Dikevi o Lotu

VURAVURA

Sivia na tolu na ikava ni lewe i vuravura era tu ena vanua e vakatatabutaki kina na nodra lotu nira dau vakacacani se lewa sara ga ni matanitu. Ena lima ga na yabaki sa oti, e voleka ni vakaruataki na kedra iwiliwili na matanitu era vakararawataki ira tiko na matalotu lalai.

ME VAKASAMATAKI: Cava soti na vuna era sega ni taleitaki lotu kina eso?—Maciu 23:27, 28; Joni 15:19.

IGILADI

E vola na Paraiminisita vakacegu o Tony Blair ena niusiveva na Observer ni kena “sega ni dau muri na ivakavuvuli vakalotu” e uqeta vakalevu nodra vakacaca na batikadi ena dua na gauna wale tiko ga qo. E tomana: “Na ka e vakavuna tiko na veileti nikua oya na duidui ni ivakarau vakavanua se vakabauta vakalotu, sega ni vakabauta vakapolitiki me vaka a yaco ena ika20 ni senitiuri.”

ME VAKASAMATAKI: Cava e dau vu ni veisei kina o lotu?—Marika 7:6-8.

OSITERELIA

E ripotetaka na Australian Bureau of Statistics ni 1 mai na veiya 5 na lewenivanua era sega ni lewe ni dua na lotu. E tomana na ripote qori: “Sega ni tautauvata nomu lewena e dua na lotu kei na nomu vakaitavi ena kena cakacaka.” E 15 ga na pasede na tagane kei na 22 na pasede na yalewa era lewena e dua na lotu, era kaya nira dau vakaitavi ena veika vakalotu se na kena cakacaka vakaiwasewase.