Me Veiraurau Qai Rawarawa Nomu Bula
E VEIVAKACEGUI dina na bula e veiraurau qai rawarawa. Ia na cava e okati kina? Kena imatai, ena rairai vinakati mo vakasamataka na veika o na vakaliuca. O na cakava vakacava qo?
Tarogi iko mada: ‘Na cava au sa rawata? Na cava tale e se vo me caka?’ Vola e ra na ka e bibi vei iko:
1. ․․․․
2. ․․․․․
3. ․․․․․
E lekaleka nodra rai e levu nikua me baleta na domodomoiyau. Qo ena nodra tukuna: “Meda kana ga, da gunu, nida na mate nimataka.” (1 Korinica 15:32) Era vakabauta ni na vinaka na bula, ke ra cakacaka vakalevu me levu kina na ilavo mera volia kina na ka. Ia na iVolatabu e sega ni duavata kei na rai qo.
A tukuna o Jisu ena dua na vosa vakatautauvata me baleti koya na turaga a binia nona iyau qai mate ni bera mada ga ni marautaka. “E vaka tale ga kina o koya e binia vakalevu na nona iyau, ia e sega ni vutuniyau ena mata ni Kalou.” (Luke 12:16-21) E cala beka nona cakacaka vakaukaua na turaga ya me qaravi koya kina? Sega. Na leqa gona ya ni vakabibitaka na qarai ni iyau. A sega ni yavutaki ena rai vaKalou na nona lalawa. Kena itinitini ga, a sega ni yaga vua na iyau kece a cakacakataka. E vakaloloma dina!—Dauvunau 2:17-21; Maciu 16:26.
Ia e kena veibasai o Jisu, e sureti keda meda cakacakataka na icovi tawamudu. E uqeti keda o koya:“Ni kua ni cakacakataka na kakana e ca rawarawa, na kakana ga e tudei me rawati kina na bula tawamudu.” (Joni 6:27) A tukuna mada e liu o koya: “Na levu ni nona lomani vuravura na Kalou e solia kina na Luvena e duabau ga e bulia, mera kua ni rusa o ira era vakabauti koya, mera rawata ga na bula tawamudu.” (Joni 3:16) Sa dua dina na icocovi totoka!
O Rawa ni Valuta Vakacava na Nuiqawaqawa?
E vakadeitaka o Jisu ni itovo ga ni kawatamata me dau nuiqawaqawataka na ka me bula kina. Ya na vuna e uqeti ratou kina nona tisaipeli: “Dou kua ni vakasaqara tiko ga na ka mo dou kania se gunuva, dou kua tale ga ni lomaocaoca; ni ka kece qo era cumuaqara voli kina na lewe ni veimatanitu. Ia sa kila tu na Tamamudou ni bibi vei kemudou na ka qori. Dou vakasaqara tiko ga na nona matanitu, ena qai vakarautaki vei kemudou na veika qo.”—Luke 12:29-31.
Na vosa ni veivakacegui ya, e uqeti ira e levu na lotu vaKarisito mera bula rawarawa ga. E tukuna o Juliet e vakaitikotiko mai Malaysia: “E dau veivakaocai qai rarawataki noqu cakacaka saumi. Keirau sa qai mani masu vakaveiwatini vei Jiova me veivuke me keirau bula rawarawa. E totolo nona rogoca o Jiova na neirau masu. Ena loma ga ni dua na vula, a soli kina vei au e dua na cakacaka vagauna meu vakavulici ira na gone era vakaleqai tu na yagodra.” O Steve mai Ositerelia, e dau caka konitaraki ni delavuvu ni vale, a veisautaka nona cakacaka me levu kina na gauna e vakayagataka kei ratou nona vuvale ena veika vakayalo. E vakamacalataka na watina o Maureen: “E marau sara vakalevu o koya, e vaka tale ga kina o keitou. E rau marautaka na luvei keirau! Au marautaka tale ga! Ni rawarawa ga noda bula ena bulabula tale ga na vuvale.”
Ia ke o vakacegui mai nomu cakacaka, qai vakarau vakayalia tale ga na nomu vale, ena vinakati na vakabauta mo muria kina na ivakasala i Jisu. Nomu vakaliuca na veika vakayalo kei na nomu nuitaki Jiova, e rawa ni veiraurau kina nomu bula qai rawarawa. Nomu cakava qo o na rawata kina na “bula dina”—na bula tawamudu ena vuravura vou ni yalododonu ni Kalou, o na marautaka kina na nomu cakacaka kece qai yaga nomu cakacaka vakaukaua.—1 Timoci 6:17-19; Aisea 65:21-23.
O na taleitaka mo vulica e levu tale na ka me baleta na “bula dina” e yalataka na iVolatabu? Ke o taleitaka, qai raica e dua na iVakadinadina i Jiova ena nomu itikotiko se volavola ena kato ni meli ena tabana e 5 ni mekesini qo.
[Tikina bibi ena tabana e 21]
Ena vuravura vou ni Kalou ena marautaki qai yaga na cakacaka kece
[Kato ena tabana e 20]
Cakacaka O Rawa Ni Cakava
Qo eso na vakatutu e rawa ni yaga ena so na vanua, vakabibi ena leqa ni cakacaka eda donuya tu qo:
● Yadravi ni vale (qo nira gole eso ena nodra cakacaka vakabisinisi se gade, ra qai dau vinakata me yadravi nodra vale)
● Sasamaki: ena sitoa; vale ni cakacaka; ni taravaki oti na vale kei na tabavale, oti na kama, ni caka oti na toki, cakacaka ni vale (qo ena nodra vale tale eso); iloilo (vanua vakabisinisi se na vale)
● Ripeataki ni iyaya: basikeli; kei na veimataqali iyaya kece ga
● Cakacaka vakamatai: na caka lalaga ni vale e tuba; tara kovate, katuba, poji; boroboro; caka bai; kei na vakavinakataki ni delavuvu ni vale
● Cakacaka ena iteitei: teitei, beti vuata, tatamusuki
● Na samaki ni loma ni vale kei na qaravi ni kau: ena valenivolavola, ena baqe, vanua ni wawa, vanua ni veivoli, so na mataqali vale e taba vica tu qai vakacirigalala, eso ra delavuvu iloilo
● Na qaravi ni qele se vale: dua e raica na cicivaki kei na vakavinakataki ni so na vale, cicivaka na qaravi ni veika vakailavo (so na gauna e dau vakarautaki sara ga na nodra vale)
● Dau tevu ibe ni valagi kei na vanisi fuloa, kei na sasamaki
● Dau kau niusiveva kei na so tale na tabana ni veiqaravi: na kena kacivaki na ivoli, na bili ni taoni lalai
● Tokitoki, na kena maroroi na nodra iyaya na toki
● Samaki ni lomanibai, musuki vakaleleka na kau, koti co, ta kau
● Draiva ni basi ni gonevuli
● Dau veitaba (veitaba ena so na soqo)
● Dau volitaki baca ni ika vei ira na dau siwa
● Veisau cakacaka: veisau mai na ripeataki motoka ina cakacaka vakalivaliva, mai na culacula ina vakavinakataki paipo
Ke o via kila tale e levu na itukutuku qai raica na Awake! na ika8 ni Maji, 1996, tabana e 3-11.
[Kato/iYaloyalo ena tabana e 21]
CAKACAKA E RAWA NI CAKA E VALE
Mo dau vakaraica na ka era gadreva o ira na tiko ena nomu yasayasa. Tarogi ira oni tiko veitikivi. Mo vakaliuliu sara.
● Na meimei
● Volitaki kakana draudrau se senikau e tei ga e vale; kei na volitaki wainimoli
● Dau culacula, veisautaka, qai vakavinakataki ni sulu
● Na cakacaka o saumi ga ena ka o cakava
● Dau vavavi kei na vakarautaki ni kakana
● Cula iubi ni loga, tali wa, talikula; makarame, dau tulituli; kei na so tale na cakacaka ni liga
● Dau vakadakobataki dabedabe
● Dau volatukutukutaka na veika vakailavo, taipa, qaravi ni kompiuta e veivale
● Nomu sauma na qiri
● Dau veikoti
● Redetaki rumu
● Dauvakau ivola e veitikotiko kei na vakatawani waqanivola vei ira na daukacivaki ivoli
● Na sava motoka kei na kena qusi vinaka (era kauta mai nodra motoka ena nomu vale)
● Nodra qaravi na manumanu
● Na kena ripeataki na loka kei na buli ki (o tiko ga e vale)
Me nanumi: Me rawa ni kilai na nomu cakava na cakacaka va qo, e rawa ni vakaraitaki na kena notisi ena sitoa se vanua ni volivolitaki.