iVakasala me Baleta na Lomada kei na Noda Bula
“Ni sa vakabulai na yalo, sa bula talega kina na yago.”—VOSA VAKAIBALEBALE 14:30.
“A loma daumarau sa wai yaga.”—VOSA VAKAIBALEBALE 17:22.
● E tukuna na veivosa rawarawa qai veiuqeti qori o Tui Solomoni e Isireli rauta ni tolu na udolu na yabaki sa oti.a Vakacava e dina kece na vosa qori? Na cava era kaya na vuniwai ena gauna qo?
Ni rau laurai vata e dua e yalomalua kei koya e dau cudrucudru, e tukuna kina na Journal of the American College of Cardiology: “E laurai ena vakadidike wale ga qo ni vakavuna vakalevu na mate ni uto na cudrucudru kei na itovo voravora.” E tukuna tale ga: “E sega ni walia ga na mate ni uto . . . na veiqaravi vakavuniwai sa taka levu tu kei kena wainimate, e rawa tale ga ni walia na noda vulica meda kua ni dau cudru, me kua tale ga ni voravora na noda itovo.” Kena ibalebale qori ke da yalomalua eda na bulabula vinaka kina me vaka ga e kaya na iVolatabu.
E laurai ni yaga tale ga na noda dau marau. E tukuna o Dr. Derek Cox e dua na vakailesilesi ni tabana ni bula e Sikoteladi, ena tabana ni itukutuku na BBC: “Ke o dau marau, ena lailai na mate e tauvi iko ena gauna se bera mai ni vakatauvatani kei ira na sega ni dau marau.” E tomana: “O ira na dau marau ena dredre me tauvi ira na mate ni uto kei na strouk.”
Na cava e se yaga tiko ga kina nikua na vuku i Solomoni, sega ni wili kina eso tale na dau vola iVolatabu? E matata na kena isau. “Sa solia vei Solomoni na Kalou na vuku kei na loma sa daukila rawa na ka levu sara.” (1 Tui 4:29) Kuria qori, ni volatukutukutaki na vuku qori ena vosa e rawarawa ga na kena kilai me rawa ni yaga vei keda kece. Eda sega tale ga ni sauma kina e dua na ka!
Vakacava me ivakarau sara ga ni nomu bula mo dau wili iVolatabu? Me vakataki ira na vica vata na milioni era sa vakila na marau dina, ena “qai curuma na lomamu na vuku, ka sa kamikamica mai ki na yalomu na daukila ka; ena qai maroroi iko na lomavuku, ka vakatawai iko na yalomatua.” (Vosa Vakaibalebale 2:10, 11) Macala ga ni veivakadeitaki dina qori.
[iVakamacala e ra]
a Ena iVolatabu na vosa ‘lomada,’ e dau vakaibalebaletaki ena noda itovo, wili kina na ka eda dau vakila.