Na Ka e Dau Mositi Koya me Baleta na Koro o Niu Yoka

NA IVAKATAKILAKILA matailelevu oqori e cake, e se volai sara ena 1950 ena dua na valenicakacaka ni Watchtower Society, e Brooklyn, Niu Yoka. Era vakadreti na vakaitikotiko e kea, kei ira na vulagi saravanua, se o ira kece ga era lakosivia na vanua oya, mera dau wilika na iVolatabu ena veisiga. Me vakaraitaka na yaga ni ivakatakilakila oqori, oqo na ivola e vola mai e dua na goneyalewa iVakadinadina i Jiova.

“Au talanoataka tiko vua e dua keirau kalasi vata, se cava au via cakava ena gauna e sa na oti kina na noqu vuli ena koronivuli torocake. Au talanoataka sara vua na Peceli, na nodra itikotiko liu na iVakadinadina i Jiova, e tuburi koya sara na marau. Tukuna vei au na goneyalewa oqo, ni vakaitikotiko ena koro o Niu Yoka ena nona bula taucoko. E sega ni vuvale lotu nona matavuvale, ia ni dau iro mai na katubaleka ena veimataka e dau lauti koya tiko ga na ivakatakilakila e tukuni kina, ‘Wilika na Vosa ni Kalou na iVolatabu e Veisiga.’ E dau wilika gona na nona iVolatabu ena veimataka ni se bera ni lai vuli.

“Ena gauna sa toki kina, e kaya ni ka e mositi koya me baleta na koro o Niu Yoka, oya ni sa sega ni raica ena gauna me yadra kina na veivakadreti me dau wilika na nona iVolatabu. Ia ena vuku ga ni ivakatakilakila oya e tiko ena vale ni Watchtower, e sa lai matau kina vua me dau wilika na iVolatabu ena veisiga, o koya gona, e sega ni cegu nona cakava tiko ga me yacova mai oqo!”

Na sala vinaka meda tekivuna kina e dua na siga, oya meda wilika mada ga e dua na iwase lailai ni Vosa ni Kalou! Ke o vakayacora oqori, ena sega ni vakataratutu ni o na vakadinadinataka na vosa i Paula na yapositolo ena nona kaya: “Nai Vola tabu, . . . sa vakavukui iko rawa mo bula ni ko sa vakabauti Karisito Jisu.”​—2 Timoci 3:​15-​17.