“Sota ena Matanitu ni Kalou”

“Isa noqu itokani! Rupert, au sa totogi mate nikua. Kua ni lolosi. Au loloma tu yani vei iko kei iratou kece mai vale. Sota ena Matanitu ni Kalou.”

ENA 8 June, 1942, a vola na ivola oqo o Franc Drozg ni bera nira vanai koya na sotia ni Nazi. Na cava e vakamatei kina?

Na ivolatukutuku ena Museum of National Liberation e Maribor mai Slovenia, e vakaraitaka me baleti koya na daunikaukamea oqo, e yabaki 38, ni a sega ni via curu ena Wehrmannschaft, na mataivalu ni Jamani e tiko mai Slovenia. E Bibelforscher, se Gonevuli ni iVolatabu, era kilai kina na iVakadinadina i Jiova ena vanua oya. Ni muria na Aisea 2:4, e sega kina ni tokona na sasaga vakaivalu ni Nazi, qai kaya ni vakarurugi ena Matanitu ni Kalou.​—Maciu 6:33.

E kilai o Franc ena nona koro o Ptuj, ni dau gumatua ni kacivaka na itukutuku vinaka ni Matanitu ni Kalou. (Maciu 24:14) E sotava e levu na dredre, ia e kacivaka tiko ga na itukutuku vinaka me yacova nona vesu ena Me 1942.

E levu na iVakadinadina i Jiova mai Slovenia era vakacacani vakaca vei ira na Nazi. O Franc e dua vei ira na imatai ni vica me vakamatei ena vuku ni nona vakabauta vakalotu. Me vakataki ira na lotu Vakarisito ena imatai ni senitiuri, e vakaukauataki koya na veivosa: “Sa kilikili me vuqa na ka rarawa eda sa curu kina ki na matanitu ni Kalou.” (Cakacaka 14:22) Nona vakabauta dei na matanitu vakalomalagi e laurai ena otioti ni veivosa e vola, “Sota ena Matanitu ni Kalou.”

[iTaba ni Credit Line ena tabana e 32]

Franc Drozg: Photo Archive-Museum of National Liberation Maribor, Slovenia; ivola: Original kept in Museum of National Liberation Maribor, Slovenia