Na Burenioni

E DUA na mataqali oni na Apis mellifera. E dau bulia nona bure ena drega weliwelia e drodro mai ketena. Veivakurabuitaki dina na ibulibuli ni burenioni. Na vuna?

Vakasamataka mada: Vica na senitiuri nodra nanuma tu na daunifika ke buli e dua na qara, ena vinaka me yasayasaiyaono mai na kena e yasaitolu se yasaiva. Ni levu na ka e tawa kina, qai lailai na ka e vakayagataki ena kena buli. Era sega ga ni vakadeitaka sara na vuna. Ia ena 1999, sa qai vakadinadinataka vakafika o Parofesa Thomas C. Hales ni totoka vakaoti na vakasama qori, e yaga, qai tukuna ni qo e vaka na buli burenioni ena ka e vatavatairalagotaki tu ga. E vakaraitaka ni dua na ka e wasei me ono na tutuna ena veirauti vinaka na lomana, lailai tale ga na iyaya e vakayagataki me tauri ira vata tu.

Nira vakayagataka gona na oni na qara e vaka na lawa vakamatana me yasayasaiyaono, era bulia rawa na nodra bure e mamada qai kaukaua, veirauti na drega weliwelia era bulibuli kina, ra qai maroroya vakalevu na denioni ni veirauti na qara. Sa rauta me tukuni ni burenioni e “ibulibuli vakatubuqoroqoro.”

Nikua era vakatotomuria na saenitisi na ibulibuli ni burenioni mera tara kina na ka e kaukaua qai veirauti vinaka na lomana. Kena ivakaraitaki, o ira na idinia ni waqavuka, era vakatotomuria na burenioni mera bulia na iyaya e vakayagataki me buli kina na waqavuka e kaukaua vinaka qai mamada, sega tale ga ni levu na waiwai e kania.

Na cava o nanuma? E bula vakaidewadewa na totoka ni ibulibuli ni burenioni se buli?