Qaqa ena Mataveilewai Levu

ERA qaqa na iVakadinadina i Jiova mai Jamani ena mataveilewai levu na Federal Constitutional Court, e Karlsruhe. Sa dua dina na toso i liu me baleta na nodra kilai vakalawa.

Sa sivia oqo e 100 na yabaki na nodra vunau voli e Jamani na iVakadinadina i Jiova. Era bulata rawa na veivakacacani kaukaua sara ena ika20 ni senitiuri ena ruku ni rua na veiliutaki—nodra na National Socialist kei na Kominisi. Mai na 1990, era sa saga tiko mai kina na iVakadinadina i Jiova me kilai vakalawa na nodra isoqosoqo. Ni oti na nodra qaqa ena rua na kisi ni veilewai kei na kena veisautaki na lewa sa tau oti me baleta e dua tale, era qai kerea na iVakadinadina i Jiova me rogoci tale mada na nodra kisi ena mataveilewai levu, na Federal Constitutional Court. E qai tau na kena lewa ena 19 Tiseba, 2000.

Era Duavata na Turaganilewa Baleti Ira na iVakadinadina i Jiova

Eratou duavata na le vitu na turaganilewa levu ni mataveilewai oya nira dina na iVakadinadina. Eratou veisautaka na turaganilewa e dua na lewa ni mataveilewai na Federal Administrative Court ni 1997 qai ratou vakarota me dikevi vinaka tale mada na nodra kisi na iVakadinadina.

Sa qai vakayagataka na mataveilewai levu na nona dodonu me vakamacalataka se mataqali veiwekani vakacava me koto ena maliwa ni matanitu kei na lotu. Na yavu ni dua na matalotu “e vakatau ena ka e cakava, sega mai na ka e vakabauta.”

E kunea tale ga na mataveilewai ni nodra kaya tiko na iVakadinadina nira “sega ni veitovaki na lotu Vakarisito,” era “sega ni saqata na ivakavuvuli vakademokarasi” era “sega tale ga ni via sosomitaka na demokarasi kei na dua tale na ivakarau ni veiliutaki vakamatanitu.” O koya gona, e sega ni dodonu mera vakacalai na iVakadinadina ena nodra sega ni veidigidigi ena veika vakapolitiki, me vakayagataki oya me tarova na nodra sasagataka tiko me kilai vakalawa na nodra isoqosoqo.​—Joni 18:36; Roma 13:1.

E dikeva tale ga na mataveilewai ni dua e vakabauta—se iVakadinadina se dua tale na lotu—ena rawa ni sotava ena so na gauna na ituvaki ena veicoqacoqa kina na lewa ni matanitu kei na veika e gadrevi ena nona vakabauta. Ke muria o koya na nona lewaeloma “ena nona vakarorogo ina nona vakabauta e sega ena lawa,” ena rairai duavata kina na matanitu me vaka ni salavata kei na nona galala ni sokalou.​—Cakacaka 5:29.

E nodra ulu ni itukutuku na dauvakauitukutuku na vakataulewa oqo ni mataveilewai. Dredre me kune e dua na niusiveva e Jamani me sega ni tabaka na vakataulewa ni mataveilewai oqo. Voleka ni o ira kece na siteseni lelevu ni retioyaloyalo kei na retio era vakacuruma ena nodra porokaramu na kena macala. Se sega tale mada ni dua na gauna e liu me vakatetei kina vakalevu vaka oqo e Jamani na yaca i Jiova.

[iTaba ni Credit Line ena tabana e 8]

AP Photo/Daniel Maurer