Noveba

Ke o itubutubu, vukei ratou na luvemu me ratou vakarautaka na isaunitaro e veiganiti kei na yabaki ni nodratou bula. Eso na gauna, ena veivosakitaki ena gauna ni vuli na veika bibi, me vaka na leqa ni vakawati se na itovo, ia ena rairai tiko e dua se rua na parakaravu e rawa nira vakamacala kina na gone. Kena ikuri, vukei ratou me ratou kila ni ratou na sega ni digitaki ena gauna kece eratou laveliga kina. Nomu vakamacalataka qo era na sega ni rarawa kina nira digitaki eso tale. (1 Tim. 6:18) Eda rawa kece ni vakarautaka na ivakamacala veiuqeti ena rokovi kina o Jiova, ena uqeti ira tale ga na tacida lotu vaKarisito. (Vkai. 25:11) Eso na gauna eda na tukuna vakalekaleka eso na ka eda sotava, ia me kua ni sivia tale noda vakamacalataki keda. (Vkai. 27:2; 2 Kor. 10:18) Eda na saga meda vakabibitaki Jiova, nona Vosa, kei ira nona dauveiqaravi.​—Vkta. 4:11. w23.04 24-25 ¶17-18

E bibi na loloma meda rawa ni yadra tiko kina, meda yalomatua. (Maciu 22:​37-39) Nida lomana na Kalou, eda na vosota tiko na cakacaka vakavunau se leqa cava eda sotava. (2 Tim. 1:​7, 8) Nida lomani ira eda sega ni vakabauta vata, eda na vunau tiko ga ena noda yalava, eda na vunau ena talevoni se vola ivola. Eda na sega ni soro nida nuitaka ni dua na gauna era na veisau e levu, mera cakava na ka e dodonu. (Isik. 18:​27, 28) Na noda lomani ira na kainoda, era okati kina na itokani lotu vaKarisito. Eda vakaraitaka na loloma qori nida “veivakayaloqaqataki tiko,” eda “veivakauqeti” tale ga. (1 Ces. 5:11) Me vakataki ira na sotia era veitokoni ena ivalu, eda dau veivakauqeti. Eda na sega ni nakita meda vakararawataki ira na tacida, se sauma na ca era cakava vei keda. (1 Ces. 5:​13, 15) Eda vakaraitaka tale ga na loloma nida dokai ira na tacida tagane era vakatawai keda tiko ena ivavakoso.​—1 Ces. 5:12. w23.06 10 ¶6; 11 ¶10-11

Dua na sala ena dei kina na noda vakabauta, ya meda vakasamataka vakatitobu na ivoli. Na ivoli e ivakadei ni na yaco dina na yalayala ni Kalou. Nida vakasamataka vinaka na vuna e vakarautaki kina na ivoli kei na ka e vauca, ena qai dei na noda vakabauta na yalayala ni Kalou me baleta na bula tawamudu ena dua na vuravura e vinaka sara. Na cava eda tukuna kina qori? Na cava e okati ena ivoli? E tala mai nona ulumatua daulomani o Jiova, na nona itokani voleka mai lomalagi me mai sucu me tamata uasivi e vuravura. Ni bula voli e vuravura o Jisu, e vosota e levu na ka dredre. Oti e vakararawataki qai vakamatei vakaloloma. E dua dina na ka talei e vakarautaka o Jiova! Ena sega ni vinakata na noda Kalou dauloloma me vakararawataki o Luvena qai mate me vinaka ga kina vakalekaleka na noda bula. (Joni 3:16; 1 Pita 1:​18, 19) Ni talei na ka e vakarautaka o Jiova, ena raica sara ga me vakayacori na bula tawamudu ena vuravura vou. w23.04 27 ¶8-9

Vakacava e vinakata o Jiova me vakaturi ira na mate? E macala ni vinakata sara ga. Kena ivakaraitaki, e uqeti ira na dauvola iVolatabu mera vola na nona yalayala me baleta na veivakaturi ena gauna se bera mai. (Aisea 26:19; Vkta. 20:​11-13) Ni yalataka o Jiova e dua na ka, ena vakayacora sara ga. (Josua 23:14) O Jiova e vinakata me vakaturi ira na mate mera bula tale. Vakasamataka na ka e tukuna na peteriaki o Jope. E vakadeitaka ke mate, ena vinakata sara ga o Jiova me bula tale. (Jope 14:​14, 15, vmr.) E va tale ga qori nona rai vei ira kece nona dauveiqaravi era sa mate. E vinakata me vakabulai ira tale, mera bulabula qai mamarau. Ia vakacava o ira na vica vata na bilioni era sa mate, era se bera ni rogoca na ka dina me baleti Jiova? E vinakata na noda Kalou dauloloma me vakaturi ira tale ga. (Caka. 24:15) E vinakata mera nona itokani, mera bula tawamudu tale ga e vuravura.​—Joni 3:16. w23.04 9 ¶5-6

Ena dei tiko ga vakacava nomu inuinui? Kena ivakaraitaki, ke nomu inuinui mo bula tawamudu e vuravura, mo wilika na ka e tukuna na iVolatabu me baleta na Parataisi qai vakasamataka vakatitobu. (Aisea 25:8; 32:​16-18) Vakasamataka se na vakacava na bula ena vuravura vou. Raitayaloyalotaka ni o tiko sara ga e kea. Ke da dau raitayaloyalotaka wasoma na inuinui ni bula ena vuravura vou ena “lekaleka qai mamada ga” na noda leqa. (2 Kor. 4:17) Na inuinui e vakarautaka tu vei iko o Jiova o na vosota kina na ituvaki dredre. Sa vakarautaka tu o Jiova na ka me vakaukauataki iko kina. Ni o vinakata na veitokoni mo qarava e dua na ilesilesi, mo vosota na ituvaki dredre, se marau tiko ga, mo gumatua ni masu vei Jiova qai qara nona veidusimaki ni o vuli vakataki iko. Marautaka nodra veivakayaloqaqataki na mataveitacini. Vakasamataka wasoma na nomu inuinui me matata tiko ga vei iko. Ni o cakava qori ena ‘vakaukauataki iko na kaukaua levu [ni Kalou] mo vosota kina na ka kece ena vosovoso kei na marau.’​—Kolo. 1:11. w23.10 17 ¶19-20

Levu na vuna meda vakavinavinakataki Jiova kina ena masu. Meda vakavinavinakataka na ka vinaka e tu vei keda, ni iloloma vinaka kece e vakarautaka mai. (Jeme. 1:17) Kena ivakaraitaki, eda rawa ni vakavinavinakataka na rairai vinaka ni vuravura kei na veika totoka e bulia. Meda vakavinavinakataka noda bula, noda vuvale, noda itokani, kei na noda inuinui. Eda vinakata meda vakavinavinakataki Jiova tale ga nida rawa ni veitokani voleka kei koya. Ena rairai vinakati na sasaga meda vakasamataka na vuna meda vakavinavinakataki Jiova kina. Eda bula ena vuravura sa sega kina na vakavinavinaka. Levu era vakasamataka ga na ka mera cakava me rawati kina na ka era vinakata. Ia era sega ni vakasamataka na ka mera cakava mera vakavinavinakataka kina na ka e tu vei ira. Ke da vakatotomuria na rai qori, ena rawa nida kerekere tu ga ena noda masu. Me kua ni yaco qori, e bibi meda bucina tiko ga na yalo ni vakavinavinaka qai vakaraitaka qori nida vakavinavinakataki Jiova ena ka kece e cakava vei keda.​—Luke 6:45. w23.05 4 ¶8-9

Ni Tama dauloloma o Jiova, e sega ni via raica meda rarawa tiko. (Aisea 63:9) Ia e sega ni tarova na veika dredre kece eda sotava, era vaka na veiuciwai kei na bukawaqa. (Aisea 43:2) E yalataka me na vukei keda meda ‘vosota’ na veika qori. Ena sega ni vakatara na ituvaki dredre me vakaleqa noda veiwekani kei koya. Ena solia tale ga na yalona tabu meda vosota kina. (Luke 11:13; Fpai. 4:13) Eda rawa ni nuidei gona ni na solia o Jiova na veika eda gadreva meda vosota qai yalodina tiko ga vua. E vinakata o Jiova meda nuitaki koya. (Iper. 11:6) Eso na gauna eda nanuma ni vaka na bai cecere noda leqa, eda sega ni vosota rawa. De dua eda na vakatitiqataka nona rawa ni vukei keda o Jiova. Ia e vakadeitaka na iVolatabu ni na solia vei keda na Kalou na kaukaua meda “kabata kina na bai.” (Same 18:29) Meda kua gona ni vakatitiqa, meda masu ena vakabauta, meda nuitaki Jiova ni na sauma noda masu.​—Jeme. 1:​6, 7. w23.11 22 ¶8-9

Qori na ivakamacala totoka me baleta na loloma dina! Na vosa qori e vakayaloqaqataki ira na veiwatini: E rawa ni rau veilomani tiko ga. E vakatau sara ga vei rau na veiwatini na nodrau veilomani ena nodrau bula taucoko. Kena ivakaraitaki, ena waqa vinaka na buka e matadravu ke uturi tiko ga. Ke sega, lakolako sa na boko. Erau na veilomani tiko ga va qori na veiwatini, ke rau sasaga me dei nodrau vakawati. Eso na gauna, e rawa ni batabata nodrau veilomani, vakabibi ke rau leqa vakailavo, tauvimate, se dredre na susu gone. Me rawa ni caudre tiko ga “na bukawaqa i Ja,” e vinakati na sasaga vei tagane kei yalewa vakawati me rau veivolekati kei Jiova. w23.05 20-21 ¶1-3

Na cava meda cakava meda bucina na yaloqaqa? Rau na rairai uqeti keda noda itubutubu meda yaloqaqa, ia rau na sega ni rawa ni solia vei keda na itovo qo me vaka e dua na iyaya. Na noda vakaraitaka na yaloqaqa e vaka na kena vulici e dua na cakacaka. Meda kenadau ena cakacaka qori e vinakati meda raica vakavoleka na ka e cakava o koya e veivakavulici tiko, da qai vakatotomuria nona ivakaraitaki. Eda na bucina tale ga na yaloqaqa nida dikeva vakavoleka nodra vakaraitaka eso tale na itovo qori qai vakatotomuria. Me vakataki Taniela, e bibi meda kila vinaka na Vosa ni Kalou. Eda veivolekati kei Jiova nida veivosaki wasoma kei koya qai talaucaka vua na lomada. Bibi meda nuitaki Jiova, meda vakabauta ni na tokoni keda. Ni vakatovolei gona noda vakabauta, eda na yaloqaqa. Era dau dokai na yaloqaqa. Era na uqeti ira tale ga na yalomalumalumu mera kilai Jiova. Macala gona ni tiko na vuna vinaka meda vakaraitaka kina na yaloqaqa. w23.08 2 ¶2; 4 ¶8-9

Na vosa vaKirisi e vakadewataki me “vakadeitaka” e veisemati ena kena vakatovolei na koula kei na siliva. E vinakati gona meda dau vakatovolea na veika kece eda rogoca se wilika meda vakadeitaka na kena dina. Sa qai bibi sara vei keda nikua ni sa voleka na veivakararawataki levu. Meda kua ni vakabauta tu ga na ka kece era kaya eso, meda vakayagataka noda vakasama meda vakatauvatana na ka eda wilika se rogoca kei na ka e tukuni ena iVolatabu kei na isoqosoqo i Jiova. Nida cakava qori, eda na sega ni vakacalai ena ivakavuvuli ni timoni. (Vkai. 14:15; 1 Tim. 4:1) Era na vakabulai vakailawalawa na dauveiqaravi ni Kalou ena veivakararawataki levu. Ia eda sega ni kila yadudua na veika ena yaco ena siga nimataka. (Jeme. 4:14) Ke da bula sivia na veivakararawataki levu se mate ni bera na siga qori, eda na vakalougatataki meda bula tawamudu ke da yalodina tiko ga. Meda vakanamata mada ga ena noda inuinui totoka qai vakarau tu ga ena siga i Jiova! w23.06 13 ¶15-16

Eda sega ni kila na sala era vakayacori kina eso na parofisai vakaivolatabu. (Tani. 12:​8, 9) Ia ena yaco dina na parofisai kece, ke da sega mada ga ni kila vinaka na sala ena vakayacori kina. Eda rawa sara ga ni nuitaki Jiova me vakaraitaka na ka meda kila ena kena gauna donu, me vaka ga e cakava ena veigauna sa sivi. Ena kacivaki mada “na vakacegu kei na sautu.” (1 Ces. 5:3) Era na qai ravuti lotu lasu na veimatanitu e vuravura, era vakarusa tale ga. (Vkta. 17:​16, 17) Oti, era na valuti keda na tamata ni Kalou. (Isik. 38:​18, 19) Na veika qori ena tini sara ena iotioti ni ivalu na Amaketoni. (Vkta. 16:​14, 16) Eda vakadeitaka ni sa vakarau yaco kece qori. Me yacova na gauna ya, meda vakavinavinaka tiko ga vua na Tamada vakalomalagi dauloloma nida kauaitaka tiko ga na parofisai vakaivolatabu qai vukea eso tale mera cakava tale ga. w23.08 13 ¶19-20

Ni vakamacalataka tiko na yapositolo o Paula na vakabauta, inuinui, kei na loloma, e tinia ena nona kaya ni “uasivi duadua vei ratou qo na loloma.” (1 Kor. 13:13) Na cava e kaya kina qori o Paula? Ena gauna se bera mai sa na sega ni vinakati meda vakabauta tale tiko na yalayala ni Kalou me baleta na vuravura vou, se meda nuitaka na vosa ni yalayala qori nira sa na vakayacori oti. Ia ena vinakati tiko ga meda lomani Jiova kei ira na tacida. Eda na lomani ira tiko ga vakalevu me tawamudu. Na loloma tale ga eda kilai kina nida lotu vaKarisito dina: E tukuna o Jisu vei ratou nona yapositolo: “Na ka qo era na kila kece kina ni dou noqu tisaipeli, ke dou veilomani.” (Joni 13:35) Kena ikuri, na noda veilomani ena vakaduavatataki keda. E kaya o Paula ni loloma e “ivau vinaka duadua ni duavata.” (Kolo. 3:14) E vola na yapositolo o Joni vei ira na tacina vakayalo: “O koya e lomana na Kalou, me lomana tale ga na tacina.” (1 Joni 4:21) Nida veilomani, eda vakaraitaka nida lomana na Kalou. w23.11 8 ¶1, 3

Na iVolatabu e vakatauvatana na noda bula na lotu vaKarisito kei na veitaucici. O koya e rawata vinaka nona veitaucici, e nona icovi na bula tawamudu. (2 Tim. 4:​7, 8) E bibi gona meda gumatua ni cici tiko ga, vakauasivi nida sa volekata yani qo na icavacava. Na yapositolo o Paula e tukuna na ka meda cakava meda rawata vinaka na noda veitaucici. E dusimaki keda “meda biuta laivi kece na ka e vakabibitaki keda . . . meda qai ciciva tiko ga ena vosota na cere e tu e matada.” Vakacava e tukuna tiko ni sa na sega noda icolacola na lotu vaKarisito? Sega. E vakaibalebaletaka tiko ga meda biuta laivi kece na icolacola e sega ni yaga. Na mataqali icolacola qori e rawa ni vakaberai keda, eda oca tale ga kina. Meda rawa gona ni vosota, e bibi meda kila totolo na icolacola e tawayaga qai biuta laivi. Ia ena gauna vata qori, eda sega ni via biuta laivi na icolacola e dodonu ga meda qarava. Ke sega, eda na vakavuna ga noda sega ni rawata na veitaucici.​—2 Tim. 2:5. w23.08 26 ¶1-2

E vinakati na yalorawarawa meda doka nodra rai eso tale. Kena ivakaraitaki, eso na tacida yalewa era taleitaka na sasauni, eso e sega. Eso na lotu vaKarisito era taleitaka mera gunu ga vakalailai, ia eso era vakatulewataka mera sa kua sara ga ni gunu. Era vinakata na lotu vaKarisito mera bulabula vinaka, e duidui tale ga na veiqaravi vakavuniwai era digia. Ke da nanuma ni donu tu ga noda vakatulewa da qai saga mera muria na tacida ena ivavakoso, eda rawa ni vakatarabetaka eso, eda vakavuna tale ga na duiyaloyalo. (1 Kor. 8:9; 10:​23, 24) Kena ivakaraitaki, e sega ni via lewa noda isulusulu o Jiova, ia e dusimaki keda ena so na ivakavuvuli meda muria. E bibi meda tokara na isulu me kilai kina nida dauveiqaravi ni Kalou, e laurai kina na yalorawarawa, yalomalumalumu, kei na “yalomatua.” (1 Tim. 2:​9, 10) Eda sega gona ni vinakata meda saravi ena noda isulusulu. Ena vukei ira tale ga na qase ni ivavakoso eso na ivakavuvuli vakaivolatabu mera kua ni biuta e dua na lawa me lewa na isulusulu kei na ikotikoti ni ulu. w23.07 23-24 ¶13-14

E vakarautaka o Jiova na sala meda vakalougatataki kina. O ira na muria na veisureti ni “yalewa lialia e kosakosa,” era taleitaka mera marautaka na ka ni veivakamarautaki “kamikamica” e caka lo tiko. Na kena itinitini na “vanua lolovira ni iBulubulu.” (Vkai. 9:​13, 17, 18) E duidui sara o ira na taleitaka na veisureti nei “vuku dina.” (Vkai. 9:1) Eda vulica tiko meda taleitaka na ka e taleitaka o Jiova, meda cata tale ga na ka e cata. (Same 97:10) Eda lomavakacegu tale ga nida sureti ira eso tale me yaga vei ira na “vuku dina.” E vaka sara ga eda “kacivaka ena veivanua cecere ena koro: ‘O koya e yalowai me lako mai ke.’” E yaga ena gauna qo vei keda kei ira na rogoci keda. Kena ikuri, ena yaga ena gauna kece meda rawa ni “bula” tawamudu nida “muria yani na sala ni yalomatua.”​—Vkai. 9:​3, 4, 6. w23.06 24 ¶17-18

Na cava nomu rai ke taroga nomu vakabauta e dua drau cakacaka vata se vuli vata? O dau lomaleqa? Levu vei keda e dau va qori. Ia na taro qori o na kila kina nona rai se nona vakabauta, e gauna vinaka mo wasea kina vua na itukutuku vinaka. Eso na gauna ena rawa ni taro e dua ni nona inaki me veiba. Meda kua ni kurabuitaka qori. Eso era dau rogoca tu na itukutuku lasu me baleti keda. (Caka. 28:22) Kena ikuri, eda bula tu qo ena “iotioti ni veisiga,” levu era “sega ni via okati ena dua na veiyalayalati” era “voravora” tale ga. (2 Tim. 3:​1, 3) O na rawa ni taroga, ‘E rawa vakacava niu yalomalua se yalovinaka ni vakalewai na noqu vakabauta?’ Na cava mo cakava? Ena yaga na yalomalua. O koya e yalomalua ena sega ni dau cudru totolo, ia ena lewai koya vinaka ni vakacudrui se sega ni kila na ka me tukuna. w23.09 14 ¶1-2

Eso na gauna, eda rogoca na ivakasala eda na taqomaki kina me vaka na domodomoiyau, se cakava eso tale na ka meda beca kina na lawa ni Kalou. Eda na vakalougatataki nida muria na veidusimaki i Jiova. (Aisea 48:​17, 18; 1 Tim. 6:​9, 10) E macala ni o Jiova ena vakayagataki ira tiko ga na nona dauveiqaravi mera matataki koya mera veidusimaki ena gauna ni veivakararawataki levu me yacova yani na Duanaudolu na Yabaki. Vakacava eda na muria tiko ga na veidusimaki qori? Ena rawarawa sara noda cakava qori ke da muria na veidusimaki i Jiova nikua. Koya gona, meda muria tiko ga na veidusimaki i Jiova, wili kina na kena era vakarautaka na tagane era lesi mera yadravi keda tiko. (Aisea 32:​1, 2; Iper. 13:17) Nida cakava qori, e tiko na yavu vinaka meda nuitaka kina na veidusimaki i Jiova, o koya ena vukei keda meda kua ni muria na sala ena vakaleqai kina na noda bula vakayalo, ia meda muria ga na sala e basika ena bula tawamudu ena vuravura vou. w24.02 25 ¶17-18

E marautaka na yapositolo o Paula nona qaravi Jiova, ia e levu na ituvaki dredre e sotava. E yawa na vanua e dau lakova, e sega tale ga ni rawarawa na veitosoyaki ena gauna ya. Ena nona ilakolako, eso na gauna e “ririkotaki sara na [nona] bula ena veiuciwai,” e ririkotaki tale ga vei ira “na daubutako ena veitolonisala.” Eso na gauna era mokulaki koya na dauveitusaqati. (2 Kor. 11:​23-27) Kena ikuri, eso na lotu vaKarisito era sega ni vakavinavinakataka nona sasaga o Paula me vukei ira. (2 Kor. 10:10; Fpai. 4:15) Na cava e vukei Paula me marautaka tiko nona qaravi Jiova? E vulica e levu na itovo i Jiova mai na iVolatabu kei na veika e sotava. E vakadeitaka kina ni lomani koya na Kalou o Jiova. (Roma 8:​38, 39; Efeso 2:​4, 5) Qori e uqeti koya me lomani Jiova vakalevu. E vakaraitaka o Paula nona lomani Jiova ni “qaravi ira na yalosavasava, qai sega ni cegu na [nona] veiqaravi.”​—Iper. 6:10. w23.07 9 ¶5-6

Era kaya e levu ni yaga na matanitu, meda talairawarawa tale ga ena so na lawa era bulia na “iliuliu cecere.” Ia o ira na tukuna qori era na rairai sega ni via muria tale na lawa ke ra sega ni taleitaka se ra nanuma nira vakaduiduitaki kina. E kaya na iVolatabu ni vakavuna na rarawa na matanitu vakatamata, e lewa tu o Setani, sa vakarau rusa tale ga. (Same 110:​5, 6; Dauv. 8:9; Luke 4:​5, 6) E tukuni tale ga ena iVolatabu ni o koya e “saqati ira na veiliutaki e saqata na ituvatuva ni Kalou.” Noda talairawarawa vei ira na iliuliu vakatamata, e dua na ituvatuva e vakarautaka o Jiova meda tiko vinaka kina, ia ena lekaleka wale ga. E dodonu gona meda “solia na ka vei koya e dodonu me soli vua,” e okati kina na saumi ivakacavacava, veidokai kei na talairawarawa. (Roma 13:​1-7) Eda na rairai raica e dua na lawa e dredre me muri, e sega ni dodonu, e saulevu tale ga. Ia eda talairawarawa vei Jiova, e tukuna tale ga meda talairawarawa vei ira na veiliutaki ke sega ni beci kina na nona lawa.​—Caka. 5:29 w23.10 8 ¶9-10

Ni sucu o Samisoni, era liutaka na vanua o Isireli na kai Filisitia, era vakasaurarataki ira. (Dvei. 13:1) E voravora na nodra veiliutaki, era rarawa kina vakalevu na Isireli. E lesi Samisoni o Jiova me “liutaka na nodra vakabulai na Isireli mai na ligadra na kai Filisitia.” (Dvei. 13:5) Me qarava rawa qori o Samisoni, e vinakati me nuitaki Jiova. Dua na gauna e lako yani na mataivalu ni Filisitia mera vesuki koya e Liai, e tiko e Juta. Era rere na lewe i Juta, era mani vakatulewataka mera soli Samisoni vei ira na meca. Era vesuki koya na kainona ena rua na dali vou ra qai kauti koya vei ira na Filisitia. (Dvei. 15:​9-13) Ia e “vakaukauataki [Samisoni] na yalo i Jiova,” mani tasere na kena ivesu. E “raica sara o [koya] e dua na suinigalegale vou ni asa tagane,” e taura mai qai mokuta kina e 1,000 na tagane ni Filisitia!​—Dvei. 15:​14-16. w23.09 2 ¶3-4

E vakaraitaka vakalalai o Jiova na nona “inaki tawamudu” ena iVolatabu. Se cava e yaco, o Jiova e rawa ni “cakava . . . na ka kece me rawa kina na nona inaki.” (Vkai. 16:4) Na itinitini ni ka e cakava ena tu ga me tawamudu. Na cava na nona inaki? Na veiveisau cava e cakava me rawati kina qori? E tukuna na Kalou vei rau na imatai ni tamata na nona inaki me baleti rau. Oya me “[rau] vakawa, mera le levu mai,” rau “vakasinaiti vuravura,” rau “vakamalumalumutaka,” rau “lewa tale ga . . . na kabula kece” e vuravura. (Vkte. 1:28) Ni rau talaidredre o Atama kei Ivi, rau vakavuna me dewa na ivalavala ca ina vuvale ni kawatamata. E sega ni veisau na inaki i Jiova. E veisautaka ga na sala me rawati kina. E totolo nona tuvanaka me tauyavu e dua na Matanitu mai lomalagi me vakayacora nona inaki taumada me baleta na kawatamata kei na vuravura.​—Maciu 25:34. w23.10 20 ¶6-7

Ena vukei keda o Jiova meda vosota. Ena sega toka ni rawarawa, vakabibi ke sa dede noda valuta tiko e dua na malumalumu. Eso na gauna ena rairai dredre sara na noda malumalumu ni vakatauvatani kei na ka e sotava na yapositolo o Pita. Ia ena solia o Jiova na kaukaua meda vosota kina. (Same 94:​18, 19) Kena ivakaraitaki, e dua na tacida tagane e dau mocera eso tale na tagane me vica vata na yabaki ni bera ni vulica na ka dina. E veisautaka vakadua na nona bula, e muria sara na ivakatagedegede vakaivolatabu. Ia eso na gauna e ka ni sasaga me valuta na gagadre ca. Na cava e vukei koya me kua ni soro? E kaya: “E vakaukauataki keda o Jiova. Ena veitokoni ni yalo tabu i Jiova . . . , au vulica ni rawa nida vulica tiko ga na sala ni dina . . . E tiko na noqu malumalumu ia se vakayagataki au tiko ga o Jiova, e vakaukauataki au tiko ga.” w23.09 23 ¶12

Kemuni na tacida tagane gone, e vinakati na sasaga moni lotu vaKarisito matua. E bibi mo digia na ivakaraitaki vinaka mo vakatotomuria, mo dau raiyawa, mo nuitaki, mo vulica eso na cakacaka mo qaravi iko kina, mo vakarautaki iko tale ga ena so tale na itavi se bera mai. De dua o na lomaleqataka ena so na gauna na itavi e tu me qaravi. Ia o rawa ni cakava. Nanuma tiko ni vinakata o Jiova me vukei iko. (Aisea 41:​10, 13) Macala ga nira na vukei iko tale ga na mataveitacini ena ivavakoso. Ni o sa na lotu vaKarisito matua, o na marautaka nomu bula, ena vakainaki tale ga. Keimami lomani kemuni vakalevu! Me vakalougatataki iko mada ga vakalevu o Jiova ni o saga ena gauna qo mo tagane lotu vaKarisito matua. w23.12 29 ¶19-20

Vakatauvatana mada va qo. O tiko kei na so na tacimu ena dua na soqo. O marautaka na veimaliwai, o tabaki kemuni vata kece sara. Ena rua se tolu na kemudou itaba, de sega ni rairai vinaka na kena imatai. Sa na tolu toka na itaba. Ia ena dua na itaba qori o raica ni mataruburubu tu kina e dua na tacimu. O na bokoca sara ni sa tu e rua tale era matadredredre kece, wili kina na tacida qori. Macala ga nida sega ni guilecava na gauna marautaki eda tiko kina kei ira na tacida. Ia kaya mada ke dua na gauna qori e cakava se tukuna na tacimu e dua na ka e vakararawataki iko. Cava o na cakava? O rawa ni bokoca laivi me vaka ga o cakava ena itaba ya. (Efeso 4:32) Eda rawa ni cakava qori nida nanuma tiko ga na gauna vinaka eda marautaka vata. Eda na via nanuma tu ga na gauna va qori da qai mareqeta. w23.11 12-13 ¶16-17

Na vosa vaKirisi e vakayagataki eke e dusia ni nodra isulusulu na yalewa lotu vaKarisito me laurai kina na veidokai, mera kauaitaka tale ga na nodra rai eso tale. Eda qoroi ira na tacida yalewa lotu vaKarisito e rakorako na nodra isulusulu! Dua tale na itovo mera vakaraitaka kece na yalewa lotu vaKarisito matua, ya na yalomatua. Na cava na yalomatua? Oya na nomu vakatulewa vinaka, nomu vakaduiduitaka na ka e donu mai na ka e cala, oti o cakava sara na ka e dodonu. Dikeva mada na ivakaraitaki nei Apikali. E vakatulewa cala o watina, e rawa ni vakaleqai sara ga na nona lewenivuvale taucoko. Ia e yavala totolo, mani bula nona vuvale ni vakatulewa vakayalomatua. (1 Sam. 25:​14-23, 32-35) E yaga tale ga na yalomatua meda kila na gauna meda vosa kina se galu tiko ga. E bibi qori nida kauaitaki ira eso tale, ia me kua ga ni sivia tale na ka eda cakava.​—1 Ces. 4:11. w23.12 20 ¶8-9

E vola na vosa qori na yapositolo o Paula ina ivavakoso e Roma. Era vulica na mataveitacini qori na veika me baleti Jiova kei Jisu, era vakaraitaka nodra vakabauta, era mai lotu vaKarisito tale ga. O Jiova e “okati [ira mera] yalododonu ena vuku ni vakabauta” qai lumuti ira ena yalo tabu. (Roma 5:1) Io, e totoka vakaoti na nodra inuinui, ena vakayacori tale ga. Dua na gauna e muri, e vola o Paula vei ira na lotu vaKarisito e Efeso na nodra inuinui. Na nuinui qori e okati kina “na ivotavota . . . mera taukena na yalosavasava.” (Efeso 1:18) E tukuna tale ga o Paula vei ira e Kolosa na vanua e tiko kina na nodra inuinui. E kaya ni nodra “inuinui e maroroi tu mai lomalagi.” (Kolo. 1:​4, 5) Na nodra inuinui gona na lotu vaKarisito lumuti, oya nira na vakaturi mera bula tawamudu i lomalagi, na vanua era na veiliutaki kina kei Karisito.​—1 Ces. 4:​13-17; Vkte. 20:6. w23.12 9 ¶4-5

Na vosa taumada ni “taqomaka” e vakayagataki ena mataivalu me baleti ira na sotia era dau taqomaka na koro me kua ni valuti. Era dau moce vinaka na lewenikoro nira kila nira taqomaka tiko na sotia na matamata. E va tale ga qori na vakacegu ni Kalou, ni taqomaka na lomada kei na noda vakasama. Eda vakacegu nida kila nida taqomaki tiko. (Same 4:8) Me vakataki Ana, ke sega mada ga ni veisau totolo na keda ituvaki, se rawa tiko ga nida vakila na vakacegu. (1 Sam. 1:​16-18) Nida vakacegu eda dau vakasama vinaka kina, e donu tale ga na noda vakatulewa. Na cava eda rawa ni cakava? Ni o sotava na ituvaki dredre, kerea na veitaqomaki i Jiova. Ena sala cava? Mo masu me yacova ni o sa vakila na vakacegu ni Kalou. (Luke 11:9; 1 Ces. 5:17) Ke o sotava tiko na ituvaki va qori, gumatua ena masu, o na vakila tale ga na vakacegu i Jiova ni taqomaka na lomamu kei na nomu vakasama.​—Roma 12:12. w24.01 21 ¶5-6

Me vakarokorokotaka o Jisu na yaca i Tamana, e vosota kina nona vakararawataki, vosabeci, kei na nona vakaucacataki. E kila ke talairawarawa vei Tamana ena ka kece e cakava, ena sega ni maduataka e dua na ka. (Iper. 12:2) E kila tale ga ni o Setani e saqati koya tiko ena gauna dredre qori. (Luke 22:​2-4; 23:​33, 34) E vinakata o Setani me kua ni yalodina o Jisu, ia e qai sega ni rawata! E vakaraitaka o Jisu ni o Setani e dau lasulasu. Kena ikuri, era tu na dauveiqaravi i Jiova era yalodina vua ena gauna mada ga era vakatovolei kina ena veika dredre sara! Vakacava o via vakamarautaka na nomu Tui sa veiliutaki tiko? Mo vakacaucautaka tiko ga na yaca i Jiova, mo vukea tale ga e levu mera kila na nona itovo talei. Ni o cakava qori o sa vakatotomuri Jisu tiko. (1 Pita 2:21) Me vakataki Jisu, mo vakamarautaki Jiova, mo vakaraitaka tale ga ni dau lasulasu na kena meca, o Setani! w24.02 11-12 ¶11-13

Ena loma ni lima na yabaki sa oti, e sivia ni duanamilioni era papitaiso mera iVakadinadina i Jiova. Ni o yalataki iko vei Jiova, o sa digia mo tisaipeli i Jisu Karisito, o sa vakaliuca tale ga na vakayacori ni loma ni Kalou. Na cava e okati ena nomu yalayala vaKarisito? E kaya o Jisu: “Ke dua e via muri au, me kua tale ni muria na lomana.” (Maciu 16:24) Na vosa vaKirisi e vakadewataki “kua tale ni muria na lomana,” e rawa tale ga ni vakadewataki mo “vakasega vei iko.” Ni o dauveiqaravi yalayala i Jiova, ena vinakati mo vakasega ena ka kece e sega ni salavata kei na lomana. (2 Kor. 5:​14, 15) Qori e wili kina nomu vakasega se cata na “vua ni itovo vakayago,” me vaka na veiyacovi tawadodonu. (Kala. 5:​19-21; 1 Kor. 6:18) Vakacava ena dredre vei iko mo muria na ivakaro qori? Ena sega ni dredre ke o lomani Jiova qai vakadeitaka ni na yaga vei iko nomu muria nona lawa.​—Same 119:97; Aisea 48:​17, 18. w24.03 2 ¶1; 3 ¶4

O Jiova e solia na yalona tabu vei ira e vakadonuya. (Maciu 12:18) Eda rawa ni taroga, ‘Vakacava au dau vakaraitaka eso na itovo e okati ena vua ni yalo tabu?’ O raica ni o sa vosovoso tiko vakalevu ni vakatauvatani kei na gauna o se bera ni kilai Jiova kina? Na levu ga ni nomu vulica na sala mo vakaraitaka kina na itovo e okati ena vua ni yalo tabu, o na nuidei sara ga ni vakadonui iko o Jiova! O Jiova e vakayagataka na yaga ni ivoli vei ira e vakadonuya. (1 Tim. 2:​5, 6) Vakacava ke da vakabauta na ivoli, eda papitaiso sara, ia eda se nanuma tiko ga ni sega ni vakadonui keda o Jiova? Meda nanuma tiko ni sega ni rawa nida nuitaka na lomada, ia meda nuitaki Jiova. E okati ira na vakabauta na ivoli mera yalododonu e matana qai yalataka me vakalougatataki ira.​—Same 5:12; Roma 3:26. w24.03 30 ¶15; 31 ¶17