Na Koronivuli e Vakarautaki Keda ena Cakacaka Bibi Duadua

¹ Eda lai vuli na tamata baleta ni tiko na ka eda via sauva ena bula oqo. Ia e sega tale ni dua na isausau e uasivia na noda vakacaucautaki koya na Vu ni bula kei na noda vukea e so tale mera vulica na nona inaki kei na nona ivalavala! Na inaki e duri kina na Koronivuli ni Vuli Vunau oya meda tuberi ena sala meda na vakavulici ira kina e so tale ena veika eda vakabauta. O koya gona, nida tiko ena koronivuli oqo e veimacawa, eda sa vulica tiko kina na iwalewale matau meda vakayacora kina na cakacaka bibi duadua ena bula oqo.

² E tabaki tiko ena Cakacaka Vakaitalatala ni vula sa oti na “iTuvatuva ni Koronivuli ni Vuli Vunau ena 2003.” Eda na wilika ena ituvatuva oqori na iwalewale ena cicivaki kina na koronivuli. De vinaka mo maroroya tiko na ituvatuva oqori ena loma ni nomu ivolanivuli Me Yaga Nomu Curu ena Koronivuli ni Vuli Vunau ni o gole mai ina Koronivuli ni Vuli Vunau e veimacawa. Meda raica mada oqo e vica na tikina e okati ena Koronivuli ni Vuli Vunau ena 2003.

³ iVakarau ni Vosa: Ena Janueri, ena tekivutaki na Koronivuli ena dua na vosa e lima na miniti, me vakamacalataki kina e dua na ivakarau ni vosa, se dua na ka me baleta na wili ivola, vuli, kei na veivakavulici. Ena vosa ena itavi oqo na ivakatawa ni koronivuli, se lesia vua e dua tale na qase e maqosa ena veivakavulici. Ena sereki kina na ibalebale ni ivakarau ni vosa kei na kena bibi. Oti me qai vakarabailevutaka na tikina oqo o koya e vosa ena nona kauta cake mai e so na ivakaraitaki vakaivolatabu qai dusia na sala me taurivaki kina na ivakarau ni vosa oya, vakabibi ena kena laveti cake noda iwalewale ni vosa ena cakacaka vakavunau.

⁴ Vosa Nb. 1: O ira na tacida e lesi vei ira na itavi oqo era vakadreti mera ‘vakabibitaka wale ga na veitikina e yaga.’ Kena ibalebale era na vakamatatataka vei ira na lewe ni ivavakoso na sala mera vakayagataka kina na veika era vakamacalataka. Ke o vosa ena itavi oqo, gole ina tabana e 48-9 ni ivola na Vuli Vunau, ni o na kunea kina e so na vakatutu me baleta nomu vakavakarau, gole tale ga ena idusidusi ni ivola oqo ena ruku ni ulutaga “Yaga na iVakamacala,” cega na veitabana era vakatakilai tu kina qai vakawilika na kedra ivakamacala.

⁵ iTuvatuva ni Wili iVolatabu: Ke o sega ni dau muria rawa ena veigauna sa oti yani na ituvatuva ni wili iVolatabu vakamacawa, me nomu isausau mada ga mo muria na kena ituvatuva ena yabaki oqo. Ke o cakava vaka kina, o sa na wilika tasevu na iVolatabu Vakirisi Vakarisito ni cava na yabaki. E kau cake mai ena tabana e 10, parakaravu e 4 ni noda ivolanivuli na yaga ni noda muria dei na ituvatuva ni wili iVolatabu ena iVolatabu Vakirisi Vakarisito.

⁶ Veitikina Bibi Mai na Wili iVolatabu: Sa vakabalavutaki na itavi oqo me tini na miniti, mera vakamacala tale ga na vakarorogo ena wase ni iVolatabu e wiliki ena dua na macawa. O koya e lesi ena itavi oqo me kua ni sivia na gauna yalataki. Ena caka tiko na itavi oqo ena veimacawa kece wili kina na macawa ni railesuvi. Ni o sa wilika na wase ni dua na macawa, vaqara na tikina ena ganita nomu vuvale ni dou vuli vata, ena yaga ena nomudou cakacaka vakavunau, se nomudou bula. Ena wase o wilika, na itovo cava i Jiova e votu ni veitaratara kei na so na tamata se so na matanitu? Na cava o vulica e vaqaqacotaka nomu vakabauta kei na nomu taleitaki Jiova? Sa rawa ni o vakamacala mai na tikina cava ga o raica ena wase e lesi vei iko, bau kina na veitikina e kovuti ena Vosa Nb. 2, ni na sega ni vakamacala kina na tacida e lesi me wilika.

⁷ Vosa Nb. 2: Na itavi oqo ena vakamatauni kina o gonevuli ena wilivola e matanalevu. Ena yavutaki ena iVolatabu na veitikina e lesi me wiliki e veimacawa, vakavo na iotioti ni macawa ni veivula. Ena yavutaki oqori ena Vale ni Vakatawa. Ena wilika wale ga na nona itavi o gonevuli, ena sega ni tekivutaka nona wiliwili ena dua na ikaunivosa se tinia ena dua na ivakamacala. Na ka ga ena saga o koya me cakacaka kina oya me vakavinakataka cake nona wilivola.​—1 Tim. 4:13.

⁸ Vosa Nb. 3 kei na Nb. 4: O rau na vosa oqo erau yavutaki ga vakalevu ena ivola na Reasoning; so na gauna ena volai ga yani na usutu. Ke sega ni levu soti na ivakamacala ena nomu itavi, se soli ga vei iko e dua na usutu, sa rawa ni o vakarabailevutaka na nomu ivakamacala ena nomu vakekeli ena ivola ni isoqosoqo. Ena vakarawarawataka oqo vei ira na tacida yalewa mera moica nodra itavi me ganiti koya e nodra ivukevuke.

⁹ iTuvatuva: E tukuni ena tabana e 45 ni noda ivolanivuli ni o koya na ivakatawa ni koronivuli ena lesia na ituvatuva. Kevaka e sega, sa rawa ni digia ga nona ituvatuva na tacida yalewa mai na dua vei ira na volai toka ena tabana e 82. Kaya mada, ke vakaitavi na ganeda ena veiyarua na vula qai vakayagataka e dua na ituvatuva mai na 30 e volai kina, ena tauri koya toka oqori me lima na yabaki. O ira na ganeda era digitaka na Nb. 30, “Dua tale na ituvatuva e ganita nomu itikotiko” e dodonu mera vola na nodra ituvatuva ena boto ni nodra tikidua (S-89) ni itavi se dakuna. O ivakatawa ni koronivuli ena vola ena ivola i gonevuli ena tabana e 82 na tikinisiga e vakaitavi kina, me vola ravita na ituvatuva e vakayagataka. Me cakava oqori ena gauna vata ga e toqa kina na nona ivakasala ni vosa o gonevuli.

¹⁰ iVakasala ni Vosa: Sa tabaki tu ena nomu ivola na nomu ivakasala ni vosa. E tiko ena tabana e 79-​81. Mo na kauta gona na nomu ivola qai solia vua na ivakatawa ni koronivuli ena gauna kece o vakaitavi kina. Ena toqa na ivakatawa ni koronivuli na tikina kece o cakacaka kina.

¹¹ Railesuvi: Ni caka na railesuvi ni Koronivuli, ena veivosakitaki ga, eda na sega ni volavola. Ena vakayacori ena veiyarua na vula, 30 na miniti na kena dede. Ena tabaki tiko ga ena Noda Cakacaka Vakaitalatala na taro me na veivosakitaki. Ke sota na macawa ni railesuvi kei na macawa ni soqo ni tabacakacaka se veisiko ni ivakatawa ni tabacakacaka, me qai tuvai na itavi ni macawa e tarava me caka totolo ni se vo e dua na macawa, ia na railesuvi me qai caka ni sa oti na veisiko ni ivakatawa ni tabacakacaka.

¹² iKuri ni Koronivuli: Ena ivavakoso e sivia na 50 na levu ni gonevuli, sa rawa nira tuva na qase me vica tale na koronivuli. “Na vo ni koronivuli e rawa ni vakayacori ga kina na iotioti ni rua na vosa, se rawa ni okati tale ga kina na wili iVolatabu.” (Vuli Vunau, t. 285) Na imatai ni ka e vakaturi oqori e baleta na ivavakoso e levu kina na tacida yalewa qai vica wale ga na tacida tagane mera vakaitavi ena wiliwili. O ira na qase mera lesia na tacida tagane matua mera veitauri ena ikuri ni koronivuli oqori.

¹³ iVukevuke ni Daunivakasala: Me vaka e volai ena ituvatuva ni Koronivuli ni Vuli Vunau, me ratou na lesia na qase e dua na ivukevuke ni daunivakasala me vakasalataki ira lo na qase kei na dauveiqaravi vakaitalatala era vakaitavi ena vakamacalataki ni veitikina bibi mai na iVolatabu se vosa ni veivakaroti. Na tacida e lesi ena itavi oqori me dua e sa matua, era na doka tale ga na vo ni qase na nona ivakasala. Me yavutaka vinaka nona veivakasalataki, me vakavinavinakataka e liu na iwalewale vinaka ni vosa kei na veivakavulici e raica, oti me qai kauta cake mai e dua se rua na tikina me vakavinakataki cake. Ke dua na tacida e dau vakaitavi wasoma, e sega ni tukuni me sa vakasalataki tu ga ena veigauna kece e oti kina nona vosa. Ia ena gadrevi me tiko na rai vakayalomatua vua na tacida e lesi me dau veivakasalataki, me kila tiko ni o ira mada ga na tacida era sa dau vosa ena ivunau soqovi levu e se rawa tiko ga nira vukei mera toroya cake na vinaka ni nodra veivakavulici.​—1 Tim. 4:15.

¹⁴ Na Ka me Vakarogoca: Na cava ena vukei koya na daunivakasala me vakalewa vinaka na nona vosa e dua? Nona raica na ikatolu ni kato ena so vei ira na 53 na wase ni noda ivolanivuli. E volai vakaleleka kina na veika me vakarogoca. Me dikeva tale ga na ivakatawa ni koronivuli e so tale na tikina e vakaturi ena ivola me na vukei koya me vakalewa totolo e dua na vosa, me baleta beka na kena veisemati vinaka kei na sala laulau e sereki kina. E so na taro vinaka e tarogi ena tabana e 55 qai so tale ga na tikina veiganiti e kau cake mai ena iotioti ni parakaravu ena tabana e 163.

¹⁵ Vakalewena na Tikina e Lala: E sega wale ga ni levu na yasana lala ena taqaniveva ni noda ivolanivuli meda volavola kina, e tiko tale ga e vica na tikina e lala mo na vakalewena ni o vuli tiko vakataki iko se ni o vakarorogo voli ena Koronivuli ni Vuli Vunau. (Raica na tabana e 77, 92, 165, 243, 246, kei na 250.) Mo dau kauta mai e veimacawa nomu ivola. Cega qai vakamuri koya e nona na imatai ni vosa. Dolava tiko na nomu ivola me yacova ni sa cava na itavi kece ena koronivuli. Vakarogoca vinaka na vakatutu nei ivakatawa ni koronivuli. Vakaraici ira matua na vakaitavi ena ivakarau ni nodra veivakavulici, taro era taroga, ivakaraitaki era kauta cake mai, ivosavosa kei na ivakatautauvata era taurivaka, vaka kina na droini se iyaloyalo era vakayagataka. Ke o dau vakavola e so na tikina momona, saga mo raica lesu oqori qai tovolea mo vakayagataka.

¹⁶ A okata o Jisu Karisito me itavi dokai duadua e rawa ni lesi vua e dua na vunautaki ni itukutuku vinaka me baleta na Matanitu ni Kalou. Na nona ilesilesi bibi duadua oya. (Mari. 1:38) E kaya: “Sa dodonu me’u lako me’u tukuna nai tukutuku-vinaka ni matanitu ni Kalou e na veikoro tani talega: ni sa ka oqo ka’u sa talai mai kina.” (Luke 4:43) Eda cuqena tale ga vakalevu na vunautaki ni itukutuku vinaka nida sa ciqoma na nona veisureti meda muri koya, da qai tovolea e veigauna kece meda vakavinakataka tiko ga na noda “i madrali ni vakavinavinaka.” (Iper. 13:15, VV) Meda nakita mada ga meda vakaitavi wasoma ena Koronivuli ni Vuli Vunau, na koronivuli ena vakarautaki keda vinaka ena cakacaka bibi duadua.