‘Na Rerevaki Jiova, sa i Koya na Vuku’

“TOU rogoca nai tinitini ni ka kecega oqo: Mo rerevaka na Kalou, ka muria na nona vunau: ni sai koya ga oqo nai tavi taucoko ni tamata.” (Dauvunau 12:13) E bibi dina na vakasama e vakadeitaka oqori o Tui Solomoni e Isireli makawa ni a dusimaki koya kina na Kalou! Na peteriaki tale ga o Jope e kila na vinaka ni rerevaka na Kalou, a kaya: “Raica, na rerevaka na Turaga [o “Jiova,” NW], sai koya na vuku; kei na biuta na ka ca, sai koya na yalomatua.”​—Jope 28:28.

Io, e vakabibitaka na iVolatabu na rerevaki Jiova. Na cava e ka vakavuku kina meda bucina na rerevaka na Kalou? E yaga vakacava na rerevaka na Kalou​—vei keda yadudua se ena noda sokalou dina vakamatailawalawa? E saumi na taro oqori ena Vosa Vakaibalebale wase 14 tikina e 26 ina 35.a

Vanua Eda Rawa ni “Vakararavi Matua” Kina

E kaya o Solomoni: “Sa tu vata kei na rerevaki Jiova na vakararavi matua: ia sa na dua na nodrai drodro ko ira na luvena.” (Vosa Vakaibalebale 14:26) Na tamata e rerevaki Jiova ena vakararavi matua ga vua, ni Kalou kaukaua qai dau dina. Sega ni vakabekataki ni na yalodei ena nona vakanamata yani ena veika sa tu mai liu! Ena balavu qai kalougata na nona veigauna mai muri.

Ia, na cava e rawa ni tukuni me baleta na ka ena yacovi ira na dau vakararavi ena veika ni vuravura​—⁠na kena lalawa, isoqosoqo, vakabauta, kei na iyau? Se mani cava ena yacovi ira, e macala ni na lekaleka wale ga na nodra bula, ni kaya na iVolatabu: “Ko vuravura sa lako tani yani, kei na kena gagadre talega; ia ko koya sa cakava na ka sa vinakata na Kalou, sa tu dei ga ka sega ni mudu.” (1 Joni 2:17) Ke sa vaka oya, me icavai meda “lomani vuravura” kina “se na veika sa vakavuravura”?​—1 Joni 2:15.

Na cava era rawa ni cakava na itubutubu era rerevaka na Kalou mera vakadeitaka kina “na nodrai drodro” na luvedra? E lagata na daunisame: “Dou lako mai, ragone, vakarorogo mai vei au; ka’u na vakavulici kemudou mo dou rerevaki Jiova.” (Same 34:11) Nira raica na gone na nodra ivakaraitaki na itubutubu ra qai tuberi mera rerevaka na Kalou, era na tubu cake mera tagane, ra yalewa dau vakararavi matua vei Jiova.​—Vosa Vakaibalebale 22:6.

E tomana o Solomoni: “A rerevaki Jiova nai vurevure ni bula, me rawa kina na lako tani mai nai cori ni mate.” (Vosa Vakaibalebale 14:27) Na rerevaki Jiova sa “[i]vurevure ni bula,” ni Kalou ga e “mata-ni wai bula.” (Jeremaia 2:13) Noda vuli meda kilai Jiova kei Jisu eda na rawa kina ni bula tawamudu. (Joni 17:3) Na rerevaka tale ga na Kalou eda rawa kina ni lako tani mai na icori ni mate. Ena sala cava? E kaya na Vosa Vakaibalebale 13:14: “A vunau ni tamata vuku sai vurevure ni bula me lako tani kina mai nai cori ni mate.” Nida rerevaki Jiova, da muria nona lawa da qai vakalaiva nona Vosa me dusimaki keda, ena taqomaki keda mai na ivalavala kei na gagadre e dauveivakaleqai, o koya eda rawa ni matedole kina.

“Rogo Kina na Tui”

A rerevaki Jiova o Tui Solomoni qai talairawarawa ena dua na iwase levu ni gauna ni nona veiliutaki. Oqo e vakavuna me vinaka nona veiliutaki. Ena kilai sara mada vakacava na vinaka ni nona veiliutaki e dua na tui? E sauma na Vosa Vakaibalebale 14:28: “Ni ra lewe vuqa na tamata, sa rogo kina na tui: ia ni ra lewe lailai mai na tamata, sa rusa kina na turaga.” Na vinaka ni nona veiliutaki e dua na tui e laurai ena kedra ituvaki na nona lewenivanua. Ke levu gona era vinakata me liutaki ira tiko ga, e kena ibalebale ga oya ni vinaka nona veiliutaki. O Solomoni a ‘lewa mai na Wasa [Damudamu] yaco ina Wasa [Levu], mai na uciwai [na Uferetisi] ka yacova na iyalayala kei vuravura.’ (Same 72:6-8) E sega ni tukuni rawa na sautu kei na vinaka ni nona veiliutaki. (1 Tui 4:24, 25) Io, a veiliutaki vinaka o Solomoni. Ena yasana adua, e ka vakamadua vua e dua e veiliutaki mera sega ni taleitaki koya na lewenivanua.

Ena vakasama vata oqori, na cava e rawa ni tukuni me baleta na nona lagilagi o Solomoni Levu Cake, na Tui Lumuti, o Jisu Karisito? Vakasamataki ira mada na vakarurugi tiko vua nikua. Mai na veiyasa i vuravura, e sivia e ononamilioni na tamata era dau rerevaka na Kalou era sa vakatulewataka mera vakarurugi ena nona veiliutaki o Karisito. Sega wale ga nira vakabauti Jisu, ia era duavata sara tale ga ena sokalou dina vua na Kalou bula. (Joni 14:1) Ni sa cava na veiliutaki ni duanaudolu na yabaki, o ira kece e nanumi ira tu na Kalou era na vakaturi mai na mate. Era na vakatawa na parataisi e vuravura na tamata mamarau, yalododonu, era dau vakaraitaka nodra vakavinavinakataka na nodra Tui. Oya e dua na ivakadinadina levu ni vinaka na veiliutaki nei Karisito! Meda dei tiko mada ga ena noda inuinui totoka, oya na Matanitu ni Kalou.

Kena Yaga Vakayalo, Vakayago Tale Ga

Na rerevaka na Kalou e rawa ni vakaceguya na noda vakasama kei na lomada. Na vuku tale ga e vauca e levu na ka, e okati kina na vakatulewa dodonu kei na yalomatua. E kaya na Vosa Vakaibalebale 14:29: “O koya sa berabera ni cudru sa vuku sara: ia ko koya sa yalo vakariri sa vakarewataka na lialia.” Na yalomatua e vukei keda meda raica ni cudru vakalialia e rawa ni vakaleqai keda vakayalo. “Na dauveicati, na dauveileti, na veiqati, na daucudrucudru, na dauveiba” e so vei ira na itovo eda na ‘sega ni rawata kina na Matanitu ni Kalou.’ (Kalatia 5:19-21) Eda vakasalataki tale ga meda kua ni dau cudrucudru, kevaka sara mada ga e tiko na vuna vinaka. (Efeso 4:26, 27) Na yalototolo tale ga eda rawa ni cavuta kina e so na vosa lialia, da qai cakava e so na ka eda na veivutunitaka e muri.

Ena nona dusia tiko na kena veivakaleqai na cudru ina noda bula e kaya kina na tui kei Isireli: “Ni sa vakabulai na yalo, sa bula talega kina na yago: ia sai vakavuca ga ni sui na vuvu.” (Vosa Vakaibalebale 14:30) Na tauvimate e vu mai na cudru kei na yalokatakata e okati kina na ceguoca, tubu ni dra, mateniyate, kei na vakaleqai ni yatekia. Era kaya tale ga na vuniwai ni cudru kei na yalokatakata e rawa ni vakalevutaka se vakavuna sara ga e so na mate me vaka na karokaro ni davuibuco, milamila, ceguleka, matenikuli, kei na matenikete. Ia, ena yasana adua, na “lomavakacegu e solia na bula ina yago.” (Vosa Vakaibalebale 14:30, New International Version) Ena ka vakavuku gona meda ‘saga tiko ga na veika e kauta mai na veivakacegui kei na veivakatataki cake.’​—Roma 14:19, VV.

Eda na Sega ni Veivakaduiduitaki Nida Rerevaka na Kalou

E kaya o Solomoni: “O koya sa vakasaurarataka [“vakaduiduitaka,” NW] na dravudravua sa beci Koya ka Buli koya: ia ko koya sa dokai Koya, sa yalololoma vua na dravudravua.” (Vosa Vakaibalebale 14:31) Ni dua e rerevaka na Kalou ena kila vinaka ni dua ga e buli keda na tamata kece, oya na Kalou o Jiova. Se mani dua e dravudravua, eda ibulibuli kece ga ni Kalou, na ka tale ga e caka vua ena votu kina na nona beci se dokai na noda Dauveibuli. Meda rawa ni vakalagilagia na Kalou, eda na sega ni veivakaduiduitaki vei ira e so tale se meda dau ca vei ira. O ira na lotu Vakarisito dravudravua e dodonu mera karoni vakayalo, me kua nira vakaduiduitaki. Meda saga tale ga meda vunautaka na itukutuku vinaka ni Matanitu ni Kalou vei ira na dravudravua kei ira na vutuniyau.

E tiko tale e dua na yaga ni rerevaka na Kalou, oya na ka e kaya na tui vuku: “Ena tabaki sobu na tamata ca ena vuku ni nona ca: ia na tamata yalododonu ena taqomaki koya na nona dina.” (Vosa Vakaibalebale 14:32, NW) Ena tabaki sobu vakacava na tamata ca? E so na vuku ni iVolatabu era kaya ni kena ibalebale ni na sega ni duri rawa ni yaco vua e dua na leqa. Ia, ena yasana adua, ni yaco e dua na leqa vua na tamata e rerevaka na Kalou, e vakanuinui ni na taqomaki koya na nona yalodina vua na Kalou. Ena nona nuitaki Jiova vakatabakidua, me yacova sara mada ga na mate, e vakaraitaka na yalo vata ga a tiko vei Jope ni kaya: “Au na sega ni biuta tani vei au na noqu yalododonu, ka yacova na siga ka’u na mate kina!”​—Jope 27:5.

Meda yalodina tiko ga ena gadrevi meda rerevaka na Kalou da qai vuku. E vei beka ena kune kina na vuku oqori? Sauma na Vosa Vakaibalebale 14:33: “Sa tiko dei na vuku e na loma i koya na yalomatua: ia na ka e tu e lomadra na lialia sa dautukuni.” Rawa gona ni kune na vuku ena loma ni tamata yalomatua. Ia, me lai dautukuni vakacava tu na vuku ena kedra maliwa na lialia? E kaya e dua na ivola, “ena levu ni nona vinakata na tamata lialia me nanumi ni vuku, ena sega ni kinoca rawa na nona dau vosa vakavuku, ia sa na qai votu dina ga kina na nona yalowai.”

“Vueta Cake na Matanitu”

Sa da dikeva mai na kena cakayaco vei ira na tamata yadudua na nodra rerevaka na Kalou, ia meda dewa mada oqo ena kena cakayaco ina matanitu, e kaya na tui kei Isireli: “Sa vueta cake na matanitu nai valavala dodonu: ia nai valavala ca sa rogo ca kina na lewe ni veivanua.” (Vosa Vakaibalebale 14:34) Vakavotui vinaka sara ga na ivakavuvuli oqo ena ka a yacova na matanitu o Isireli! Na nodra muria na ivakatagedegede cecere ni Kalou era na vueti cake kina vei ira na matanitu era tu wavoliti ira. Ia, na nodra talaidredre wasoma e vakavuna nodra rogo ca, qai sega ni vakadonui ira o Jiova. E vauci ira tale ga na tamata ni Kalou nikua na ivakavuvuli oqori. Na ivavakoso lotu Vakarisito gona ena duatani ni vakatauvatani kei vuravura, baleta ni muria na ivakavuvuli dodonu ni Kalou. Ia meda na rawa ni vueti cake tiko ga, sa dodonu me savasava na noda ivakarau ni bula yadudua. Ke da ivalavala ca eda na rogo ca, ena rogo ca kina na Kalou, vaka kina na ivavakoso.

E kaya o Solomoni na ka ena vakamarautaka e dua na tui: “Sa yalovinaka na tui vua na tamata vuku: ia sa cudru vua sa ia na veivakamaduataki.” (Vosa Vakaibalebale 14:35) Kaya tale ga na Vosa Vakaibalebale 16:13: “Era sa vinakata ko ira na tui na tebenigusu sa vosa vakadodonu; ka ra sa lomani koya sa vosa vakadodonu ga.” Na noda iLiuliu na Tui, o Jisu Karisito, e dau marau ni dodonu na ivakarau ni noda bula da qai yalomatua ni vakayagataka na tebenigusuda meda vunautaka na Matanitu ni Kalou kei na noda veivakatisaipelitaki. Meda vakaogai keda tiko mada ga ena cakacaka oqori nida marautaka tiko na veivakalougatataki e kauta mai na noda rerevaka na Kalou dina.

[iVakamacala e ra]

[iYaloyalo ena tabana e 15]

E vulici na rerevaka na Kalou