Na Cava Meda iValavala Vinaka Kina?

O KUNIHITO e dua na turaga ni Japani tudonu nona bula e se qai toki ga oqo me lai vakaitikotiko e Mereke.a E sotava e dua na ituvaki dredre ni se qai lai macawa vica ga, voleka sara ni vakaleqa nona cakacaka. E talanoataka o Kunihito: “Ni tarogi au o noqu boso se na rawa niu qarava e dua na itavi, au nanuma ni sega ni dua na kena dredre. Ia, niu a vakavulici ena yalomalua e wili me ivalavala vinaka, au mani kaya: ‘Au sega mada ni kila se rawa niu cakava, ia, au na tovolea ga na noqu vinaka taucoko.’ Ena rai nei noqu boso ni Mereke, e vaka me sega ni ganiti au na cakacaka oya, ni sega vei au na yalodei. Niu sa kila na lomana, au qai raica rawa ni dodonu meu veisau.”

E bula ena korolevu o Niu Yoka o Maria, e rawata vinaka tiko nona vuli, qai marautaka me dau vukei ira nona lewenikalasi. Erau kalasi vata kei na gonetagane o Jiuta qai dau kerei Maria ena so na gauna me vukei koya. Kuria ni dau wedevi koya qai saga me taleitaki koya o Maria. Dina ni tovolea me goneyalewa savasava tiko ga, e qai coko o Maria ina dai ni veicavilaki i Jiuta, tini sara ina ivalavala vakasisila.

E ka ni bolebole dina ena gauna oqo meda ivalavala vinaka tiko ga ni sa rui duidui na itovo ni tamata, qai torosobu sara na ivalavala raraba ni bula. Na cava meda ivalavala vinaka kina? Baleta ni vakamarautaka na Kalou na ivalavala vinaka, qai levu vei keda eda gadreva na nona veivakadonui.

E uqeti keda na Vosa ni Kalou na iVolatabu meda vakaitovotaki keda ena ivalavala vinaka. Me kena ivakaraitaki, ni vola na yapositolo o Paula: “Ia kevaka sa dua na ka e vinaka, se na ka e daudokai, dou nanuma na veika oqo.” (Filipai 4:8) E veiuqeti tale ga na yapositolo o Pita meda ‘gumatua vakalevu sara ni vakaikuritaka na noda vakabauta ena ivalavala vinaka.’ (2 Pita 1:5) Na cava sara mada na ivalavala vinaka? E rawa beka ni vulici e koronivuli? Eda na vakaitovotaki keda kina vakacava?

[iVakamacala e ra]