Veisiko i Belize

E VANUA lailai o Belize qai vutuniyau ena veika bula. E robota na lomanivanua na veikauloa qai ciri voli ena baravi na veiyatu yanuyanu. Ia qori era itekitekivu wale ga ni veika totoka e kune e Belize.

Era bula kina na manumanu ni vanua kei manumanuvuka ena kena veimataqali. E bula e kea na manumanuvuka na billed toucan e matalau na rokana, kei na manumanu yavaiva na baird tapir e vuvale kei na rhino, e vaka na ibulibuli ni ucu ni elefaniti na ucuna, e totolo e vanua, e wai tale ga. E bula tale ga e kea e dua na manumanu yavaiva na jaguar, e vuvale vata kei na vusi, e vaka na rairai ni lepate. E sakitaka kina o Belize ni imatai ni matanitu e vuravura e tiko kina na vanua era taqomaki kina na manumanu qo.

Era tawani Belize taumada na Maya era itaukei ni vanua kei Merika. Era yaco yani ina vanua qo na dausoko ni Sipeni ena ika16 ni senitiuri, ia era sega ga ni vakavuai ira rawa na Maya. E qai vuaviritaka na vanua qo o Peritania, veisautaka sara na yacana ena 1862 me British Honduras. Ia ena 1981, sa mai matanitu vakataki koya o Belize.

Era duikaikai na lewenivanua e Belize. Na wiliwili levu ni lewenivanua era kai Creole, Idia, Garifuna, Maya, kei na Mestizo. Era dauveikauaitaki qai veidokai. Era dau vosa ena vakarokoroko na gone nira veivosaki kei na dua e uabula, ra qai sauma na taro ena “Io saka” se “sega saka.”

E tiko e Belize na ivavakoso ni iVakadinadina i Jiova ena vosa vagalu ni Merika na American Sign Language, na Belize Kriol, vakavalagi, vosa vakaJamani, vakaJaina, Maya (na Mopán), kei na vosa vakaSipeni. Ena iVakananumi ni Mate i Jisu ena 2013, e cakacakataki ni dua mai na le 40 na lewenivanua e Belize e mai tiko ena soqo qori.