Digia na Bula Tawamudu

E LEVU vei keda se qai bau donuya e dua na gauna sa levu dina kina na veimataqali ka e tu meda digidigi mai kina. Kena ivakaraitaki, na noda digia na isulu meda dara, na kakana meda kania, vanua ni noda cakacaka se e vei meda lai vakaitikotiko kina. Dua tale na ivakarau e kune ena levu na yasa i vuravura, na galala meda digia na keda isa. Ia na iVolatabu e dulaka e dua na digidigi e uasivia na digidigi kece​—qai dola ina tamata kece ga.

E kaya kina na iVolatabu: “Sa rawa na bula e nai valavala dodonu: . . . [ia] ko koya sa cicimuria na ca, ena mate kina.” (Vosa Vakaibalebale 11:19) Kaya tale ga o Jisu Karisito: “Sai koya oqo na bula tawa mudu, me ra kilai kemuni na Kalou dina duaduaga, kei Jisu Karisito ko koya ko ni a tala mai.”​—Joni 17:3.

Io, e dulaka vei keda na noda Dauveibuli na sala e rawa nida digia ena basika ina bula tawamudu! Na cava meda cakava meda bula tawamudu kina?

Kaya na iVolatabu ni “sala ni valavala dodonu sa rawa [kina] na bula.” (Vosa Vakaibalebale 12:28) E rawa nida maliwai ira na ivalavala dodonu era sa lakova tiko na sala ina bula tawamudu. Ena rawa vakacava? Ke da vakadeitaka ena noda bula nida sa cakava tiko na inaki kei na ivakaro ni Kalou. (Maciu 7:​13, 14) Meda digidigi donu mada ga, meda na rawata na isolisoli ni Kalou na bula tawamudu.​—Roma 6:​23.