DIGOVI VURAVURA

Jamani

Ena 2012, a vakatulewataka e dua na mataveilewai levu mai Jamani ni o ira sa kilai vakamatanitu nira sa cegu mai na dua na lotu, era na sega tale ni vakatarai mera lewena na lotu era tu kina e liu. O ira kece era kere vakacegu mai na lotu Katolika ra qai sega ni via solia nodra ivakacavacava ni lotu, ia era se lai lotu tiko ga, sa sega ni vakatarai mera Komunio, mera vakatusa nodra cala, sega ni soli vei ira e dua na itutu vakalotu, ena sega tale ga ni qarava na lotu na nodra veibulu.

Vuravura

Ena dua na vakadidike me baleta na lotu, e laurai nira le 2.2 na bilioni era lotu vaKarisito, 1.6 na bilioni era Musolomani, 1.1 na bilioni era kaya nira “sega ni lewena e dua na lotu,” ia era vakabauta na Kalou, qai rauta ni 1 na bilioni era lotu Idu.

Japani

Era dikeva na saenitisi mai Japani ni gauna eda vakacaucautaki kina, e yavalata e dua na tiki ni noda mona qai vakavuna meda marau. Na vakadidike qori e vakadeitaka ni veivakacaucautaki e sala vinaka meda vakauqeta kina e dua me vakavinakataka tiko ga na nona cakacaka.

Bolivia

Ena icavacava ni yabaki 2012, a caka na wili lewenivanua mai Bolivia. A vakarota na matanitu me kua ni dua e veilakoyaki ena gauna qori me vakayacori vinaka na wiliwili. A vakatabui mera kauta nodra lori na lewenivanua, e sogo na iyala ni vanua, vakatabui tale ga na gunu alakaolo.

Itali

Ena dua na vakadidike, era kaya na kai Itali, ni dau 15 ga na miniti na nodra dau qito vata kei luvedra e veisiga. E kaya na La Repubblica, “E dua mai na lima na itubutubu era nanuma ni yaga vakalevu na nodra dau qito kei luvedra.” E kaya o Andrea Angiolino na parofesa e kenadau ena buli iyaya ni qito me vaka na chess kei na so tale: Nodra dau qito na itubutubu kei luvedra era sa vulica tiko na gone mera vakayagataka na nodra vakasama, mera kila tale ga na ka e donu kei na ka e cala.