Taro na Dauwiliwili
Ena Roma 12:19, e vakaraitaka tiko beka na yapositolo o Paula ni sega ni dodonu me cudru na lotu Vakarisito ena nona kaya: “Oi kemudou sa lomani dou kakua ni sauma [se, “cudruvaka,” NW] na ca sa caka vei kemudou, ia mo dou laiva vua na Kalou me sauma”?
E sega. E ke e tukuna tiko na yapositolo o Paula na nona dau cudru na Kalou. Ia e sega ni kena ibalebale oqo ni sega ni dua na ka ke cudru na lotu Vakarisito. E vakasalataki keda vakamatata na iVolatabu meda kua ni dau cudru. Oqo gona e so na ivakasala vakalou.
“Kakua so ni cudru, biuta ga na daulesavi; kakua ni vakararawataki iko mo cala kina.” (Same 37:8) “O koya yadua sa cudru walega vua na wekana, ena cudruvi koya na mataveilewai.” (Maciu 5:22) “Ia sa votu na cakacaka ni tovo vakayago, ka sa vakaoqo: A dauveibutakoci, na daudara, nai valavala tawa-savasava, na daugarogaro, na dausoro ki na veimatakau, na daucakaisausau, na dauveicati, na dauveileti, na veiqati, na daucudrucudru.” (Kalatia 5:19, 20) “Me biu tani kece vei kemudou na yaloca, kei na cudrucudru, kei na daunene, kei na veiba, kei na vosavakacaca, kei na ca kecega.” (Efeso 4:31) “Mo dou kusarawa yadua me vakarorogo, mo dou berabera ga ni vosa, mo dou berabera ni cudru.” (Jemesa 1:19) E vakasalataki keda tale ga vakawasoma na Vosa Vakaibalebale me kua nida dau cudrucudru, se me kua nida dau yalokatakata ena vuku ni so ga na cala lalai kei na so na leqa e vu ga mai ena malumalumu vakatamata.—Vosa Vakaibalebale 12:16; 14:17, 29; 15:1; 16:32; 17:14; 19:11, 19; 22:24; 25:28; 29:22.
Na veitikina yavolita ni Roma 12:19 e salavata sara ga kei na ivakasala oqori. E kaya o Paula me kua ni veivakaisini na noda loloma, meda vosa vakalougatataki ira era vakacacani keda, me vinaka noda vakanananu me baleti ira na tani, meda kua ni veisausaumitaka na ca, meda saga meda veiyaloni kei ira na tamata kece ga. E qai vakauqeti keda: “Oi kemudou sa lomani dou kakua ni sauma [se, “cudruvaka,” NW] na ca sa caka vei kemudou, ia mo dou laiva vua na Kalou me sauma; ni sa volai; A noqui tavi me’u cudruvaka; au na sauma koi au, sa kaya na Turaga.”—Roma 12:9, 14, 16-19.
Io, meda kua gona ni sauma na ca ena vuku ni noda cudru. E sega ni dau taucoko sara na noda kila na veika e yaco dina, vaka kina na yavu ni noda vakatulewataka e dua na ka. Nida veisausaumitaka na ca ena dela ni cudru, eda dau tini cala kina vakavuqa. Ena sala oqori eda sa cakava tiko kina na loma ni Tevoro, na Meca ni Kalou. E vola tale ga o Paula: “Ni dou sa cudru, kakua ni dou cala kina; me kakua ni dromu na mata-ni-siga ni dou sa cudru tiko: kakua talega ni vakarawarawataki kemudou vua na tevoro.”—Efeso 4:26, 27.
E vinaka qai ka vakayalomatua meda laiva ga vua na Kalou me lewa se gauna cava me qai vakatauca kina nona cudru, o cei tale ga e dodonu me tau vua. Ni kila vinaka tu na dina ni veika kece, ena vakatauca gona kina nona cudru ena dela ni lewadodonu. Oqori sara ga na ka e tukuna o Paula ena Roma 12:19 ena nona tokaruataka na Vakarua 32:35, 41, e tiko tale ga kina na veivosa oqo: “Me noqu na veicudruvaki, kei na veisausaumi.” (Vakatauvatana Iperiu 10:30.) Dina ga ni sega ni kune ena iVolatabu Vakirisi, ia e so na dau vakadewa edaidai era vakacuruma “vua na Kalou” ena Roma 12:19, e mani vaka kina oqo na nodra ivakadewa, “laiva vei au meu sauma” (The Contemporary English Version); “laiva me sauma na Kalou” (American Standard Version); “me veitotogitaki ga na Kalou ke vinakata” (The New Testament in Modern English); “me qai tau ga kina na cudru vakalou.”—The New English Bible.
Kevaka mada ga era tulevaki keda se ra vakacacani keda na meca ni ka dina, sa rawa nida nuitaka na ivakamacala e rogoca o Mosese me baleta na Kalou o Jiova: “Ko Jiova, ko Jiova na Kalou, sa yalololoma ka daulomasoli, sa vosovoso vakadede, ka levu na nona yalovinaka kei na dina, sa dauyalovinaka tiko vei ira na veiudolu, sa sega ni cudruvaka na caka ca kei na talaidredre kei nai valavala ca, ia sa sega ga ni vakadonui ira na cala.” (Neitou na matanivola kala.)—Lako Yani 34:6, 7.