“Kua ni Lomaocaoca”
“E boko vakadua na neitou akaude ni ilavo maroroi ena baqe a volai tiko ena yacadratou na luvei keirau. Rauta ni vicavata na vula keitou a taga lala tu kina.”
● Au a cicivaka tiko e dua na koronivuli ena dua na lomanivanua e Idia, qai toso vinaka sara tiko. Rauta ni 500 na gonevuli era a vuli tiko kina ena dua na gauna. Yaco na gauna me vakarautaka e dua na koronivuli rogo ena loma ni tauni eso na basi mera cici yani ena neimami yasayasa, qo e vakarawarawataka nodra lai vuli i kea na gonevuli. Vakavuna kina mera toki noqu gonevuli ina koronivuli ya. Lutu sara na iwiliwili ni gonevuli mai na 500 ina rauta e 60. Qai ca sara, ena gauna vata qori a dinau tu kina vei au e dua na vakailesilesi ni koronivuli ena neirau veidinadinati vakailavo. Ena vinakati mera saumi e levu vei ira na cakacaka e koronivuli, ia qo au sotava tu na leqa vakailavo.
Keitou veivosakitaka vakavuvale na ituvaki qo. Keitou duavata kece ena neitou vakuai keitou ena neitou muria na vosa i Jisu me ‘vinaka na mata i’ keitou ena veika vakailavo—se me keitou kua ni vakalusi ilavo ena ka keitou sega ni gadreva dina. (Maciu 6:22, 25) So na gauna keitou sega ni vakayagataka tu mada na neitou motoka baleta na isau ni waiwai kei na kena vakavinakataki. Keitou maninitaka na voli kakana ena neitou dau lai volivoli ena yakavi baleta ni dau lutu sobu kina na kedra isau. Keitou musuka tale ga eso na ka e dau laukanavata kei na keitou kakana.
Ni keitou iVakadinadina i Jiova, e bibi me keitou vakasosoqoni vata kei ira na neitou itokani vakabauta vata ena soqoni vaKarisito. (Iperiu 10:25) Dina ni keitou sotava na dredre vakailavo, keitou vakadeitaka ga me keitou kua ni calata na soqoni, soqo ni tabacakacaka kei na soqo ni tikina—ke yawa mada ga na vanua me keitou gole kina. Na neitou cakacaka vakaitalatala—e okati kina nodra vakavulici eso ena iVolatabu, ena neitou goleva na yalava ribayawa. Keitou na sega ni kauta na motoka, keitou na vakayagataka ga na motopai. Ia qo e rawa ga ni vodo kina e le rua.
E sega ni kena ibalebale qo ni lailai na gauna keitou vakayagataka ena cakacaka vakaitalatala. Na kena veibasai ga, ni vakalevutaka na nodrau gauna o watiqu kei na luvei keirau yalewa me rau veitalanoataka kei ira eso tale na iVolatabu. So na gauna erau dau taubaletaka e rauta ni ono ina walu na kilomita me rau vakavulici ira na tataleitaki ena iVolatabu. Keirau dau saga tale ga kei luvequ tagane me keirau vakalevutaka na gauna ni neirau vakavulici ira tale eso ena iVolatabu.
E vaka me vinaka cake toka mai vakalailai ena gauna qo na keitou ituvaki vakailavo. Keitou vulica vakavuvale ena ituvaki dredre keitou sotava, me kua ni vakabibitaki na iyau. Keitou vulica tale ga me kua ni lomaocaocataki na ka keitou sega ni lewa rawa. E uqeti keitou dina na Same 55:22. E kaya: “Mo biuta vei Jiova na nomui colacola bibi, ena tokoni iko ko koya: ena sega ni laivi ira na yalododonu me ra vakayavalataki e na dua na gauna.” A dina taucoko na vosa qori ena gauna ni neitou leqa vakailavo!—Cautaki mai.