Na Rai ni iVolatabu

O Cei o Setani? E Tiko Dina Li?

ERA kaya e so na vuku ena gauna oqo ni sega o Setani. Era kaya ni o Setani e nodra vatavatairalago ga na tamata. Ia, e sega ni ka vou na kena veiletitaki tiko na tikina oqo. A se vola sara e dua na daunivucu ena ika19 ni senitiuri, o Charles-Pierre Baudelaire, “ni veivakalaboci levu duadua ni Tevoro, oya me saga meda vakabauta na tamata ni sega ni bula dina tiko o koya.”

E tiko beka o Setani? Kevaka kina, e tekivu vakacava nona bula? O koya beka na kabula kaukaua tawarairai e vakavuna tiko na leqa e vuravura? Cava meda cakava me kua kina ni vakamuai keda cala?

Na Ka e Kaya na iVolatabu

Na iVolatabu e vakamacalataka ni o Setani e dua na kabula vakayalo, e ibulibuli tawarairai. (Jope 1:6) E tukuna ni dau veivakalolomataki, e kaukaua na nona itovo qai torosobu na veika e cakava. (Jope 1:13-19; 2:7, 8; 2 Timoci 2:26) E volaitukutukutaki tale ga ena iVolatabu na nona veivosaki o Setani kei na Kalou, vaka kina o Jisu.​—Jope 1:7-12; Maciu 4:1-11.

E lako mai vei na kabula vakayalo torosobu oqo? Ni bera ni bulia na tamata na Kalou, a bulia taumada na Luvena “ulumatua,” e kilai e muri me o Jisu. (Kolosa 1:15, VV) Yaco na gauna me buli e so tale na “luve ni Kalou,” era vakatokai me agilosi. (Jope 38:4-7) Era ibulibuli uasivi ra qai yalododonu. Ia, e dua vei ira na agilosi oqori a yaco e muri me o Setani.

A sega ni vakatokai ena yaca oqori ena gauna a buli kina. E yaca vakaibalebale, e kena ibalebale na “Dauveitusaqati; Meca; Dauveibeitaki.” Mani vakatokai me o Setani baleta ni a digia na ivakarau ni bula e veisaqasaqa kei na loma ni Kalou.

E bucina na agilosi oqo na yalodokadoka kei na nona qatia na Kalou. A vinakata me caka vua na sokalou. Ena gauna a bula voli kina e vuravura na Luve ni Kalou ulumatua, o Jisu Karisito, a temaki koya sara mada ga o Setani me “cuva sobu ka vakarokoroko” vua.​—Maciu 4:9.

O Setani “a . . . sega ni vakabauta na ka dina.” (Joni 8:44) E vaka me beitaka na Kalou ni daulasulasu, ia o koya ga na daulasulasu. Ena ivakatekivu a tukuna vei Ivi ni na vaka na Kalou, ia na kena dina ni o koya ga a vinakata me vaka na Kalou. Ena sala qaseqase a yaco na lomana. A lai tini vakabauta kina o Ivi ni uasivi cake o Setani vua na Kalou. Ni talairawarawa o Ivi vei Setani, a vakaraitaka kina ni ciqomi Setani me nona kalou.​—Vakatekivu 3:1-7.

Na nona liutaka na veitusaqati, a yaco kina na agilosi nuitaki oqo me o Setani—e dauveitusaqati qai meca ni Kalou kei na tamata. Dua tale na yaca torosobu e vakatokai kina na kabula oqo, oya na “Tevoro,” e kena ibalebale “Daukakase.” Ni liutaka na ivalavala ca a lai vakacalai ira kina e so tale na agilosi mera talaidredre vua na Kalou, ra qai tokoni koya ena nona veitusaqati. (Vakatekivu 6:1, 2; 1 Pita 3:19, 20) Era qai kuria ga na agilosi oqo na leqa ni kawatamata. Ena vuku ni nodra muria na sala kocokoco i Setani, a mani “sinai e nai valavala kaukauwa ko vuravura.”​—Vakatekivu 6:11; Maciu 12:24.

Vakacava Sara Mada na Kaukaua ni Veivakacalai i Setani?

Ni dua e cakava e dua na ka ca, ena saga me kauta laivi kece na veika e rawa ni vakatakilai koya. O koya gona, nira yaco mai na ovisa era na sega ni kila se o cei e cakava, na ka wale ga era na taura rawa, oya ni dua e basulawa. O Setani, na “dauveivakamatei” taumada, e saga me tabonaka na ka kece e rawa ni vakatakilai koya. (Joni 8:44; Iperiu 2:14) Ni vosa mada ga vei Ivi, a vakayagataka e dua na gata me kua ni kilai kina. Ena gauna oqo e saga tale tiko ga me vunitaki koya. E “vakamatabokotaka na lomadra . . . era sa sega ni vakabauta,” me rawa kina ni tabonaka na kaukaua ni nona veivakacalai.​—2 Korinica 4:4.

Ia, o Jisu e dusi Setani ni vakavuna sara tiko ga na basulawa qai lewa tu na vuravura dukadukali eda bula tu kina oqo. E vakatokai Setani me “turaga ni vuravura oqo.” (Joni 12:31; 16:11) A vola na yapositolo o Joni: “Sa koto ga vua na vu-ni-ca ko ira kecega na kai vuravura.” (1 Joni 5:19) E vakayagataka vakavinaka sara o Setani “na gagadre ca ni yago, na gagadre ca ni mata, kei na dokadokai keda e na ka ni bula oqo,” me “temaki ira kecega na kai vuravura.” (1 Joni 2:16; Vakatakila 12:9) Kena ibalebale ni o ira na kawatamata era talairawarawa tiko vei Setani.

Me vakataki Ivi ga, o ira na talairawarawa vei Setani era sa vakalou sara tiko ga vua. O koya gona, o Setani e “kalou ni vuravura oqo.” (2 Korinica 4:4) E roka ni nona veiliutaki na veivakaisini kei na lasu; ivalu, veivakatotogani kei na veivakarusai; basulawa, kocokoco kei na veidabui.

Rawa ni O Goletani Mai na Nona Veivakacalai

E vakadreta na iVolatabu: “Dou yalomatua, dou vakatawa.” Na vuna? Baleta “sa veilakoyaki voli na nomudou meca na tevoro, me vaka na laioni sa tagi, a sa vakasaqara eso me tiloma.” (1 Pita 5:8) Dina ni veivakadreti tiko na tikinivolatabu oqo, ia e veivakacegui nida kila ni o ira ga era sega ni yalomatua—o ira na sega ni yadra tiko​—ena ‘rawai ira o Setani.’​—2 Korinica 2:11.

E bibi meda vakabauta ni bula dina tiko o Setani, da qai ciqoma nona veivuke na Kalou me ‘vakataudeitaki keda’ qai ‘vakaukauataki keda’ tale ga. Ena sala oqori eda na ‘vorati [Setani]’ kina, da qai to vei Jiova.​—1 Pita 5:9, 10.

O BAU VAQAQA BEKA?

◼ E lako mai vei o Setani?​—Jope 38:4-7; Joni 8:44.

◼ E vakacava sara mada na levu ni nona vakacalai vuravura o Setani?​—Joni 12:31; 1 Joni 5:19; Vakatakila 12:9.

◼ Cava eda rawa ni cakava meda taqomaki keda kina mai na ivadi qaseqase i Setani?​—1 Pita 5:8-10.

[iYaloyalo ena tabana e 10]

O Setani beka na kabula kaukaua tawarairai e vakavuna tiko na leqa e vuravura?