Tukutuku Mai na Daukacivaka na Matanitu

‘Sa Vu ni Kaukaua na Vosa ni Kalou’

E LEVU era kila tu na iVolatabu ena yanuyanu katakata o Jamaica mai na Caribbean. E voleka ni kune ena nodra veivale kece ga, na ivakadewa ni iVolatabu na King James Version, ra qai vakila e so ni “bula na vosa ni Kalou, ka kaukauwa.” (Iperiu 4:​12) E rawa ni veisautaka na bula na kaukaua oqo, me vaka e laurai ena ivakaraitaki e tarava.

E dua na iVakadinadina i Jiova a sikova e dua na turaga o Cleveland, ni se qai lesu tiko ga mai na cakacaka. Ni oti nodrau veivosakitaka e so na tikina mai na iVolatabu, a solia toka vua e dua na ivola vakaivolatabu Na Ka Mo Kila Mo Bula Tawamudu Kina na iVakadinadina oya. E sega vakadua ni kila o Cleveland na kaukaua ena uqeti koya kina na Vosa ni Kalou.

E dau masu vakatolu o Cleveland ena dua na siga, e kerea tiko kina vua na Kalou me vakaraitaka vua na ivalavala dodonu me sokaloutaki koya kina. A vakadeitaka o Cleveland ni cala na ivalavala ni sokalou erau muria tiko na nona itubutubu, ia e sega ga ni lomavakacegu ni oti nona vakadikeva e so tale na lotu. E dina ni sa dau rogoca tu na kedra itukutuku na iVakadinadina i Jiova, ia e lomatarotarotaka ni tiko vei ira na ka dina. E vakadonuya me vulica na iVolatabu kei na iVakadinadina a lakovi koya yani, dina ni se lomalomarua tiko ga. Baleta? E via vakalasui ira na iVakadinadina!

Sega ni dede sa vulica o Cleveland ni sega ni taleitaka na Kalou nona veidauci tiko kei na rua na yalewa. (1 Korinica 6:​9, 10) Ni vuli oti ga vakarua, sa rawa ni doudou me tagutuva nona veilasamaki kei rau na yalewa ruarua. Sa tekivu tiko tale ga ena soqoni vakarisito ena Kingdom Hall. Ia, oqo e dua tale na ka ni bolebole vua.

E dau vakaitavi vakalevu o Cleveland ena timi ni qito soka ena vanua e vakaitikotiko kina, oqo e dau vakaleqa nona lako ina soqoni. Na cava ena cakava? Dina ga nira cikevi koya vakaukaua na lewe ni timi, nona dauniveivakavulici kei ira na nona ilala, e vakatulewataka ga o Cleveland me sa vakacegu mai na timi ni soka. Io, e sa tekivu vakaukauataki koya na Vosa ni Kalou, ni uqeti koya me cakava na ka ena yaga vua!

E vakadinadinataki tale na kaukaua ni Vosa ni Kalou ena gauna a tekivu wasea yani kina o Cleveland vei ira e so tale na veika e kila mai na iVolatabu. (Cakacaka 1:8) Kena itinitini, rau sa tekivu lakova nodra soqoni na iVakadinadina i Jiova e rua nona leweni timi makawa. Ni sa dautukutuku o Cleveland, a marautaka vakalevu na cakacaka vakaitalatala, ni vakayagataka sara ga kina na Vosa ni Kalou me vukei ira tale e so.

Ni uqeti koya tiko ga na kaukaua ni Vosa ni Kalou, a papitaiso o Cleveland me ivakadinadina ni nona sa yalataki koya vei Jiova, a lesi ena itavi lavotaki me cakacaka vakaitalatala vakatabakidua qai dua tale ga na dauveiqaravi vakaitalatala ena ivavakoso.

Mai Jamaica kei na veivanua e vuravura raraba, e vica vata na udolu na tamata era sa mai vulica ni “bula ka kaukauwa” dina na Vosa ni Kalou.

[Mape/iYaloyalo ena tabana e 8]

(Raica tale na ivola)

JAMAICA

[Credit Line]

Map and globe: Mountain High Maps® Copyright © 1997 Digital Wisdom, Inc.