Vosa Vakaibalebale

14 Na yalewa vuku dina e tara cake na nona vale,+

Ia na yalewa lialia e basuka sobu e ligana.

 2 O koya e muria tiko nona yalododonu e dokai* Jiova,

Ia o koya e veidabui nona ivalavala e beci koya.

 3 Na kuita ni viavialevu e tiko ena gusuna na lialia,

Ia na tebenigusudra na vuku ena taqomaki ira.

 4 Ni sega na bulumakau, e savasava na ikanakana ni manumanu,

Ia na igu ni bulumakau tagane e levu kina na ka me tamusuki.

 5 Na ivakadinadina dau dina ena sega ni lasu,

Ia na ivakadinadina lasu ena tukuna ga na ka lasu.+

 6 Na dauveivakalialiai e qara na vuku qai sega ni kunea,

Ia na kilaka e rawarawa vei koya e yalomatua.+

 7 Mo lako tani mai vua na tamata lialia,

Ni o na sega ni kunea na kilaka ena tebenigusuna.+

 8 Na nona vuku na tamata yalomatua ena kila na vanua e lakova,

Ia o ira na tamata sesewa e vakaisini ira na nodra lialia.+

 9 O ira na lialia era dredrevaka na cala,*+

Ia o ira na yalododonu, era vakarau tu mera veiyaloni.*

10 Na loma ni tamata e kila na nona rarawa,

E sega ni dua na vulagi erau marau vata.

11 Na nona vale na tamata ca ena vakarusai,+

Ia na nona valelaca na yalododonu ena vinaka tiko ga.

12 E tiko na sala e rairai donu vua na tamata,+

Ia na kena itinitini na sala ga ni mate.+

13 Ni ia tiko na dredre e mosi na loma ni tamata,

Ia na itinitini ni marau na rarawa.

14 O koya e muria ga na lomana ena tamusuka na vua ni nona ivalavala,+

Ia na tamata vinaka ena tamusuka na isau ni nona ivalavala.+

15 Na tamata yalowai e vakabauta na vosa kece,

Ia o koya e yalomatua e vakasamataka na nona ilakolako kece.+

16 O koya e vuku e qaqarauni qai gole tani mai na ca,

Ia o koya e lialia e doudou* qai nuitaki koya vakasivia.

17 O koya e cudru totolo ena cakava na ka lialia,+

Ia na tamata e vakasamataka vinaka na ka e cati.

18 O ira na yalowai ena nodra ivotavota na ka sesewa,

Ia o ira na yalomatua era na vakaisala ena kilaka.+

19 O ira na tamata ca era na cuva e matadra na tamata vinaka,

Kei na tamata ivakarau ca ena cuva ena nona matamata na yalododonu.

20 Era cata na tamata dravudravua na wekana,+

Ia era lewe levu na nona itokani na tamata vutuniyau.+

21 O koya e beca na wekana e valavala ca,

Ia o koya e lomani ira na vakaloloma e marau.+

23 E yaga na cakacaka kaukaua kece,

Ia na vosa wale e tini ena dravudravua.+

24 Na nodra isala na vuku na nodra iyau,

Ia na nodra lialia na sesewa na lialia.+

25 Na ivakadinadina nuitaki e veivakabulai,

Ia o koya e lawaki ca e cavuta na ka lasu.

26 Ni dokai* Jiova e dua e nuitaki koya vakalevu,+

E nodra ivakaruru na luvena.+

27 Noda dokai* Jiova e ivurevure ni bula,

Me vagolea tani e dua mai na dai nei mate.

28 Nira lewe levu na tamata e rogo kina na tui,+

Ia na turaga e sega na nona tamata e bale.

29 O koya e berabera ni cudru e yalomatua vakalevu,+

Ia o koya e yalototolo e vakaraitaka na nona lialia.+

30 Na yalovinaka e bulabula kina na yago,

Ia na yalovuvu e vuca kina na sui.+

31 O koya e dabuya na vakaloloma e beca na Dauveibuli,+

Ia o koya e lomana na dravudravua e dokai koya.+

32 Ena bale na tamata ca ena nona ivakarau ca,

Ia o koya na yalododonu ena vakaruru ena nona yalodina.+

33 E tiko dei na vuku e lomana na tamata yalomatua,+

Ia ena vakavotui ena kedra maliwa na lialia.

34 Na ivalavala dodonu e vakacerecerei kina na matanitu,+

Ia na ivalavala ca era madua kina na lewe ni veivanua.

35 E taleitaka na tui na dauveiqaravi yalomatua,+

Ia e cudruvi koya e vakamadua na nona ivalavala.+