Taro na Dauwiliwili

Na cava e vakaibalebaletaka o Paula ena nona kaya: “E na veigauna kece sara dou na kania kina na madrai oqo ka gunu e na bilo oqo”?

A vosa tiko o Paula me baleta na iVakananumi ni mate i Jisu ena nona vola: “E na veigauna kece sara dou na kania kina na madrai oqo ka gunu e na bilo oqo, dou sa vakaraitaka tiko na mate ni Turaga me yacova nona lesu tale mai.” (1 Korinica 11:​25, 26, VV) E so era nanuma ni “veigauna” e cavuti e ke, e kena ibalebale ni dodonu me vakananumi vakawasoma na mate i Karisito, me caka vakaveitaravi. Oya na vuna era vakananuma kina vakavica vata ena loma ni dua na yabaki. Ia, e vakaibalebaletaka li o Paula me vaka oya na kena caka wasoma?

Sa voleka oqo ni 2,000 na yabaki na balavu ni gauna a tekivutaka kina o Jisu na vakananumi ni nona mate. Ke vakananumi mada ga vakadua ena dua na yabaki, sa rawa ni tukuni ni sa caka e veigauna me tekivu sara mai na 33 S.K. Ia na veitikina e wavolita na 1 Korinica 11:​25, 26, e vakaraitaka ni sega ni ulutaga ni veivosaki i Paula na iwiliwili ni gauna me caka kina, na sala ga me caka kina na iVakananumi. E sega gona ni a vakayagataka o Paula na vosa vakirisi na pol·laʹkis, e kena ibalebale “veigauna” se “wasoma.” Ia, a vakayagataka na vosa ho·saʹkis, e kena ibalebale “ena gauna kece,” se dua tale na kena itukutukuni “na gauna cava ga,” se “ena gauna dou cakava kina.” A kaya tiko o Paula: ‘Ena gauna kece dou cakava kina, dou sa vakaraitaka tiko na mate ni Turaga.’

Me vakacava gona na wasoma ni kena caka na iVakananumi ni mate i Jisu? E dodonu me caka ga vakadua ena dua na yabaki. Ni ivakananumi ga, ena dau caka vakadua ena dua na yabaki me vaka na kena ivakarau ni veika tale e so e dau vakananumi. Kuria oqo, a mate o Jisu ena siga era dau vakananuma kina na Jiu na Lakosivia, e dau caka vakadua ena dua na yabaki. Veiganiti kina na nona vakatokai Jisu o Paula me “Lami ni Lakosivia,” ni nona mate vakaisoro o Jisu a dolava na bula vei ira na Isireli vakayalo. E tauvata vinaka oqo kei na isoro ni imatai ni Lakosivia, era a bula kina na nodra ulumatua na Isireli mai Ijipita qai dolava na sala mera sereki mai na nodra tu vakabobula. (1 Korinica 5:​7, VV; Kalatia 6:​16) Ni veisemati na ivakananumi oqo kei na nodra dau vakananuma na Lakosivia na Jiu, ra dau cakava vakadua ena dua na yabaki, sa qai vakadeitaka ga ni dodonu me caka na iVakananumi ni mate i Jisu me vakadua ga ena dua na yabaki.

O Paula a semata vata tale ga na mate i Jisu kei na dua tale na soqo era dau solevutaka na Jiu me vakadua ena dua na yabaki, oya na Siga ni Veibuluti. Eda wilika ena Iperiu 9:​25, 26: “Sa sega talega ni vakacabori koya vakavuqa [o Jisu], me vaka sa curu na bete levu ki na loqi tabu e na veiyabaki [ena Siga ni Veibuluti], ka kauta na dra ni ka tani; . . . sa qai vakarairaitaki vakadua ko koya e nai vakataotioti ni veigauna sa loku me kauta tani nai valavala ca ni sa vakacabori koya.” Na nona sorovaki koya o Jisu e isosomi ni isoro ni Siga ni Veibuluti a dau caka vakadua ena dua na yabaki, sa macala ni dodonu me caka ga vakadua ena dua na yabaki na iVakananumi ni nona mate. E sega gona ni dua na ivakamacala ena iVolatabu me tokona ni dodonu me caka vakavica vata na iVakananumi ena loma ni dua na yabaki.

Tokona oqo na ka e kaya na daunitukutuku makawa o John Laurence von Mosheim, ni dau nodra ivakarau na lotu Vakarisito mai Esia Lailai ena ikarua ni senitiuri, mera cakava na iVakananumi ni mate i Jisu “ena ikatinikava ni siga ni imatai ni vula vakajiu na [Naisani].” Ena veiyabaki e muri, sa qai tekivutaka kina o lotu ni Veivanua Vakarisito na nona cakava vakavica vata ena loma ni dua na yabaki na iVakananumi ni mate i Jisu.