iMatai ni Samuela
3 E qaravi Jiova tiko ga na gone o Samuela+ e mata i Ilai, ia e vosa vakavudua o Jiova ena gauna oya, e sega ni levu na raivotu.+
2 Dua na siga ni davo tiko o Ilai ena vanua e dau davo kina, sa buawa na matana, e sega ni rai rawa.+ 3 Se bera ni boko na cina ni Kalou,+ e davo tiko o Samuela ena valenisoro*+ i Jiova, na vanua e tiko kina na Kato ni Kalou. 4 E qai kacivi Samuela o Jiova. E kaya o koya: “O yau qo.” 5 E cici sara vei Ilai, e kaya: “O yau qo ni o kacivi au.” Ia e kaya: “Au sega ni kacivi iko. Lai davo tale.” E lako me lai davo. 6 E kaci tale o Jiova: “Samuela!” E duri o Samuela me lako vei Ilai, e kaya: “O yau qo ni o kacivi au.” Ia e kaya: “Au sega ni kacivi iko luvequ. Lai davo tale.” 7 (Se sega ni kilai Jiova o Samuela, se sega tale ga ni vakatakilai vua na vosa i Jiova.)+ 8 E kaci tale ena ikatolu ni gauna o Jiova: “Samuela!” E duri o koya me lako vei Ilai, e kaya: “O yau qo ni o kacivi au.”
E qai kila o Ilai ni o Jiova ga e kaciva tiko na gonetagane. 9 E kaya sara o Ilai vei Samuela: “Lai davo, ke kacivi iko tale, mo tukuna vua, ‘Moni vosa mai Jiova ni sa vakarorogo tiko na nomuni tamata.’” E mani lako o Samuela me lai davo ena nona tikina.
10 E lako mai o Jiova me duri e kea qai kaci me vaka e liu: “Samuela, Samuela!” E kaya sara o Samuela: “Moni vosa mai ni sa vakarorogo tiko na nomuni tamata.” 11 E kaya o Jiova vei Samuela: “Raica! Au cakava tiko e dua na ka e Isireli ena qasikanunu kina na daligana ruarua o koya e rogoca.+ 12 Ena siga oya au na cakava vei Ilai na ka kece au tukuna me baleta na nona vuvale, mai na kena itekivu ina kena itinitini.+ 13 Mo tukuna vua niu na lewa na nona vuvale me tawamudu ena vuku ni cala e kila tiko o koya,+ ni rau beca na Kalou na luvena+ qai sega ni cudruvi rau.+ 14 Oya na vuna au yalataka kina ina vuvale i Ilai, ni na sega sara ni vosoti na nodratou cala na vuvale i Ilai ena isoro se na isolisoli.”+
15 E davo o Samuela me yacova na mataka, e qai dolava na katuba ni vale i Jiova. E rere o Samuela ni tukuna vei Ilai na raivotu. 16 Ia e kacivi Samuela o Ilai: “Samuela na luvequ!” E kaya o koya: “O yau qo.” 17 E taroga: “Na cava e tukuna vei iko o koya? Yalovinaka kua ni vunitaka vei au. Me totogitaki iko mada ga na Kalou me kuria tale ga ke o vunitaka vei au e dua na ka ena ka kece e tukuna vei iko.” 18 E kaya sara vua o Samuela na ka kece, e sega ni vunitaka vua e dua na ka. E kaya o Ilai: “O Jiova sara ga qori. Me cakava o koya na ka e vinaka e matana.”
19 E tubu tiko ga o Samuela, e tokoni koya o Jiova,+ e sega ni dua na ka e tukuna me sega ni vakayacora.* 20 Era kila kece na Isireli me tekivu mai Tani me yaco i Pieri-sepa ni sa vakadeitaki me parofita i Jiova o Samuela. 21 E rairai tiko ga o Jiova e Sailo, ni vakatakilai koya o Jiova vei Samuela e Sailo ena vosa i Jiova.+