Eda Vakataki Ira Ga Era Vakabauta

Vunautaki na iNuinui ni Lotu Vakarisito e Senegal

NA IKA e kakana dau laukana vakalevu ena gauna makawa. Sa vica vata na udolu na yabaki na nodra qoliva tiko na tamata na veiwasawasa, na drano, kei na veiuciwai. E so tale ga na yapositolo i Jisu Karisito era gonedau, era dau qoli ena Wasawasa e Kalili. Ia a vakatakila vei ira o Jisu e dua tale na mataqali qoli. Oqo na qoli vakayalo, na qoli oqo ena yaga vei ira na gonedau, ena yaga tale ga vei ira na ika.

Oqori na vuna e kaya kina o Jisu vei Pita, na gonedau: “Me tekivu oqo ko sa na dau qolivi ira na tamata.” (Luke 5:​10, VV) Oqo na mataqali qoli sa vakayacori tiko ena sivia na 230 na vanua, bau kina o Senegal. (Maciu 24:14) Era sa vunautaka tiko e kea edaidai na inuinui ni lotu Vakarisito o ira na “gonedau ni tamata.”​—Maciu 4:​19.

E toka o Senegal ena ra ni ucunivanua kei Aferika. E koto volekata na nuku dravuisiga na Sahara ena vualiku, e tara yani na veikau katakata ena yasayasa o Casamance ina ceva. E dau liwavi Senegal na cagi katakata ni vanua dravuisiga, kei na cagi batabata vinaka ni Atalanitika. Sivia na ciwanamilioni na lewenivanua oqo. E kilai nira dau veiciqomi. Vuqa vei ira era sega ni lotu Vakarisito. Levu era dau vakatawa sipi, so era dau vakatawa bulumakau, kameli, kei na me. So tale era dauteitei tu ga, era tea na pinati, vauvau, kei na raisi. So tale ga era gonedau, era katoa ena nodra dau qoliva na wasawasa na Atalanitika, kei na veiuciwai lelevu era drodro tu ena lomanivanua oqo. Na qoli e dua na ivurevure levu ni ilavo ena vanua o Senegal. Na kedra kakana taleitaki vakalevu na ceebu jën, oqo na raisi, na ika, kei na kakana draudrau, e maleka dina na kena ikanakana.

“Gonedau ni Tamata”

E 863 na levu ni dautukutuku era vunautaka tiko vagumatua na Matanitu ni Kalou e Senegal. A tekivu na qoli vakayalo ena vanua oqo ena yabaki 1950 me lako mai. E dolava na Watch Tower Society ena 1965 e dua na valenitabana ena kena koroturaga o Dakar. Ra sa tekivu tale ga mera yacoyaco yani na “gonedau” daukaulotu era cavutu mai na veivanua yawa. Sa tekivu sara na “qoli,” sa tekivu tale ga me toso na vunautaki ni inuinui ni lotu Vakarisito e Senegal. Lakolako sa tara e dua na valenitabana vou e Almadies ena taudaku kei Dakar, a yalataki sara vei Jiova ena June 1999. E gauna rekitaki dina!

Ka ni Bolebole na Ciqoma na Ka Dina

Era sa tarai tiko vakawasoma na veimataqali tamata kece ga ena vanua oqo, so gona era taleitaka sara na itukutuku ni vakanuinui vinaka e tu ena Vosa ni Kalou. Dina ni lewe vuqa era sega tu ni kila na iVolatabu, ia era marau nira sa qai kila ni sa vakarau me vakayacori na vosa ni yalayala kece a tukuna tu na Kalou o Jiova vei ira na parofita yalodina ena gauna makawa.

E vinakati na yaloqaqa me rawa nida taura matua na ivakavuvuli vakarisito, vakauasivi ke tara oya na ivakarau ni bula vakavuvale kei na itovo vakavanua. Me kena ivakaraitaki mada, sa kena ivakarau tu e Senegal me dau vica vata na watina e dua na tagane. Vakasamataka na tagane oqo, e rua tiko na watina ena gauna e tekivu vulica kina na iVolatabu. Ena yaloqaqa beka me ciqoma na ka dina vakarisito me moica nona bula me salavata kei na iVolatabu, oya me dua ga na watina? (1 Timoci 3:2) Vakacava, ena taura ga na imatai ni yalewa e watina ena gauna e se cauravou kina? Oqori sara ga na ka e vakayacora, edaidai e sa dua tu na qase gugumatua ena dua na ivavakoso levu ena yasayasa o Dakar. Sa ciqoma tale ga na ka dina na imatai ni watina kei iratou na 12 na luvena, e 10 vei koya na imatai, qai rua vei koya na kena ikarua.

Dua tale beka ga na ka e vakalatilati ena nodra ciqoma na inuinui ni lotu Vakarisito, oya na nodra lecava na volavola kei na wilivola. E kena ibalebale oqo ni na sega ni rawa me ciqoma se bulataka na ka dina e dua e tu ena ituvaki oqo? E sega. Vakasamataka na ivakaraitaki i Marie, e dua na tina dau cakacaka vakaukaua, qai walu na luvena lalai. E totolo sara nona raica rawa ni vinakati vakabibi me dau veitalanoataka kei ira na luvena lalai na tikinivolatabu ena veisiga nira se bera ni lai vuli, kei na nona gole o koya me lai cakacaka. Ia ena cakava vakacava, ni sega tu mada ga ni kila na wilivola? Dau nona cakacaka ena veimataka me lai duri tu ena gaunisala nuku ena nona matanivale, e dau taura tu na ivola na Dikevi na iVolatabu e Veisiga. Nira tavali na tamata e gaunisala, e dau tarogi ira se ra bau kila na wilivola. Ni sotava e dua e kila na wilivola, e solia sara vua na ivola, qai kaya sara ga vakadodonu vua: “Au sega ni kila na wilivola, au kerea ke o rawa ni wilika mada ga vei au edaidai na kena iwase oqo?” Dau vakarorogo vinaka sara ni sa wili. E vakavinavinakataki koya e wiliwili, curu tale i lomanivale me lai veivosakitaka kei iratou na luvena na tikinivolatabu ni se bera ni ratou lai vuli!

Ra Vakarorogo na Veimataqali Tamata

Eda dau raici ira na tamata e Senegal nira dabe toka e gaunisala ra qai volitaki ika toka, na kakana draudrau, se volitaki vuanikau ena makete, se ra vakacegu toka ga ena ruku ni vunikau levu na baobab, ra gunu ti gaga, qai via roka drokadroka e vakatokai na ataya. Erau gu e rua na tacida tagane me rau wasea na itukutuku vinaka vei ira kece ga erau sotava, erau vosa gona vua e dua na tamata lokiloki e dau kerekere voli e gaunisala. Ni oti nodrau vakabula vua, rau kaya sara: “Ra lewe vuqa era dau soli ilavo vei iko, ia era sega mada ga ni bau tu mera vosa vei iko. Keirau lako mai oqo me keirau mai tukuna vei iko e dua na itukutuku bibi, e baleta na nomu veigauna mai muri.” E kurabui sara ga na tamata dau kerekere oqo. “Keirau via taroga vei iko e dua na taro. Na cava e sa rui levu kina na rarawa ena vuravura?” “E inaki ga ni Kalou,” e kaya na tamata dau kerekere.

Ratou veitalanoataka na iVolatabu, rau qai vakamacalataka vua na Vakatakila 21:4. E tara sara ga na tamata dau kerekere oqo na itukutuku ni vakanuinui vinaka, vaka tale ga kina na nodrau kauai na rua me rau bau vakamacalataka vua na iVolatabu. E luluvu sara qai tonawanawa na matana. Ia e sega ni kere ilavo vei rau, sa qai kerei rau ga na tacida me rau taura taucoko na ilavo e sa bau rawata e tawa tiko ena kena kava! Sa dua na ka na nona cikevi rau me rau kauta na ilavo, e vakavuna mera vakararai mai na tavali tiko e kea. Rau vakamasuti koya sara ga na tacida me taura ga na ilavo. Oti sa qai vakadonuya, ia e cikevi rau me rau lesuvi koya tale.

Sa bau katoa tale ga na lawa ni qoli vakayalo ena univesiti levu e Dakar. A tekivu vulica e kea na iVolatabu o Jean-Louis, e dua na vulivuniwai. Totolo sara nona vakila ni ka dina e vulica tiko, a yalataka nona bula vei Jiova, mani papitaiso sara. E vinakata tiko me painia, oya me cakacaka vakaitalatala vakatabakidua, ia e taleitaka tale ga na vulivuniwai e goleva tiko. Ena veiyalayalati e cakava kei na nona vanua, e dodonu me vakacavara vinaka sara nona vuli. Ia ena gauna vata oqori sa tekivu me painia veivuke kina. Ni oti ga nona rawata na nona ivolatara ni vuniwai, sa sureti sara me lai veiqaravi vakavuniwai ena dua na Peceli levu mai Aferika. E dua tale ga na cauravou a tarai ena gauna e vuli tiko kina ena univesiti e Dakar, e sa veiqaravi tiko e Peceli mai nona vanua ena gauna oqo.

Sa yaga dina na qoli vakayalo e caka tiko e Senegal. Sa dua na ka na kena taleitaki na nodra ivola vakaivolatabu na iVakadinadina i Jiova, e sa tabaki tale ga ena gauna oqo ena vosa vaka Wolof. Nira rogoca na itukutuku vinaka ena vosa era sucukaya mai, e uqeti ira e vuqa na tamata lomadina mera ciqoma ena vakavinavinaka na itukutuku vinaka. Ena veivakalougatataki i Jiova, e sega ni vakabekataki ni na levu tale na ika vakayalo ena qolivi mai, kevaka ga era gumatua tiko na “gonedau ni tamata” e Senegal mera tukuna tiko ga ena vakabauta kei na yaloqaqa na inuinui ni lotu Vakarisito.

[Mape/​iYaloyalo ena tabana e 31]

(Raica tale na ivola)

SENEGAL

[iYaloyalo]

Vunautaki na inuinui ni lotu Vakarisito e Senegal

[Credit Line]

Mountain High Maps® Copyright © 1997 Digital Wisdom, Inc.