“O Dina, e Ka Talei na Bula!”

O VIA kila se cava na inaki dina ni bula? O Magdalena e yabaki 18 qai dua na iVakadinadina i Jiova, e vakaitikotiko ena korolevu o Szczecin mai Poladi, a vukei Katarzyna me kila na isaunitaro oqo, erau kalasi vata ena dua na koronivuli torocake e kea. E sega ni vakabauta na Kalou o Katarzyna, ia ni talanoataka vua o Magdalena na iVolatabu, e gole kina na yalona.

Sa taleitaka gona o Katarzyna na nona dau vakamacala vakaivolatabu vua o Magdalena, ia e sega ga ni mani ciqoma sara. Ena dua na nodrau veitalanoataka kei Magdalena se e vei era na kune kina na itokani dina, e kaya vaka oqo o Katarzyna: “E tiko na nomu iVolatabu; o kila na ivakavuvuli mo muria, o kila tale ga se e vei mo lai kunei ira kina na itokani dina. Ia, vakacava o ira na sega ni via ciqoma na ivakavuvuli oqori, se ra se bera ni ciqoma?”

Dua na veisau a yaco vei Katarzyna ena nona a gade i Lodoni, mai Igiladi. A lai sikova na valenivolavola ni tabana ni iVakadinadina i Jiova e kea, a tara na nona bula na nona kauaitaki. Na ka lalai sara me vaka na kena dolavi vua na katuba, kei na nodra vakatudaliga vua o ira era talanoa kei koya.

Ni qai tekivu na yabaki vou ni vuli ena Sepiteba 2001, sa vakadeitaka o Katarzyna me sa na vulica wasoma na iVolatabu. Sa tekivu tara cake na nona taleitaka na ivakavuvuli ni iVolatabu, sa tekivu bulataka sara ga e veisiga. Wale tiko ga oqo, a vakaraitaka na lomana vei Magdalena, ena nona kaya: “Vaka sa tekivu vou na noqu bula.” Bau dua tale ga na nona itukutuku lekaleka a katoni ena vodaphone i Magdalena, e kaya kina: “Vinaka vakalevu na nodaru vuli iVolatabu nikua! O dina, e ka talei na bula! Sa qai taucoko ga vakaoti nida sa qai kila se o cei meda vakavinavinakataka ena ka oqo.”