Dauteitei Vakasakiti ni Veikauloa

ERA kila na dauteitei ni na vuavuaivinaka na itei ke kaburaki ena vanua donu kei na gauna donu. Ia dua na iwalewale ni teitei e veikauloa e dau caka ga ena bogi—mai maliwalala. Qo o ira na bekalulu era dauteitei vakasakiti ni veikauloa—so era kilai mera bekaloa, so tale na bekasigasiga se bekadamu.a

Kakaburaki

Levu na bekalulu era dau vuka ena bogi mera vaqara vuata kei na senikau kamikamica. Nodra veivukayaki tiko qori era na kania na vuata ia era na kaburaka tani na lewena kei na sorena era sega ni mama rawa. Okati tale tiko ga ena nodra teitei qori nodra dau vakamautaka na senikau ena gauna era domica tiko kina na kena wai kamikamica.

Ni levu na vanua e vukaca na bekalulu ena bogi, e levu tale ga na vanua era kakaburaki kina. So na sore ni vuata qori era kaburaka nira valelailai, e vakabulabulataka na kena tubu. E yaga gona nodra cakacaka na beka e veikauloa nira vakamautaka na senikau ra qai kaburaka na sore ni vuata.

Nira dau vuka vakayawa qai kovuta e levu na vanua, e vinakati me dua nodra idusidusi vinaka, mera rai tale ga vakavinaka. Ni buto, e rawa nira rai vakavinaka ni vakatauvatani kei keda. Era rawa mada ga ni vakaduiduitaka eso na roka. Rawa tale ga nira vuka ena siga me vaka nodra dau vuka ena bogi.

Nodra Bula

Na bekadamu ni Samoa e dau dua tu ga na kedra isa. So na tinanibeka era dau qarauni ira vinaka na luvedra, ra dau tiko vata ga me vica na macawa, era na vakasucumi ira tiko me yacova nira sa kaukaua. Ia ni laurai qori kei na rua na mataqali bekalulu, e dau tiko e dua tale na beka yalewa me veivuke ena gauna ni vakasucu.

Ka ni rarawa nira sa kawaboko tiko e levu na bekalulu ni vakacacani nodra itikotiko. E rivarivabitaki nodra sa yali tiko na bekalulu ena veiyanuyanu ena Wasa Pasifika, ni so na kau qori e vakatau nodra tubu ena nodra kakaburaki na beka. Me kua gona ni vakawaleni nodra kakaburaki mai maliwalala na dauteitei vakasakiti qo.