iMatai ni Samuela

16 E kaya vei Samuela o Jiova: “Ena vakacava na dede ni nomu lolositaki Saula+ tiko, niu sa sega ni vakadonui koya me tui me lewai Isireli?+ Tawana nomu ileu ena waiwai,+ mo lako. Au na talai iko vei Jese+ na turaga ni Peceliema, niu sa digitaka e dua vei ratou na luvena tagane me tui.”+ 2 Ia e kaya o Samuela: “Meu lako vakacava? Ena vakamatei au+ o Saula ni rogoca qo.” E kaya o Jiova: “Mo kauta e dua na luvenibulumakau yalewa mo qai kaya, ‘Au lako mai meu vakacaboisoro vei Jiova.’ 3 Mo sureti Jese yani ena vakacaboisoro, au na qai vakatakila vei iko na ka mo cakava. Mo lumuta ena vukuqu o koya au digitaka vei iko.”+

4 E mani vakayacora o Samuela na ka e tukuna o Jiova. Ni yaco yani i Peceliema+, era sautaninini na qase ni koro nira lai tavaki koya, era kaya: “Oni kauta tiko mai na vakacegu?” 5 E kaya sara o koya: “Io na vakacegu. Au lako mai meu vakacaboisoro vei Jiova. Moni vakasavasavataki kemuni, meda lai vakacaboisoro vata.” E vakasavasavataki Jese kei ratou na luvena tagane o koya, oti e kacivi ratou ina vakacaboisoro. 6 Ni ratou curu yani e loma, e raici Iliapi+ sara o koya, e kaya: “Sa tu sara ga qo ena mata i Jiova na nona lumuti.” 7 E kaya vei Samuela o Jiova: “Kua ni raica na kena irairai kei na kena balavu,+ niu sega ni digitaki koya. Na rai ni tamata e sega ni vaka na rai ni Kalou, ni raica ga na tamata na ka e sau, ia o Jiova e raica na loma ni tamata.”+ 8 E qai kacivi Epinatapi+ o Jese me lako e mata i Samuela, ia e kaya: “E sega tale ga ni digitaki koya qo o Jiova.” 9 E vakaraitaki Sama+ tarava o Jese me raici koya, ia e kaya: “E sega tale ga ni digitaki koya qo o Jiova.” 10 E kacivi ratou e vitu na luvena tagane o Jese me ratou lako e mata i Samuela, ia e kaya vei Jese o Samuela: “E sega ni digitaki ratou qo o Jiova.”

11 E qai kaya vei Jese o Samuela: “Qo kece o ratou na nomu cauravou?” E kaya o koya: “Se vo tiko o koya e gone duadua,+ e vakatawa sipi tiko.”+ E kaya sara o Samuela vei Jese: “Mo talatala me lai kau mai, ni tou na sega ni dabe me tou kana me yaco mada mai eke o koya.” 12 E mani talatala me lai kau mai o koya, e kauti koya yani. E damudamu o koya, e matavinaka, e musudonu.+ E qai kaya o Jiova: “Tucake lumuti koya, o koya ga qo!”+ 13 E taura sara o Samuela na ileu e tiko kina na waiwai+ qai lumuti koya ena kedratou maliwa na tuakana. E tekivu vakaukauataki Tevita na yalo i Jiova mai na siga oya me lako yani.+ Oti e tucake o Samuela me gole yani i Rama.+

14 Ia e biuti Saula na yalo i Jiova+ qai vakarerei koya e dua na yalo ca* mai vei Jiova.+ 15 Era tukuna vei Saula na nona dauveiqaravi: “Oni kila ni vakarerei kemuni e dua na yalo ca mai vua na Kalou. 16 Me vakaroti ira mada na dauveiqaravi era tu qo e matamuni, kemuni na neimami turaga, mera vaqara e dua e kenadau ena qiri api.+ Ena gauna ga e curumi kemuni kina na yalo ca mai vua na Kalou, ena qiriqiri o koya, ena vinaka vei kemuni.” 17 E kaya sara o Saula vei ira na nona dauveiqaravi: “Moni qara mada mai vei au e dua e dau qiriqiri vinaka, moni kauti koya mai vei au.”

18 E kaya e dua na dauveiqaravi: “Raica! Au kila tiko e dua na luvena tagane o Jese na turaga ni Peceliema e kenadau ena qiriqiri, e tagane yaloqaqa, e dauvala.+ E gusumacala, e musudonu+ qai tokoni koya o Jiova.”+ 19 E talatala sara vei Jese o Saula, e kaya: “Soli Tevita mada mai na luvemu tagane e vakatawa sipi tiko.”+ 20 E mani vakavodoka o Jese ena asa na madrai, na tavaya waini kulinimanumanu, kei na dua na luvenime me kauta vei Saula o Tevita na luvena. 21 E lako sara vei Saula o Tevita me qaravi koya.+ E taleitaki koya vakalevu o Saula qai dau cola na nona iyaragi. 22 E vakauitukutuku vei Jese o Saula: “Yalovinaka me qaravi au tiko ga o Tevita niu taleitaki koya.” 23 Ni dau curumi Saula na yalo ca mai vua na Kalou, e taura sara o Tevita na api me qiria, e lomavakacegu kina o Saula, e vinaka vua qai yali vua na yalo ca.+