saravi sara i muri me vaka na tamata e lesi me vakamatei,+ nida ka ni sarasara e vuravura,+ vei ira na agilosi kei ira na tamata. 10 Keitou sa lialia+ ena vuku i Karisito, ia oni sa vuku ena vuku i Karisito, keitou malumalumu, ia oni kaukaua, oni rokovi, ia keitou beci. 11 Me yacova mai qo keitou se waloloi+ tiko ga, keitou se karamaca+ tiko ga, keitou sega ni vakaisulu vinaka,* keitou mokulaki,*+ e sega neitou vale, 12 keitou cakacaka, keitou oga ena liga i keitou.+ Ni keitou vakasewasewani, keitou vosa vinaka ga,+ ni keitou vakacacani, keitou vosota.+ 13 Ni keitou vakaucacataki, keitou vosa vakayalovinaka,*+ keitou sa vaka na benu kei vuravura, na benu ni ka kece me yacova mai qo.
14 Au sega ni vola na ka qo moni madua kina, meu vunauci kemuni ga ni oni luvequ lomani. 15 Ke mani 10,000 sara era vakavulici Karisito vei kemuni, e sega ni levu dina na tamamuni. Ena vuku i Karisito Jisu au sa mai tamamuni kina niu tukuna vei kemuni na itukutuku vinaka.+ 16 Au vakamasuti kemuni gona moni vakatotomuri au.+ 17 Oya na vuna au talai Timoci yani kina vei kemuni, ni luvequ lomani qai gone yalodina ena Turaga. Ena vakavulica vei kemuni na ka au dau cakava* me vakataki Karisito Jisu,+ na ka vata ga au vakavulica tiko ena ivavakoso kece e veivanua.
18 Era dokadoka vakalevu eso me vaka sara ga au na sega ni lako yani vei kemuni. 19 Ia ena sega ni dede au na lako yani vei kemuni, ke loma i Jiova.* Au na qai kila na nodra kaukaua na dokadoka, sega ni nodra vosa wale ga. 20 Ni sega ni ka ni vosa wale ga na Matanitu ni Kalou, e ka ga ni kaukaua. 21 Cava oni vinakata? Meu kauta yani vei kemuni na kuita,+ se meu lako yani ena dela ni loloma kei na yalovinaka?